Union des sentences de philosophie

BREF ADVERTISSEMENT
à tous Amateurs de vertu.

Il n’y a celuy tant soit il peu versé és sciences des bonnes lettres, qui ne puisse facilement juger combien apporte de profit la reduction des sentences & memorables dicts de ceux qui ont surpassé le vulgaire en bonne doctrine & Philosophie Morale. Pour ceste cause considerant, que la multitude & diversité d’icelles (dispersees dedans un grand nombre & infinité d’Autheurs tant anciens que modernes) est telle qu’il seroit impossible à la plus part de les recueillir pour les mettre en usage & en faire leur profit, il m’a semblé bon & utile de faire un abregé et recueil de celles qui sont les plus singulieres & excellentes, & les ordonner selon l’ordre Alphabetique en forme de lieux communs : pour par ce moyen les delivrer d’une grande peine et travail d’esprit. Maintenant donc faictes en vostre profit, tellement qu’on voye d’oresnavant en voz propos, et en voz oeuvres reluire une gravité & modestie, telle que vous sera recommandee par la commodité de ce present livre à la gloire & honneur de Dieu, & l’edification des prochains. Que si ainsi vous le faictes me donnerez suffisant argument & occasion pour m’emploier à vous dedier ce present livre plus parfait et entier en peu de Jours.

Grace avec vous.