Le Routier de la mer jusques au fleuve de Jourdain

C’est le routier de la mer.

Et premierement marees du bas de Sayn jusques en Flandres.

Au ras de Sayn la lune o surnoest ung quart de su plaine mer & o suest quart de l’est basse mer. A Sainct Mahieu la lune o nordest plaine mer e o suest basse mer. Au Four la lune au nordest ung quart de l’est plaine mer et suest ung quart de su basse mer. A Porsal et a Bergroach la lune o l’est nordest plaine mer et o suest la lune basse mer. A Liganan la lune o l’est nordest plaine mer, et o suest basse mer. Dedens l’isle de Bazpoul la lune en l’est nordest plaine mer et dehors ou chevaul la lune en l’est, et o su la lune basse mer. A Melenen la lune o su ung quart de surnoest basse mer, et o uoest quart de nornoest plaine mer. A .vii. Isles la lune a l’est suest plaine mer, et su surnoest basse mer. Et de l’isle de Bazpoul juc a Saint Malo tout le long de la coste juc a Cartaras la lune o su basse mer a terre, et o uoest la lune plaine mer. A Chansaye, a Grenese, a Jarsé, a Forc et a Erc la lune o su basse mer a terre, et o uoest plaine mer. A Roquetone la lune o suest ung quart de l’est plaine mer & en la coste de Greneuse hors la lune o suest plaine mer. Au ras de Brehat la lune en l’est plaine mer, et o su basse mer. A la Ferrere la lune o suest plaine mer. Au ras de Blanchart entre la Hague et Oronnay la lune o suest ung quart de l’est plaine mer. Et entre Cert et Oronnay y a ung banc qui s’appelle le banc de Chare, et il y a dessus ce banc .ix. brasses. Et hors Casquet la lune en l’est suest plaine mer et o su suruoest basse mer.

A la Hague et Oronnaye la lune o su ung quart de suruoest basse mer a terre. A Cherebourc, et Barfleu, et a la Hague la lune o su surnoest basse mer a terre. A Quarteras la lune o su suest plaine mer et o uoest sunoest basse mer. Et du chef de Caux jusques a Dieppe la lune o su suest plaine mer. En Saine a la fosse de Leure aussi pour l’espurin de la rive et la lune de Valente de suest plaine mer. Dehors Antifer jusques au bas de Somme la lune o su suest plaine mer. En Saine la lune o su plaine mer, et de mortes eaues et de vent de mont la lune o su suest plaine mer. Estaples et a Boulongne juc a l’establiere de Tanet la lune o suest plaine mer. A l’estricte de Calais la lune o surnoest plaine mer. Et de l’estricte de Calais juc a l’Ostande la lune o su suest basse mer. Et de l’Ostande jusque a Blanquebergue la lune o suest ung quart de su basse mer. Et sur tous les bancz de Flandres la lune o su plaine mer. Au cap de Loupin la lune o su plaine mer.

Cours du ras de Sayn jusques en Flandres et comment les marees devers Bretaigne portent.

Dedens le channau Hyr aussi porte le flo en l’est et le jussant o uoest. Entre Moilenes et Oyssant porte le flo en l’est nordest et le jussant o uoest surnoest. Dehors les isles trouveras .xlv. brasses et menu proy. Entre Oyssant & Surlingues porte le flo en l’est nordest. En la goutiere de Oyssant trouveras bon giste a .xxv. brasses, et te donne garde d’une roche qui est au millieu de la baye. Entre le Four et Bergroach juc a l’isle de Bazpoul porte le flo a nordest ung quart de l’est et le jussant a l’encontre. Au costé de Bazpoul porte le flo en l’est suest. Hors .vii. Isles porte flo en l’est ung quart de suest & dedens aussi. Dehors Brehat porte le flo en l’est, et le jussant a l’encontre. Et de Brehat jusques a Sainct Malo porte le flo en l’est suest. Entre Casquet et Oronnay vient le montant du surnoest jusques a demy maree. De Oronnay jusques a Barfleu vient l’eau de l’est. A Barfleu jusques aux isles de Marcoll vient l’eaue du su suest le long de la coste. De Barfleu a Antifer, et jusques au chief de Caulx vient l’eaue de l’est nordest, et en la route tu trouveras de sonde .xvi. ou .xviii. brasses, et bon fons et sablon. Et de Antifer jusques au bas de Somme vient l’eaue de l’est nordest. De bas de Somme jusques a Boulongne vient l’eaue de nor nordest. De Boulongne jusques a Hurdrenes vient l’eaue du nort. De Hurdrenes jusques a Gravalingues le cours dehors le bas vient l’eaue du nort nordest. Et dehors Gravalingues jusques a Ducarque vient l’eaue ou nordest. De la baye de la Dune jusques a l’Ostandes vient l’eaue du nordest ung quart de l’est. De l’Ostandes jusques a Blanquebergue vient de l’est nordest. De Blanquebergue jusques au pointal de Saincte Katherine vient l’eaue de l’est de l’est nordest.

