Livre d'amours, auquel est relatee la grant amour et façon par laquelle Pamphille peut jouir de Galathee et le moyen qu'en fist la maquerelle

  

    Livre d'amours: ouquel est relatee

    La grant amour: et façon par laquelle

    Pamphille peut: jouyr de galathee

    Et le moyen: qu'en fist la maquerelle

    

  





  

    Le dieu d'amours qui par amour loial

    Voulut aymer du monde la plus belle

    Tant par amours que son palais royal

    Prendre voulut et eslire avec elle

    Par sa bonté infinie eternelle

    Acroisse bruit au puissant roy de france

    Charles huittiesme pour lequel en substance

    De pamphille et galathee saige

    Traicté d'amours j'ay les faitz a plaisance

    Pour passer temps car sans quelque doubtance

    Siege d'amours gist en noble couraige

    

  

  

    Qui aime bien n'est jamais desloyal

    Mais doulx bening et gracieux a celle

    Qu'il veult aimer sans penser a nul mal

    La vraye amour doit tousjours estre telle

    Qui veult aymer dame ou damoiselle

    De pamphille maintienne l'ordonnance

    Et compasse ses faitz par attrempance

    Sans se monstrer instabile et vollaige

    Soit doulx parlant en termes d'ellegance

    Si trouvera comme en toute naissance

    Siege d'amours gist en noble couraige

    

  

  

    Les haultz princes ont a pié et cheval

    Servi amours et tenu leur querelle

    Joustes faisant par tout amont aval

    Tournes plaisans a la mode nouvelle

    Mais pamphille par une maquerelle

    L'assault gaigna: sans frapper a oultrance

    Sans se tuer et sans rompre la lance

    Galathee sumist en son servaige

    Et si monstra que venus par puissance

    Luy secourut et qu'en telle aliance

    Siege d'amour gist en noble couraige

    

  

  

    Prince puissant mon chief mon asseurance

    Mon seul escu et ma seulle esperance

    Prenez a gré ce trespetit ouvraige

    Cest passe temps une resjouyssance

    Et si voit on dedans que en ceste dance

    Siege d'amours gist en noble couraige

    

  





Comme pamphille amoureux de galathee
commence ses complaintes de
tant qu'il ayme et ne l'ose declairer
et dit



  

    [V]ulneror et clausum porto sub pectore tellum

    Crescit et assidue plaga dolorque michi

    

  

  

    D'ung glaive agu suis vulneré

    Et porte dessoubz ma poitrine

    Le glaive qui m'a vulneré

    Duquel n'ose monstrer le signe

    La playe croist et ne decline

    Point la douleur en moy enclose

    Tel est batu qui plourer ne ose

    

  

  

    Et ferientis adhuc non audeo dicere nomen.

    

  

  

    J'ay sus une mon cueur assis

    Je ne sçay se g'y perviendray

    Mais se une fois en grace suis

    Je feray ce que je vouldray

    C'est hault lieu mais g'y pretendray

    Si voit on ce que je doy craindre

    A trop embrasser pou estraindre

    

  

  

    Je ne sçay s'elle m'ayme ou non

    Mais je croy qu'elle m'aimera

    Et si n'ose dire son nom

    Par moy point on ne le sçaura

    Je pense que elle accordera

    A moy/ mais en tel differance

    Moult remaint de ce que fol pense

    

  

  

    Nec sunt aspectus/ plaga videre suos

    

  

  

    Ma plaie croist en toutes pars

    Et ne veult pas tant seulement

    Laisser qu'on voye ses regars

    Pour me donner guarissement

    Mais encore finablement

    Se je parvien a mon entente

    Je n'y pers que la longue attente

    

  

  

    Unde futura meis majora pericula dampnis

    

  

  

    Pourtant donc que je n'ose dire

    Ma douleur je suis en doubtance

    Que l'ung dangier l'aultre ne tire

    Et que je n'en aye habundance

    J'ay de mon salut esperance

    J'espoir reconfort a mon dueil

    Mais ung mal jamais ne vient seul

    

  

  

    Spero salutis opem nec medicina dabit.

    

  

  

    L'esperance que j'ay d'avoir

    Salut me donne aulcun confort

    Mais si fault il faire debvoir

    Au residu c'est du plusfort

    Espoir est mon seul reconfort

    Touteffois disent les subtilz

    Qu'esperance paist les chetifz

    

  





Les considerations que pamphille
fait devant que aler parler a galathee et
les moyens qu'il doit tenir et dit



  

    Quam prius ipse viam meliorem carpere possum

    

  

  

    Quelle voye doy je donc prendre

    Pour la meilleure a parvenir

    A ce lieu ou je vueil pretendre

    Je ne sçay quel chemin tenir

    Car bien y vouldroye venir

    Par bon moyen se je sçavoye

    Mais dangier est tousjours par voye

    

  

  

    Heu michi quid faciam non bene certus eo

    

  

  

    Helas doncques que doy je faire

    Je craing dangier le mal parlant

    Mon tresgrant ennemy contraire

    Qu'il ne me rencontre en alant

    En montant ou en devallant

    Se je y voys c'est en ceste doubte

    Mal asseur va qui ne voit goute

    

  

  

    Conqueror est que mee justissima causa querelle

    Cum sit consilii copia nulla michi

    

  

  

    Pourtant doncques je me complains

    A parmoy car en ma querelle

    J'ay tresjuste cause de plains

    Quant il n'y a celluy ne celle

    Qui de conseil une estincelle

    Me presente/ ou ayt presenté

    Plainte n'est pas cry de santé

    

  

  

    Sed quia multa nocent opus est michi querere multa

    

  

  

    Mais pourtant qu'en telle entreprinse

    Plusieurs choses peuent encourir

    Qui seroyent cause de reprise

    Plusieurs moyens doy enquerir

    Et le plus utille querir

    Par art secret se ainsi peult estre

    Souvent ayde l'art a son maistre

    

  

  

    Si mea plaga suos denudet in ordine vultus

    Quis sit et unde venit armaque quis posint

    

  

  

    S'il fault que je quiere advocas

    Pour leur dire par ordonnance

    Toute ma douleur et mon cas

    Qui elle est dont vient sa naissance

    Qui cause aussi ma douleance

    Je craingz conseillers desloyaulx

    Tel se dit amy qui est faulx

    

  

  

    Perdet et ipsa sue fortassis spem medicine

    Spes reficit donum fallit et ipsa suum.

    

  

  

    Ainsi donc se la congnoissance

    De ma plaie je determine

    Perdre je pourray l'esperance

    Que j'ay d'en avoir medicine

    Or est esperance si fine

    Que son seigneur souvent repaist

    Et le deçoit quant il luy plaist

    

  

  

    Si tegat ex toto faciem motusque doloris

    Et nunquam querat plaga salutis opem.

    

  

  

    D'aultre part s'il fault que je cueuvre

    Du tout ma face et ma couleur

    Sans que aulcunement je descueuvre

    Les mouvemens de ma douleur

    Sans querir moyen de valeur

    Pour avoir aidance du mire

    Je fais doubte qu'il ne me empire

    

  

  

    Forsitan evenient pejora prioribus istis.

    Et me continget protinus inde mori

    

  

  

    Par trop secret mon cas tenir

    En grant continuation

    Il me pourroit: pire venir

    Que devant en conclusion

    Tellement par succession

    De temps que mourir en pourroye

    Doubter doit qui a double voie

    

  

  

    Estimo monstrari melius nam conditus ignis

    Defficit et subito perditur ipse calor

    

  

  

    Toutesfois a la verité

    Le mieulx comme je puis entendre

    Est que mon mal manifesté

    Soit a quelque ung sans plus attendre

    Car le feu condict en la cendre

    Par trop estre couvert perit

    Souvent cueur ploure et bouche rit

    

  

  

    Ergo loquar veneri/ venus est mors/ vitaque nostra.

    Ducunturque suis omnia consiliis

    

  

  

    Pourtant parleray je a venus

    Des amans princesse et amye

    A qui nous sommes tous tenus

    C'est nostre mort et nostre vie

    C'est celle qui tout seigneurie

    Duyt et conseille toute chose

    Mon mal fault que je luy expose.

    

  





Comme Pamphillus salue la deesse
venus et l'incite d'ouyr ses prieres.



  

    [U]nica spes vite nostre venus inclita salve

    Que facis imperio cuncta subire tuo

    

  

  

    Salut a toy venus haulte princesse

    Nostre salut nostre espoir nostre adresse

    Qui tous humains peulz regir et conduire

    Tu peulz par droit comme dame et maistresse

    Tout gouverner et par ta grant noblesse

    Toutes choses submettre a ton empire.

    Le seul espoir tu es de nostre vie

    Et des plus grans requiers estre servie

    Comme droit est car tu es souveraine

    Throsne d'honneur de beaulté la fontaine

    Medecine des povres langoreux

    Et pour ce cas chascun jour de sepmaine

    Salut te doit tout loyal amoureux.

    

  

  

    Quam timet alta ducum seruitque potentia regum.

    Supplicibus votis tu pia parce meis

    

  

  

    Tu es celle chastellaine une fois

    Que sert et craint la puissance des roys

    Des ducz aussi qui te rendent hommaige

    Les plus vaillans a tout leurs grans arrois

    Comme je voy clerement et congnois

    Par chascun jour viennent a ton seruaige

    Tu es celle qui sans quelque rigueur

    Les ostes hors de peine et de langueur

    Si vien a toy pour faire mon devoir

    Te suppliant que vueilles recevoir

    Les simples veux qu'il fault que je te face.

    Car pour certain je puis veoir et sçavoir

    Si n'est par toy que je n'auray point grace

    

  

  

    Ne sis dura michi precibus que resistere noli

    

  

  

    Ne me soyes point de dure maniere

    Ne resister a ma simple priere

    Vueilles aussi en ma necessité

    Esperance j'ay en toy singuliere

    Fay donc cella qu'il fault que je requiere

    Pouoir en as et seulle auctorité

    Tu le me peulz doulcement accorder

    Pas grans choses ne te vien demander

    

  

  

    Sed fac quod posco non ego magna peto

    Dixi non magna misero michi magna videntur.

    Sed tamen ista dare non tibi difficile est

    

  

  

    Non pas grandes quant au regart de toy

    Mais tresgrandes quant au regart de moy

    Qui suis dolent langoureux et debille

    Pour mon salut a toy recourir doy

    Car ce donner ne t'est point difficille

    

  

  

    Anno dic tantum jam jamque beatus habebor

    Et sic evenient prospera cuncta michi

    

  

  

    Dy seullement pamphille je te octroie

    Tes demandes et je croy fermement

    Que plus joyeulx n'y a que je seroye

    Et bien euré dessoubz le firmament

    Par ton octroy viendront prospereement

    Tous mes desirs comme dire te voys

    Et desclarer du tout mon pensement

    Plaise toy donc a escouter ma voix

    

  





Comme pamphille descript devant
venus la beaulté de celle dont il
estoit amoureux et les causes qui le
retardent de parler a elle.



  

    [E]st mihi vicina vellem non esse puella

    Si non subveniat gratia vestra michi.

