Cy est le Chevalier aus Dames.

De grant leaultez et prudence

Qui pour les garder de tous blasmes

Fait grant prouesse et grant vaillance







L'acteur


  

    Pensif et agravé de doeil

    Longtain de tout confort et joie

    Pleurant larmes de cuer et d'oeil

    Comme ung qui desespoir desvoie

    Nagaires: ainsi me trouvoie

    Sur ung lit: cuidant m'endormir

    Mais le repos dont fain j'avoie

    Failloit qu'il tournast en gemir

    

  

  

    La grant destresse de mon cueur

    Ne se souffroit estre obliee

    Ains il failoit que sa douleur

    Fust par maintz souspirs desliee

    Du lieu: ou elle estoit liee

    Par variance de fortune

    Que rigueur avoit aliee

    Sur moy plus que sur ame aucune

    

  

  

    Le cueur m'estoit en grant traveil

    Et en trespiteux pensement

    Parquoy mes yeulx furent en veil

    Toute la nuit presque ensement

    Qui ne fin ne commencement

    Trouver pouoye en mon mesaise

    Ne reconfort n'avancement

    D'espoir: qui les dolans appaise

    

  

  

    Toutesvoies comme nature

    Par sa fragilité desyre

    Avoir repos et nouriture

    Car a aultre chose ne tire

    Pour oblier mon deul et ire

    Grevé. de maintz divers propos

    Le sommeil me prit sans plus dire

    Dont tantost je fus en repos

    

  

  

    Je m'endormy assez et bien

    Non pas si fort que je vouloie

    Toutesfoys me fist il grant bien

    Ce bien petit que j'en prenoie.

    Lors comme au premier somp estoit

    Par devers moy vint une foys

    Dont forment je m'esbahissoie

    Je vous prometz a celle voys

    

  

  

    Disant ainsi de prime face

    Homs fortune/ resveille toy

    Essue tes ieulx et ta face

    Des larmes/ dont moillié te voy

    Ouvre tes yeulx: regarde moy

    Conforter vueil et esjoyr

    Ton cuer: qui est trop en effroy

    Or mectz diligence a me oyr

    

  

  

    Lieve toy sus: et te desmarche

    Du chetif lit ou tu remains

    Si prens de l'aincre et de la parche

    Cinq ou six fueilles en tes mains

    Aler te fault en lieu ou maints

    Sont indignes pour y aler

    Et lors verras ce qu'aux humains

    Cy aprés te fault reveler

    

  

  

    Il te fault estre secretaire

    D'un tresnoble et treshault secré

    Et si convient que solitaire

    Soyes. pour mieulx servir en gré

    Tu seras mis en tel degré

    Et en tel dignité d'office

    Que par dessus l'erbe du pré

    L'on prisera ton benefice

    

  

  

    Prens ce levrier/ blanc comme noif

    Et monte sus/ il te rendra

    Ou tu n'auras ne fain ne soif

    Ne froit ne chault ne te prendra

    Et au lieu ou il descendra

    Tiens toy illecq. et ne te mue

    En actendant ce que y viendra

    Sans parler nesque beste mue

    

  

  

    Escoute/ et voy/ et te tiens prés

    Ame n'aura qui te mesdie

    Et se tu oyes riens aprés

    Mectz le en escript/ quoy qu'on en die

    Tu y oiras grant melodie

    Et y verras par aventure

    Chose/ pourquoy ta maladie

    Sera mise a desconfiture

    

  


¶ Icy se taist la voix.


  

    A tant me tais et faiz depart

    De toy mon heure est acomplie

    Pense de tirer celle part

    Ou ta journee est establie

    N'actens ne prime ne complie

    Pour y aler. je te commande

    Car fol seras se tu l'oblie

    Quant si grant dame le te mande

    

  


¶ Icy continue l'acteur sa demande/
et devise comment le levrier le porta en
une Isle nommee l'isle de secret. Et
lors vit arriver une dame nommee
Noblesse feminine/ et puis aprés ung
Jeune homme nomme noble cueur
Lesquelz ne s'entrecongnurent point
jusques a grant temps aprés.




¶ L'acteur


  

    Lors ne savoie que devint

    La voix que estoit moult estrange

    Mais le beau levrier a moy vint

    Qui estoit blanc com est ung ange

    Il n'avoit pas jeu en la fange

    Ce sembloit bien a sa blancheur

    N'en rien qui blanche couleur change

    Tant estoit net plain de doulceur

    

  

  

    Mais je ne sçay quant je devine

    Se la chose estoit feerie

    Ou miraculeuse ou divine

    Ou vision de tricherie

    Toutesfoys par sens ou folie

    J'obey au commandement

    De la voix/ qui estoit polie

    De beau parler tresgrandiment

    

  

  

    Je montay sur ledit levrier

    Qui s'en aloit fuyant plus viste

    Que ne fait le vent en fevrier

    Ne l'oyseau qui es boys habite

    Si vous jure et pour vray recite

    Qu'en moins de temps: que six momens.

    Il me porta jusqu'en son giste

    Plusbeau n'a soubz les elemens

    

  

  

    Lors me posa dessoubz ung arbre

    Sur le ruisseau d'une fontaine

    Qui estoit ouvree en ung marbre

    Par main de grant science plaine

    Mes yeulx gectay en celle plaine

    Que par raison bien pouoit estre

    Nommee. et par raison certaine

    La seur au paradis terrestre

    

  

  

    Ainsi que tout esmerveillé

    De la beaulté et des merveilles

    Que je vy lors: tout esveillé

    Presque a nature impareilles

    Je vy venir par unes treilles

    Une si gratieuse ymage

    Que tout le cueur o les entrailles

    Me changea: lui faisant hommage

    

  

  

    Vestue estoit et atournee

    Royalement de point en point

    Et de corps aussi bien tournee

    Que nature en fist oncques point

    Fresche nouvelle et en bon point

    Tresgratieuse en son maintien

    Sy croy tant que la mort me point

    Que nature y mist tout le sien.

    

  

  

    Cuidant que je fusse apparceu

    Treshumblement la saluay

    Mais si tresbien m'en est escheu

    Qu'en vain donné mon salut ay

    Pourquoy toute coleur muay

    Craingnant ma povre petitesse

    Qu'alors bien petit valu ay

    Au regard de sa grant haultesse

    

  

  

    Neantmoins. se vint appoyer

    Des bras sur la fontaine ung poy.

    Et emprés moy s'escontoyer

    Mais elle mot. non fiz je moy

    Alors pensoie en bonne foy

    Que la chose estoit impossible

    Que telle rudesse eust en soy

    Se je n'eusse esté invisible.

    

  

  

    Et defait par experience

    Invisible je me sentoie

    Mais par ma povre conscience

    Je ne sceu point se je l'estoie

    A l'eure que je y arrivoie

    Mais je prins bien la congnoissance

    Que telle vertu recevoie

    Par fait de divine puissance

    

  

  

    Lors par devers soleil levant

    Je vy venir ung jouvencel

    Tresbien en point: et se me vant

    Que pieça n'en vy point de tel

    Il estoit gratieux et bel

    Et gent/ autant qu'on pourroit dire

    Riens n'y steuz. forz qu'il fut mortel

    Sur luy ne trouvay que redire

    

  

  

    Il estoit descendu a pié

    Et son cheval a mon advis

    Avoit a ung arbre atachié

    Qui estoit bel en tout devis

    Et luy qui sembloit assouvis

    De toute grant vertu mondaine

    Print son chemin ce me fut vis

    Pour s'en venir vers la fontaine.

    

  

  

    Quant il fut prés comme a dix pas

    De lieu ou s'appuyoit la dame

    Et qu'encor il ne pensoit pas

    Qu'il y deust trouver aucun ame

    Souldainement vy une flame

    Qui le faisoit rougir forment

    Comme ung qui avoit peur de blasme

    Ou de mesprendre aulcunement

    

  

  

    Il la vit bien: et elle lui

    Pouoir n'avoit de soy retraire

    Parquoy il failloit a celuy

    S'avancer: et vers elle traire

    Combien qu'assez lui fut contraire

    Pour honte/ que son cueur craignoit

    Mais il vit bien qu'il failloit faire

    Ce que noblesse contraignoit

    

  

  

    Il s'approuchoit en beau maintien

    Vers elle celuy que je nomme

    Mais dieu scet comme il marchoit bien

    En prince et en grant gentil homme

    Comme d'un empereur de romme

    Sy estoit noble tout son fet

    Et ne lui coustoit une pomme

    Quant qu'il voulsist mectre en effect

    

  

  

    Jusques a terre il s'enclina

    En luy donnant saluz plusieurs

    Comme ung qui le cueur enclin a

    A toutes vertus et honneurs

    Et elle plaine de doulceurs

    Le print es bras/ et le baisoit

    Sans changier contenance ou meurs

    Ne riens dont blasmer se faisoit

    

  


¶ Icy bien veignist Noblesse feminine
noble cueur et entreparlent maintes
gratieuses parolles ensemble.
sans s'entrecognoistre.

Noblesse feminine.





  

    Disant beau filz dieu vous dont joie

    Levez vous. je vous prie beau sire

    Que dieu vous dont brief et envoie

    Quant que vostre doulx cueur desire

    Mais je vous pry. vueilliez moy dire

    Sans que faintise vos varie

    Quel besoing pardeça vous tire

    Car j'en suis forment esbahie

    

  


Noble cueur


  

    Helas tresexcellente dame

    Pardonnez moy se j'ay mal fait

    Car je vous jure par mon ame

    Que je ne pense a nul meffait

    Fortune icy/ venir me fait

    Que long temps m'a esté cruelle

    Et s'en ce point vous ay tort fait

    Certes la coulpe en est en elle

    

  


Noblesse feminine


  

    Il n'y a pas grant mesprison

    Ne vous en donnez ja soucy

    Mais certes je n'ay pas foison

    Trouvé. que homme venist icy

    Le lieu est sy tresdigne aussy

    Que homme n'y doit venir jamais

    Si ce n'est ung/ que j'ay choisy

    Et si ne me vit oncques mais

    

  


Noble cueur


  

    Helas. je suis ung povre errant

    Que fortune de sa denture

    Trop mort/ en ce que voy querrant

    Honneur. los. et bonne aventure

    Ainsi se je vous faiz injure

    Quant fortune mon fait dispose

    Certes ma dame je vous jure

    Je ne suis pas que le propose

    

  


Noblesse feminine


  

    Aux gentilz hommes estrangiers

    Qui par honneur du pays issent

    Viennent fortunes et dangiers

    Maintesfoys plus qu'ilz ne voulsissent

    Parquoy forment ilz s'esbaissent

    Et s'en tiennent a mal contens

    Mais trop seroit se ilz mesprissent

    De si legier comme autres gens

    

  


Noble cueur


  

    Je ne tien point cecy fortune

    Ains m'est tresjoyeuse aventure

    D'avoir trouvé des belles. l'une

    Qu'oncques formast dieu ou nature

    Sy vous pry. noble creature

    Vueilliez mon fait en bien tourner

    Et quant vous plaist que plus ne dure

    Voulentiers m'en vueil retourner

    

  


Noblesse feminine


  

    Tant est gratieux vostre affaire

    Et tant semblez de hault parage

    Qu'il vous convient tout honneur faire

    Et recueillir de bon couraige

    Je vous pardonne tout oultraige

    Ne craignez estre mal traictié

    Car vous n'aurez que beau langage

    Amour doulceur et amistié

    

  


Noble cueur


  

    Tel honneur n'est point deu a moy

    Ne je n'en suis point de valeur

    Quant a moy. je ne vaulx q'un poy

    Mais vous acquictez vostre honneur

    L'onneur remaint plus au donneur

    A cil. qui honneur fait et donne

    De la noblesse de son cueur

    Qu'a celuy pour qui on l'ordonne

    

  


Noblesse feminine


  

    Vostre humble cueur et doulx maintien

    Vostre belle et plaisant parolle

    Monstrent tresclerement et bien

    Qu'avez esté a bonne escole

    De vostre bouche ung mot ne vole

    Qui ne soit bien a point assiz

    Parquoy vous pouez sans frivole

    Percer ung cueur d'acier massis.

    

  


Noble cueur


  

    Ha dame. vous me destruisez

    Et me voulez confondre a honte

    De telz langaigez vous taisez

    Et si les mettez hors de compte

    Tel oultrageux loz trop meffronte

    Saillant de bouche sy haultaine

    Car se j'estoie ou duc ou conte

    Je le vouldroie encor a peine

    

  


Noblesse feminine


  

    Ma langue ne se pourroit taire

    Sans louer vostre gentilesse

    Car dieu par grace salutaire

    Vous a donné biens a largesse

    Espoir aussi/ qu'avez maistresse

    Que vous parfait avec nature

    Et que donneur et de noblesse

    Prendre vous fait la nourriture

    

  


Noble cueur.