Routtes du ras de Sain jusques en Flandres.

Routtes du ras de Sain a venir a Sainct Mahé il fault aller sur le nort et porter la poincte de l’aguille ung pou d’estrebourc. De Saint Mahé au Fourc fault aller sur le nort nornoest et ouffrés Saint Mahé hors. De la pointe beau sablon et vous donnez bien garde. Le Four et les Aguillons de l’isle Deuich gisent nordest et surnoest. L’isle de Bazpaoul & Greneuse gisent nordest et surnoest. Roquetone & Greneuse gisent nort & su. Greneuse & Oronne gisent nordest & surnoest. Oronnay et Casquet gisent nordest & suest ung quart de l’est et ung quart de uoest. Casquet & Antifer gisent est uoest, et qui veult aller a Harfleur en Saine voyse en l’est suest. Antifer & chef de Caux gisent nort & su, et qui veult aller de Antifer en Somme et Estapples gisent nordest & surnoest. Se tu veulx aller de la strette de Calais en Flandres va o nordest avecques flo et contre eaue en l’est nordest aussi avant comme la baye de la Dune. Et si tu es a seize brasses tu seras le droict cours au chanau de Flandres. Et quant tu auras .xii. brasses de l’eaue tu seras bort a bort du bas et te cherras a coup a .iii. ou .iiii.

Entrees & gistes de la coste de Normendie.

Se veulx gesir a Cherebourch metz l’ancre a .vi. brasses & trouveras beau fons & viendra nornoest du pointal de l’aval, et te donne garde dudit pointal car il y a dangier. Se veulx gesir a la Hogue metz l’ancre dessoubz l’eglise a .vii. brasses. Se tu veulx gesir a la fosse de la Colleville metz l’ancre hors a .vii. ou a .viii. brasses. Se veulx gesir en la radde du chief de Caux va ens et metz l’ancre a .vi. brasses, et la te viendra nord de la terre ainsi comme antrenes, et n’auras point d’abry de nord nordest. Se veulx gesir en la radde de Dieppe metz l’ancre a .vii. brasses devant la ville. Si veulx gesir au bas de Sommes gis dehors Lobanes et garde que le montier de Caïo te demeure en l’est nordest, et metz l’ancre a .vi. ou a .vii. brasses. Et se tu veulx aller dedens porte haulte maree devant toy, et prens tes amers oultre le chastel de Crote ung peu hors de l’Ordelle et iras a .ii. brasses & demie ou a .iii. Se veulx gesir devant Estapples metz l’ancre a .vii. brasses ou a .vi. Se veulx gesir en l’ancre de Boulongne gis devant le Hauffre & metz l’ancre a .viii. ou a .vi. brasses. Se veulx gesir devant Hurdrenes de vant d’amont boute l’ancre devant Ordecelle a .x. ou a .xii. brasses d’eaue & tu auras abri de vent de nort et qui te viendra de Hurdrenes et aura bon fons, et se tu metz l’ancre en plus parfons tu trouveras rochier et mauvais fons.

Les marees de Surlingues et d’Angleterre jusques en Flandres.

A Surlingues la lune o nordest ung quart de l’est plaine mer & dehors la lune en l’est. A Monsole la lune en l’est nordest plaine mer a terre et dehors en l’est. A Saleume la lune en l’est ung quart de nordest plaine mer a terre & hors en l’est suest. A Saunic & a Plenur la lune en l’est plaine mer a terre et dehors en l’est suest. A Tartemue la lune en l’est plaine mer a terre et dehors en l’est suest. A Porlant dehors la lune o suest ung quart de l’est plaine mer. A l’ancrage de Porlant la lune en l’est suest & plaine mer. A Holfal & a la Polle la lune o suest plaine mer et surnoest plaine mer. Aux Aguillons de l’isle Deuich dehors la lune o suest ung quart de su plaine mer. Au costé de l’isle Deuich de grant mer la lune o su suest plaine mer. A Soren la lune o su ung quart de suest plaine mer. Au Beauchef la lune o su plaine mer. A la chambre de Vinchenese la lune o su plaine mar. A travers la Romané la lune o su surnoest plaine mer. A la stricte de Calais la lune o surnoest plaine mer.