    Nam solet ammoto plus ledere proximus ignis

    Sed si vota feret lederet ipsa minus

    

  

  

    Dame j'ay une voysine

    La plus plaisante poupine

    Qui soit pour une pucelle

    Ainsi comme je ymagine

    Se ta grace ne se incline

    A me mettre en grace d'elle

    Je vouldroie tant soit belle

    Que jamais n'en fust nouvelle

    Car tant plus on se reculle

    Du feu et moins on se brusle

    Par quoy quant elle seroit

    Si loing de moy qu'elle ne auroit

    Mes regars en façon nulle

    Sa beaulté ne me nuyroit

    

  

  

    Est in vicinis formosior omnibus illa.

    Aut me fallit amor omnibus aut superest

    Hec mea trajascit certis precordia tellis

    Que nunc inde quero vi removere mea

    

  

  

    Entre toutes autres pucelles

    Je croy que la plus belle soit

    C'est la fleur de toutes les belles

    Ou je dy que amours me deçoit

    Si tost que mon oeil apperçoit

    Son doulx maintien sa belle face

    Tout a travers de mon cueur passe

    Ung feu d'amours dont bruslé suys

    Voulentiers a force l'ostasse

    Mais par mon ame je ne puys

    

  

  

    Vulneris inde nude crescit dolor omnibus horis.

    Mutaturque color vis que calor que meus.

    Hoc nulli dixit nec que michi vulnera fecit

    Nullaque causa fuit dicere que metuit

    

  

  

    De jour en jour croist ma douleur

    Et d'heure en heure multiplie

    Qui me destruit chaleur couleur

    Et me trouble la fantasie

    La peine qui me contrarie

    A personne n'ay revellee

    De peur de honte et villennie

    J'ayme mieulx la tenir cellee

    

  

  

    Dicitur et fateor me melioribus orta est.

    Hinc igitur metuo dicere velle meum

    

  

  

    Elle est doulce moriginee

    Plaisante gratieuse saige

    Et de plus noble ligne nee

    Que moy je congnois son lignaige

    Par quoy descouvrir mon couraige

    Je doubte car ainsi qu'on dit

    Ung franc voulloir transist de raige

    Quant il fault qu'il soit escondit.

    

  

  

    Fertur et est verum quod me scit ditior illa

    Et decus et dotes copia sepe rogat

    Nec michi sunt dotes decus ingens copia grandis.

    Sed quo habere queo quero labore meo

    

  

  

    On dit et aussi je confesse

    Qu'elle a plus que moy de richesse

    C'est une chose veritable

    Or requiert noblesse noblesse

    Et avoir avoir ce me blesse

    Car je ne suys que ung povre diable

    Qui n'ay richesse ne avoir

    Et ne sçay moyen d'en avoir

    Fors du labeur que je puis faire

    C'est ung des poings qui me fait taire

    Car honneur et richesse aussi

    Demandent avoir grant douaire

    Et je ne puys fournir cecy

    

  

  

    Cum vero sit dives cujusdem nata bubulci.

    Eligit e nulle quemlibet illa virum

    

  

  

    Son pere a de beufz si grant somme

    Qu'il peut pour donner a sa fille

    Eslire et choisir ung homme

    Le mieulx a son gré entre mille

    C'est le plus riche de la ville

    Conclusion par quoy je doubte

    Que au long d'elle ne me reboute

    Par povreté a ce besoing

    J'ay bien cause de faire doubte

    De peur d'estre jetté au loing

    

  

  

    Concipit ingentes animos fiducia forme

    In que modum dominum non sunt esse suum.

    

  

  

    Toutesfois sont de ardeur esprins

    Mes membres pour sa grant beaulté

    Mais tout regarde et comprins

    Dire n'ose ma voulenté

    Fiance de formosité

    Souvent conçoit les grans couraiges

    Et voit on a la verité

    En estre atrappez les plus saiges

    

  

  

    Has de corde meo tamptem demere curas

    Sepius obstanti tunc magis arsit amor

    

  

  

    Toutes ces curiositez

    J'ay essayé hors mon cueur mettre

    Par prendre autres felicités

    Mais amour ne l'a peu permettre

    Ains tant que possible peut estre

    La ou je me ay voulu contraindre

    Le feu d'amours a fait acroistre

    Et jamais ne l'ay peu estaindre.

    

  





Comme pamphille en maniere de
epillogue reitere ses prieres et se
plaint de venus qui ne luy respont
point.



  

    En mala nostra vides et nostra pericula nosti

    Unde precor precibus mitis adesto meis

    

  

  

    Ainsi venus tu vois les sommes

    De noz maulx et perilz mortelz

    En quoy a toute heure nous sommes

    Se par toy n'en sommes ostés

    Par quoy je requiers tes bontés

    Que tu soyes doulce et benigne

    Aux veux qui te sont presentés

    Par moy qui devant toy me incline.

    

  

  

    Non michi respondes non dictis porrigis aures

    Non tua clara meum/ lumina lumen habent

    

  

  

    Venus tu ne me respons point

    Ne prestes l'oreille a mes ditz

    Je ne sçay se tu me escondis

    Ce me viendroit trop mal apoint

    D'autre part je regarde ung point

    C'est que tes loyaulx yeulx seullement

    Sus moy qui suis si mal en point

    Tourner ne veux aucunement.

    

  

  

    Aut tu tolle tuas nostre de corde sagittas.

    Aut tu sceva tuis/ vulnera pasce modis.

    

  

  

    Au moins se noz greves douleurs

    Rapaiser ne veulx et guarir

    Oste tes saiettes de noz cueurs

    Sans si asprement nous ferir

    Ou par moyen nous secourir

    Sans faire plaies si cruelles

    Car assez seroit pour mourir

    Se tu ne metz mesure en elles

    

  

  

    Quis posset tanti curam tollerare laboris

    Que domino flenti premia nulla daret.

    

  

  

    Qui esse qui pourra porter

    De si tresgrant labeur la cure

    Se tu ne le veulx supporter

    Et conforter en sa laidure

    Bien est la cure forte et dure

    Qui son seigneur par desconfort

    Seuffre souspirer et endure

    Sans luy donner aucun confort.

    

  

  

    Justo precando tibi mihi nam dolor anxius instat

    Assiduas que preces concipit ipse dolor

    

  

  

    Justes choses je te supplie

    Tu ne me dois point escondire

    Et si fault que je multiplie

    Mes prieres et te les dire

    Par plusieurs foys/ car le martire

    Que j'ay nuyt et jour me contraint

    Faisant doubte qu'il ne me empire

    Car tant plus gelle plus estraint.

    

  

  

    Quant pamphille eut parlé

    Devant venus en lamentant

    En demandant grace et mercy

    Des douleurs dont il avoit tant.

    Venus en le resconfortant

    Parla et dist ce qui ensuyt

    Que pamphille fust escoutant

    Doulcement sans faire grant bruit.

    

  





Comme venus deesse d'amours
parle a pamphille et luy enseigne les
moyens pour jouyr de ses amours



  

    [N]unc venus hec inquit labor improbus omnia vincit.

    Quolibet et poteris ipse labore frui.

    

  

  

    O pamphille j'ay ouy tes clamours

    Ce dist venus la deesse d'amours

    Tes complaintes et lamentations

    Et diz que a moy seulle tu as recours

    Pour te donner allegence et secours

    En tes grandes et dures passions

    Tu dis avoir pené et labeuré

    Et des douleurs grandement enduré

    Mais il te fault encor en endurer

    Et cent fois plus que jamais labeurer

    Car par labeur sans aucune doubtance

    Vaincre pourras et de toy procurer

    Toutes choses ou tu as esperance

    

  

  

    Et monstrare tuos animos nulli verearis.

    Vix erit mille que neget una tibi

    

  

  

    Ne doubte/ soit a femme ou fille

    Dire et monstrer ta fantasie

    Car a grant peine une entre mille

    Tu trouveras qui te denie

    Que voulentiers ne soit ta mye

    Et pour tant sans estre paoureux

    Ta voulenté ne celle mie

    A celle dont es amoureux

    

  

  

    Quamque precando petes prius aspera forte negabit

    Venales sensus improbus emptor habet.

    

  

  

    Peut estre de commencement

    Que ung peu aspre se monstrera

    Mais prie tousjours doulcement

    Car en la fin se moderera

    Et ton parler escoutera

    Se tu es doulcement preschant

    Finablement tienne sera

    Rien n'eschappe a ung bon marchant

    

  

  

    Non mare transsisset pavidus si nauta fuisset

    Turgida cum primum restitit unda rati

    

  

  

    Se tu es loyal amoureux

    Ne crains point a demander grace

    Ung marinier qui est paoureux

    A bien grant peine la mer passe

    Quant il voit le vent qui dechasse

    Les vagues en mer rudement

    Et l'eaue qui l'une fois est basse

    L'autre grande soudainement.

    

  

  

    Ergo tuis primum si non favet illa loquelis

    Arte vel officio fac tamen ut faveat.

    

  

  

    Et pour tant si de prime face

    Elle ne obeist a ton dit

    Ne cuyde pas qu'elle te chasse

    Et ne te tien point escondit

    Mais par art saige et bien conduit

    Par obedience et service

    Que lui feras ainsi qu'il duyt

    Pourchasse tant qu'elle obeisse.

    

  





Comme venus monstre a pamphille
que toutes choses se font par art
ou service agreable.



  

    Ars animos frangit et firmas dirruit urbes

    Arte cadunt turres arte levatur onus

    

  

  

    Art froisse les fermes couraiges

    Art abat les fermes cités

    Par art chaient les fors ouvraiges

    Tours chasteaux en hault lieu boutez

    Par art aussi sont haulz montez

    Les grans fais et pesans fardeaux

    Enfin art fait toutes bontés

    Art aussi fait faire tous maulx

    

  

  

    Et piscis liquidis deprenditur arte sub undis

    Et pedibus siccis per mare transit homo

    

  

  

    Par art dedans caves courans

    Est prins le poisson a la rayz

    Par art sont dessus l'eaue courans

    Les hommes a pié sec par quoy

    Pamphille considere en toy

    Que devant que avoir gallathee

    Et la convertir a ta loy

    Il fault que par art soit temptee

    

  

  

    Rebus et in multis ars adjuvat officiumque.

    Pauper sepe suo pascitur officio

    

  

  

    Tu vois ung povre loricart

    Par artifficiel office

    Devenir ung riche pinarc

    Et acquerir grant benefice

    Il n'est rien que avoir on ne puisse

    Par art ou service agreable

    En effait rien n'est plus propice

    En amours que estre serviable.

    

  

  

    Et quamvis juxta sedatur principis ira.