  

    Quant est de maistresse ou de dame

    Dont mon cueur s'esjoysse ou dueille

    Je n'en sçay nulle par mon ame

    Ne n'en ay point: que bien me vueille

    Non pas que leur amour desvueille

    Ains m'en tiendroie a bien eureux

    Mais homme de sy basse fueille

    N'est pas taillié d'estre amoureux

    

  


Noblesse feminine


  

    Certes sire. c'est tresmal dit

    Et est chose bien forte a croire

    Mais pourtant il n'est point maldit

    Qui d'amours vous vouldroit mescroire

    Ostez ce point hors de memoire

    Et vous rendez au droit du pas

    Car d'amours ont et grace et gloire

    Pluseurs. qui ne vous vallent pas.

    

  


Noble cueur


  

    Dames peuent leurs cueurs donner

    Ou il leur plaist de leur franchise

    Et en elles est. d'ordonner

    Leurs servans a leur propre guise

    Or peut bien estre/ quant je y vise

    Que mon corps. et le croy ainsi

    N'est pas propice a leur devise.

    Et ainsi ne suis pas choisi

    

  


Noblesse feminine


  

    Pour sens et encor moins de bien

    Me semble/ vous tenez en nous

    Mais les dames sachiez le bien

    N'ont pas leurs cueurs en leurs genouls

    Se vous estez si fiers de vous

    Que damez ne daignez acquerre

    Soyez certains. vous. et trestous

    Qu'on ne vous viendra pas requerre

    

  


Noble cueur


  

    Quant en ce cas. je n'ay fierté

    Orgueil ne despit qui me lie

    Je vous en dis la verité

    Car se seroit a moy folie

    Ostez en la melencolie

    Et ne me chargez trop a tort

    Car mon cueur en tant s'umilie

    Vers elles. qu'il ne peut plus fort

    

  


Noblesse feminine


  

    Je ne sçay doncq pourquoy vous dites

    Qu'en amours voustre cueur ne sougne

    Parquoy je croy que vous mesdictes

    Car voustre affaire le tesmoigne

    Vous cuidez tirer a la longe

    Mais c'est ung proverbe ancien

    Et l'ose dire sans mensonge

    Tel gerbe n'est pas sans lien

    

  


Noble cuer


  

    Je ne sçay quel semblant je porte

    Ne a qui mon maintien ressemble

    A vous de ce je me rapporte

    D'en dire ce que bon vous semble

    Maint homme est autre qu'il ne semble

    Et maint semble/ ce qu'il n'est pas

    Car tousjours ne vont pas ensemble

    Semblance/ et cueur tout en ung paz

    

  


Noblesse feminine


  

    Cest argument cy n'est qu'escume

    Legier comme fueille en forest

    L'on congnoist tousjours a la plume

    L'oyseau. de quel affaire il est

    Mais puis qu'ansi couvrir vous plest

    Aille comme il en peut aler

    Et dieu vous doint joyeux acquest

    Et bien amer et bien celer

    

  


Noble cueur


  

    Las. et que vous pourray je dire

    Je ne me sçay dequoy vanter

    Fors que mon cueur tresbien desire

    Dames servir et les hanter

    Lors s'il eschiet/ et puis chanter

    Dancer et deviser o elles

    Et m'est certes leur frequenter

    Chief de mes joyes temporelles

    

  


Noblesse feminine


  

    Ha dea: se vous prenez plaisir

    A les servir. pour leurs doulceurs

    Donc ne peut que n'ayez desir

    D'une. de toutes. ou pluseurs

    Ou que ne faites voz clameurs

    Aucunesfoys en plusieurs lieux

    Et grans et singuliers honneurs

    A une. qui vous plaist le mieulx

    

  


Noble cueur


  

    Je n'ay pas le cueur si d'acier

    Contre le cours de tous humains

    Qu'amour ne puist en moy fichier

    Son trait/ si bien qu'en autres mains

    Mais l'ome est fol. me semble au mains

    Qui par desir mect a malaise

    Son cueur. et si ne tient les trains

    Pour tout: sans chaloir ou il voise

    

  


Noblesse feminine


  

    Qui par desir d'amer emprent

    Ainsi que beaucop ont d'usance

    Signe est. que folle amour l'eprent

    Et qu'il ne tend qu'a sa plaisance

    Mais/ qui pour honneur et vaillance:

    Donne son cueur en lieu haultain

    Et lors depart sa bien vueillance

    Tel cueur n'est pas donné en vain

    

  


Noble cueur


  

    Las/ j'ay la pluspart de ma vie

    Esté auz dames vray servant

    Mais encor n'ay pas deservie

    La grace d'une. en les servant

    Non obstant/ qu'en soye observant

    J'espoir il m'en viendra quelq'une

    Que je servirey loyaulment

    De fait/ pour toute la commune

    

  


Noblesse feminine


  

    Ayez de ce ferme esperance

    Vouz l'aurez. ains que trespassez

    Se vous faites perseverance

    Voustre desir aurez assez

    En honneur. tousjours pourchassez

    Leur graice et gardés de fallir

    Leurs biens aussy point n'amassez

    Et vous aurez voustre desir

    

  


Noble cueur


  

    Se je pouoie mectre a euvre

    Et que dieu me donnast puissance

    De descouvrir ce que je couvre

    Dedans ma riche bien vueillance

    J'esperoie par vaillance

    Gaignier en traveil de jeunesse

    Aucune grace. en recueillance

    Pour le repos de ma vieillesse

    

  


Noblesse feminine.


  

    Le hault vouloir que vouz avez

    Ne peult qu'il ne vous tourne en bien

    Estre leal certe debvés

    Et secret je vous le dis bien

    Ce sont les poins et le moyen

    Parquoy parvenir on y peult

    Que aultrement fait il ne fait rien.

    Dont a la fin son cueur s'en deult

    

  


Noble cueur.


  

    J'ay tout mon temps usé en vain

    Se fortune en moy ne s'acquicte

    Et du jourd'uy au lendemain

    Desir me croist. et moins prouffite

    Ma joie est toute desconfite

    Toute esperance m'est privee

    Et ma pensee en pleur confite

    Jusqu'a tant que l'aie trouvee

    

  


Noblesse feminine


  

    Helas mon tresdoulx escuier

    Dequoy vous plaingnez vous ainsi

    Comme le feu art ou foyer

    Mon cueur art. pour savoir cecy

    Je vous pry par droicte mercy

    Ayez fiance en mon aide

    Et me dites vostre soucy

    Peut estre que je y sçay remede

    

  


Noble cueur.


  

    Pleust a dieu/ que je deusse vivre

    Mains. et plustost finer mes jours

    Et que vous me feissiez delivre

    De mes couvers souspirs et plours

    Je ne sçay ou prendre sejours

    Tant est secret ce qu'a dire ay

    Non obstant pour avoir secours

    S'il vous plaist. je le vous diray

    

  


¶ Icy fait noble cueur ung Conte a
noblesse feminine Comment luy estant
en l'aage de douze ans. vint devers lui
dame Nature: et lui donnoit plusieurs
enseignemens de bonnes meurs: et beacoup
d'autres choses/ lui remonstrant:
dont de mot a mot Come nature lui
disoit/ il le reconte a noblesse feminine

Noble cueur


  

    Dame. jadis en mon enfance

    Quant environ douze ans avoye

    Et que le fruit de congnoissance

    Premier a gouster commençoie

    Ung jour d'esté. seul me trouvoie

    Assis en lieu assez sauvage

    Et pensif assez devenoie

    Contre le droit cours de mon aage

    

  

  

    Lors par maniere de soucy

    Jeunesse son cueur oblioit

    En pensant en ce monde cy

    Qui tous les cueurs humains lioit

    Aux ungs/ il flatoit et rioit

    Leur baillant honneurs et richesses

    Aux autres/ tout amour nyoit

    Et leur failloit de ses promesses

    

  

  

    Ainsi pour le temps avenir

    Penser commençoie a ma vie

    Pour bon et sage devenir

    Car d'honneur me print grant envie

    Lors en ycelle fantasie

    Une dame me vint surprendre

    Que de sa large courtoisie

    Disoit a ma jeunesse tendre

    

  

  

    Mon bel enfant et gratieux

    Dieu soit o vous. et vous doint joie

    Trop semblez melencolieux

    Dont forment me poise et ennoie

    Et pource que je vous veoie

    Aucun grant faiz au cueur porter

    Mon chemin vers vous adressoie

    Par vouloir de vous conforter

    

  

  

    Je sçay assez vostre pensee

    Et la cause que vous adjourne

    Et pourquoy elle est commencee

    Et de puis quant elle y sejourne

    Pourtant se voustre cueur se tourne

    A ce que je vous vueil instruire

    Pluscler que le jour qui adjourne

    Je vous feray le cueur reluire

    

  

  

    Ma voix ne vous soit point amere

    Sachiez. je suis dame Nature

    Que vous formay en voustre mere

    Tantost aprés la geniture

    De moy avez forme et figure

    Et complexion corporelle

    Et de dieu la noble ame et pure

    O sa vertu spirituelle.

    

  

  

    En ce mesme point et moment

    Que dieu eust une ame transmise

    En vostre corps qui proprement

    Estoit formé tout a la guise

    Dieu vous soubmist a la franchise

    De ma grant puissance ancienne

    Pour avoir par sur vous maistrise

    En toute ma vertu terrienne

    

  

  

    Or vous voy je tout assourdy.

    Tout esbahy en vostre affaire

    Et comme ung enfant estourdy

    Vous ne savez quel part vous traire

    Pourtant m'en viens vers vous retraire

    Pour vostre noble ame informer

    Et par desir de plus parfaire

    Le corps/ que j'ay voulu former

    

  

  

    Sy vous dy mon tresbel enfant

    Tout vostre preux et vostre bien

    Gisent et se croisseront en tant

    Que mectrez peine a vivre bien

    Quant est du corps/ c'est moins que rien

    Se l'ame n'y est vertueuse

    Laquelle fait sembler d'un fien

    Que ce soit pierre precieuse

    

  

  

    Je sens voustre jeunesse encline

    Entierement a grans honneurs

    Et tresidoyne a discipline

    A vertus/ et a bonnes meurs

    Mais eschiet par foys a pluseurs

    Que par aucun meschant venin

    Ou par deffaulte d'instructeurs

    Ung bon cueur: prent mauvais chemin

    

  

  

    J'ay singulier amour vers vous

    Et ame voustre avancement

    Et vous vueil par langaige doulx

    Donner nouveau gouvernement

    Et se honneur et avancement

    Voulez et renommee bonne

    Mectez doncq voustre entendemment

    Au regime que je vous donne

    

  

  

    Premierement il vous souviengne

    De bien servir dieu a journee

    De qui il fault que le bien viengne

    A toute creature nee

    Voustre ame soit a luy donnee

    En voustre fleurissant jeunesse

    Et elle sera guerdonnee

    De son service avant viellesse

    

  

  

    Quelque honneur ou pouoir haultain:

    Que voustre cueur sy vous propose

    Certez vous traveillez en vain

    Se la grace dieu n'y dispose

    Qui sa fiance en dieu repose

    Et mect son cueur sur son autel

    Jamais fortune ne s'oppose

    A la prosperité d'ung tel

    

  

  

    Dieu vous a fait par congnoissance

    Discerner du bien et du mal

    Sy pouez par voustre puissance

    Monter hault ou descendre aval

    Car par le contrepois egal

    De raison et de franc arbitre

    Le corps et l'ame en general

    Prendront en fin louyer et tiltre

    

  

  

    Hantés suyvés les debonnaires

    Les doulx les humbles et les saiges

    Les gracieulx en leurs affaires

    Les attrempés en leurs langaiges

    Mirez voz yeulx en leurs visaiges

    Et vous soit leur viz ung miroir

    Et ung adressement d'ouvraiges

    Pour vous faire plus apparoir

    

  

  

    Soyez honeste de la bouche

    Courtois net en cueur et sçavant

    Sans dire injure ne reprouche

    Sur homme nul mort/ ou vivant

    Verité soyez observant

    Et fuyez langue mensongiere

    Car ung homme mis en avant

    Par elle/ se recule arriere

    

  

  

    Honnorez toute gentilesse

    Et s'aucune ame vous honneure

    Gardez que voustre corps ne lesse

    Qu'il ne luy soit rendu a l'heure

    Se mon conseil en vous demeure

    Et vous le voulés du tout croire

    Voustre corps aura ains qu'il meure

    D'honneur et de joye la gloire

    

  

  

    Mais le point par qui vous pourés

    Plus avoir graice temporelle

    Sy est que vous honnourerez

    Toutes dames et demoiselles

    Car tant qu'aurés le cueur a elles

    Vous n'aurés cueur a vilenie

    Sy ne prandrés point de querelles

    Dont peult noblesse estre honnie

    

  

  

    Leur service vous mectra sus

    Et vous donra refection

    Qui est pour mondaines vertus

    Souveraine perfection

    Leur amour fait correction

    Du tout ou maluaistié le cueuvre

    Et donne ardante affection

    A tout noble et vertueux euvre

    

  

