Cy commence le traittié intitulé les euvangiles des quenoilles
faittes a l'onneur et exaucement des dames.
Maintes gens sont au jour d'huy qui alleguent et auctorisent
leurs parolles et raisons par les euvangilles
des quenouilles qui gaires ne scevent de quele importance
et auctorité elles sont ne qui en furent les sages doctoresses et
premieres inventerresses. Et aincoires qui pis est les alleguent
plus par derrision et en mocquerie qu'ilz ne font par affection
qu'ilz ayent a la grande substance qu'elles contiennent. Et ce font
ilz tousjours en l'amoindrissement et reboutement des dames
dont c'est pechié et grant honte pour ceulx qui ainsy le font.
Car ilz ygnorent la grande noblesse des dames/ et les grans
biens qui d'elles procedent. Car pour ce que la premiere femme
fut faitte et cree en lieu hault et noble plain de net et pur air
pour ce sont toutes femmes naturelement nobles/ nettes/ douces/
courtoises/ et plaines d'esperit legier et inventif et si tressoubtil:
que a bien pou d'ayde elles scevent pluiseurs choses
avenir. Car les passeez et presentes scevent de leur propre nature
selon les conjectures et dispositions des temps des personnes
des auguremens des oyseaulx et des bestes et brief de toutes autres
creatures comme il apperra ou procés de ce livre.
Or est
ainsi doncques que pour obvier a teles injures et teles mocqueries
mettre a neant/ et par contraire exauchier les dames et leurs
euvangiles verifier: je qui de pieça et mesmes des mon enfance
ay esté leur humble clerc et serviteur/ et dont des biens que
d'elles ay receus assez ne me sauroie loer/ je a la requeste d'aucunes
mes treschieres/ ay comme cy aprés porrez veoir mis
par escript et en ordre ce petit traittié qui contient en soy le texte
des euvangiles des quenouilles ensemble pluiseurs gloses
et postiles y adjousteez et esclarciez par aucunes sages dames
desqueles les noms seront cy ensiuvant mis et escrips.

Les noms des dames qui firent le texte des euvangiles des
quenoilles.
Pour entammer doncques ceste euvre il est tout notoire a
tous bons et vrais catholicques que pour mettre et redigier
par escript a la memoire perpetuele des crestiens les saintes
et vraies parolles/ ensambles les vertueuses euvres et fais
de nostre benoit sauveur et redempteur jhesus crist/ et de ses sains
apostres/ furent esleus quatre preudhommes d'entr'eulx plains
de verité et vertus pour faire cestui sainct mistere qui se nomment
euvangiles par les escriptures lesqueles la vraye et sainte
foy catholique est tenue/ enluminee et corroboree/ et sera jusques
en la fin des siecles.
A semblable doncques pour verifier
et mettre en en avant les parolles et auctoritez des femmes
de jadis/ affin aussi de les nom perdre ne telement evanouyr
que la memoire ne puisse estre fresche et recente entre celles du
temps present et de cellui ont esté trouveez six matrones sages
et prudentes pour reciter et lire lesdittes euvangiles des quenouilles
en la maniere que cy aprés sera declairié.
Et pour ce
que en tout tesmoingnage de verité il convient trois femmes
pour deux hommes: pour faire et acomplir doncques le nombre
desdiz quatre euvangelistes il a convenu que six femmes
aient esté empeschiez de faire cestui euvre pour plusgrande approbacion
de verité. desqueles les noms se ensuivent.
La premiere
fut nommee dame ysengrine du glay.
La seconde estoit appellee dame transeline du croq.
La tierce eut nom dame
abonde du four.
La quatre fut appellee dame sebile des
marez.
La quinte eut nom dame gomberde la faee.
Et la sixiesme eut nom dame berthe de corne.
Ces six dames furent
si tressaiges en leur temps que se ce eust esté pour conjurer un
bleu dyable ou pour le loyer dessus un coussin: si estoient elles
assez expertes et habilles.

Qui fut la premiere femme qui mist avant ces euvangiles.