    Servat et illesum/ corpus opesque reus

    

  

  

    On voit souvent que le coulpable

    Rabat l'ire de son seigneur

    Combien qu'elle soit equitable

    Par avoir blessé son honneur

    Et si garde de deshonneur

    Ses richesses et de dommaige

    Son corps qui est le point greigneur

    Par art subtil et façon saige

    

  

  

    Et gaudet locuplex qui flere solebat egenus

    Et modo vaditur eques qui solet ire pedes

    

  

  

    On voit le riche en grant liesse

    Mener joye et felicité

    Qui par deffaulte de richesse

    Soulloit plourer en povreté

    Cellui aussi qui a esté

    Mille fois a pié par les champs

    Par art estre a cheval monté

    Art a fait mille bons marchans

    

  

  

    Quod donare sibi minime potuere parentes

    hoc excersenti jam dabit officium

    

  

  

    Se serviable tu te rens

    Envers elle/ elle te aymera

    Et ce que donner tes parens

    Ne pourroient/ te donnera

    Quant continuer te voirra

    A service lui presenter

    Trop fort orgueilleuse sera

    Se tu ne la faiz contenter

    

  

  

    Officium que tuum primum si forte recuses

    Tu servire tamen este paratus ei

    

  

  

    Se ton service elle reffuse

    Depremier que a elle viendras

    Ne te chaille ce n'est que ruse

    Point a desdaing ne le prendras

    Par ce point tu l'entretendras

    En amour tant qu'en fin finalle

    A ton entente parviendras

    Et te aymera d'amour loyalle

    

  

  

    Hiis poteris superare minas causantis amice

    Fiet amica tibi que prius hostis erat

    

  

  

    Par les moyens que je t'ay dis

    Toutes les rigueurs de t'amye

    Se saigement tu te conduys

    Suppereras n'en doubtes mye

    Et sera je te certiffie

    Enfin de toy fort amoureuse

    Celle qui te estoit ennemie

    Au devant se fort rigoreuse.

    

  





Comme venus enseigne pamphille
faire jeux et dire plaisantes parolles
devant gallathee et frequenter
les lieux ou elle frequente.



  

    In quibus esse solet loca sepius ipsa frequenta

    Sine potes pulchris pascere pasce jocis

    

  

  

    Il te fault aussi mettre entente

    A souvent les lieux frequenter

    Ou voulentiers elle frequente

    Et ou elle hante hanter

    Devant elle rire chanter

    Et la repaistre de beaux jeux

    Dire beaux motz doulx caqueter

    Et tenir termes gratieux

    

  

  

    Gaudia semper amat et ludi verba juventus

    Et juvenum mentes hec in amore movent

    

  

  

    Tousjours joyes ayme jeunesse

    Et parolles de jeu aussi

    Amours ne veullent que liesse

    Point n'y fault parler de soucy

    Mais de tout jeu car par cecy

    Et tenir termes beaux et gentz

    Souvent se mettent a mercy

    Les pensees des jeunes gens

    

  

  

    Nec non semper ei letis te ultibus offer

    Est cum letitia pulchrior omnis homo

    

  

  

    D'abiz te convient acoustrer

    Le plus mignot que tu pourras

    Et devant elle te monstrer

    Joyeux ou tu la trouveras

    Car plus beau tu luy sembleras

    De luy monstrer joyeuse face

    Jamais beaulté en toy n'auras

    S'il fault que tristesse te chasse

    

  

  

    Nec nimium taceas nec verba superflua dicas

    Despicit et nimio sepe puella virum

    

  

  

    De tenir trop grant gravité

    En langaige te dois garder

    Aussi en superfluyté

    De parolles trop habonder

    Car la pucelle a regarder

    L'homme trop pensant et songart

    De l'aimer se peut retarder

    Et ne l'appelle que busart.

    

  

  

    Exitat et nutrit/ facundia dulcis amorem.

    Multotiens animos mitigat illa feros

    

  

  

    La chose qui plus en ce monde

    Excite et nourrist amours

    C'est doulce et plaisante faconde

    Sans avoir langaige a rebours

    Tousjours beau parler est en cours

    Et si voit on les haultz couraiges

    Estre moderez tous les jours

    Et convaincus par beaux langaiges

    

  

  

    Si locus est illi jocundis vocibus insta

    Quod vix sperasti jam dabit illa tibi

    

  

  

    Apres agreable service

    Receu pour le commencement

    Se elle se treuve en lieu propice

    Dy luy quelque mot hardiement

    En amours tout secretement

    Car par adventure que adoncques

    Auras d'elle courtoisement

    Cella que avoir tu ne peuz oncques.

    

  

  

    Non scivit interdum pudor illi promere votum.

    Sed quod habere cupit hoc magis illa vocat

    

  

  

    Il te fault entendre que honte

    Ne seuffre pas aucuneffois

    Une pucelle tenir conte

    De ce qu'elle ayme touteffois

    Se elle trouvoit bien a son choys

    Lieu propice elle accorderoit

    La chose que souventeffois

    Au paravant neyee auroit.

    

  

  

    Pulchrius esse putat vi perdere virginitatem.

    Quam dicat de me fac modo velle tuum.

    

  

  

    A parler a la verité

    Pucelle croit chose plus belle

    Perdre a force virginité

    Et se tenir ung peu rebelle

    Que de dire a l'homme que de elle

    Il face a sa voulenté

    Jamais on ne a une pucelle

    Sans aucune difficulté.

    

  

  

    Hoc nimium caveas ne sit tibi circa supellex.

    Nesciat esse tuum pauperiam que tuam.

    

  

  

    Sus toutes choses garde bien

    D'avoir mauvais habillement

    Se tu es povre n'en dy rien

    A elle principallement

    Et si garde totallement

    De luy dire ta residence

    Ou elle puisse aucunement

    Savoir se tu as indigence

    

  

  

    Exiguo pulchram ducit solertia vitam

    Jocundo que suas ore tegit lachrimas

    

  

  

    Le saige maine vie honneste

    De si petit qu'il peut avoir

    Sans que son estat magnifeste

    Qu'il n'est ja mestier de sçavoir

    Se tu veulx faire ton devoir

    Garde toy de dire nulle heure

    Que tu as souffrance d'avoir

    Souvent bouche ryt que cueur pleure

    

  

  

    Quod non esses simulare potes dictis habitu que.

    Maxima sors parvo contigit ingenio

    

  

  

    A celle fin de mieulx attaindre

    Et venir a fin de ton fait

    Aucuneffois tu peulz bien faindre

    Estre tel que n'es pas de fait

    Le dit et l'abit en effect

    Aucuneffois aydent a l'homme

    Et apparaist estre parfait

    Tel qu'il ne vault pas qu'on le nomme

    

  

  

    Plurima mundus habet sua que vicinia nescit.

    De quibus apta sibi plura referre potest.

    

  

  

    Le monde a plusieurs povretés

    De quoy son voysin ne sçait rien

    Tel a de grans necessités

    Qui dit qu'il est tout plain de bien

    Pour ce pamphille garde bien

    De dire que soies souffreteux

    Mais dy plus tost que tout est tien

    Ou tu n'es point vray amoureux.

    

  

  

    Crede quod interdum multis mendatia prosunt.

    Et quandoque nocet omnia vera loqui

    

  

  

    Croy pamphille que bien mentir

    Aucuneffois est treslicite

    Il ne s'en fault point repentir

    On voit que a plusieurs il proffite

    Verité aussi estre dicte

    A toute heure n'est pas louable

    En une amoureuse poursuyte

    Mentir est souvent convenable.

    

  





Comme venus admonneste pamphille
de estre gratieux et habandonné
aux serviteurs de la maison la
ou il veult estre amoureux.



  

    Et famulos famulas que dominus sibi sepe loquentes

    Allice colloquus muneribus que tuis

    

  

  

    Aux serviteurs et serviteures

    De celle que tu aimeras

    Monstrer te fault a toutes heures

    Begnin quant a eulx parleras

    Par les dons que tu leur feras

    Et beau parler a ta mignonne

    Cent fois recommandé seras

    Et diront bien de ta personne.

    

  

  

    Ut semper referant de te bona verba vicissim

    Et pascant dominam laudibus usque tuis.

    

  

  

    Je te exorte estre habandonné

    Aux servans sans les escondire

    Car si tu leur as rien donné

    A leur maistresse le yront dire

    Et ta grant largesse descrire

    Tes vertus et grans preminence

    Si qu'en la fin sans contredire

    Elle aura en toy confidence.

    

  

  

    Dum dubio dubias mentes in pectore versat

    An faciat vel non nesciat velle tuum.

    

  

  

    Plusieurs doubtes elle fera

    Premierement que se accordez

    Et plusieurs fois reffusera

    Devant qu'en puisses aborder.

    Mais se tu sçaiz beau demander

    En la fin tu en jouyras

    Pourtant pense de recorder

    Les beaulx motz que tu luy diras

    

  

  

    Tunc illam multo certamine sepe fatiga

    Ut cicius possis victor amore frui

    

  

  

    Pour te cuyder rendre confus

    De grans raisons alleguera

    En tenant termes de refus

    Mais a l'heure que ce sera

    Reprouve ce qu'elle dira

    Par belles raisons sophistiques

    En quoy elle s'abusera

    Se sagement tu les applicques

    

  

  

    Pellitur huc animus hominum vel pellitur illuc

    Sepe labore brevi dum manet in dubio.

    

  

  

    Doubter ne doibz aulcunement

    Car le vouloir d'homme doutable

    Change propos incessamment

    Comme inconstant et variable

    Mais il te fault estre immuable

    Ferme constant en ung propos

    Et pourchasser comme notable

    Ta proye sans avoir repos

    

  

  

    Et placeat nobis interpres semper utriusque

    Quod caute referat hoc quod uterque cupit

    

  

  

    Je ne sçay se tu es constant

    A tenir nostre enseignement

    Ainsi que dit est et pourtant

    Nous qui tenon le jugement

    Des amans jugeron comment

    Tu qui es en fleur de jeunesse

    Auras pourchassé vaillamment

    Au regart de nostre vieillesse

    

  

  

    Des operations aux jeunes

    Doivent jugier les anciens

    Car par leurs oeuvres anciennes

    De droit ilz sont praticiens

    Et tous les utilles moyens

    Du train d'amours ilz sçayvent bien

    Pourtant disent les plus sciens

    Qu'il n'est trace que de viel chien

    

  

  

    Emula nam juvenum dijudicat acta senectus

    Et simul hos prohibet litigiosa loqui

    

  

  

    Quant les jeunes sont en debat

    Et en parler litigieux

    Leur ire rappaise et rafait

    Souvent la doctrine des vieulx

    Et leur deffent user entre eulx

    De parolles litigeuses

    Mais avoir termes gracieux

    Et en parolles amoureuses

    

  

  

    Incipe spe melius dedit et dabit omnia tempus.

    Non timor ullus erit in quibus esse times.

    

  

  

    Pource pamphille hardiement

    Commence par bonne esperance

    A ton joyeulx commencement

    Faire ne doibz quelque doubtance

    Le temps te donra asseurance

    Et ou tu craingz qu'elle repugne

    De vouloir faire a ta plaisance

    Tu ne trouveras crainte aucune

    

  

  

    Non tibi plus dicam vinces studiosus amicam

    Inceptum que viis mille patebit opus.