  

    Si que pour vous faire vouloir

    D'elles. vous voz ferez acointe

    Et mectrez tous voustre valoir

    A estre net ioly et cointe

    Et s'aventure ainsi appoincte

    Que vous y trouvez bel acueil

    Legier cueur point ne vous despoincte

    Mais couvrez le deduit de l'ueil

    

  

  

    A nulle rien tant n'entendez

    Qu'a lez servir sans variance

    Et du louyer vous actendez

    Seurement: a leur ordonnance

    Mais se leur doulce bien vueillance

    Se tarde a estre descouverte:

    Par menteurs est/ car par constance

    Il convient qu'elle soit ouverte

    

  

  

    Toutes les amerez pour une

    Et leur honneur exaulcerez

    Se vous pouez jusqu'a la lune

    Ou jusqu'aux cieulx les haulserez

    Jamais ne vous avancerez

    Pour choisir une seule dame

    Mais toutes vous les choiserez

    Sans penser a mal ny a blasme

    

  

  

    Desir vous fera dur assault

    Et aussy grant empeschement

    Mais obeyr point. il ne fault

    Tousjours a son commandement

    Celuy qui bon conseil n'entent

    Et laisse ung grant bien pour ung maindre

    A la fin souvient se repent

    Et n'est pas saige de se plaindre

    

  

  

    Mais pour vous donner esperance

    Confort courage et bon vouloir

    Droit cy je vous faiz asseurance

    D'un riche don vous pourveoir

    Mais vous ne le pourrez avoir

    Dedanz dix ans. pour nul party

    Mais unefoys vous direz voir

    Que je vous auray bien party

    

  

  

    Je vous mectz en service d'une

    Qui est tresnoble demoiselle

    Et n'y a point dessoub la lune

    Nulle qui soit plus doulce qu'elle

    Elle est tresgracieuse et belle

    Et de plusieurs bien desiree

    Au monde n'y a point de telle

    Tant est de beaulté a tournee

    

  

  

    Ung temps vient/ qu'elle aura besoing

    D'ayde et de bon reconfort

    Et que son cueur sera en soing

    Et en trespiteux desconfort

    Pluseurs travailleront tresfort

    Pour la blecer ou desconfire

    Et la vouldront blasmer a tort

    Dont la cause est piteuse a dire

    

  

  

    Mestier aura de force et d'armes

    Et avec ce d'un treshault sens

    Et seront maintes nobles armes

    Pour elle en dueil. comme je sens

    Dont ennuys/ et douleurs cinq cens

    Au cueur long temps vous porterés

    Mais s'il vous plaist/ je my assens

    Vous seul la reconforterez

    

  

  

    Pourtant je vous requier et charge

    Mectez vous en obedience

    Et soubz la cremeur de la verge

    Durant le temps d'adolescence

    Vous avez bien la cognoissance

    Des plaisirs que poez avoir

    Car vous meurs et bonne prudence

    En la fin vous poulront valoir

    

  

  

    Et quant expert vous vous sentez

    De rethoricque ou de gramaire

    Si convient il que vous hantez

    Les armes. pour plus vous parfaire

    Car voustre main/ aura a faire

    Maint cop horrible en la bataille

    A tel. qui vouldra semblant faire

    Que telz d'eux comme vous. il vaille

    

  

  

    Comme a vingt ans. non point plustost

    Vueul que hors du pays saillez

    Et ne direz a ame mot

    Ou ne pourquoy/ que vous alez

    Cheminez/ traversez/ bragués

    En visitant pluseurs royaumes

    Et comme estrangier ne faillez

    De la vous presenter aux dames

    

  

  

    Il vous fault pluseurs regions

    Traverser/ point ne le vous celle

    Et des dames dix legions

    Congnoistre. avant que trouver celle:

    Plus vivrez. tant plus l'estincelle

    Se croistra tousjours en ardure

    Et aurez pour la jouvencelle

    Mainte ennuyeuse nuit et dure

    

  

  

    Se vous mectez entendement:

    Voustre doulx cueur pour acomplir

    Mes ditz/ et mon commandement

    Et selon se vous contenir

    Je vous feray tost parvenir

    En la gloire ou tout bien abonde

    Et l'amour de dieu obtenir

    Et la grace de tout le monde

    

  

  

    Lors me disoit cent foys a dieu

    Et me prioit honneur et joye

    Disant/ qu'en ung estrange lieu

    Encor autresfoys la verroie

    Quant celle dame trouveroie

    Que j'ame et craing sur toute rien

    Disant/ que tout asseuré soie

    Qu'en la fin m'en doit prendre bien

    

  

  

    Et puis qu'il fault que tout vouz die

    Ma foy si est bien acquictee

    Sans jamais estre refroidie

    En chose qui est recitee

    Quoy que gaires n'a prouffitee

    La peine encores que j'ay prise

    Et si a ja mainte nuitee

    Que je travaille en ceste emprise

    

  

  

    Pourtant noble fleur de jouvent

    Riche de sens et de beauté

    Pensez se je doy bien souvent

    Souspirer telle feaulté

    Qui ay ja mainte royaulté

    Perquise. et rompement de teste

    Et estes seule en loyaulté

    A qui j'en feisse oncques enqueste

    

  

  

    Je ne sçay plus riens qu'entreprendre

    Pour temps et pour pays passer

    Et si n'ay vouloir de me rendre:

    J'ame mieulx vaillant trespasser

    C'est grant ennuy que de chasser

    En boys vuyt s'il ne plait a dieu

    Et graice en avoir pourchasser

    Sans savoir ou. ne en quel lieu

    

  

  

    Je vous ay cy mon cas ouvert

    Tout en nombre de bonne foy

    Et me suis aussy descouvert

    Trop plus peut estre que je ne doy

    Je vous requier conseillez moy

    Se bon confort s'y peut trouver

    Car sy honorable vous voy

    Que je my peul bien asseurer

    

  


¶ Icy noblesse feminine le reconforte
par plusieurs bonnes raisons

Noblesse feminine





  

    Certes mon tresdoulx escuier

    La requeste est si honnorable

    Que mon cueur vous veult octroyer

    Tout ce qu'en honneur est faisable

    Si ne doubtez que ja nuisable

    Vous en soit la descouverture

    Mais tresjoyeuse et profitable

    Louez en dieu et l'aventure

    

  

  

    Nature certes vous a fait

    Honneur tressingulier et grant

    Et aujourduy n'a si parfait

    A qui elle en ait fait autant

    Acheter il vous fault pourtant

    L'onneur treshault qui n'est paz chiche

    Et estre douleur supportant

    En tant que le don est plus riche

    

  

  

    Ung peu de mal ne peut pas nuire

    A cueur de haulte voulenté

    Ne legierement le destruire

    Quant il est bien entalenté

    Ung petit arbresseau enté

    Resiste bien a ung fort vent

    Et quant il a plut ou venté

    Le beau temps vient aprés souvent.

    

  

  

    Ung grant bien ne peut estre acquis:

    Se pene ne si entretreuve

    Ne tousjours tout ce qui est quis

    A voulenté. point ne se treuve.

    Ung bon cueur en querant s'espreuve

    Et loz et grace lui acquiert

    Et monstre de fait et appreuve

    Qu'il a amour a ce qu'il quiert

    

  

  

    Les chevaliers aventureux

    Qui jadis tant prouesse amerent

    Et par leurs cueurs chevalereux

    En dure mainte queste entrerent

    Dont les ungs les paracheverent

    En pene et douleur continue

    Les autres d'errer ne cesserent

    Jusques la mort leur est venue

    

  

  

    Se leur cueur eust esté flexible

    Et pene leur eust peu grever

    Il leur eust esté impossible

    De telz haulx faiz parachever

    Leur bonté fait bonne trouver

    En mainte glorieuse histoire

    Que tant ne lez peut eslever

    Qu'ilz ne vaillent troup plus encoire.

    

  

  

    Alexandre l'avantureux

    Qui a tous autres roys differe

    Comme d'honneur plus couvoiteux

    Qui oncques si nasquist de mere

    Il n'acquist pas sans pene amere

    La haulte gloire de ce monde

    Ne sans douleur ne sans misere

    Les ylles de la mer parfonde

    

  

  

    Riens n'est trop fort a qui a cueur

    Riens trop hault a qui a vaillance

    Riens impossible/ a qui n'a peur

    Riens trop dur/ a qui a constance

    Riens chier/ a qui a bien vueillance

    Riens trop long/ a qui ne varie

    Riens trop tart/ a qui a fiance

    Riens que cueur d'homme ne maistrie

    

  

  

    Et puis qu'il a pleu a nature

    Vous envoyer ainsi dehors

    En une si noble aventure

    Pour le prouffit de voustre corps

    Vous ne devez pour nulz effors

    Vous laisser cheoir en lascheté

    Veu q'un bien qui vient de lors

    Ne peut trop chier estre acheté

    

  

  

    Vivre devez joyeusement

    Et vaincre toute frenaisie

    Et avoir tousjours pensement

    A voustre belle et doulce amie

    Que d'une seule courtoisie

    Peut adoulcir tous voz travaulx

    Quant l'eure sera acomplie

    Que finer se devront voz maulx

    

  

  

    Mais je vous pry beau gentil homme

    Dites moy s'il vous plaist icy

    De bon cueur/ comment on la nomme:

    Celle qui vous querez ainsi

    Et quel est voustre nom aussy

    Forment a savoir le desire

    Car vous devés savoir cecy

    Selon la plaie. il fault le mire

    

  


Noble cueur


  

    Certes ma gratieuse dame

    Il n'est riens que je ne vous deisse

    Et pour y mectre corps et ame

    Que tresvolentiers je ne feisse

    Et pleust a dieu/ que je vaulsisse

    Que pour vous faire aucun plaisir

    Ou qu'il en fust com je voulsisse

    Lors verriez vous mon bon desir

    

  

  

    Mon cueur s'esmeut du tout et change

    Ne sçay quel merveille m'approuche

    Dieu me dont ung joyeux eschange

    Et de trouver nouvelle doulche

    Je croy q'un tresnoble air le touche

    Ou il sent quelque plaisir doulx

    Car semblant fait que des la bouche

    Malgré moy. veult saillir vers vous.

    

  

  

    Si vous dy ma tresbelle et fine

    Que celle pour qui tant j'endure

    Se dit Noblesse feminine

    Ainsi la me nommoit nature

    Franche joyeuse necte et pure

    Plus que saphir ne dyamant

    Asur ne pourpre ne verdure

    Le paradis d'un vray amant

    

  

  

    Mon nom ne vous vueil refuser

    Puis qu'a savoir sont voz desduitz

    Aussi ne m'en puis je excuser

    Car verité celer ne puis

    A elle souvent je me affuys

    Mensonge engendre deshonneur

    Mais certes trop indigne en suis

    Car l'on m'appelle. Noble cueur

    

  


Noblesse feminine


  

    Ha noble cueur/ digne tresor

    Riche joyaux et precieux

    Plus chier qu'argent pieres et or

    Parement tresmelodieux

    Ha mon doulx amy gratieux

    Fermail de toutes nobles meurs

    Tant est mon cueur de vous joyeux

    Qu'a pene apresent je ne meurs

    

  

  

    Ha vaillant Champion et ferme

    Ha fier et courageux enfant

    Ha que m'avez fait plus enferme

    D'amours/ que nul qui soit vivant:

    Ha vive clarté eslevant

    Ha dignité tresrenommee

    Sur qui mon ame. dieu devant

    Se repose. et y est fondee

    

  

  

    Bien viengnant cinq cens mille foys

    Benoiste soit voustre arrivee

    Bien viengnant mon plaisir mon choyz

    Bien viengnant ma joie privee

    Bien viengnant mon tout ma pensee

    Seul sans per ne comparison

    Par qui joye m'est recouvree

    J'espoir et toute garison

    

  

  

    Helas. j'ay de si longtemps a

    Desiré. de veoir ce jours

    Qu'ailleurs mon cueur oncq ne pensa

    Fors en vous/ ou il fist sejours

    Or suis je joyeuse a tousjours

    Quant j'ay noble cueur en saisine

    Et vous. voustre treschiere amours

    Dame Noblesse feminine

    

  

  

    O ma tresexcellente joye

    O mon bon et sauverain cueur

    O soleil qui mes yeulx convoie

    O clarté de mon plaisir pur

    O mon doul confort ferme et sur

    O le plushault salut que j'ame

    O de mon vray espoir le mur

    Aprés dieu et la vierge dame

    

  

  

    O ma treshabundant richesse

    O tressouefve nourriture

    O le seul bien de ma jeunesse

    O mon rabat de toute ordure

    O la santé de ma nature

    O mon vertueux fruit de l'ame

    O ma felicité trespure

    Apres dieu et la vierge dame

    

  

  

    O le mirouer de ma plaisance

    O ma vierge et chastiement

    O ma cremeur ma redoubtance

    O d'honneur mon adressement

    O mon mondain avancement

    O mon eslonguement de blasme

    O cause de mon sauvement

    Aprés dieu et la vierge dame

    