Cours de cap de Cornouaille jusques en Flandres et comment les marees portent.

Saches que du chief de Cornouaille jusques a Lessart vient l’eaue de l’est & devers le suest. De Lessart a Dodmen et jusques a Bodesteurs vient l’eaue de l’est nordest. De Bodesteurs a Porlant vient l’eaue de suest et tant bien saura l’heure que le flo portera o suest par raison du sac. De Porlant a l’isle Deuich vient l’eaue de l’est devers le nordest. Se tu es a la coste de la cité de Veilles a .ii. brasses l’eaue te vendra de l’est nordest. Jusques a Douffre vient l’eaue de l’est devers le nordest. De Saincte Marguerite a Tanet vient l’eaue du nort. En la Tamisse vient l’eaue de l’est suest.

Routes de Surlingues, et de Angleterre jusques en Flandres.

Surlingues et Longues Chippes gisent est nordest et uoest surnoest. Surlingues & Lessart gisent est uoest. Entre Surlingues et Lessart il y a une basse qui s’appelle la Rossee, et en breton Goulff, et qui part du chef de Cornouaille, il fault aller en l’est suest pour doubler Lessart, car ainsi gisent les deux terres. Monsolle et Lessart gisent suest & noruoest. Lessart & Dodmen gisent nordest et surnoest ung quart de l’est et ung quart de uoest. Dodmen et Bodesteurs gisent est nordest & uoest surnoest. Bodesteurs et Porlant gisent est & uoest ung quart de nordest et ung quart de surnoest. Porlant et l’isle Deuich gisent est & uoest. L’isle Deuich & Beauchef gisent est et uoest ung quart de nordest et ung quart de surnoest. Beauchef & le pointal de Romané gisent est & nordest et uoest surnoest. Le pointal de Saincte Marguerite et Tanet gisent nort et su.

Contrees et gistes de la coste de Angleterre le long de la coste.

Se tu veulx gesir a travers de Monsolle va pres de la terre & metz l’ancre a .vii. brasses & tu seras en bon lieu : a .viii. brasses c’est tout rocher. Se veulx entrer en Fallemue tu trouveras une basse parmi l’entree & la laisseras aval le port & iras vers l’est d’ele. Quant tu l’auras passé va droit ens car la baye y est grande saine et large, et metz l’ancre ou tu vouldras a .x. ou a .xii. brasses parmy la baye : et se tu veulx aller a convers du perroy attens la mer haulte, car il y a ung banc a passer. Trouveras de la basse mer et de grande mer .ii. brasses & demye ou trois en l’ancrage. Et se tu veulx tu iras en la ville de Paren. Se tu veulx entrer a Plemeure va droit ens & n’aproche pas trop de l’isle : car il y a grant dangier : et se tu veulx estre a sec va devant la ville et tenes devers la tour pour la chaussee et se veulx passer devers le uoest va pres de la grande terre et met l’ancre a vingt brasses. Se tu veulx entrer a Tartemue va dessoubz Sainct Patric ung monstier que tu verras droit a l’entree du havre & te tiens devers le noest du vent d’aval et donne bien pou de run au pointal de Sainct Patric : pource qu’il y a plat de roche, et si te garde de la basse qui demourra a vabort, et est ceste basse a travers de Sainct Patric a travers le chanau. Et saches qu’il ne demeure de basse mer, et de grant mer que .iii. coutees ou une brasse, et met l’ancre pres de la ville a .vii. ou .viii. brasses. Se tu veulx passer a Porlant met l’ancre a huit brasses, et auras abri de vent de su parmy l’isle. Se tu veulx entrer a la Polle va pres en la Fast, et metz le clocher de la Polle parmi une petite maison qui est a l’entree du havre et iras entre les deux bans et trouveras de basse mer deux brasses et demie ou trois. Se tu veulx entrer dedens les Aguillons de l’isle Deuich va bort a bort des Aguillons droit ens et te garde de la basse ou millieu du chanau, et trouveras au chanau huit ou .xi. brasses, et bort a bort des Aguillons il y a trois ou .iiii. brasses. Se tu veulx gesir a Saincte Heleine metz l’ancre a sept ou a .viii. brasses, et te garde du pointal qui gist ung peu hors. Se tu veulx gesir hors de Saincte Heleine prens le montant et va su suest tant avant que tu soyes a .xx. brasses. Se tu veux gesir a Beauchef va a la terre et met l’ancre a .viii. brasses et tu auras abri de uoest surnoest au millieu de Beauchef. Se tu veux entrer a la chambre de Vinchenese porte demie maree soubz toy et te garde que Beauchef soit ou nort hors de farle et va o perroy : et iras tout du long du perroy et te donne garde du pointal qui gist un peu hors. Se tu veulx gesir a l’ancre de Romané gis devant ung petit village que verras et met l’ancre a .vii. ou .x. brasses : car a .xi. brasses auras abri de surnoest fons de basse : et a .x. tu n’auras point abri de surnoest et a l’ancre de Romané a ung banc qui est bien a ung cor de l’eaue du perroy : et il y a du parfond entre le banc et le perroy bort a bort du banc seize brasses. Et gist le banc et le pointal de Romané est nordest et uoest surnoest, et ne demeure de basse mer et de grande mer dessus cest banc que une brasse d’eaue. Et tu trouveras de Romané jusques es Dunes bon giste tout le long de celle coste a .xvi. ou .xx. brasses, et auras abri de uoest surnoest. Se tu veulx gesir devant Saincte Marguerite metz l’ancre a .xvi. brasses, et tu auras abri au surnoest. Se tu veulx gesir es Dunes metz l’ancre a .xvi. ou a .xvii. brasses.