    

  

  

    Plus ne t'en dy ne te diray

    Mais se tu es bien studieux

    Tu vaincras car je t'aideray

    Mais il te fault estre soingneux

    Car par nulles voyes et lieux

    L'oeuvre de ton inception

    Apparoistra de mieulx en mieulx

    Pour venir a perfection

    

  





Comme pamphille dit que
par le conseil de venus il ne luy
est point amendé Ains que sa
douleur est aussi grande ou
plus que devant



  

    [I]ncolumis leviter egro solatia prebet

    Nec minus infirmus sentit adesse malum

    

  

  

    On dit que ung sain legierement

    Au malade donne soulas

    Bien est legiere voirement

    L'ayde que me donne en mon cas

    Venus: car je me sens plus las

    Ou autant que devant estoye

    Je puys bien dire dieux helas

    Je croy que jamais n'auray joye

    

  

  

    Consilio veneris michi non dolor alleviatur

    Sed meus in tristi pectore versat amor.

    

  

  

    Le conseil de dame venus

    Ne m'a point la douleur ostee

    De qui mes membres sont tenus

    Ains croy qu'elle soit augmentee

    Et pour l'amour de galathee

    Que j'ay cloz dedens ma poitrine

    Incessantement tourmentee

    Du feu d'amour qui point ne fine

    

  

  

    Hactenus auxilii mihi spes fuit omnia nulla

    Spes modo discessit et manet ipse dolor

    

  

  

    Maintenant esperance avoye

    En venus que totallement

    Par elle conforté seroye

    Mais je ne apperçoy nullement

    Que j'aye aulcun allegement

    Esperance s'est separee

    De moy/ et m'est entierement

    Toute la douleur demouree

    

  

  

    Non miser evadam me nauta reliquit in undis

    Et portum quero nec reperire queo.

    

  

  

    Point ne esvaderay ce dangier

    Car le marinier me delaisse

    Es eaux ou je ne puis nagier

    C'est venus la haulte deesse

    Ou je cuydoye avoir adresse

    En ma douleur et reconfort

    Mais il fault bien que je congnoisse

    Que j'ay cherchié sans trouver port

    

  

  

    Sed modo quid faciam mea spes modo spectat ad illam

    Illi me noviter convenit ire loqui

    

  

  

    Maintenant que feray je doncques

    Plus d'esperance n'ay en elle

    Plus esbahy que ne fuz oncques

    Je suis: pour neant je l'appelle

    Aler me fault parler a celle

    Pour qui ceste douleur me tient

    Helas la gracieuse et belle

    Voycy ou vers moy elle vient

    

  





Comme pamphille en appercevant
galathee qui vient vers luy se esbahit
tellement qu'il ne sçait quel propoz
tenir vers elle tant se treuve
entreprins et dit



  

    Quam formosa deus nudis venit illa capillis

    Quantus inesset ei nunc locus inde loqui

    

  

  

    Qu'elle est belle beau sire dieu

    Doulce gracieuse et honneste

    La voycy venir en ce lieu

    En beaux cheveulx toute nue teste

    Quel lieu pour faire ma requeste

    Luy seroit maintenant propice

    Qui de faire estoit toute preste

    Je ne sçay ou faire la puisse

    

  

  

    Sed subito quanti michi nunc venere timores

    Nec mea mens mecum nec mea verba manent

    

  

  

    Je ne sçay dont ces craintes viennent

    Qui me ont feru soubdainement

    Et de luy declairer me tiennent

    Ce qui gist en mon pensement

    Plus n'ay sens ne entendement

    Toutes mes parolles se changent

    Ma pensee pareillement

    Et mes espris de moy se estrangent

    

  

  

    Nec michi sunt vires tripidantque manus que pedes que

    Actonio nullus congruus est hatubis

    

  

  

    J'ay toute ma force perdue

    Mes piez tremblent incessemment

    Tout aussi tost que je l'ay veue

    A commencé leur tremblement

    Des mains aussi semblablement

    Et n'est habitude congrue

    De luy aler dire comment

    Elle me a la force tollue

    

  

  

    Mentis in affectu sibi dicere plura pavi

    Sed timor excussit dicere que volui.

    

  

  

    Au devant que je la trouvasse

    Plusieurs choses pensé avoye

    Qu'il failloit que luy declairasse

    Et que declairer luy pensoye

    Mais je ne sçay par quelle voye

    Crainte m'est venu attraper

    Tant que de tout ce que vouloye

    Ung mot ne sçauroit eschapper

    

  

  

    Non sum qui fueram vix me cognoscere possum

    Non bene vox sequitur sed tamen inde loquor

    

  

  

    Plus ne suis cil que j'ay esté

    A peine je me recongnois

    Puis que mon esperit me est osté

    Je voys et ne sçay ou je vois

    Si fault il parler touteffois

    Mon esperit n'a point de repoz

    Je le congnois bien a ma voix

    Qui ne peult suyvre mon propoz

    

  





Comme pamphille salue galathee
Et est si surprins et esmeu qu'il ne
tient comme point de propoz



  

    Ulterius ville mea neptis mille salutes

    Per me mandavit officium que tibi

    Hec te cognoscit dictis et nomine tantum

    Sed te si locus est ipsa videre cupit

    

  

  

    Belle gracieuse et plaisante

    J'ay en ceste ville une tante

    Qui fort se recommande a toy

    Et si te mande depar moy

    Qu'elle est toute tienne servante

    De te congnoistre elle se vante

    De dict et de nom seulement

    Mais de te voir est desirante

    Se possible est aulcunement

    

  

  

    Illic me voluere unde retinere parentes.

    De quibus electis villa redundat ibi.

    

  

  

    La me ont bien voulu retenir

    Les parens d'une belle et gente

    Mais il m'en a faillu venir

    Car j'avoye ailleurs mon entente

    Ilz me ont offert douaire et rente

    Avecques la doulce pucelle

    Des aultres choses plus de trente

    Qu'il n'est ja mestier qu'on revelle

    

  

  

    Hii michi cum umma spondebant dote puellam.

    Pluraque: que non est cura referre modo.

    

  

  

    Toute leur offre entierement

    Refusee ay par ordonnance

    Sans y donner consentement

    Car en toy seule ay prins plaisance

    Et n'y a au monde chevance

    Argent contant ne or en masse

    Que pour avoir la jouyssance

    De ton amour ne refusasse

    

  

  

    Omnia postposui tu mihi sola placuisti

    Respuere pro te quicquid in orbe manet

    

  

  

    Belle ne te vueille desplaire

    Je ne parle qu'en m'esbatant

    J'aymeroye mieulx a moy taire

    Que de toy desplaire et pourtant

    Soit ton bon plaisir consentant

    A me ouyr parler en ce lieu

    Ainsi que amoureux combatant

    Mais ce que je dy n'est que jeu

    

  

  

    Ludendo loquimur loquitur sic sepe juventus

    Verbula ficta jocis jurgia nulla movent.

    

  

  

    Jeunesse parle voulentiers

    D'amours il est bon a sçavoir

    Entre les saiges et entiers

    Jeu honneste est a recepvoir

    Et si ne doivent point mouvoir

    Parolles de jeu nul debat

    Quant on peult bien appercevoir

    Qu'on ne les dit que par esbat

    

  

  

    Sed modo dicamus cordis secreta vicissim

    Dicta que preter nos nesciat alter homo

    

  

  

    Mais pourtant belle qu'il me semble

    Que voycy lieu assez decent

    Que nous pouons parler ensemble

    Se vostre plaisir se y consent

    Car le monde est de nous absent

    Oultre je ne desire point

    Rien dire qui soit indecent

    Et qui blasme touche ung seul point

    

  

  

    Demus et inde fidem fieri sic postea dicam

    Primitus incepi/ primitus inde loquar

    

  

  

    Nos modo concordes debemus vera fateri

    Gratior in mundo te michi nulla manet

    Mais devant que nous nous metton

    A rien dire plus amplement

    L'ung a l'aultre foy prometton

    De tout garder secretement

    Touteffois au commencement

    Je parleray c'est la rayson

    Car j'ay parlé premierement

    Et ay commencé le blason

    

  





Comme pamphille dit a galathee
qu'il l'aime et l'espace du
temps qu'il l'a aymee sans luy
dire



  

    [N]os modo concordes debemus vera fateri

    Gratior in mundo te michi nulla manet

    

  

  

    Maintenant nous sommes d'accord

    Il ne reste que recorder

    Chascun son faict/ c'est du plus fort

    Pour voir se pourrons acorder

    Gallathee sans me bourder

    Saches que ta doulce faconde

    Plus m'est plaisante a regarder

    Que toutes les choses du monde

    

  

  

    Ut te dilexi jam te pertransiit annus

    Nostra nec ausus eram vota referre tibi.

    

  

  

    Il y a ja ung an passé

    Que je t'aime d'amour certaine

    Et ay couru et tracassé

    Pour te voir par mainte sepmaine

    Mais craignant reproche vilaine

    Jamais dire la cruaulté

    Ne osay ne la douleur et peine

    Que j'avoye pour ta beaulté

    

  

  

    Tempore non longuo loquitur sapientia surdo

    Nos que diu frustra non decet inde loqui

    

  

  

    Je te dy mon vouloir en court

    Il n'y fault point de long languaige

    Tenir long procés a ung sourt

    N'est point maniere d'homme saige

    Je te desclaire mon couraige

    Mais se tu veulx faire la sourde

    Je pers mon temps et mon ouvrage

    Qui me seroit chose bien lourde

    

  

  

    Te constanter amo modo plus tibi dicere nolo.

    Donec tu dices quid placet inde tibi

    

  

  

    Je te aime tres constantement

    Maintenant plus ne t'en vueil dire

    Tant que tu diras plainement

    Pamphille que veulx tu beau sire

    Je ne te vueil point escondire

    Adoncques je me enhardiray

    Et la grant douleur et martire

    Que j'ay chascun jour te diray

    

  





Comme galathee respont a pamphile
et luy dit que plusieurs pucelles
ont esté deceues par le doulx parler
des amoureux



  

    [S]ic multi multas multo temptamine fallunt.

    

  

  

    Pamphille tu me diz aymer

    Mais ce ne sont que parabolles

    Beau parler jurer affermer

    En amours ne sont que frivolles

    Plusieurs par leurs doulces parolles

    Et temptation mise en voye

    Ont deceu plusieurs jeunes folles

    Comme moy se je te creoye

    

  

  

    Sic multas fallit ingeniosus amor

    

  

  

    Je sçay bien que tous amoureux

    Sont subtilz en temptation

    Puis amour est ingenieux

    De sa propre condition

    Parquoy en la deception

    D'amours sont souvent attrappés

    Ceulx qui par adulation

    De beau language sont frappés

    

  

  

    Infamare tuo sermone vel arte putasti.

    Quam falli nostro non dece ingenio

    

  

  

    Je sçay bien et me tiens asseur

    Que tu croys mon entendement

    Changier par art et par doulceur

    De ton amoureux parlement

    Mais pamphille croy fermement

    Que par l'art que tu peulz sçavoir

    Il ne apartient aulcunement

    Que je me laisse decepvoir

    

  

  

    Quere tuis alias in cestis moribus aptas.

    Quas tua falsa fides et dolus infatuet

    

  

  

    Va pourchasser aultre que moy

    A tes folles meurs convenables

    Car je ne vueil ouyr de toy

    Quelques regretz ou fainctes fables

    Tes juremens sont decepvables

    En tel cas ta foy n'y vault rien

    Pourtant va querir tes semblables

    Aultres que moy tu feras bien

    

  





La responce de pamphille contre ce
que galathee a cy devant dit et argue
que les bons ne doivent point
estre pugnis pour les maulvais et
dit



  

    Et sic impediunt justos peccata malorum

    Hic nocet alterius non mea culpa michi.