  

  

    Mon cueur est tout de joie espris

    D'avoir trouvé ce qu'il desire

    Et en est si acop surpris

    Que ma langue ne scet que dire

    Mes yeulx qui ont cause de rire

    Sur voustre face belle et blonde:

    Fondent leurs larmes d'une tire

    Par joie qui au cueur habonde

    

  

  

    J'ay bon vouloir. mais je ne puis

    J'ay sens. mais il m'est privé tout

    J'ay trop plus que ne me soit duis

    J'ay tant que je n'en sçay le bout:

    Je suis perdu par avoir moult

    Plus riche suis que je ne deusse

    Il vouldroie n'avoir q'un soult

    Et qu'assez saluer vous peusse

    

  

  

    Tant m'avez aveuglé les yeulx

    Et tant suis abesty de joie

    Que pouoir n'ay ainsi m'aist dieue

    De parler comme je vouldroie

    Mais se mon cueur ouvrir pouoie

    Avant q'un mot passast mes dens

    Par dieu je le vous ouvriroie

    Si verriez ce qui est dedens

    

  

  

    J'ay quis long temps ce que j'amoie

    La mercy dieu. Or l'ay trouvé

    Et au lieu que je reclamoie

    Euresement suis arrivé

    Fortune acop ma eslevé

    Plus que n'avoie en lui fiance

    Et m'a tout au plushault levé

    De sa roue et de sa puissance

    

  

  

    Cueur corps et ame je vous donne

    Et a trois motz je vous deslie

    Ce que large desir ordonne

    Qu'en grant langage je vous die

    Tuez mon corps gastez ma vie

    Noble cueur cela veulz je bien

    Point ne suis voustre a la moitié

    Mais plus que tout/ et a moy rien

    

  

  

    Long temps a que premier congnoiz

    Et vous et voustre bon vouloir

    Mais je vous prie a ceste foys

    Que plus ne vous vueilliez douloir

    Servy m'avez sans desvouloir

    Et voustre corps mis a bandon

    Mais se jamais tant puis valoir

    Vous en receverez guerdon

    

  

  

    De me monstrer doy estre chiere

    Et de descouvrir dangereuse

    Sy n'ose faire bonne chiere

    Toutes les foys que suis joyeuse

    Il advient bien d'estre amoureuse

    Ou l'ueil n'ose semblant monstrer

    Et estre d'amours covoiteuse

    Sans en tous temps le demonstrer.

    

  

  

    Tant de foys vous ay veu aler

    Entre dames et damoiselles

    Chanter/ dancer/ jouer/ parler

    Esbatre et deviser o elles

    Pour avoir los et bruit d'icelles

    Dont maintes vous voloyent grant bien

    Mais par leurs contenances belles

    Oncques n'en apparceustes rien

    

  

  

    Helas je leur fis la defence

    De trop s'apprivoiser de vous

    Car peu de gens a qui ne pense

    Mal ou n'y a point entre nous

    Les gens sont au jourd'uy trestous

    Si faulx. que bon se fait garder

    Mauldis soyent tous envieulx

    Parqui nous fault tant endurer

    

  

  

    Mais pource que tout voustre affaire

    Est auz dames moult aggreable

    Et que semblant n'ont osé faire

    Tel comme il vous estoit feable

    D'un conseil meur et delectable

    Toutes ensemble m'ont transmise

    Vers voustre personne honnorable

    Et pour vous festoyer commise

    

  

  

    Je vous tiens a sage et discret

    Et pource me suis je soubstraicte

    Icy en l'isle de secret

    Qui est propice a ma retraicte

    Et tant comme il vous plaist et haicte

    Serez o my. malgré dangier

    En joye et en amour parfaicte

    Sans que ame nous puist chalangier

    

  

  

    Paissez le cueur. saoulez vous yeulx

    Arousez voustre sang qui ard

    Emplissez vous de lieux en lieux

    De la doulceur de mon regard

    Prenez en tant. et telle part

    En bien tant que vouldrez tousdis

    Et s'un plaisir vous fault en part

    Pour ung. si en reprenez dix

    

  

  

    Tout mon tresor vous est ouvert

    Prenez en la fleur et le choys

    Et vous esbatez cy au vert

    O my pour chescune heure ung moys

    Honnorer et cherir vous doys

    Car ma grace avez deservie

    En ce que tant et longue foys

    M'avez honnoree et servie

    

  

  

    Povre amoureux au cueur tramblant

    En qui est leaulté tresseure

    Oncques ne vous osay semblant

    Monstrer d'amours. fors a ceste heure

    Or veult raison. que je sequeure

    A voustre honneste et noble emprise

    Parquoy force est que je y acqueure

    Ou j'en seroie ailleurs reprise

    

  

  

    Loué soit qui vous a transmy

    Au besoing de ma maladie

    Car par vous seul mon bel amy

    J'auray santé et melodie

    J'ay esté long temps enlaidie

    Par les excez de vilain cueur

    Mais or fauldra qu'il se desdie

    Par vous. qui en serez vainqueur

    

  

  

    Je m'en voys vers dame Nature

    Mon confort et ma phisicienne

    Pour lui remembrer ma laidure

    Et ma grande douleur ancienne

    Si vous prie m'amour terrienne

    Que rendre lui viegnez salut

    Car en voustre grace et la sienne

    Gist tout mon bien et mon salut

    

  


¶ Icy devise l'acteur/ comment noblesse
feminine mena noble cueur devers
dame Nature. Et comment elle fist
une complaincte devant elle: present
lui disant come s'ensuit

L'acteur.





  

    Hors d'un vouloir incorrumpu

    Et d'une chiere irreprenable

    Et sans honneur estre rompu

    En rien qui soit ymaginable

    La compaignie treslouable.

    Sentrebaisa d'un meur unime:

    Sans ce que mauvais homme ou diable:

    Les eust sceu accuser de crime

    

  

  

    Non plus qu'a fleurir une rose

    Sur l'arbre. y peut avoir offence

    Non plus de mal. bien dire l'ose

    Ny avoit en leur convenance

    Mais par honneur sans violence

    Leurs cueurs estoient en ung adjoinct

    Et s'aultre mal quelq'un y pense

    Honny soit/ car il n'i fut point

    

  

  

    Car par ce que je vy en eulx

    Maintenir vueil toute ma vie

    Qu'on peut tresbien estre amoureux

    Sans ja penser a vilenie

    Et quoy que soyt/ qui ce point nie

    Je dy que faulsement le treuve

    Et vueil bien qu'on m'excommunie:

    Se la verité ne les preuve

    

  

  

    Sans prejudice nul de l'ame

    Amour les tenoit en ses termes

    Mais raison y trempoit la flame

    Et les fist vivre en honneur fermes.

    Pechié ne les fist pas enfermes

    Ains touz leur plaisir et leur mieulx

    Estoit/ en distiller les larmes

    Que leur cueur envoyoit es yeulx

    

  

  

    En ce point main a main ensemble:

    Les deux amans d'illecq partirent

    Qui l'un a l'autre. ce me semble

    Maint gratieux mot departirent

    Et droictement celle part tirent

    Ou demeuroit ung peu avant

    Nature. a qui grant honneur firent

    Comme noble gente et sçavant

    

  

  

    Des dames ung infiny nombre

    Vy lors. et mainte damoiselle

    Que toutes leur refuge et umbre

    Prindrent leanz avecques elle

    Partie pour la vie belle

    Que nature leur enseignoit

    Partie pour dangier la felle

    Fuyr. Car leur cueur la craignoit

    

  

  

    Maint instrument en mainte forme

    Maint divers fruit en mainte rive

    y avoit/ desquelz elle forme

    Tout chose vive et non vive

    Jamais ne sembloit estre oysive

    Ne pour travail ne se couchoit

    Toutesvoyes sa main traictive

    Sembloit qu'en euvre ne touchoit

    

  

  

    J'ouy tousjours et escoutoie

    Et diligemment escrivoy:

    D'estre apparceu ne me doubtoie

    En quelque lieu que j'arrivoy

    Tousjours deprés je les suivoy

    Et sans reproche ne malgré

    Je vy j'ouy/ et si sçavoy

    Tout leur affaire et leur secré

    

  

  

    D'ungs yeulx de larmes encombrez

    D'une voix gemissant piteuse

    D'un cueur plain d'ennuys innombrez

    Et d'une chiere peu joyeuse

    La noble dame gratieuse

    S'agenoilloit devant Nature

    Faisant la complainte greneuse

    Cy aprés mise en escripture

    

  


¶ Complainte de noblesse feminine a nature





  

    Excellente dame et princesse

    Souveraine gouverneresse

    Plaine d'honneur et de sagesse:

    Puissante ouvriere

    Seule maistresse et singuliere

    De toute chose seculiere

    Que par foiblesse de matiere

    Est corruptible

    Mortel deffaillant diffinible

    Et de qui toute rien sensible:

    Prent par nature distinguible:

    Son estre et vie

    Dame de haulte seigneurie

    Plaise vous d'ouyr je vous prie

    Ma voix que devant vous s'escrie:

    Piteusement

    Et me donnez aucunement

    Voustre doulx reconfortement

    Et de mes pleurs allegement

    Qui en avez

    Seule puissance/ et si savez:

    Ou au moins savoir vous devez

    Quoy et comment tous aggravez

    Sont mes ennemis

    Et pourquoy si dolante suis

    Exillee de tous deduis

    Tant que rien faire je ne puis

    Ou que je viengne

    Qui a moy ou autruy reviengne

    Ou a mon affaire appartiengne

    Ma noble dame il vous souviengne

    Comment jadis

    J'estoie demeurant tousdis

    Icy en voustre paradis

    Ou par honneur et par beaux dits

    Mon corps traictastes

    Et si me distes et monstrastes

    De quel substance me formastes

    Et quel vertu vous adjoustastes

    Par sur toute ame

    En moy. et toute noble dame

    Disant qu'il n'estoit fruit ne balsme:

    Ne chose tant soit riche en fame

    Que fust pareille

    A ma dignité impareille

    De qui tout oeil et toute oreille

    Par nouveauté d'un grant merveille:

    S'aveugleroient

    Quant d'aventure ilz me verroient

    Et mon estat regarderoient:

    En lieu ou ilz approucheroient

    De ma noblesse

    Et pour accroistre ma liesse

    Vous me feistes alors promesse

    Que terrienne gentillesse

    Roy duc ou conte:

    Mectroient mon honneur en compte

    En me gardant de blasme et honte

    Et de tout ce qui tourne et monte

    En mon despris

    Et seroient si bien apris

    Que pour avoir et los et pris:

    En mon cueur: qui est ung chier priz

    Par ma soufferte

    Jusques sur terre ou l'erbe verte

    La teste nue et descouverte

    Me seroit reverence offerte

    Par eulx trestous

    Et seroient humles et doulx

    Soupples de corps et de genoulx

    Devant chacune d'entre nous

    Puis me deistes

    Qu'en ce monde vous me transmistes:

    Comme ung soleil que vous y mistes

    Pour les hommes que vous feistes

    Qui nulle joie

    N'auroient/ se je n'y estoye

    Et se je ne respendissoie

    Leurs courages et adressoie

    En bonnes meurs

    En sens en prouesse et valeurs

    En crainte et en vertuz pluseurs

    Dont sourdent terriennez honneurs

    Et savez bien

    Tous ce qui est en moy de bien

    Quelle vertu j'ay et combien

    Et se je vaulx beaucop/ ou rien

    Car corps et ame

    Sont passez par vos mains ma dame

    Et n'ay de sang pas une dragme

    Soit digne d'amour ou de blasme

    Que vous de fait

    Ne l'ayez et trempé et fait

    Qui en maint honneur et bien fait

    Avez mon povre cueur refait

    En le faisant

    Doulx et traictis et bien plaisant

    Tendre mol et appetissant

    Mais selon l'ame reluisant

    Voustre clemence

    Me fist piteuse en conscience

    ydoine a doctrine et science

    Encline a vraye obedience

    Humble et honteuse

    Simple craintive vergongneuse

    Doulce courtoise et gratieuse

    Debonnaire et toute amoureuse

    En tous mes faitz

    Par qui vertu les imparfaiz

    Les corrompuz et les infaitz

    Ont cueur de devenir parfaitz

    Pour plus me plaire

    Et sur l'espoir de pouoir traire

    Aucune grace debonnaire

    De moy/ qui ay la riche anmaire

    De toute joie

    Si m'ordonnastes que je soie

    Couverte en tous mes cas. et coie

    Et que jamais ne partiroie

    De ma richesse

    Si n'est a gens plains de noblesse

    D'honneur de bonté de prouesse

    De meurs de sens et de largesse

    Mais a itieulx

    Il vous plaisoit bien si m'aist dieux:

    Que je gectasse ung peu mes yeulx

    Et je les acueillisse mieulx

    Car leur bonté

    Leur doulx maintien et leur beaté

    Leur franchise et leur liberté

    Renforcee de loyaulté

    Certes le vallent

    Car eulx de qui lez vertuz saillent

    Et en honneur jamais ne faillent

    Sont ceulx qui plaisir aux yeulx baillent

    Et joie au cueur

    A toute dame de valeur

    Laquelle sans graver honneur

    Malgré tout vilain repreneur

    D'euvre et de bouche

    Les peult cherir par amour doulche

    Car d'amour qui en mal ne touche

    Dame ne doit avoir reprouche

    Mais lasse my

    Or n'ay je plaisir ne demy

    Ne reconfort de vray amy

    Car vilain cueur mon ennemy

    M'a desolee

    Et a son grant tort desprisee

    Injuriee et tant blecee

    Que ma haultesse en est bassee

    Tresvilement

    Et ne veult souffrir nullement

    Que je soie mais tellement

    Exaulcee. s'aucunement

    y pouoit mectre

    Deffense/ par euvre ou par lectre

    Ou par donner ou par promectre

    Il tend a destruire et demectre

    Mon privilege

    Qui est pis fait que sacrilege

    De me vouloir oster le siege

    Ou dieu a voulu que je siege

    Le cours du monde

    Et le vilain que dieu confonde

    Et face qu'en enfer il fonde

    Prent sa raison la plusparfonde

    Et la plus folle

    Dont oncques l'on tenist escole

    Et mect tout premier en parolle

    Chose. qui est legiere et molle

    Et trop mal clere

    Que eve noustre premiere mere

    Pource que pecheresse elle ere

    Que le cop de la mort amere

    Nous vint par elle

    Arguant par envie felle

    Fraude et deception en elle

    Et qu'a dieu elle estoit rebelle

    Trop plus que l'omme

    Par friandise d'une pomme

    Et pourtant/ que toute la somme

    Des femmes/ est de telle gomme

    Et encor pire

    Et semble qu'il nous vueille dire

    Et pour plus nous grever et nuyre

    D'honneur abasser et destruire

    Il a exquis:

    Les secretz de nature. et quis

    Sentences gloses et escrips

    Qui font ou fons d'enfer les cris

    Et a glosee

    Noustre nature. et exposee

    Tresinconstante irreposee

    Et si fragile

    Qu'aujourd'uy region dix mille

    Sont par mon affaire inutile

    En grant confusion et vile

    Et en servages

    Mectant sur moy tous les domages

    Tous lez meschiez tous les oultrages

    Qui furent oncques es lignages

    Des anciens

    Des sarrasins et des payens

    Des juifz et des chrestiens

    Et de tous autres terriens

    Qui pour prouver

    Sa raison/ et nous reprouver

    Il a esté prendre et trouver

    Cuidant son fait mieulx approuver

    Les plus expers

    Les glorieux excellens clercs

    Disant que par mes fais divers

    Tous se sont tumbés a l'envers

    Et puis le bon

    Qui estoit tout contraire au bon

    Desquelz sy estoit salomon

    Virgile Aristote et Sanson

    Adjoustant en ce

    Que l'ung en perdit sapience

    L'aultre mesusoit de science

    Le tiers trompe Incorpulence

    Comme en sa force

    Par quoy il conclut que c'est force

    Et a la maintenir s'efforce

    Que noustre corps n'est qu'une porce

    Dehors paree

    Ou mainte teste fort baree

    De sens a esté esgaree

    Deffaicte. et tost desamparee

    Si en a fait.

    Certes maint livre. qui deffait

    Mon honneur/ dont il me deplaist

    Qu'il me fault endurer son plait

    Car mainte prose

    Et mainte injurieuse glose

    A mis ou romant de la rose

    Tresfaulsement/ bien dire l'ose

    Et a grant tort

    Et par telz envieux enort

    Qui est vilain puant et ort

    A mis maint cueur en grant discort

    Encontre moy

    Et contre honneur justice et loy.

    Car pluseurs y adjoustent foy

    Et sont de si mauvais aloy

    Qu'ilz en tiennent

    Leurs estoles/ ou ilz convienent

    Pour leur faulse erreur qu'ilz maintinnent

    Mais j'ay espoir que nulz n'y viennent:

    Fors meschans gens.

    Car les haulx nobles et les gents

    Qui de mes biens sont indigens

    Ne furent oncq si negligens

    Que d'estre itieulx

    Non obstant. que maint jeune et vieulx

    ont aujourd'uy: cueur: langue et yeulx.

    Si corrumpu. que l'air des cieulx

    S'en putrifie

    Et sont tous. je vous certifie

    Rempliz de folle jalousie

    De faulx argu de tromperie

    Par les escrips.

    Injurieux. qui sont escripts

    Et que malle bouche a apris

    A mainte homme de petit pris

    Qui plus appreuvent

    Ung mal que par escript ilz treuvent.

    Et plus le virent et remeuvent

    q'un bien qu'en leur feme ilz espreuvent

    De fait et d'euvre

    en quoy grant mauvaistié se cueuvre

    Et prie a dieu. que tant y euvre

    Qu'en bref. vengence s'en recueuvre:

    Car se je vueil

    Sur aucun homme ouvrir ung oeil

    L'on diroit tantost que mon vueil

    Seroit pour lui donner acueil

    Ne n'oseroie

    Rire chanter ne monstrer joie

    Se d'aventure en lieu j'estoie

    Ou faire et monstrer le vouloie

    Dont il m'est crue

    Grief douleur. que tant suis mescrue

    Et que bonne foy est descrue

    Et souspeçon tant paracrue

    Sur mainte bonne

    Qui oncques ne passa la bonne

    D'honneur. ne ne fist a personne

    Chose qui en reprouche sonne

    Si leur est certes

    Grief a souffrir que sans dessertes

    Toutes convient estre desertes

    D'honneur. de bon los: descouvertes

    Pour les mis sus

    De huit ou dix. peu moins ou plus

    Qui ont fait ung meschant abus

    Parquoy l'on nous veult ruer jus

    Toute et chescune

    Et cuide la faulse commune

    Qu'aujourd'uy nait dame nesune

    Que ne tende a folie aucune

    Par quoy couvient

    Des l'eure que nous en souvient

    Fermer noz yeulx. quant il advient.

    Que quelq'un par devers nous vient:

    Ou nous refaire

    Tout de nouveau. et contrefaire

    Car honneur faire sans meffaire

    Au jourd'uy/ ne se seuffre a faire

    Ainsi me semble

    Que moy et vous. toutes ensemble:

    Sommes com en ung flot qui tremble

    Ou toute malheurté s'assemble

    Et vraiement

    Bien vivons inutilement

    Au monde/ et plus au griefvement

    Des bons/ qu'a leur confortement

    Quant nullement

    Faire n'osons descouvrement

    De ce que naturellement

    Nous est donné pour sauvement

    D'humain lignaige

    Si nous fault rendre en hermitage.

    Et laisser le peuple ramage

    Bons et mauvais morir de rage

    Sans esjoyr

    Ame qui d'amour veult joyr

    Car j'ame mieulx loing m'enfouyr

    Que souffrir tousjours et ouyr

    Si grant reprouche

    Qui nuit et jour en jeu me couche

    Par raison que n'est gaires doulche

    De vilain cueur et malle bouche

    Et ont ces deux

    Tant de complices avec eulx

    Que le nombre en est merveilleux

    Dont les noms que portent yceulx

    Le sont pluseurs

    Mesdisans/ cuidereaux/ vainteurs.

    Souspeçonneux/ jaloux/ mocqueurs

    Enuieux/ desireux/ menteurs

    Trompeurs couars.

    Faulx promecteurs vilains eschars

    Et tous autres itieulx cornars

    Qui ont estudie es ars

    Du grant dyable

    Qui leur fait a croire de fable

    Et d'une bourde abhominable

    Que ce soit chose veritable

    Puis les publient

    Et meschans gens y estudient

    Mais ung point y a qu'ilz oblient

    Dieu et les anges les maldient

    Et trouveront.

    Q'une fois ilz en respondront

    Et qu'en dangier ilz en seront

    A l'eure que raison rendront

    De tout ensemble

    Ou n'a si juste qui ne tremble:

    Et quant enfer tous lez assemble

    Je n'en suis gaires plus me semble:

    D'honneur paree

    Ne de lumiere reparee

    Qui leur langue en mal obduree

    M'a pourchassee et procuree

    Si est ainsi

    Que je m'en plaing a vous droit cy

    En suppliant que par mercy

    Vous vueilliez regarder cecy

    Car je vous jure

    Qu'aujourd'uy toute creature

    Est infecte. et de telle ordure

    Et prent plaisir et nouriture

    L'un en mesdire

    Sur mainte. ou il n'a que redire

    Mais qu'il la voie sans plus rire

    Il veul jugier ou l'ueil se tire

    En son penser

    L'autre ne fait que mal penser

    Le tiers ne fait que offencer

    Le quart pour cuider s'avancer

    De flaiterie

    Va user et de gaberie

    Affin qu'il puist sa mocquerie

    Tenir de noustre druerie

    Ainsi chescun:

    Paist aujourduy son cueur d'aigrun

    Et de mille n'en a pas ung

    Qui n'ait itel reprouche aucun

    Que fort l'abasse

    Ainsi force est que je delesse

    Tout beau semblant toute liesse

    Et que j'embride ma jeunesse

    Avant vieillesse.

    Du frain de douleur et tristesse:

    Et que honneur se desloge et cesse

    En moy/ qui suis la forteresse.

    D'humain plaisir

    Ou chescun doit par vray desir

    Son derrenier repos choisir

    Comme au lieu dont il fault issir

    Si vous conjure

    Ma maistresse dame Nature

    Et vous prie par amour pure

    Prenez pité de ma laidure

    Que vous ouez

    Et point ne me desavouez

    Suppliant que si vous pouez

    En brief. vous y remediez

    

  


¶ Icy repayse et reconforte Dame
Nature Noblesse feminine par pluseurs
raisons evidentes et moult prouffitables
a son ennimy. Comme cy aprés
s'ensuyt.

Nature.





  

    Helas Noblesse feminine

    Pour dieu ne plourez plus si fort

    Mais en la grant doulceur divine

    Mectez tout voustre grief effort

    Gaires ne vault le desconfort

    Quant est a moy s'il plaist a dieu

    Je vous donray bon reconfort

    Mais que raison trengne en vous lieu

    

  

  

    Vous savez bien que tout ce monde:

    N'est q'un flot d'eau trop instable

    Une mer hideuse et parfonde

    Ung repos beaucop variable.

    Fort desiré/ peu prouffitable

    Ung souef plaisir de renchiere

    Une liesse defraudable

    Plus a fouir qu'a tenir chiere

    

  

  

    Tout ce dont il est composé

    Est subget a mutation.

    Et ne fut oncques si posé

    Qu'il n'i eust alteration:

    Discord et variation

    Noises envies entre gens

    Et tant de tribulation

    Qui se chaingent comme les vens

    

  

  

    Tout y va ce dessus dessoubz

    Verité y est desprisee

    Et qui pis est/ tout au rebours

    Mensonge y est auctorisee

    Mauvaise vie y est prisee

    Vertu y est peu recongnue

    Et les mauvais font leur risee

    De chose que bonne est tenue.

    

  

  

    Les moins dignes en tous endroiz.

    Sont ceulx qui ont les biens du monde:

    Les folz ont l'onneur et la voix

    Et les estaz tous a la ronde:

    Le sage qui en sens habonde

    Le plus il va querant son pain

    Sur lez meschant tout bien redonde

    Les nobles vont morans de fain

    

  

  

    Faulseté est subtilité

    Meschant parler n'y est point honte

    Raillerie y est viveté

    Du droit chemin nul ne tient compte

    Justice est mise hors du conte

    Mauvaistié y est impugnie

    Et bonté quelque peu qu'el monte

    C'est celle qu'on excommunie

    

  

  

    Or m'a la divine ordonnance

    Mise en dignité treshaultaine

    Et establie la puissance

    Sur tout quant que la terre amene

    Puis donc/ que creature humaine

    Est fait de terre fraisle et vile

    Il couvient qu'elle ait pour domaine

    Vie variable et fragile

    

  

  

    Les creatures que je forme

    Sont de diverse qualité

    Soit en complexion ou forme

    Il n'y a point de qualité

    L'une tend a enormité

    Et de pechié fait sa maison

    L'autre het la difformité

    Et se gouverne de raison

    

  

  

    Or est pechié ung accident

    Naturel a homme et a femme

    Mais pourtant n'est pas resident

    Equalement en chescun ame

    De nature est/ que toute dame

    Se peut laisser cheoir en pechié

    En lui seul n'est pas ung tel blasme

    Car tout homme en est entachié

    

  

  

    Supposons doncq qu'aucunes femmes

    Ont fait: et font encor oultrages

    Et se grievent en elles mesmes

    Par leurs faulx et mavaiz couragez

    Pensez vous que leurs folz ouvrages

    Ayent puissance de destruire

    Les autres bonnes et les sages

    Que ont cueur de soy bien conduire.