Comment les ports & les havres de Bretaigne, et d’Angleterre, et de Normendie gisent et quantes lieues il y a de l’un a l’autre.

Le Four & Oyssant gisent est & uoest et y a entre eulx .ii. lieues. Oyssant et Surlingues gisent nornoest & suest quart de nort & quart de su, et y a entre eulx .xxviii. lieues. Le Four et Lanchip gisent nort nornoest et su suest, et y a entre eulx .xxxvii. lieues. Le Four et Tartemue gisent nort nordest & su surnoest, et y a entre eulx .xxviii. lieues. Le Four et Dodmen gisent nort et su, et y a entre eulx .xxxiii. lieues. L’isle de Bazpoul et Greneuse gisent nordest & surnoest. La Melmenne et Bodesterne gisent nort et su, et y a entre eulx .xxviii. lieues. Greneuse & Dodmen gisent est & suest et uoest nornoest, et y a entre eulx trente et huyz lieues.

Casquet & Porlant gisent nort & su ung quart de nornoest et ung quart de suest, et y a entre eulx .xx. lieues. Porlant et Barfleu gisent nornoest & suest, & y a entre eulx .xxviii. lieues. Saincte Heleine et cul de Hague gisent nort noest et su surnoest, et a entre eulx .xxiii. lieues. Saincte Heleine et Barfleu gisent nort et su, et a entre eulx .xxiii. lieues. Saincte Heleine et chef de Caux gisent nornoest & suest, et a entre eulx .xxviii. lieues. Blanc de Chef et Barfleu gisent nordest & surnoest. Le pointal de Romané & de Dieppe gisent nort & su ung quart de nort noest & quart de suest & y a entre eulx .xxvi. lieues.

Sondes que tu trouveras a venir d’Espaigne ou de Ellevent ou de Portingal a querir Oyssant.

Saches que une nef qui vient de Portingal a querir Oyssant ou Lessart en ceste route a cent ou .iiii. vingts .x. brasses trouveras sonde grosse & seras de la part de Sayn environ .xx. lieues, et trouveras en ceste route .iiii.xx. brasses coquilles comme de Sainct Jacques et coups de plomb. En ceste route prens du nort tant que change de sonde et se tu es a soixante ou .lx. et cinq, tu trouveras sablon menu meslé & vermeil, et seras a costé de Oyssant, et se tu as temps & jour va le guerir o nordest & seras entour de .x. lieues de l’isle, et se tu viens faisant ta route entour la basse Frede tu trouveras sablon gros vermeil & roux, et trouveras de sonde .xl. brasses. Saches que se tu es devers le banc de Surlingues tu trouveras .iiii.xx.v. brasses, ou .iiii.xx.x. brasses, & trouveras au plomb comme couleur de basses. Saches que tu feras grant singlage et seras vers le banc de Surlingues, et se tu es a .iiii.xx. tu trouveras sablon menu blanc et noir, et saches que tu seras a travers de Lessart. Et se tu es a .lx. ou .lxv. tu trouveras sablon blanc et arenes blanches et dougees. Saches que tu seras bien pres de Lessart.