Et comment le composeur de ce livre fut constraint de faire cest
euvre.
Selon ce que je treuve es anciens registres ces euvangiles
furent commenceez des les premiers et second eages
du monde ou temps que regnoit le fort et puissant roy zoroastes
qui fut le premier qui trouva l'art de nygromancie/ de
laquele art il monstra et enseigna partie a la royne sa femme
nommee hermofrodita. et laquele depuis fist de beaux principes
pour le commencement de ces euvangiles. mais elles ne furent
de son temps acheveez. ains d'eage en eage/ et de siecle en siecle
elles ont esté multiplieez/ et par legiers espris infusez es
corages des prudentes femmes chascunes en son temps selon
les auguremens et signes qu'elles povoient concevoir et veoir
tant en la terre comme en l'air.
Et depuis ce temps n'a esté
aincoires aucun/ voire que j'aye sceu ne qui soit venu a ma
congnoissance qui ait volu prendre la paine de les mettre par
escript ou en registre/ au moins le tout/ ne par ordre/ mais ce
tant pou que fait en a esté/ ce a esté confusiblement et par pieces
puis cy puis la sans tenir aucun ordre. et aincoires ce que fait
en a esté/ ç'a esté plus par derrision et mocquerie que autrement
et toutesfois elles ne deffaillent pas de grant mistere. Et pour
vous donner a cognoistre comment je suis venu en ceste temeraire
et presumptueuse hardiesse et outrecuidance que de vouloir
escripre et mettre par ordre cest euvre: il est verité que un
soir aprés souper/ pour cause d'esbat et de passetemps/ es longues
nuis entre le noel et la chandeleur derrain passé/ je me
transportay en l'ostel d'une assez ancienne damoisselle assez prez
ma voisine ou j'avoye acoustumé d'aler souvent deviser/ car
pluiseurs des voisines d'environ venoient illec filer et deviser
de pluiseurs menus et joieux propos dont je prenoie grant
soulas et plaisir. mais pour ceste fois estoient illec les six dames
assambleez qui moult fort estoient empeschiez de diverses
raisons/ et souvent de la grant haste qu'elles avoient de dire
leurs propos: elles anticipoient l'une l'autre et parloient toutes
ensemble.
Moy aucunement honteux de ceste ma soudaine
avenue entr'elles/ me voulz retraire arriere et pris congié d'elles
en moy deportant d'illec. Mais soudainement je fus d'elles
rappellez et de fait arrestez par la robe par l'une d'elles dont moitié
force moitié requeste je retournay et m'assiz entr'elles et leur
priay moult humblement qu'elles me pardonnaissent de ce que
si francement et si baudement me estoie embatus entre elles.
L'une prist la parolle pour toutes les autres. et me dist que
vrayement je leur estoie le tresbien venus et le mieulx que homme
qu'elles sceussent en ce monde. et qu'il leur sembloit que dieu
m'avoit illec amené pour estre en leur ayde attendu le fait en
quoy elles estoient pour ceste heure occuppeez et empeschiez/ et
que mieulx leur drescheroie leur euvre et concept veu que autreffois
en autres matieres avoie escript des dames fort a leur
honneur. et aincoires de present me prioient que le pareil
voulsisse faire a cestui leur tresgrant besoing/ et elles en temps
oportun par elles ou par leurs successeurs me feroient tele remuneracion
que jusques a souffire/ me priant en oultre que
voulsisse entreprendre de mettre par escript un petit volume
qui pour son nom prenderoit. les euvangiles des quenoilles
en memoire et souvenance perpetuele d'elles/ et a l'adreschement
de toutes celles qui vendroient.
Moy aucunement honteux de
la loenge qu'elles me donnoient me cuiday excuser. mais tantost
je fus sy anticipez de parolles/ et de diverses raisons enveloppez:
que tout confus me convint entreprendre ceste charge.