    

  

  

    Ha ha galathee je regarde

    Que tu prens excusation

    Et aux oeuvres des mauvais garde/

    Pour me donner objection

    Bien voy que l'operation

    Et la coulpe d'aultruy me nuyt

    Les maulvais sont occasion

    De tollir aux justes leur fruyt

    

  

  

    Sed tamen ascultet me gratia vestra benigne

    Et liceat domine dicere pauca mee.

    

  

  

    Mais galathee nonobstant

    Je vous prie que prenez espace

    De reposer en me escoutant

    Ung peu de vostre bonne grace

    Sans que je die ne que face

    Chose en quoy soit trouvé blasme

    Si non qu'on me donne l'audace

    De parler ung peu a ma dame

    

  

  

    Inde deum celi testorum quoque numina terre

    Non loquor ista tibi fraude vel ingenio

    

  

  

    Galathee donne moy lieu

    De te dire ma voulenté

    Du ciel je tesmoigne le dieu

    Et de terre la deité

    Que par quelque infidelité

    Mal engin ou abusement

    Ne sera par moy recité

    Quelque petit mot seulement

    

  

  

    Nec manet in mundo modo te michi gratior ulla.

    Carnis et nullum mens animusque videt

    

  

  

    J'ay dit qu'il n'y a celle au monde

    Qui tant me plaise que tu fais

    Je le dy pour la fois seconde

    Ainsi que j'ay dy une fois

    Tant chierement je voy tes fais

    Que cueur voulenté et couraige

    Et tous mes espris sont refais

    Quant je voy ton biau personnaige

    

  

  

    Sed loquor inde casum tua mens puerilis et etas.

    Quid nocet aut prodest noscere nescit adhuc

    

  

  

    Mais je parle a toy vainement

    Car trop es encor jeune et tendre

    Pour congnoistre si promptement

    Le bien a quoy je vueil pretendre

    Ton aage ne peult pas comprendre

    Tant est encor jeune et petite

    Si ce que je te donne entendre

    Porte dommaige ou s'il profite

    

  

  

    Junior antiqua quamvis sit acutior etas

    Nam cum multa senes plura vident

    

  

  

    Touteffois jeunesse est habille

    Pour plus ung cas tost concepvoir

    Que vieillesse qui est debille

    Combien qu'elle ait plus de sçavoir

    On peult souvent apparcevoir

    Que les jeunes ingenieulx

    Peuent la congnoissance avoir

    De plus de choses que les vieulx

    

  

  

    Et quamuis juvenis fac ut cognoscere possis

    Quis sim que mea res quisve meus sit amor.

    

  

  

    Combien doncques que jeune soyes

    Montre toy antique en prudance

    Et que tu congnoisses et voyes

    La fin ou parvenir je pense

    Et que par certaine science

    Me congnoisse et qui je suis

    L'amour aussi grande et immense

    Dont je te ayme tant que je puis

    

  

  

    Cunctarum rerum prudentia ducitur usu.

    Usus et ars docuit quod sapit omnis amor

    

  

  

    De toutes choses par usaige

    Peult on la verité congnoistre

    Pourtant le proverbe du saige

    Nous dit que l'usaige rent maistre

    Tout ce qui en amour peult estre

    Est sceu par usaige et par art

    Pourtant la belle tu dois mettre

    A me congnoistre ton regart

    

  

  

    Ire venire loqui nec non dare verba vicissim

    Esse simul tantum deprecor vt liceat.

    

  

  

    Aler venir secretement

    Parler ensemble honnestement

    N'est point cause de vilennie

    Et pourtant belle je te prie

    Que ce permettes seulement

    Estre pouons licitement

    Ensemble amoureurement

    Sans estre reprins car m'amie

    Aler venir secretement

    Parler ensemble honnestement

    N'est point cause de vilennie

    

  

  

    Non nisi colloquio cognoscimus intima cordis.

    Ipsa referre potes quid placet inde tibi

    

  

  

    Du dedans du cueur clerement

    La congnoissance proprement

    Premier par parolle est baillie

    Pource dy moy je te supplie

    Qu'il t'en plaist/ car certainement

    Aler venir secretement

    Parler ensemble honnestement

    N'est point cause de vilennie

    Et pourtant belle je te prie

    Que ce permettes seulement

    

  





Comme galathee acorde a pamphile
escouter ce que il vouldra dire
qui est la premiere cause de sa deception



  

    [I]re venire loqui tibi nec cuiquam prohibebo.

    Quisquis ubique vias ire viator habet

    

  

  

    Aller et parler ne pourroye

    A toy ne a aultres deffendre

    Car chascun viateur peult prendre

    Ainsi que bon luy semble voye

    Tu ditz que trop rude seroye

    Se ton parler ne vueil entendre

    Aler et parler ne pourroye

    A toy ne a aultre deffendre

    

  

  

    Quant mille fois j'escouteroye

    La fin a quoy tu veulx pretendre

    Si ne me ferois tu pas rendre

    A ton plaisir mais chose vraye

    Aler et parler ne pourroye

    A toy ne a aultre deffendre

    Car chascun viateur peut prendre

    Ainsi que bon luy semble voye

    

  

  

    Convenit est et honor ut det responsa patenti.

    Et quoscunque videt queque puella nocet

    

  

  

    Chose convenable et decente

    Est a toute jeune pucelle

    Sans que a mal faire se consente

    De parler quant on parle a elle

    De respondre quant on l'appelle

    Voulentiers: chascun saluer

    Sans se monstrer fiere et rebelle

    On ne la peult redarguer

    

  

  

    Hoc concedo satis tibi tu vel quilibet alter

    Ut veniat salvo semper honore meo

    

  

  

    Pource pamphille je concede

    Que toy ou aultre parle a moy

    Fors que le parler ne procede

    Que en honneur: car d'aultre ou de toy

    Le parler escouter ne doy

    Se je apperçoy que en deshonneur

    Vueille touchier je ne sçay quoy

    Mais assés en termes de honneur

    

  

  

    A stultare licet et reddere verba puellis

    Convenit ista tamen ut moderanter agant

    

  

  

    Chose licite est escouter

    Et rendre responce aux pucelles

    Touteffois ilz doyvent doubter

    Qu'on ne touche point l'honneur d'elles

    Par moyen en parolles belles

    Respondre a ce qu'on parlera

    Car porteurs de faulces nouvelles

    Sont prestz d'ouyr ce que on dira

    

  

  

    Verbula si dederis ludendo verbula reddam

    Sed si forte nocent hec tibi non patiar.

    

  

  

    Pource pamphille en t'esbatant

    Se tu ditz parolles plaisantes

    Je rendray autant pour autant

    Toutes parolles esbatantes

    Mais se tu dictz choses nuysantes

    Jamais ne te le permettroye

    Se ce sont parolles cuisantes

    Pour rien ne les escouteroye

    

  

  

    Nos simul esse petis solos simul esse recuso

    Quere locum publicum non tibi sola loquar

    

  

  

    Que soyons seul a seul ensemble

    Tu demandes: certainement

    Ce n'est pas honneur ce me semble

    Mieulx vault parler publiquement

    Qu'il ne fait solitairement

    Dont il peult venir villennie

    Se faire le veulx aultrement

    Point ne te presteray l'ouye

    

  

  

    Nam loca sola nocent infamia nascitur inde

    

  

  

    Par ce pamphille se tu veulx

    Que devant tous en general

    Ensemble nous parlon nous deux

    Je l'offre de cueur liberal

    Car le monde est si desloial

    S'il voit gens ensemble parler

    Que plustost y pense le mal

    Que le bien pour le flajoller

    

  

  

    Tutius inde loqaar plebe videntur tibi

    

  

  

    Et pource quant les gens seront

    Presens qui de joyeuseté

    Ensemble parler nous verront

    Je parleray plus a seurté

    Car je sçay qu'en communité

    Tousjours y a quelque envieux

    Et a grande difficulté

    On se peult garder de tant de yeulx

    

  





Comme pamphille remercye galathee
de ce qu'elle lui permet parler
a elle puys en fin lui demande ung
baiser faignant n'oser ce faire.



  

    [N]on michi parva modo sed munera magna dedisti.

    Nempe michi tantum sufficit alloquium

    

  

  

    Gallathee ma doulce amye

    Humblement je te remercye

    De ce que m'as habandonné

    Tu ne m'as pas icy donné

    Peu de chose par courtoisie

    Seullement me prester l'ouye

    En quoy soit ma parolle ouye

    Je suys haultement gardonné

    Gallathee ma doulce amye

    Humblement je te remercie

    De ce que m'as habandonné

    

  

  

    Du demeurant ne me soucye

    Puis que parler en compaignie

    Je puys dieu me y a amené

    Jamais ne fuz mieulx assigné

    Pour faire mon oeuvre acomplye

    Gallathee ma doulce amye

    Humblement je te remercie

    De ce que m'as habandonné

    Tu ne m'as pas icy donné

    Peu de chose par courtoisie

    

  

  

    Hiis meritis dignas nequeo tibi reddere grates.

    Equari meritis non valet hoc meritum.

    

  

  

    Je ne puis graces assés dignes

    Te rendre a si grant merite

    Trop grandement a moy te inclines

    Louenge n'est assez licite

    Qui devant toy puisse estre dicte

    Pour ce merite equaliser

    Ma bouche seroit trop petite

    Pour suffisamment le priser

    

  

  

    Sed fortassis adhuc venient tempus que dies que

    Quo se monstrabit si quis amicus erit.

    

  

  

    Mais par adventure le temps

    Et les jours viendront qu'on voirra

    S'il vient ainsi comme je entens

    Qui est vray amy et sera

    Qui est amy se monstrera

    Ung jour qui vient ce ay je esperance

    Et que chascun dire pourra

    J'ay prins amours a ma plaisance.

    

  

  

    Nec tibi displiceat non audeo dicere plura

    Quamvis te peterem pauca libenter adhuc.

    

  

  

    Jamais ne fuz si a mon aise

    Que je le suys c'est chose vraye

    Gallathee ne te desplaise

    J'ay cella que je demandoie

    Plus rien demander n'oseroie

    Combien qu'il y ait quelque chose

    Que voulentiers demanderoie

    Elle est petite mais je n'ose

    

  

  

    Nos alternatim complexus basia tactus

    Ut dare possimus cum locus affuerit

    

  

  

    Si me le fault il exposer

    C'est s'il te plaisoit de ta grace

    Que l'ung l'autre peussions baiser

    Quant temps nous viendroit et espace

    Car de baiser ta doulce face

    Et accoller ton beau corps gent

    Me seroit trop plus grande grace

    Que avoir l'or du monde et l'argent

    

  





Comme gallathee accorde que pamphille
la baise et accolle seullement et
pour couvrir son cas luy deffent que autre
chose ne luy demande



  

    Quamvis illicitum complexus nutrit amorem

    Et fallunt dominam basia sepe suam.