Entre le chief de Cornouaille & Oyssant trouveras parmy le chanau .lxx. brasses. Et assez pres du chief entre Dodmen & le Four tu trouveras parmy le chanau .lx. brasses, & se tu es a travers de Plemue ou de Bodesteurs tu trouveras sablon gros roux & coups dedens le sieu, et trouveras de sonde .lxi. ou .lxii. brasses.

A la venue de Porlant tu trouveras .xxxv. brasses & menu perroy : et se tu es pres de Porlant tu trouveras .xxx. brasses & pierres comme feves en ceste sonde et te durera juc a Saint Anthealme et se tu es dessusdites brasses trouveras pierres blanches en figure de alesnes rompues et aultres plus grandes. Saches certainement que tu seras a travers de Sainct Anthealme, ou a travers de l’isle Deuich. Et de la va en l’est pour te garder de la cité de Veille. A .ii. lieues ou .iii. lieues de l’isle Deuich trouveras .xxv. brasses a coups et taillades ou sieu comme fil dougié. A .ii. lieues ou a .iii. de Casquet trouveras .xl. brasses et grosses pierres noires et rongneuses. Entre l’isle Deuich et la Hague au plus parfond ne trouveras que .xxxv. ou quarante brasses. Entre l’isle Deuich et Antifer ou plus parfond ne trouveras que .xxv. ou trente brasses. Entre Beauchef et l’isle Deuich a une lieue de terre trouveras .xxviii. brasses & grosses cailloches comme feves. Entre Forlagues et Somme ou plus parfond ne trouveras que .xx. ou .xxx. brasses. Entre Fouquestent et Bouloigne y a ung banc qui s’apelle la Rippe Rappe et est parmy la route tant pres de Picardie comme de Angleterre et trouveras bort a bord de l’isle .xxv. ou .xxvii. brasses. Soubz le chasteau de Ouffre trouveras .x. brasses. A la stricte de Calais trouveras vingt et .v. brasses. Entre Calais et Tanet trouveras vingt & .v. brasses. En la radde de Calais a seize brasses. Entre la coste de Flandres au plus parfond ne trouveras que vingt brasses.

Les veues de Surlingues et d’Angleterre jusques en Flandres.

De Surlingues a Longues Chippes il a une veue,

de Longues Chappes a Lessart a .viii. lieues,

de Lessart a Dodmen il y a une veue,

de Dodmen au cap de Rame a une veue,

du cap de Rame au cap de Bieurres a une veue,

du cap de Bieurres a Torres a une veue,

de Torres a Porlant .xiiii. lieues,

de Porlant a Saint Antheuline a .v. lieues,

de Sainct Antheuline es Aguillons a .vi. lieues,

des Aguillons a Saincte Heleine sept lieues,

de Saincte Heleine a Blanchef .xviii. lieues,

de Blanchef a Farlagues il y a .vi. lieues,

de Farlagues a Romané a Douffre il y a .vii. lieues,

de Douffre a Calais il y a .vii. lieues,

de Calais a l’Escluse .xxi. lieues.

Marees du cap de Cornouaille jusques en Gales le long de la coste.

Du cap de Cornouille la lune en l’est nordest plaine mer et o su suest basse mer. A Padiston la lune en l’est ung quart de nordest plaine mer. A Londaye la lune en l’est plaine mer, et o su basse mer. A Caldaye la lune en l’est ung quart de suest plaine mer. A Gras Hormes la lune en l’est suest plaine mer. Es Ramaises a la pointe de Cardigan la lune o suest plaine mer. A Mileforde la lune en l’est suest plaine mer. A l’isle de Fer & a l’isle de Coulomps & a Nasquin Gouales la lune en l’est suest plaine mer. En la routte de l’isle de Magusiquees aux mons de Galuaye la lune o su suest plaine mer et partout. Et l’isle de Man jusques a Erglas en la route avant et jusques en Escosse la lune o su.