    

  

  

    Pour tous les ditz qui oncques furent

    Vous n'en valez de gaires pis

    Mais en la fin qui plus murmurent

    Seront d'honneur plus deguerpis

    Descouurir ce qu'on a au pis:

    C'est chose bien legiere a faire

    Car d'un cueur ou n'a que despis

    L'on n'en peut nulle doulceur traire.

    

  

  

    Il est des hommes plus ne mains

    Comme il fut des anges jadis

    Les ungs sont bons doulz et humains

    Les autres vers dieu refroidis

    Des bons ne vient que bien tousdis

    Ne ja par eulx n'est armé homme

    Des mauvais viennent les faulx ditz

    Et tout vilenie en somme

    

  

  

    La cause pourquoy pluseurs sages

    Vous vont blasmant en leurs escripts

    C'est pource qu'en voz beaux visagez

    Autresfoys ilz ont esté pris

    Et ont esté ainsi surpris

    D'amoureuse melencolie

    Qu'ilz en perdoient et los et pris

    Et leur sens tournent en folie

    

  

  

    Or sont ilz d'un courage fier

    D'une tresorgueilleuse mine

    Et cuident que rien assegier

    Ne les peust qui sur eulx domine

    Mais quant par doulceur feminine:

    Se sont trouvez si tresaubas

    Par despit. ainsi le devine

    Ils en vont blasmant voz soulas

    

  

  

    Les aucuns que maleur enchante

    Et qui ont d'aucune aventure

    Trouvé quelque povre meschante

    Quelque petite necte ordure

    Qui tousjours brait noist et tambure:

    Le povre maleureux meschant

    Cuide. que de telle laidure

    Toutes soient/ et d'un tel chant.

    

  

  

    A lors le meschant amusé

    Qui en ce meschant las est cheu

    Quant il se cougnoist abusé

    Que par sa meschance est deceu

    Il en est bien forment mescheu

    A la plus vaillant de la route

    Car tout le mal qu'il a conceu

    En une/ il va disant sur toute

    

  

  

    Les meschans sont de leur nature

    De mesdire et de rompre pais

    Et de trouver charge et injure

    Sur les bons/ point sur les mauvais

    Ilz sont a ce faire contrais

    A leur bouche n'a point de clause

    Mais honneur vous est a jamais

    Quant ilz le font a malle cause

    

  

  

    Dieu que estoit si pur et net

    Si beau si bon. si tresparfait

    Que nulle rien si pure n'est

    Ne moins souillee de meffait

    Ne fut il pas blasme de fait

    Chargié et accusé de vice

    Certes oy/ quoy qu'en effect

    Oncq n'en fut pire sa justice

    

  

  

    D'hommes y a trop et assez

    Selon le temps leurs meurs se muent

    Les bons sont forment trespassez

    Bontez faillent et desvertuent

    Les mauvais. les vertueux tuent

    Aumoins s'en mectent ilz en pene

    Les plus fors sur les foibles ruent

    C'est tout le fait de vie humaine

    

  

  

    On peut bien tant couvrir ung lieu

    Que nulle clarté n'y peut luire

    Mais rien n'est si puissant/ fors dieu:

    Que clarté peust rompre et destruire

    S'aucuns meschans vous cuident nuire

    Faisant de voustre clarté umbre

    Ja pourtant ne pourroit construire

    L'esceuvre qui la toute encombre

    

  

  

    Mais pource que par cueur vilain

    Et par malle bouche envieuse:

    Voustre honneur qui est tant haultain

    Est mis en place trop umbreuse

    Je vous donne d'amour joyeuse

    Noble cueur. pour voustre advocat

    Par lequel. comme treseureuse

    Vous serez remise en estat

    

  

  

    Cueur vilain. vous a fait retraire

    Du lieu/ ou dieu vous avoit mise

    Ainsi par cueur noble. au contraire.

    Il fault que vous soyez remise

    Il vous restablira franchise

    Honneur. clarté. los souverain

    Et destruira la faulse guise

    De malle bouche et cueur villain

    

  


¶ Icy dame Nature/ adresse son
parler/ a noble cueur.





  

    Beau filz bien vous peut souvenir

    Comment jadis par grant humblesse

    Vous me veistes vers vous venir

    En fleur de voustre grant jeunesse

    Pour conforter voustre tendresse

    Qui estoit durement pensive

    Et tant que innocente et simplesse

    Vous tiendrent la pensee oysive

    

  

  

    Lors vous savez que vous donnoie:

    Maintz notables enseignements

    Et tout du long vous ordonnoie

    Par regle. voz gouvernemens:

    Quelz joies et avancemens

    Vous pourriez en ce monde acquerre

    Et en honneur adressemens

    Autant que homme dessus la terre

    

  

  

    Je vous conseilloie d'amer

    Toutes vertuz et euvre bonne

    D'autrepart/ fuyr et blasmer

    Toute vile et meschant personne

    Et tout vice qui empoisonne

    Ou corrumpt bonne renommee

    Car la ou pechié s'afoisonne

    Ne peut la vie estre inblasmee

    

  

  

    Les dames et les damoiselles

    Vous prisoient sur toute rien

    Et vous feiz serviteur a elles

    Pour voustre prouf et pour le mien:

    Vous affermant que tresgrant bien

    Vous adviendroit leur service

    Et encores me semble bien

    Que c'est voustre meilleur office

    

  

  

    A fin que vous eussiez conduicte

    De sens acquis par sur nature

    Et que science fust reduicte

    En vous/ avecques nourriture

    Je vous feiz paistre en la pasture

    De treshaulte philozophie

    Par quelle toute creature

    Se parfait et moult glorifie

    

  

  

    Pour lez fait d'amours mieulx apprendre

    Au mestier d'armes vous soubmis

    Affin de savoir entreprendre

    Resistence a voz ennemis

    En oultre plus/ ce mot y mis

    Que une foys avant longs termes.

    La dame que je vous promis

    Vous fauldroit secourir par armes

    

  

  

    Maint grant et merveilleux avance

    Vous ay fait/ et maint grant honneur

    Et avez par vostre sçavance

    Trouvee mainte grant doulceur

    Entre les dames de valeur

    Sans estre lassé de servir

    Mais ores vient tout le greigneur

    Et le plusfort a deservir

    

  

  

    Car le temps est tout acomply

    Desoresmais se rompt la trieve

    Et tout cueur qui est trop emply

    Aujourd'uy convient qu'il se crieve

    La douleur ancienne et grieve

    Maintenant toute descueuvre

    Et demande vengence brefve

    A dieu/ a moy/ de fait et d'euvre

    

  

  

    Les cieulx sont plains et assourdis

    Des clameurs et douleur piteuses.

    Les anges sourds et estourdis

    Des regrez et voix lamenteuses

    Les saints et sainctes ennuyeuses

    Et chescun a pleurer s'encline

    D'ouyr les plaintes doloreuses

    Que fait noblesse feminine

    

  

  

    L'air est infect et corrompu

    Arbres fruitz et herbes pourrissent.

    Le firmament est desrompu

    Bestes oyseaux tous si gemissent

    Les poissons des rivieres issent

    Le soleil devient noir et vain

    Et toutes choses amaindrissent

    Par le venin de cueur vilain

    

  

  

    Je ne le puis plus endurer

    Il fault reconforter les dames

    Que ne font las que murmurer:

    Et les reparer de grans blasmes

    Plourer et tormenter leurs ames

    Qui beaucop leur sont impropices.

    Et mectre a l'envers sur les lames

    Vilain cueur. et tous ses complices.

    

  

  

    Or fault il ce puant vermine

    Du tout mettre a destruction

    Et l'arbre o toute la racine

    Ardoir en grant confusion

    C'est une grande abusion

    De souffrir vivre telle ordure

    Qui par la faulse instruction

    Deffait la rien qui est plus pure

    

  

  

    Par vous que l'on dit et appelle

    Cueur noble en vertu couragié

    Il convient que le faulx rebelle

    Soit rué jus. et oultragié

    Et que le dragon enragié

    Laisse en paix dames et pucelles

    Car trop long temps a fourragié

    L'onneur et le vergier d'icelles

    

  

  

    Mais pour en vous plus faire croistre

    Courage et hault desir d'emprendre.

    Besoing vous fust que de congnoistre

    Avant que haulte euvre entreprendre

    Pourtant je vous iray apprendre

    La dignité et la nature

    De celles que devez deffendre

    Et reparer de toute injure

    

  


¶ Icy cesse a parler Nature a noble
cueur/ et parle l'acteur comment Nature
menoit noble cueur en ung merveilleusement
beau lieu Ou quel y avoit
ung arbre a deux branches sans pluz
fleury de diverses fleurs/ assiz ou milieu
d'une fontaine/ dont l'eau estoit toute
noire et troublee.




Nature.


  

    Lors je vy que dame nature

    Ensemble o la parfaicte et pure

    L'oultrepasse de corps humains

    Prindrent noble cueur par lez mains

    Mais gaires long ne cheminerent

    Qu'en ung si beau lieu le menerent

    Que je tien sur ma conscience

    Qu'il n'est cueur si plain de science

    Qui proprement pourroit suffire

    A la beauté du lieu descrire

    Car c'estoit le plushault retrait

    Ouquel nature se retrait.

    Le lieu ou elle fait et forme

    La tresnoble et tresdigne forme

    La figure d'humain coursage

    Qui est le chief de son ouvrage

    Mon regard par leans voloit

    Mais ainsi comme dieu vouloit

    Entre les autres choses/ une

    Je vy/ que n'estoit pas commune

    En mille region ne veue

    Parquoy mon sens mon cueur ma veue

    Versay totalement sur elle

    Car belle estoit et plus que belle

    C'estoit ung arbre my party

    Fourchu dessus/ par tel party

    Et de si egalle mesure

    Qu'il n'est ou monde creature

    Qui bien eust sceu jugier sans faulte:

    Quelle part estoit la plushaulte

    Fleury estoit/ mais grant merveilles

    Vous diray des fleurs et dez fueilles

    Que portoient lesdictes branches

    Rouges jaulnes perses et blanches.

    Plus de dix mille millions

    Fleurs il portoit/ tant que nulz homs.

    N'eust ja sceu toutes les comprendre

    Ne le nombre infiny en rendre

    Les unes par oultrage belles

    En fleurs et en couleurs itelles

    Les autres de maindre beauté

    Toutesfoys/ par ma leauté

    La moins belle et la plus indigne

    Me sembloit belle doulce et digne

    Mais telle y avoit difference

    Que chescune par apparence

    Estoit a chescune insemblable

    En forme assez apparcevable

    Si estoit point je ne vous celle

    A ung petit ray une estelle

    Que je fuz assez regardant.

    Chescune de ses fleurs rendant

    Par diverses impressions

    Dont les significations

    Je ne peuz oncq ymaginer

    Ne en mon cueur determiner

    Telle subtile extremité

    Mais droit en la sublimité

    De l'arbre/ du costé senestre

    Je vy sur toutes. croistre et naistre

    Une si belle fleur de lis

    Que tous autres mondains delits

    Et toute beauté naturelle

    Furent neant/ au regard d'elle

    En telle vertu fleurissoit

    Que la haulteur dez cieulx passoit

    Et rendoit si souef odeur

    Que tout le monde a la rondeur

    Et les cieulx mesmes s'emplissoient

    Des grans doulceurs qui en issoient

    Sur ceste fleur en ung trouppeau

    Avoit estoilles ung monceau

    Amoncelees et unies

    Et leurs grans clartez infinies

    Sur la tresdigne fleur gecterent

    Et telle grace lui donnerent

    Par la vertu que y habunda

    Que le nom de fleur du monde a

    Or estoit cest arbre planté

    Non pas par art ne voulenté

    Mais par puissance treshaultaine

    Droit ou milieu d'une fontaine

    La quelle estoit si ample et large

    Qu'il n'y eust fleur qui l'arbre charge

    Quant ce venoit aux accidens

    Qu'elle ne cheyst dedens

    Dont l'eau en estoit trouble et noire

    Qui est chose bien forte a croire

    Mais tant avoit de sa nature

    Qu'elle estoit chaulde par mesure

    Et si par rayson destrempee

    Que nulle rien ou monde nee

    Oncques ne fut si bien ne mieulx

    Et son eaue. par quatre lieux

    Envoyoit/ qui estoit parfonde

    Devers les quatre pars du monde

    Lors vy je que les nouveautez

    Et les singulierez beautez

    Que leans infiniz estoient

    Les sens de noble cueur mectoient

    En tresgrande admiration

    Mais la grant persuasion

    De dame nature la sage

    Le venoit d'un riant visage

    De tout informer et apprendre

    Et lui donnoit les poins entendre

    Sur le fait de cest arbre icy

    Et puis elle luy dist ainsy

    

  





Nature


  

    Beau filz forment je vous regarde

    Et congnoit bien que moult vous tarde

    Certes que je ne vous declaire

    La nature de ce repaire

    Ouquel nous sommes en present

    Et croy que voustre cueur s'i fent

    De bien content et fort joieux

    Car il y fait melodieux

    Or mectez pene a bien entendre

    Et retenir et bien comprendre

    Ce que je vous remonstreray

    Et vivement declaireray

    Pour voustre moult grant joye et preu

    Et je voys desnouer le neu

    De mon plushault secret et sens

    Que j'aie/ ne qu'avoir me sens

    Touchant a noustre present fait

    Qui fort esmerveillier vos fait

    J'apparçoy bien ainsi m'aist dieux

    Qu'en riens vous ne gectez voz yeulx.