    

  

  

    Combien que le baiser nourrisse

    Amour illicite et infame

    Et qu'il soit fontaine de vice

    Et de vitupere a sa dame

    Touteffois sans penser a blasme

    Pamphille se lieu vient apoint

    Je cuyde bien que je suis femme

    De ne vous escondire point

    

  

  

    Hoc patiar solum sed tu nichil amplius addas

    Nam cuiquam sine te talia non paterer.

    

  

  

    Pour ung baiser tant seullement

    Contente suys de l'accorder

    Fors que ce soit secretement

    Qu'on ne nous puisse regarder

    Mais garde de plus demander

    Car jamais ne me accorderoie

    Que autre me venist aborder

    Pour baiser je ne daigneroie

    

  

  

    Sed modo de templo venient uterque parentes.

    Est michi ne causer convenit ire domum

    

  

  

    A dieu te dy car je contemple

    Que tantost mon pere et ma mere

    Sont prestz de revenir du temple

    Je m'en voys je crains vitupere

    Car s'il advenoit que mon pere

    Fust arrivé a la maison

    Il me batroit c'est chose clere

    Je m'en vois il en est saison.

    

  

  

    Tempora sat veniant pariter quibus ambo loquimur

    Et memor alterius quisque sit interea

    

  

  

    Icy trop longuement je attens

    Je m'en voys il m'en fault aller

    Mais il viendra assés de temps

    Que pourrons ensemble parler

    Entrebaiser et accoller

    Comme dit est mais nonobstant

    Vueille soy tousjours recoller

    Chascun l'ung de l'autre entretant.

    

  





Comme pamphille apres le depart
de gallathee loue son beau commencement
et fait plusieurs considerations
pour la perfection de son oeuvre.



  

    Letior in toto me non est nec fuit orbe

    Figitur in rippis anchora nostra suis

    

  

  

    Or doy je bien dieu mercier

    Et fortune pareillement

    Je ne me doy point soucyer

    J'ay fait ung beau commencement

    Je croy que soubz le firmament

    N'y ayt plus joyeux que je suys

    Puys que une fois dire je puys

    Que j'ay ataché a son port

    Mon ancre est fichie sus le bort

    A peine pourroit eschapper

    Oncques més si grant resconfort

    En mon cueur ne se vint frapper

    

  

  

    Me subito nimium deus et fortuna beavit

    Nam dives redeo qui miser ante fui

    

  

  

    Or me ont bien tost dieu et fortune

    Fait venir a heure opportune

    Pour mes requestes obtenir

    Je croy qu'il n'est personne aucune

    Dessoubz le siecle de la lune

    Qui mieulx y eust sceu parvenir

    Bien en haste suys devenu

    Riche qui povre suis venu

    Et m'en retourne maintenant

    Bieneureux je suys obtenant

    Mon desir qui en grant tristesse

    Naguaires estoie en venant

    Et je m'en revois en liesse

    

  

  

    Illius et frustra quod sim memor illa rogavit

    Quam te mente mea nec labor excuteret

    

  

  

    Helas c'estoit bien pour nyant

    Qu'elle m'a prié que je fusse

    D'elle memor/ il m'en souvient

    Plus que dire peu ne luy eusse

    Car il n'est labeur que je peusse

    En tout ce monde icy porter

    Par lequel bonnement je sceusse

    Hors de mon couraige l'oster

    

  

  

    Non mecum sentit nec ut desidero noscit

    Sum velut ipse sui sit memor illa mei

    

  

  

    Mais la povre fille ne sçait

    Pas la grant amour de nature

    Dont je l'aime ne ne conçoit

    Pas le mal que pour elle endure

    Qui sans termination dure

    Si prie dieu qu'elle soit de moy

    Aussi souvenante en droicture

    Comme je le serai de soy

    

  

  

    Pluribus expedior et adhuc me plura cohercent.

    De quibus ipse meum nescio consilium.

    

  

  

    J'ay essayé plusieurs moyens

    Ains que venir en consequence

    Si que des plus conveniens

    J'ay trouvee l'experience

    Mais il y a grant difference

    Les ungs des autres sont meilleurs

    Et pourtant m'en fault il plusieurs

    Que jamais querir et trouver

    Pour essayer et esprouver

    Se a bonne fin je perviendray

    Mais a la verité prouver

    Je ne sçay quel train je tiendray.

    

  

  

    Si studiosus eam verbis que iocis que frequentes

    Auferet assuetas garrula fama vias

    

  

  

    S'il fault que je soye studieux

    A faire plaisances et jeux

    Devant elle on en parlera

    Et y aura quelque envieux

    Qui me trouvera sus les lieux

    Souvent et en murmurera

    Par ce point la elle pourra

    Encontre moy se courroucer

    Et a tout amour renoncer

    Si suys esbahi que je face

    Et ne sçay quel chemin penser

    Pour tousjours maintenir sa grace

    

  

  

    Firmet amiciciam si nulla frequentia nostram

    Non bene firmus adhuc forsan alibit amor

    

  

  

    D'autre part s'il fault que je laisse

    A luy monstrer signe d'amer

    Je faiz doubte qu'elle ne cesse

    Sans voulloir le fait confermer

    Bien aise est a deffermer

    L'ancre qui ne tient comme point

    Et comme je puis estimer

    De noz amours est en ce point

    

  

  

    Perpetuo crescit: lignis crescentibus ignis

    Detrahe ligna foco protinus ignis abest

    

  

  

    Tant plus on met au feu de bois

    Tant plus croist c'est chose congneue

    Mais ostez le bois une fois

    Le feu a sa force perdue

    Amour aussi se continue

    Par longue frequentation

    Pareillement se diminue

    Par absence et dillation.

    

  

  

    Solicitus tantis curis tantis que periculis

    Detrahor in quantis nescio mente modis

    

  

  

    Ainsi donc en sollicitant

    Si grans dangiers et adventures

    Des passions je seuffre tant

    Que jamais n'en fut de si dures

    Je voy cent mille conjectures

    Opposites aux deux cartiers

    L'une fois il me semblent seures

    L'autre je y treuve des dangiers

    

  

  

    Hac in re nullam: modo cerno prosperitatem.

    Non habet et tutum mens mea consilium

    

  

  

    Pour ceste cause en ceste chose

    Plaine de grant difficulté

    Je ne juge point ne suppose

    Qu'il y ait de prosperité

    Et en ceste duplicité

    Ma pensee ne peut trouver

    Bon conseil de securité

    Pour mieulx a son port arriver

    

  

  

    Obstat et interdum satis. fortuna virorum

    Propositum que suo: non scivit esse loco

    

  

  

    Aussi fortune la diverse

    Souventeffois les destinees

    Des hommes varie et renverse

    Et ne peuent estre menees

    Ou les dieux les ont ordonnees

    Car fortune sans nul repos

    Par ses malices obstinees

    Chascun jour change leur propos

    

  

  

    Sic multis nocuit multos tamen illa beavit

    Vivit in hoc mundo taliter omnis homo.

    

  

  

    Aussi en divers changemens

    Elle a aux ungs esté grevable

    Leur a donné de grans tourmens

    Aux autres a esté aydable

    En son fait n'y a rien estable

    Mais vella en quoy je me fonde

    Que soubz fortune variable

    Tout homme est vivant en ce monde

    

  





Comme pamphille prie dieu qu'il luy
vueille supporter son labeur et dit qu'il
n'y a en ce monde confidence que en
soy mesme et en dieu.



  

    Providet et tribuit deus et labor omnia nobis.

    Proficit absque deo nullus in orbe labor

    

  

  

    Parfaictement croire devon

    Que dieu avec labeur nous donne

    Toute chose que nous avon

    En ce monde soit malle ou bonne

    Dieu a son appetit ordonne

    Et le labeur en aucun lieu

    Ne peut proffiter a personne

    Si ce n'est par l'ayde de dieu

    

  

  

    Sit deus ergo mei custos/ rector que laboris

    Omne guberent opus/ propositum que meum

    

  

  

    Pourtant je pry dieu humblement

    Que mon oeuvre vueille tenir

    En si bon propoz tellement

    Que a bonne fin puisse venir

    Vueille moy tousjours subvenir

    Et estre de mes faiz recteur

    Les garder conduyre et tenir

    En bon estat le createur.

    

  

  

    Non meus interpres fiunt frater que nepos que

    Nam nullus leviter invenit unde fidem

    

  

  

    En tel cas j'ay ma confidence

    En dieu seul non pas a mon frere

    Car souvent y a diffidence

    De pere a filz de filz a pere

    Par tant pour fouyr vitupere

    Il n'y a frere ne nepveu

    Il n'y a ne pere ne mere

    Qui de mon estat ayt rien veu

    

  

  

    Jura fidem que nepos nescit servare nepoti.

    Nec frater fratri/ cum furor ille venit

    

  

  

    Maintenant n'y a point de foy

    Entre frere et frere on le voit

    Maintenant chascun est pour soy

    Et souvent l'ung l'autre deçoit

    En plusieurs lieux on l'apperçoit

    Que ung frere a l'autre dit injure

    Ou quelque opprobre s'il le sçait

    Pour une petite murmure.

    

  

  

    Causa pusilla nocet: sapiens nocentia vitat.

    Ergo nos aliam convenit ira viam.

    

  

  

    Peu de cause pour ce nuysance

    Le saige voulentiers evite

    Choses nuysantes a puissance

    Qui viennent de cause petite

    Pourtant esse chose licite

    De proceder qu'on ne nous voye

    Secretement car la mauldicte

    Envie est tousjours par voye.

    

  





Comme pamphille propose de aller
veoir une vieille de la ville et
en faire sa courtiere d'amours.



  

    Hic prope degit avus subtillis et ingeniosa.

    Artibus et veneris apta ministra satis.

    

  

  

    Je sçay bien que assez pres d'icy

    Est une vieille maleureuse

    Laquelle vit en grant soucy

    Et en povreté douloreuse

    Mais subtille et ingenieuse

    Fine mauvaise et cautelleuse

    Pour servir aux ars de luxure

    C'est le mieulx que je me adventure

    De luy aller dire mon cas

    Elle m'y vauldra deux advocas

    Car elle a ce mestier aprins

    Tout consideré et comprins

    Je ne puys mieulx en cest office

    Commettre sans estre reprins

    Pour me faire utille service

    

  

  

    Postpositis curis ad eam vestigia tandam

    Et sibi consilium notificabo meum

    

  

  

    Toutes cures mises arriere

    Je la feray d'amours courtiere

    Et me yray adresser a elle

    C'est une droicte messaigere

    Une maistresse langaigere

    Pour attrapper une pucelle

    En elle seulle me fieray

    Mon conseil luy notiffieray

    En la requerant humblement

    Que employer son entendement

    Veille ainsi qu'il appartiendra

    Pour moy et que de son payement

    A chose qui soit ne tiendra

    

  





Comme pamphille salue la vieille
et la persuade de louenges avant que
luy dire son cas



  

    Fama tue laudis nullum que tue bonitatis

    Causaque/ miserunt me tibi consilii

    

  

  

    Belle mere je vien a toy

    Pour les grans louenges de quoy

    On te loue en ceste cité

    J'ay aucunes choses en moy

    Pour qui avoir recours je doy

    A toy seulle pour la bonté

    Sagesse foy et loyaulté

    De qui tout le monde te fame

    En la cité plus que autre femme

    C'est ce qui devers toy me amaine

    Car je sçay que tu es certaine

    Juste secrete et honnourable

    Autant ou plus que femme humaine

    Pourtant soyes moy secourable

    

  

  

    Que loquor ascultet pietas et gratia vestra

    Alter et assensu nescit absque meo.