En laquele s'il y a a redire ou aucune faulte/ ou mauvais
entendement: je vous supplie le me pardonner/ et laditte faulte
imputer a celles qui par si tresgrant haste le me disoient:
que loisir ne temps n'avoie aucuneffois les bien entendre/ ne
ma main qui par vieillesse est devenue pesante/ et mes yeulx obnubilez
ne les povoient si hastivement comprendre ne servir
si tost qu'elles eussent bien volu.
Ceste charge doncques par
moy ainsi prise les dames me remercierent grandement/ et
prindrent jour entr'elles et heure de retourner le lendemain aprés
souper. Et me chargierent que avec moy aporttaisse largement
papier et enchre et plumes car elles vouloient determiner
de haultes besoingnes.

L'ordonnance de cestui livre mise en termes par dame ysengrine.
L'endemain a heure assignee je furny de mes agoubilles
me trouvay ou lieu assigné ouquel estoient desja
assambleez les six dames qui aprés moy attendoient. Et elles
de ma venue joyeuses comme par samblance elles demonstroient/
aprés qu'elles me eurent preparé mon lieu pour a mon
aise oyr et escripre leurs oppinions et doctrines: l'une d'elles et
la plus ancienne nommee/ dame ysengrine du glay: commença
a parler aprés licence obtenue des autres ses compaignes
les parolles qui s'ensuivent.
Mes treschieres voisines
et compaignes en ceste vocacion vous voyez/ et aussy il est
tout notoire comment les hommes du temps present ne cessent
de escripre et faire libelles diffamatoires et livres contagieux
poingnans l'onneur de nostre sexe. Et touteffois attendu
que eux et nous sommes fais tous d'un ouvrier descendans l'un
de l'autre. Et encoires puis que dire le me convient sommes
venues et descendues de plus hault et plusnoble lieu qu'ilz ne
sont/ et faittes de matiere plus nette et plus clarifiee que eux: il
m'est avis a correction de vous toutes que bon seroit que a l'ayde
de cestui nostre secretaire et amy nous feissons un petit traittié
des chappitres que volons tenir/ et mettre par ordre/ lesquelz
depieça de noz grandes et anciennes meres ont esté trouveez
affin de les non mettre en oubliance et qu'il puisse venir
entre les mains de celles qui aincoires sont a a venir. Lequel
traittié contendra les chappitres des euvangiles des quenoilles/
ensemble les gloses que aucunes sages et prudentes matrones
y ont adjousté et aincoires feront en multipliant le texte.
Et pour entrer en la matiere et mettre ordre en nostre commencement
vous savez qu'ilz sont six jours ouvriers en la sepmaine
et nous sommes six qui avons empris ceste besoingne/
et qui avons veu et oy recorder par noz anciennes pluiseurs
choses des viel et nouvel testament/ et pluiseurs vraies et bonnes
auctoritez. Si m'est avis en conclusion qu'il seroit bon que
a lundy prochain venant nous assamblissons en l'ostel de maroie
ployarde ou l'en a acoustumé de tenir la serie/ environ
sept heures du vespre/ et illec se c'est vostre avis l'une de nous
commencera sa lecture/ et ses chappitres recitera en la presence
de toutes celles qui illec seront assambleez pour les tenir
et mettre en perpetuele memoire.
Les assistentes tantost et
sans autre deliberacion dirent toutes a une voix que dame ysengrine
avoit tresbien dit. Et de fait lui prierent qu'elle voulsist
entreprendre ceste charge de lire la premiere pour ce lundy
a l'eure assignee/ et elles sans aucune faulte y seroient et sy
prieroient aucunes de leurs voisines vielles et jones pour
mieulx auctorisier leur chappitre. Ceste charge prist moult
volentiers dame ysengrine et dist qu'elle en feroit son mieulx.
En ce disant elle se tourna vers moy et moult amoureusement
me requist que son secretaire voulsisse estre/ et pareillement
de toutes les autres. et qu'elles me feroient guerredonner par
aucunes d'elles des plusjones et a mon chois/ duquel guerredon
je les remercie/ et dont desja je me tiens pour content.