    Fors en l'arbre qui la fleurist

    Et de tant belles fleurs nourist

    Lequel certes pour tout voir dire

    Est bien digne qu'on le remire.

    Et qu'on enquiere de son estre

    Veu qu'a nulle rien terrestre

    Ne naturelle. il ne ressemble

    Ains/ et plus surpasser il semble

    Le cours de commune nature

    Tant est belle la floriture

    Pourtant prenez le sainement

    Et je vous diray plainement

    De l'arbre la signifiance

    Qui en vertu et en substance

    Tresmerveilleusement habonde

    Jadis. le createur du monde

    Quant le ciel et le firmament

    Avoit mis en leur mouvement

    Et eust creé toute autre chose

    Qui en terre ou en l'air repose

    Et qu'il ne restoit mais a faire

    Rien pour le monde tout parfaire:

    Alors comme ung ouvrier tressage

    Au derrenier de son ouvrage

    Il fist cest arbre: et le forma

    Tout tel qu'a present sa forme a

    Lequel il fist par excellence

    Sy beau si digne en corpulence

    Et de si grant prerogative

    Que sa vertu suppellative

    Surpassa. vous soit bien notoire

    Toute autre chose transitoire

    Car puis qu'il fault que tout vous euvre

    Dieu en fist le chief de son euvre

    A qui sur toute autre doulceur

    Il donna s'amour et son cueur

    Vertu. grant dignité. puissance

    Discretion. sens. congnoissance

    Comme qui de son fruit et germe

    Vouloit avoir/ je vous afferme

    Louenge et grace plusparfaicte

    Que de nulle rien que fust faicte

    Et lors en ce mesme moment

    Dieu vint a moy. ne sçay comment

    Qui me va commander ainsy

    Nature. prens cest arbre icy

    Et tressougneusement le garde

    Je t'en donne maistrise et garde

    Jusqu'au diffinement du monde

    Si vueil aussi/ qu'a toy responde

    Toute autre naturelle chose

    Qui s'engendre et que se compose

    Par la vertu des elemens

    Et donneras nourissemens

    Forme. complexion. figure

    A chescune une creature

    Selon son genre et son espece

    Itelle en france comme en grece

    Et te donne la seigneurie

    De terre qui sera fleurie

    Pour toy. et pour ta gouvernance.

    Mais j'en reserve l'ordonnance

    Sur toy et sur tout ton ouvrage

    Or convient il que ce langage

    Vous soit plus au cler exposé

    Et de sentences si glosé

    Qu'en fin vous puissiez concevoir

    Ce que vouz desirez savoir

    Parquoy noble cueur. je vous dis

    Cest arbre qui fluerist tousdis.

    Et est de si plaisant umbrage

    Est l'arbre dont l'humain lignage

    Sourdist/ et sourd de jour en jour

    Par quantité telle et vigour

    Comme au jourd'uy pouez veoir

    Dont adam et eve de voir

    Jadis ung corps et une eschine

    Furent le boys et la racine

    Dont tout l'arbre tel comme il est

    Se croist. se fleurist. et se naist

    Gectant deux branches contremont

    Sans plus. que bien a noter sont

    Et est bien de necessité

    Car la gist la diversité

    Du sexe. qui est masculin.

    A celui qui est feminin

    Lesquelles sans nulle doubtance

    Sont d'un estre. d'une substance

    Et d'une mesme dignité

    Sans quelconque difformité

    Fors sans plus/ une accidentale

    Que l'une est feme et l'autre masle

    Or est ceste arbre o sa racine

    Si vert/ et sa vertu si fine

    Que tousjours rend germe nouveau

    Et n'est plus foible ne moins beau

    De tout le temps que l'ay hanté

    Que le jour qu'il y fut planté

    Si a ja six mil ans. ou plus

    Et doit fleurir en ses vertus

    Que lez cieulx que nul ne peut rompre

    Fors dieu il conviendra corrumpre.

    Quel temps: combien il durera

    Ame ne vous asseurera

    Car la providence divine

    Seule/ de ce point determine

    Les fleurs dessus la branche destre

    Sont les hommes/ qu'on a veu naistre

    Depuis adam. jusqu'au jourd'uy

    Lesquelz quant ilz partent d'icy

    Leur fleur y remaint toute telle

    Comme ilz ont vertu corporelle:

    Parquoy/ entre les fleurs la sus

    L'une est belle/ l'autre encor plus

    L'autre est tresclere. une autre mains

    Tout ainsi que les corps humains

    Mais la cause pourquoy les fleurs

    De tous les corps predecesseurs

    Demeurent sur cest arbre icy

    Certes je le vous diray cy:

    Une foys quant il adviendra

    Que toute rien sa fin prendra

    Et que la divine justice

    Vouldra tenir son excercice

    Especialement sur l'omme

    Dez lors plus fruitz ne fleur ne gomme

    De cest arbre ne saillira:

    Ne plus avant ne fleurira

    Mais luy/ comme ung roy de grant compte.

    Viendra me demander le compte

    Quoy que mes fleurs sont devenues

    Grosses moyennes et menues

    Car il luy fauldra le veoir

    Et de leurs affaires savoir

    Lors il les ira regardant

    Comme ung en grant justice ardant

    Mais telles que sont entachees

    Seront erramment arrachees

    D'entre les belles et mourront

    Et les nectez demeureront

    En joie et beauté conformees

    Plus qu'oncques ne furent formees.

    Et sera l'arbre o sa sentence

    Exaulcié. par telle excellence

    Qu'a jamais sera fleurissant

    Sans aller en amendrissant:

    Et sans gecter nouvelles flours

    Mais ung/ et en ung point tousjours

    Assis en vergier honnorable

    De melodie pardurable

    Qui sera lors vous certifie

    Comme ung arbre o le fruit de vie

    Mais pource que point nous ne somens

    En voie de traicter des hommes

    Fors de la dignité des femmes

    Qui est toute une chose mesmes

    Sachiez que la senestre branche

    Que semble tant belle et tant franche

    Est celle dont les femens naissent

    Et se nourrissent et se paissent

    Qui est pour le vous faire entendre:

    Ung peu plus doulcette et plus tendre

    Que n'est telle du costé dextre

    Pour sa plusgrant perfection

    Car dieu la voulu itelle estre

    Or ay je grant affection

    De vous apprendre et demonstrer

    S'il vous pouoit au cueur entrer

    Comment en toute femme et homme

    Se font et naissent d'une gomme

    D'une terre d'une matiere

    Et se font tous par une ouvriere

    Par moy qui tous les corps humains

    Ay fait et formé de mes mains:

    Droit cy en verité certaine

    Au milieu de ceste fontaine

    Par quelque quoy/ elle est mal clere:

    S'entend le ventre de la mere

    Ou quel/ le fruit se fructifie

    Et prent force/ et forme et vie

    Et vous diray quoy et comment

    Il est vray/ qu'en chescun moment

    Il croist la sus boutons nouveaux

    Par cens/ par milliers/ et trouppeaux

    De moult diverse qualité

    Et d'un pareil egalité

    Lesquelz tout ainsi comme ilz s'euvrent

    Et que leur germe ung peu desceuvrent

    Il chet de chescun une graine

    Cy en bas/ en ceste fontaine

    Lors moy/ qui ay la congnoissance

    Apres dieu/ seule et la savance

    De tous les boutons. quelz ilz sont

    Et quelle dignité ilz ont

    Me vien bouter emmy ce bain

    Et prens la graine emmy la main

    Lui donnant la forme et figure

    Selon la vertu et nature

    Du bouton dont elle est saillie

    Car selon lui/ est sa taillie:

    Puis se nourist ceans grant temps

    Par l'espace de trois quars d'ans

    Mais aprés il convient sans faille

    Que par l'un des tuyaux il s'aille

    Prendre sa vie et nourriture

    En une nouvelle paisture

    Et sachiez. que je vous afferme

    Que se de l'arbre chet nul germe

    Il lui convient droit cy se rendre

    Et par ma main sa vie prendre

    Mais la cause vous diray voir

    Pourquoy ce baing est trouble et noir:

    Et le vous vueil notifier

    Certes. ce veult signifier

    Le vil et orgueilleux pechié

    Dont l'humain gente est entachié

    Tant qu'il convient grant et menu

    Estre en sa tache conceu

    Princes. princesses. saints et sainctes:

    Tous en sont prins/ et saincts et sainctes

    Sans en exempter ame aucune

    Que fut. ne qui sera: fors une

    Que ne fut oncques conceue

    Ou je suis forment deceue

    Si vous diray ce que je vis

    Une foys par tresvray advis

    Jadis ou temps des anciens

    Je vy sur ces arbres ceans

    Tout a plus hault ung bouton croistre

    Lequel pour verité congnoistre

    Estoit le tresplus gratieux

    Que j'eusse onques veu de mez yeulx

    Le mieulx flairant et le plus beau

    Le plus doulx et le plus nouveau

    Qui oncques fut ne qui sera

    Tant que le monde durera

    Sy vy comme a dieu il plaisoit

    Que ce bouton espanissoit

    Ung jour par la vertu divine

    Mais avant que sa graine fine

    Se laissa cheoir en la fontaine

    Je suis tresseure et trescertaine

    Que l'eau qui estoit obscure

    Devint tresclere et necte et pure

    Et changea sa couleur umbreuse

    Qui est chose bien merveilleuse

    Puis le germe de ce bouton

    Qui par sur tous flairoit si bon

    Si laissa cheoir icy dedens

    Et y print ses nourrissemens

    Complexion. figure. et forme

    Comme les autres que je forme

    Si en formay creez a lors

    Le plusgent et le plusbeau corps

    Le plus vertueux et parfait

    Que jamais pourroit estre fait

    Ou avoit esté fait devant.

    De puis adam ça en avant

    Si pert bien que je y prins delis

    Par celle noble fleur de lis

    Que porta le vray testmoignage

    De son estre et de son coursage

    Laquelle fleur. nous represente

    La glorieuse et excellente

    La benoiste vierge marie

    Qui la divinité marie

    Sur humain genre est coronnee

    A radoulcee et rapaisee

    Or est ainsi qu'aucunes gens

    Qui sont mal duis et negligens

    Vont murmurant contre les dames

    Pour les chargier et faire infames

    Disans. que femme en sa nature

    Est une fraisle creature

    Et occasion tresgreveuse

    De mainte chose dangereuse

    Mais pour garder l'onneur d'icelles:

    Je m'oppose contre eulx pour elles

    Disant. qu'en l'omme a tant de vices

    Qu'en la femme de malefices

    Une haultesse en dignité

    Et pareille fragilité

    Si vous demonstreray comment

    Vous veez comme au firmament

    Les estoilles illecques pendent

    Et sur les fleurs leur clarté rendent:

    Diversement/ que pour tout vray

    Il semble qu'a ung petit ray

    Une chescune fleur deppent

    D'une estoille du firmament

    Dont chescune estoille conduit

    Celle fleur. sur qui elle luit

    Et la dispose et la gouverne

    Et a sa vie o elle yverne

    Mais icy gist ung point secret

    Que tout le monde point ne scet

    Et se les hommes fussent sages

    Ilz changeroient leurs usages

    Et la femme ne blasmeroient

    Jusqu'a tant que informez seroient

    Pour quel cause se fait blasmer

    La femme/ ou penser ou amer

    Et dequel lien los luy eschiet

    Ou que son honneur luy deschiet

    Car langue d'ignorance esprise

    Ne scet ce qu'elle blasme ou prise

    Pourquoy savoir il vous convient

    Que la fragilité que vient

    Sur la Femme et sur l'omme aussy

    Eschiet/ par ces estoilles cy

    Qui envoyent leurs influences

    Sur ces fleurs. et leurs differences

    Telles/ que dieu leur a donnees

    De sa franchise et ordonnees

    Entre lesquelles. les aucunes

    Donnent ennuiz. douleurs. fortunez

    Les autres joyes et richesses

    Honneurs. sciences. et prouesses.

    Les tiers. bonne et sainte vie

    Autres: barat et tricherie

    Les quintes/ vie detestable

    Luxurieuse abominable

    Si fraudulent et decevese

    Qu'a tout le monde elle est doubteuse:

    Les sixtes bon courage et net

    Autres. ou nulle bonté. n'est

    Ainsi. par les conditions

    Et diverses impressions.