Routes de Surlingues et de Angleterre jusques en Gales le long de la coste de Gales.

Surlingues & Londaie gisent nordest et surnoest, & y a entre eulx .xxviii. lieues. Cap de Cornouaille et Londaie gisent nordest & surnoest ung quart de nort et ung quart de su, et il y a entre eulx .xxv. lieues. Londaye et Calday gisent nort et su et y a entre eulx .x. lieues. Cap de Cornouaille et Consquerre gisent nort et su ung quart de nornoest et de suest & il y a entre eulx .xxxiii. lieues. Cap de Cornouaille et Masquin Goales gisent nort et su et y a entre eulx .xxxiii. lieues. Masquin Goales et Gras Hormes gisent est nordest & oest suruoest. Gras Hormes et l’isle de Fer gisent est & uoest, & a entre eulx .ii. lieues. L’isle de Fer et Mille de Forde gisent est & uoest ung quart de nordest & ung quart de suest et il y a entre eulx deux lieues.

Cours du cap de Cornouaille jusques en Gales le long de la coste.

Du cap de Cornouaille vient le flo de su, et le jussant vient du nort et hors .ii. ou trois lieues vient la maree de suruoest. Et du cap de Cornouaille jusques a Londaie vient le jussant de nordest et le flo de suruoest. Et dehors l’isle de Londaye vient le flo de uoest, et aussi le jussant vient de l’est. Et entre Londaie et Caldaie vient le flo de l’oest nordest & le jussant de l’est suest.

Et de Caldaie & Scalmaie vient le flo de nordest et le jussant de suest. Entre Scalmaie et Gras Hormes vient le flo de su, et le jussant de nort. Et de Gras Hormes par tout le costé jusques a Houlyhet vient le flo de su et le jussant a l’encontre et dehors en la route prent du nordest et du suruoest.

Et Houlyhet jusques a l’isle de Man vient le flo de suruoest, et le jussant vient de nordest. Et le long de l’isle de Man jusques dehors vient le flo de suruoest et le jussant a l’encontre.

Entre l’isle de Man et Escosse vient le flo de l’oest, et le costé d’Escosse jusques es mons de Galuay vient le flo de l’oest nordest et le jussant de l’oest nordest. De meurs de Galuay jusques a la pointe de Loquesten vient le flo de nort noruoest et le jussant a l’encontre, et de celle pointe jusques a Tare vient le flo de suruoest et le jussant de nort nordest.

Routes de Surlingues et de Angleterre jusques en Hirlande tout le long de la coste et quantes lieues a de l’un a l’autre.

Surlingues & cap de Clare gisent est suest & uoest nordest, et y a entre eulx .l. lieues. Cap de Cornouaille et cap de Veil gisent nornoest et suest ung quart de l’est et de uoest, et y a entre eulx trente & trois lieues. Cap de Veil et cap de Clare gisent est nordest et uoest suruoest, et y a entre eulx .xiiii. lieues. Cap de Clare et Musenes gisent est et uoest, et y a entre eulx .vii. lieues. Musenes et Dulfaie gisent est suest et uoest noruoest et y a entre eulx .vii. lieues. Dulfaie et la sonde de Blasquaye gisent nort & su ung quart de nort noest et de suest, et te garde des Aguillons, et y a entre eulx .xviii. lieues. Blasquaye & les isles Dareu gisent nort nordest & su suruoest et y a entre eulx .xviii. lieues. Blasquaye et Blacroc gisent nort et su, et y a entre eulx quarante lieues.

Du Blacroc sigle la vie de nort tu iras hors de toute hirlande.

Du Blacroc au Cantier il y a .vi. veues.

Cours du cap de Veil jusques au Cantier et comment les marees devers Hirlande portent.

Du cap de Veil jusques aux isles de Saltaye vient le flo de suruoest et prent de l’oest, et dehors en la route vient le flo de l’oest suruoest et le jussant de l’est nordest. Et de Saltaye jusques a Uquelo vient le flo de suruoest, et le jussant a l’encontre. Et de Uquelo jusques a Lambaye vient le flo du nort, et le jussant vient de su. Et de l’isle de Lambaye par tout le costé vient le flo de su suest, et le jussant a l’encontre. Et de Malines jusques a la poincte Darglas vient le flo de su surnoest, et le jussant a l’encontre. Et de la poincte Darglas jusques au Cantier vient le flo de nort nornoest, et le jussant de su suest.