    

  

  

    Si te prie par amitié

    Que escoutes ce que vueil dire

    Et ayes de moy pitié

    Car la douleur et martire

    Que nuyt et jour mon cueur tire

    Est si grant que dire n'ose

    Si fault il que te l'expose

    Mais je te prie humblement

    Qu'on n'en saiche aucune chose

    Tenon l'ay secretement

    

  

  

    Diligo vicinam tibi/ quam noscis galatheam

    Ipsa suis dictis me nisi fallor amat

    

  

  

    J'ay une voisine prochaine

    Que j'aime d'amour souveraine

    Gallathee tu la congnois

    Je suys chascun jour de sepmaine

    Pour elle en douleur et en peine

    Tu le peulz entendre a ma voix

    Elle m'aime bien touteffois

    Veu cella que j'ay apperceu

    Ou par ses dictz je suys deceu

    Tu la congnois et peuz sçavoir

    Se femme est pour me decevoir

    Si te pry dy m'en verité

    Et vrayement je feray devoir

    De payer a ta voulenté

    

  

  

    Non loquor ut vellem nam mille pericula vtto.

    Quicquid in orbe nocet solicitus timeo

    

  

  

    Plus emplement

    Mon pensement

    Te diroye

    Et mon tourment

    Totallement

    Monstreroye

    Se je osoye

    Mais par voye

    Sont les dangiers incessamment

    Je crains ce que ja ne vouldroie

    Voir et aussi que je ne voie

    Ce que je crains totallement

    

  

  

    Ex minimo crescit sed non cito fama quiescit.

    Quamvis mentitur crescit eundo tamen.

    

  

  

    Il ne fault que ung peu de fumee

    Pour acroistre la renommee

    De la personne ou luy tollir

    Or est gallathee famee

    De tout le monde et renommee

    Je crains a vers elle faillir

    Car je luy pourroye abollir

    Plus tost son bon nom que hausser

    Car ceulx qui veullent mal penser

    Donnent plus tost le mal entendre

    Pour la renommee abaisser

    D'autruy que la voulloir deffendre.

    

  

  

    Parva nocent miseris miseros mala multa secuntur

    Res que laborque michi spe manet in dubia

    

  

  

    Petites choses sont nuysables

    Aux miserables.

    Le vireton aux maleureux

    Mille maulx et choses grevables

    Sont doubtables

    Et suyvantes les douloureux

    Donc pour eulx

    Suys paoureux

    Et peine qui m'est angoisseuse

    Tient mes besongnes en tous lieux

    En esperance dubieuse

    

  

  

    Tu mala nostra vides tua vox erit inter utrunque

    Deprecor ut nostrum crimen eundo tegas

    

  

  

    Bonne mere tu vois noz maulx

    Je ne t'en vueil plus exposer

    Tu sçaiz que c'est de telz travaux

    Que nous souffrons sans reposer

    Plaise toy donc interposer

    Ta voix entre moy et la belle

    Tant que puisses tourner vers elle

    Ma voye et mon appointement

    Mais je te pry rien n'en revelle

    Tien nostre cas secretement.

    

  





Comme la faulse vieille respont a pamphille
que plus grant que luy aime gallathee
qui ne la peut avoir et que si
n'est par le moyen d'elle a peine on
l'aura et ce fait pour avoir des dons



  

    Alter amat quod amas: et quod petis hoc petit alter

    Sed tamen assensum non habet inde meum.

    

  

  

    Pamphille tu es amoureux

    De celle que autre ayme que toy

    Vous demandez avoir tous deux

    Ce que ung seul n'aura que par moy

    Tu es fort feru je le voy

    De gallathee la joyeuse

    Je ne sçay s'elle est amoureuse

    De toy mais je suys fort en doubte

    Que non car a peine se boute

    En amour d'aucun parsonnaige

    Et si ne croy point somme toute

    Qu'elle ayt en homme son couraige

    

  

  

    Est nimis ille probus et honesta conjuge dignus

    Sed michi displicuit quod dare disposuit

    

  

  

    Ung autre que toy l'aime bien

    Qui me pria que son moyen

    Envers elle je pourchassasse

    Mais en effait il n'y fist rien

    Car il n'est pas homme de bien

    Assez pour avoir ceste grace

    Cent foys me pria que j'allasse

    Voir se la trouveroye a point

    Mais il me desplaisoit d'ung point

    C'estoit de faire grant promesse

    De donner tresors et richesse

    A elle assez mais de ma part

    Qui devoye faire l'adresse

    Il n'avoit que ung peu de regart

    

  

  

    Promisit veteres cum pellicio michi pelles

    Sit sibi velle meum munus ademit opus.

    

  

  

    Bien appert que villain estoit

    Quant pour faire ceste façon

    Tant seullement me promettoit

    Je ne sçay quel vieil pelliçon

    J'entendy bien ceste leçon

    Autant que femme de la ville

    Et qu'il me reputtoit bien ville

    De villain don me presenter

    En effait oncques si abille

    Il ne fut d'en sçavoir gouster.

    

  

  

    Si datur ad tempus dat et affert commoda munus

    Jus leges que suo destruit imperio.

    

  

  

    Je suis assés saige et entens

    Que quant on donne a la personne

    Cella qu'on donne c'est a temps

    Car c'est raison qu'on le guerdonne

    Le don que aucuneffois on donne

    Peut porter proffit ou dommaige

    Et n'est loy ne droit ne usaige

    Sus quoy le don par son empire

    Ne ayt preference et avantaige

    Et qu'il ne les puisse destruire

    

  

  

    Quam petis ut credo per me nisi nullus habebit.

    Nam nimis imperio subjacet illa meo.

    

  

  

    J'ay des necessités bien grandes

    Chascun le voit visiblement

    Mais la celle que tu demandes

    Homme n'aura aucunement

    Si non par mon consentement

    Car plus que a femme de ce monde

    Elle est a mon commandement

    C'est la raison ou je me fonde

    

  

  

    Insuper ipsa sui sum dux et conscia facti

    Et facit illa meis viam consiliis

    

  

  

    En oultre plus je suis compaigne

    Et conducteure de son fait

    Tout cella que je luy enseigne

    Sans contredit elle le fait

    Et si ne fait rien en effait

    Que par mon conseil et doctrine

    Et si me ayme de cueur parfait

    Plus qu'elle ne fait autre voysine

    

  

  

    Non loquar ipsa diu tibi/ nam me previt altera cura.

    Carpat quisque vias et sibi querat opem.

    

  

  

    A toy je ne parleray plus

    Longuement j'ay ailleurs affaire

    Et face chascun au surplus

    Cella qu'il voirra bon de faire

    Ainsi qu'il luy est necessaire

    Chascun sçait sa necessité

    A dieu ne te vueille desplaire

    Pamphille dieu te doint santé.

    

  





Comme pamphille apperçoit bien
que la vielle ne luy veult point faire
son moyen s'il ne marchande a elle
et veult sçavoir combien



  

    Hoc mihi perstat opus nec me previt altera cura.

    Hanc michi si dederis omnia prestiteris

    

  

  

    Tu dis avoir a besoingnier

    Ailleurs que icy et aultre part

    Mais s'il te plaisoit de soignier

    A mon fait et avoir regart

    La ou je pense tost et tart

    Sans aultre cure ne soucy

    Tu me donroyes par ton art

    Tous les biens de ce monde icy

    

  

  

    Convenit externos mercari sepe labores

    Emptus et ut capiat premia digna labor.

    

  

  

    Toute peine requiert salaire

    Je le congnois c'est verité

    Point ne vueil aler au contraire

    Et pourtant de necessité

    Et mieulx tenir fidelité

    De marchander et convenir

    Marchié fait en bonne equité

    Sans difference doit tenir

    

  

  

    Nulla partem tuum frustabor crede laborem.

    Nunc quibus indigeo si michi provideas.

    

  

  

    De ce dont je suis indigent

    S'il fault que par toy pourveu soye

    J'ay des biens de l'or de l'argent

    N'espargne ne or ne monnoye

    Ne doubte que je ne te paye

    Sans te frustrer car c'est raison

    Et que je ne mette en ta voye

    Tout ce qui est en ma maison

    

  

  

    Deprecor hoc unum me credis dic inde nullum

    Et quodcunque mihi dixeris ipse dabo.

    

  

  

    Mais je te pry dy moy combien

    De moy tu demandes avoir

    Pour me vouloir faire ce bien

    S'il te plaist je le vueil sçavoir

    Ce que vouldras de mon avoir

    Dy moy je le te donneray

    Voulentiers sans te decepvoir

    Mais dy moy ce que je payeray

    

  





Comme la vieille dit qu'elle ne
veult point de attente en ce marchié
Mais avant que commencer ouvraige
voir de quoy sans promesse



  

    [P]lura volunt et plura petunt quibus instat egestas.

    

  

  

    Plusieurs choses avoir vouldroyent

    Ceulx qui sont en mandicité

    Que voulentiers demanderoyent

    S'ilz sçavoient sans faulceté

    Qu'on ne feist point difficulté

    D'oubtemperer a leur demande

    Mais te dire ma povreté

    Je n'ose car elle est trop grande

    

  

  

    Quantis indigeo tanta referre pudet.

    

  

  

    De dire honteuse seroye

    Toutes mes miserabletés

    Car au vray parler ne pourroye

    Dire toutes mes povretés

    Car j'ay tant de necessités

    Qu'il n'y a se croy creature

    Es quattre prochaines cités

    Qui tant que je fais en endure

    

  

  

    Divitias multas habui dum floruit etas

    Commoda nulla facit ars que labor que meus.

    

  

  

    Tant que j'ay fleury en jeunesse

    J'ay eu des biens par habondance

    Chascun prenoit en moy plaisance

    Et me venoit toute richesse

    Present me tourne a grant tristesse

    De estre povre car sans doubtance

    Tant que j'ay fleury en jeunesse

    J'ay eu des biens par habondance

    Mon art maintenant en vieillesse

    Ne me donne point de substance

    Mon labeur me laisse en souffrance

    Et touteffois comme princesse

    Tant que j'ay fleury en jeunesse

    J'ay eu des biens par habondance

    Chascun prenoit en moy plaisance

    Et me venoit toute richesse

    

  

  

    Si modo nostra tibi prodesse juvamina sentis.

    Deprecor ut pateat hinc michi nostra manus

    

  

  

    Pource pamphille se tu sens

    Que te puisse estre profitable

    Et ayder comme je consens

    Monstre toy large et honnorable

    Monstre dequoy soyes veritable

    Je te prie baille content

    Car ung tien/ est si agreable

    Qu'il n'y a rien au monde tant

    

  





Comme pamphille luy donne de
premier une quantité d'argent sans
regarder combien a celle fin qu'elle
voise faire son pont vers galathee.