    Que chescune a de sa nature

    Il eschiet a la creature

    Devenir tout d'icelle mine

    Qu'est celle. que sur luy domine

    Et quant lez vertuz des planettes

    Ont leurs influences secretes

    Et une seigneurie mesmes

    Sur les hommes et sur les femmes.

    Arguer fault donc. s'elles donnent

    Vertu aux hommes et ordonnent

    Les causes qui les esvertuent

    Que aussi bien elles distribuent

    Par raison. leur vertu aux dames

    Veu qu'eulx deux ont unes ames

    Comme en mon cueur le conçoy

    L'omme n'a pas nul bien de soy

    Non a la feme plus que l'omme

    La moindre graine d'une pomme

    Mais toute vertu et constance

    Toute bonté toute chevance

    Vient a la femme tant qu'au masle

    Par la grace celestiale

    Laquelle n'est pas curieuse

    Que d'estre a l'omme avantageuse

    Et a la femme defraudable

    Nuisant et prejudiciable

    Bien sçay que dieu ne daigneroit

    Et aussi peu le souffriroit

    Sa irreprenable justice

    Qui en ce faisant feroit vice

    Car l'on diroit pour causes bonnes

    Qu'il fut excepteur des personnes

    D'avoir fait l'omme noble et digne

    Et la femme meschante indigne

    Qui sont d'une forme et figure

    D'un ouvrage. d'une nature

    Et au regard de l'ame aussy

    Qu'elle a tant noble comme luy

    Parquoy donc/ s'en ces basses isles

    Femmes aucunes sont fragiles

    Ordes et mal conditionnees

    Et a vices habandonnees

    Dont me desplaist qu'il en est tant

    Las. il ne s'ensuit pas pourtant

    Que toute femme de nature

    Soit partissant de telle ordure

    Ne que tel grief deslos on donne

    A mainte/ qui est belle et bonne

    Aussi vertueuse aussi ferme

    Qu'onques fut homme: et plus l'afferme

    Car femme de soy pour tout dire

    Ne peut estre de l'omme pire

    Mais elle est bien ung peu plus molle

    Parquoy s'elle veult estre folle

    Pechié. qui tout bon renom tue

    L'aura pluslegier abatue

    Mais celle molleur que je y mectz

    N'est pas pour son mal vous promectz

    Ains dieu le m'ordonne ainsi faire

    Veu qu'elle y est necessaire

    Se le fruit humain qui y entre

    Doit croistre. et se nourrir ou ventre

    Si donc par accident qu'elle a

    Et que je y mectz. tel qu'il est la.

    Pour humaine necessité

    Elle a ung peu fragilité

    En complexion de corsage

    Non pourtant/ se l'omme estoit sage.

    Ne la doit blasmer ou despire

    Ou de sa nature mal dire

    Veu qu'en accident celui

    Elle est pour le prouffit de luy

    Mais ung point y est qu'on oblie

    Qu'en tant que Nature assaillie

    Est trop d'une part et pressee

    Que d'autant elle est reconfortee.

    Peut estre/ en vigueur spiritable

    Et en vertu celestiale

    Car dieu qui bien le veult comprendre

    Ce qu'il prent cy/ la le peut rendre

    Ainsi par le don des planettes

    Des estoilles et des comectes

    Qui se font merveilleux et mains

    Et divers/ sur les corps humains

    Aucunes femmes sont mauvaises

    Et meschantes comme punaises

    Mais ung point y voys adjoustant

    Si sont les hommes/ et plus. ou tant

    S'il est des hommes tresparfaiz

    Si en est il de tresmauvais

    Vilains pervers et decevables.

    Et pires que ne sont les diables

    Bons ne sont pas trestous lez maslez

    Ne les femelles toutes malles

    Tout pechié qui est soubz la lune

    Est aussi pres a l'un. qu'a l'une

    Et vertu et toute euvre belle

    Est aussi pres a luy. qu'a elle

    Et tant a elle/ comme a lui

    Pourquoy je conclu au jourd'ui

    Qu'en femme a aussi grans vertus

    Comme en l'omme ou tant au plus.

    Et s'aucunes ont aucuns vices

    Destinees et malefices

    Si ont les aulcuns ce me semble

    Autant ou plus. quant tout s'assemble.

    Car ung corps est leurs deux personnez

    Et ung. qui bien et mal leur donnes

    Si vous certifie pour voir

    Comme qui bien le puis savoir

    Que j'ay formé de mez mains mesmes

    Autant de corps de vaillans femmes

    Dignes d'honneur. de pris et los

    Comme d'hommes. bien dire los

    Comme c'est arbre bien testmoigne

    Se verité dis ou mensongne

    Car les fleurs portent testmoignage

    De la vertu de leur courage

    Si lez regardez une a une.

    En jugeant toutes et chescune

    Puis acomparagez ensemble

    Les deux branches. se bon vous semble

    Mais je croy point ne trouverez

    Quant bien vous les aviserez

    Se voz memoires sont entieres

    Que l'une passe l'autre en guieres

    Car si dela voyez les saintz

    Qui ont esté beaucop et maintz

    Si sont deça aussi les sainctes

    Qui on esté beaucop et maintes

    Et se dela sont les martirs

    Qui par leurs vigoreux desirs

    Ont voulu morir pour la foy

    Aussi sont pardeça je croy

    Maintes glorieuses martires

    Qui ont souffert maintz griefz martires

    Et si sont trop plus a louer

    Que martir qu'on sache advouer

    Car leur nature est precieuse

    Et pour endurer dangereuse

    Toutesfois nonobstant foiblesse

    Et leur naturelle tendresse

    Elles ont nature vaincue

    Contre son cours et desrompue

    Tant qu'amour soubz torment les mist

    Dont tout fort homme se fremist

    Plus est d'un foible vaincre ung fort

    Qu'a ung fort vaincre ung fort aufort

    En oultre. de la sont pluseurs

    Saints preudommes et confesseurs

    Et pardeça religieuses

    Sainctes vierges de dieu espeuses

    Nonnains recluses et cloistrieres

    Et gentilz femmes seculieres

    Que pour l'amour de dieu tresmonde

    Ont renoncié a tout le monde

    Et fuy majesté royalle

    Pour estre amie a dieu loyalle

    Si vous arguez des prophettes

    Qui ont les visions secretes

    Des philosophes des docteurs

    Qui sont de la foy instructeurs

    Voyez cy les propheteresses

    Et les sages devineresses

    Que maintesfois en leur publicque

    Ont eu le sens angelicque

    Tant qu'il sembloit que leur science.

    Passast humaine sapience

    Mais pour changier propos dez saints

    Parlons de ceulx qui sont mondains

    Des loyaux des preux des vaillans

    Des vertueux et des sçavans

    Des beaux dez bons dez fortz dez sage

    Et de tous vigoreux courages

    Et vous trouverez sans cautelle

    Que chescun tel/ aura sa telle

    Et qu'il en est ainsi m'aist dieux

    Autant de telles/ que de cieulx

    Lesquelles bien nommer sauroie

    Quant forment pressee en seroie

    Dont les histoires anciennes

    Tant des juyfves que payennes

    Et des crestiennes encoire

    Font tresglorieuse memoire

    Tant que bien doit leur renomee

    Estre exaulcee et renommee

    A jamais. tant que oeil pourra lire

    Ou main et plume en parche escrire.

    Mais une. qui a moins d'encombre

    Et qui est la non per du monde

    N'est pas encor mise en compte

    Que seule plus vault et plus monte

    Et est plusdigne en tous eschanges.

    Que mille millions des anges

    Ne que saint tant soyt de grant fame

    Toutesvoyes sy est elle fame

    La qui clarté. la qui haultesse

    Toutes autres aveugle et abasse

    Comme le soleil vainct la nue

    D'une estoille clere et menue

    Laquelle. tout le genre humain

    Sert et honneure soir et main

    Et pour sa grace deservir

    Tousjours est prest de la servir

    Non pas seule nature humaine

    Mais aussy bien la plus haultaine

    Sorte/ des anges de la sus

    Si s'en travaillent mieulx ou plus

    Que s'aucuns hommes qui fouloient

    D'aventure/ arguer vouloient

    Disans que la divinité:

    S'est vestue d'humanité

    Et que dieu a forme acceptee

    De l'omme pour plus exceptee

    Non pas de femme/ et par ainsy

    Vouldroient nyer tout cecy

    Certes je respons a ce point

    Que cela ne m'arguent point

    Ne ne revallent mon party

    Ne eulx n'en sont ja mieulx party

    Car le filz dieu. quant j'en commence

    Ne fut oncques d'humaine semence

    Ne homme nul ne l'engendra

    Combien que part en son gendre a

    Mais la paternité puissante

    Legendra pur et fleurissant

    En sa tresglorieuse mere

    Sans semence venant de pere

    Et pur et net fut conceu

    Du saint esperit/ qui sceu

    Estoit en ses dignes entrailles

    Sans corrumpre veines ne trailles.

    Mais moy/ quant tout se fait se fist

    Je croy qu'a lors dieu me deffist

    Ou m'endormit ou aveugloit

    Ou congnoissance me tolloit

    Car je vous jure et vous desceuvre.

    Je ne steuz oncq rien de ceste euvre

    Et suis forment esmerveillee

    Comment moy que tant esveillee

    Me suis laisser embler ce fait:

    Qui sur mon cours a esté fait

    Au fort/ j'ay bien la congnoissance

    Que riens n'est hors de la puissance

    De la deité invincible

    Ne riens devers elle impossible

    Mais par ceste solution

    L'en peut mectre a conclusion

    Tous ceulx qui pour l'omme exaulcer.

    Veullent dieu avec eulx tauxer

    Car je ne mectz en mes querelles

    Fors creatures naturelles

    Naturellement engendrees

    Mais dieu n'est pas de telz ventrees

    Mais trop plus d'honneur eternel

    Et los. trop plus perpetuel

    Est a la glorieuse vierge

    La pure incorrumpue cierge

    D'avoir esté choisie digne

    Par sa pure doulceur divine

    A porter ce que ciel et terre

    Ne peurent prendre ne conquerre

    Et le fermer tout et entier

    En son doulx virginal sentier

    Que n'est a l'omme: qui veult estre

    Seigneur par sur la femme et mestre

    Que le filz de dieu: que je nomme

    Ait accepté la forme d'homme

    Veu que autre ne devoit prendre

    Quant il luy pleust icy descendre

    Car celle forme est plusparfaicte

    Et toute a sa semblance faicte:

    Or convient il que je recours

    Ung petit: par briefz motz et cours

    Vous declairer ung petit point

    Dont parlé n'ay encores point

    Pour vous faire ung petit plus sage

    Comment au feminim corsage

    Eschiet aucunesfois le bon

    D'estre mauvais. ou bel ou bon

    Bien avez retenu je pense

    Comment le germe et la semence

    En la fontaine se nourissent

    Et la se forment et fleurissent

    Le temps qui leur est ordonné

    Et par naturel cours donné

    Et comment il fault que dehors

    Ou temps nommé ilz saillent lors

    Par le tuyau qui les envoie

    En une bien diverse voie

    C'est a dire en ce divers monde

    Ou maint dangier sourd et redonde

    Lors aussi tost que de la partent

    Et que de l'air du monde ilz partent.

    Si va venir par grant ardure

    Ma chamberiere nourriture

    Et prent les corps en gouvernance.

    Pour nourrir a son ordonnance

    De tel laict. comme il luy plaira

    Et que l'enfant besoing aura

    Laquelle en esté et yvers

    Donne nourissemens divers

    Et de vertu beaucop diverse

    Le laict que des tetines verse

    Et plus souvent le mue et change

    Q'un changeur son argent au change

    Certes vez cy celle en partie

    Par qui maintefoys est partie

    La femme en vertu ou en vices

    Et en tous itieulx exercites

    Car selon la prime paisture

    Leur donnee par nourriture

    Il convient que chescun ne prengne.

    Complexion. qui leur remaigne

    Vie meurs vertu et conduicte

    Car nourisson fait forte luicte

    Et la fille d'un roy nourrie

    D'une viande orde et pourrie

    Entre gent vile et deshonneste.

    Quant nee seroit aussi necte

    Q'un ymage en toute fasson

    Sy lui feroit la nourisson

    Changier nature primeraine

    Et devenir orde et villaine

    Veu que usance et nourriture

    Sont nommees autre nature

    Or vous ay declairé assez

    La chose que vous pourchassez

    C'est de savoir et de congnoistre

    Cil arbre que l'on voit la croistre

    Chargié de mainte fleur losee

    Par quel je vous ay exposee

    En amour et benignité

    La feminine dignité.

    Tant sy avant et sy au large

    Que le bien le mectez en marge

    Et voustre cueur aussy l'entent

    Vous en devez estre content

    Si nous convient changier propos.

    Et prendre ailleurs ung peu repoz

    Sans plus parler de tel matiere

    Qui est treshaulte et trop entiere

    

  


¶ Icy parle Nature a noble cueur/
et l'enorte luy donnant courage de vengier
le desconfort de noblesse feminine