  

    Hinc tibi nostra manus et cetera nostra patebunt.

    Sic que sub imperio copia nostra tuo.

    

  

  

    Tien vela de commencement

    A celle fin que il te apparesse

    Et que congnoisse clerement

    Que ung vray amant aime largesse

    Mais aussi monstre toy maistresse

    De faire cest appointement

    Tous noz biens et nostre richesse

    Seront a ton commendement

    

  

  

    Multum grata michi modo nos concordia junxit.

    Pactaque sollicitet inter utrumque fides

    

  

  

    Moult m'est ce concord agreable

    Et que je te puis contenter

    Aussi monstre toy serviable

    Et va mon cas soliciter

    Se tu peulz une fois traicter

    L'appointement d'elle et de moy

    Je pourrai dire sans doubter

    Que tu seras femme de foy

    

  

  

    Hinc precor  vigilet solercia nostra labor que

    Et ratione sua rem bene provideant

    

  

  

    Pourtant je te pry que tu veilles

    Si convenablement que en vain

    Et pour neant ne te travailles

    Et que ton labeur ne soit vain

    Tu sçais que pour faire bon pain

    Le bon fournier ou la fourniere

    Regarde a faire bon levain

    Faire dois en ceste maniere

    

  

  

    Principium finem que simul prudentia spectet

    Rerum finis habet crimen et omne decus.

    

  

  

    Tu sçais que prudence regarde

    La fin et le commencement

    Et pourtant je te pry pren garde

    A besongnier prudentement

    Car la fin et consonnement

    De toutes choses par honneur

    Se bien viennent pareillement

    Se mal viennent le deshonneur

    

  

  

    Verbi principium fidem quoque respice verbi.

    Ut melius possis premeditata loqui

    

  

  

    La fin de ce que vouldras dire

    Et le commencement aussi

    Regarde pour le mieulx eslire

    Avant que tu partes d'icy

    Tu le dois faire par ainsi

    De parvenir a ton attente

    Tu n'auraz que ung peu de soucy

    Car tu portes parler sans crainte

    

  





Comme la vieille voit galathee assise
a la porte de son pere et faignant
la vieille de ne la veoir point se va
mettre au pres d'elle et apar soy parler
et dire des biens de pamphille
Si que la fille le peult ouyr



  

    Hac manet in villa nimium formosa juventus.

    Crescit et in cunctis moribus ipsa bonis.

    

  

  

    Dieu qu'il demeure en ceste ville

    Ung filz plain de belle jeunesse

    Gracieulx doulx honneste habille

    C'est des jouvenceaux la noblesse

    Heure n'est au jour qu'il ne croisse

    En vertus et en bonnes meurs

    C'est une parfaicte liesse

    De le voir entre les greigneurs

    

  

  

    Non fuit in nostro melior nec dulcior evo

    Suscipit ipse meam tam bene pauperiam.

    

  

  

    Je suis vieille mais en mon aage

    Je n'oy parler du semblable

    Doulx courtois gracieux et saige

    Compacient et amiable

    Que je l'ay trouvé pitoyable

    De l'heure que a luy suis venue

    Et de vouloir tant honnorable

    Il a ma povreté receue

    

  

  

    Precellit cunctos omni bonitate coevos.

    Pamphilus et socios laudibus exuperat

    

  

  

    Il precelle en toute bonté

    Ceulx de son aage et en beaulté

    Pamphille porte l'excellence

    De doulceur et de loyaulté

    Sans aulcune desloiaulté

    Il a sus tous la preference

    C'est l'honneur de ses compaignons

    C'est la fleur des gentilz mignons

    C'est des humains le plus humain

    C'est des aultres le souverain

    Ses vertus sont inestimables

    En son fait n'y a rien villain

    Mais toutes choses honnorables

    

  

  

    Est stulto stultus est miti mitis ut agnus

    Stultitie sapiens jure resistit homo.

    

  

  

    Il fait le fol avec les folz

    Et le saige avecques les saiges

    Il fait le doulx avec les doulx

    Plus que ung aigneau en tous ouvrages

    En luy n'y a que doulx languaiges

    Jamais ne partit de sa bouche

    Parolle d'aultres personnaiges

    Qui tant soit peu deshonneur touche

    

  

  

    Non manet ac tante pubes probitatis in urbe

    Quas acquirit opes non vorat ingluvies

    

  

  

    En ceste cité pour ceste heure

    A bien pamphille regarder

    Je ne sache point qu'il demeure

    Si digne enfant de collauder

    Prudent a saigement garder

    Ses biens qu'il acquiert largement

    Sans les despendre a gourmender

    Ou les dissiper folement

    

  

  

    Est nimis ille probus bona nam fuit ejus origo

    Arbore de dulci dulcia poma cadunt.

    

  

  

    Il est de fort bonne nature

    Et aussi naturellement

    Il est de bonne geniture

    Qui est ung beau commencement

    D'ung arbre doulx communement

    Chayent pommes doulces et bonnes

    Le bon enfant semblablement

    Engendre de justes personnes

    

  

  

    Premonstrat signis prolem natura frequenter.

    Sepe solet similis filius esse patri

    

  

  

    On congnoist coustumierement

    Par les oeuvres que ung enfant fait

    Quel fut de luy l'engendrement

    Et s'il y eut aulcun forfait

    Car souvent en dit ou en fait

    Le filz est semblable a son pere

    Mais pamphille monstre en effait

    Que engendré fut sans vitupere

    

  





Comme apres ce que la vieille a dictes
toutes ces louenges de pamphille
elle se tourne vers galathee
en faisant une admiration et faindre
ne l'avoir point veue



  

    En juxta portam video stantem galatheam

    Queque locuta fui forsitan audierit.

    

  

  

    Comment dieux voicy galathee

    Aupres de ceste porte assise

    D'elle j'ay esté escoutee

    A ceste heure je m'en advise

    Au fort en ce que je devise

    De pamphille le triumphant

    Avoir ne puis quelque reprise

    Car c'est ung gracieulx enfant

    

  

  

    Hic non esse modo galatheam certe putabam.

    sed tamen ipsa nimis/ vera locuta fui

    

  

  

    Galathee certainement

    Pas icy je ne te cuydoye

    Si pres de moy presentement

    Que de pamphille je parloye

    Touteffois ce que j'en disoye

    Aussi vray est que l'evangille

    Et bref dire je ne sçauroye

    Toutes les vertus de pamphille

    

  

  

    Pamphilus ac certe cunctos precellit in urbe

    Egregie vitam providet ille suas

    

  

  

    En toutes vertus et bonté

    Il precelle certainement

    Tous les ceulx de ceste cité

    Tant est de beau gouvernement

    Il se pourvoie noblement

    Sans faire aulcune vilennie

    Bref c'est ung resjouissement

    Que contempler sa belle vie

    

  

  

    Illi semper honor et laus et gloria crescit

    Et merito nullus invidet inde sibi

    

  

  

    Tousjours luy croist honneur et gloire

    Non sans cause c'est bien raison

    Toute la cite fait memoire

    Du grant honneur de sa maison

    Qui de richesses a foison

    Est plantureusement fournie

    Et ne donne quelque achoison

    Qu'on doive avoir sur luy envie

    

  

  

    Est nimium locuplex et non tamen inde superbit

    Illius et nullum copia crimen habet.

    

  

  

    Il a richesses a planté

    Et n'en est point plus orgueilleux

    Mais tousjours en humilité

    Se monstre doulx et gracieulx

    Son fait n'est en rien vicieux

    Mais a tout le monde agreable

    Je ne croy pas que soubz les cieulx

    Peult estre trouvé le semblable

    

  

  

    Esset vt ipse tuus vellem galatea maritus

    Hanc eandem velles rem bene si saperes.

    

  

  

    Galathee ma gente fille

    Plust a dieu et la belle dame

    Que ce beau gracieulx pamphille

    Fust ton mari et toy sa femme

    Car je cuide et croy sus mon ame

    Se bien son estat congnoissoies

    Et comme chascun le reclame

    Toy mesmes le desireroyes

    

  

  

    Velle meum dixi sed non tamen ille rogavit.

    Vos simul esse meum judicat arbitrium

    

  

  

    J'ay dit que vous fussiez ensemble

    Mariez beaucop je desire

    Grant prouffit seroit ce me semble

    Nompas qu'il le me face dire

    Je ne te vouldroye pas nuyre

    Galathee tu le sçais bien

    Mais plus que a fille de l'empire

    Je desireroye ton bien

    

  

  

    Et genus et probitat et forma decens utriusque

    Mecum concendunt vos simul esse duos.

    

  

  

    Je arbitre que le mariage

    De vous deux seroit convenable

    Car la preudommie et lignaige

    De tous deux est assés semblable

    Oultre plus la forme honnorable

    De voz corps gracieulx et gens

    Monstre ceste chose traictable

    Autant que fut onc de deux gens

    

  

  

    Nostra modo vacuis deducimus ocia verbis.

    Res tamen interdum grandia parva movet

    E minima magnus scintilla nascitur ignis

    Et generat parvum grandia principium

    

  

  

    Cela que nous dison icy

    C'est temps perdu: mais touteffois

    Mariage ce font ainsi

    Par peu de chose aulcuneffois

    Ung grant feu peut faire en ung bois

    Une bien petite estincelle

    Commencer convient une fois

    En toute chose naturelle

    

  

  

    Mens mea concepit harum primordia rerum.

    Atque loqui nostris cepimus inde jocis.

    

  

  

    Jamais jour ne me apperceu

    Que pamphille eu le couraige

    De soy marier mais conceu

    J'ay apar moy ce mariage

    Puis quant j'ay veu ton personnaige

    Et que la chose vient a lieu

    J'en ay commencé le langaige

    Mais tout cela ce n'est que jeu

    

  

  

    Sed si rebus in hiis mea mens animus que movetur

    Si placet an potius desplicet inde loqui.

    

  

  

    Touteffois galathee dy moy

    S'il te desplaist aulcunement

    De ce que j'ay fait devant toy

    A cest heure ce parlement

    Car je te jure mon serment

    Que tu es du monde la fille

    Que j'ayme plus parfaictement

    Mais aussi bien fais je pamphille

    

  

  

    Deprecor ut dicas/ quod dixeris ipsa tacebo.

    Si celare velis sine referre loquar.

    

  

  

    Je te pry dy moy s'il te plaist

    Entre nous deux secretement

    Quelle ton oppinion est

    De cecy parle seurement

    Se tenir le vueil celeement

    Voulentiers je le celeray

    Se parler veulx publicquement

    Pareillement je parleray

    

  

  

    Dic michi ne dubita sculeum depone timorem

    Hic venit a sola ruscicitate timor

    

  

  

    Dy moy tout belle je te prie

    Se pamphille vouloit te avoir

    Le vouldrois tu point/ ne crains mie

    A me faire cecy sçavoir

    Pas ne vien pour te decepvoir

    Se tu es en difficulté

    Se te crainte te font mouvoir

    Folie et rusticité

    

  





Comme galathee respont a la vieille
et luy dit que les persuasions
qu'elle fait ne sont que flateries et
pour avoir aulcuns dons