Routes de boucqueau de Bayonne de long de la coste de Gascoigne jusques au ras de Sain.

Qui veult aller du boucqueau de Bayonne du long de la coste en Gironde voise sur le nort ung quart de noruoest pour doubler Alcassone, et puys quant tu auras doublé Alcassone va sur le nort ung quart de nordest, et iras aux Asnes. Au pertuis d’Antioche va sur le noruoest. Le pertuis d’Antioche gist uoest suruoest & est nordest : partez de Sainct Martin vostre droit cours est aller par le pertuis aux Bretons o uoest noruoest, et iras hors de l’isle Dieux.

Le pertuis aux Bretons gist est suest & uoest noruoest.

L’isle Dieux et Belisle gisent noruoest et suest. Et de Belisle a Glenan l’on doit aller a l’oest noruoest pour doubler la Jument de Glenan, et iras assez hors de Penmarch. Groye & Glenan gisent est & uoest ung quart de noruoest et de suest. Et qui veult aller par dehors Roche Blanche prenne le plus du uoest. Et pour donner garde de Roche Blanche prenez bons amers oultre Sainct Nicolas hors de Penfret et vous n’aurez doubte de Roche Blanche. Et quant vous serez dedens Glenan laissez les deux pars devers l’isle de Moncons et la tierce partie devers Glenan, et allez o uoest par le coureu. L’isle de Moncons et Sainct Nicolas gisent nort et su. La route de Glenant gist est et uoest. Partez de la route de Glenan et courez uoest & noruoest si viendrez devant Sainct Tud. Et qui part de la route de Glenan et veult doubler Penmarch son cours est o uoest ung quart de suruoest : car la route de Glenan & la Fourcque gisent est & uoest. Penmarch et Fontenault gisent noruoest et suest.

Les veues de la Rochelle jusques en Flandres.

De la Palice au Balivers y a .vii. lieues,

de Balivers a Holonne .vii. lieues,

de Holonne a l’isle Dieux .vii. lieues,

de l’isle Dieux a Belisle .xx. lieues,

de Belisle a Groie .vii. lieues,

de Groie a Glenan .vii. lieues,

de Glenan a Penmarch .vii. lieues,

de Penmarch au ras .ix. lieues,

du ras a Sainct Mahé .ix. lieues,

de Sainct Mahé au Four .vii. lieues,

du Four a Bergroach .vii. lieues,

de Bergroach a l’isle de Bazpaoul y a quatorze lieues,

de l’isle de Bazpaoul jusques a Sept Isles il y a sept lieues,

de Sept Isles a Brehat .vii. lieues,

de Brehat a Freelle .x. lieues,

de Frellee a Sainct Malo .iiii. lieues,

de Sainct Malo a Chanssaie .vi. lieues,

de Chanssaie a Jarsaye .vii. lieues,

de Jarsaye a la Hague .viii. lieues,

de la Hague a l’isle Deuich .xxviii. lieues,

de l’isle Deuich a Calais .xlii. lieues,

de Calais à l’Escluse .xxi. lieues.

Ce sont les sondes, venant d’Espaigne de la part dehors les isles ou chemin du nort & dessus la Rochelle.

Saches que en cest paraige es .l. brasses tu seras a .xvii. lieues de la terre. Et si tu es a .xl. brasses tu seras a douze lieues de la terre. Et se tu es a trente brasses tu seras a .vii. lieues de la terre. Et se tu es a vingt & quatre brasses tu seras a .iiii. lieues & en ceste route trouveras vase & seras devers Maumusson et pres de la terre, et trouveras pierres comme pois et sçaches que tu seras devers le Balivers ou devers Holonne & n’aprouche point se tu n’y es de jour en ceste sonde de .xxv. brasses et se tu es o su de l’isle Dieux a .lx. brasses tu trouveras sablon menu & seras a .xiiii. lieues de la terre. Se tu es a .l. tu seras a dix lieues de la terre.

Saches que de .xxx. brasses tu verras l’isle de Faic cler. Saches que se tu es en la mer de Laire es .lx. brasses tu trouveras vase tant que tu soyes a .xxv. brasses.

Saches que o su de Belisle a .lx. brasses tu seras a .x. lieues de l’isle & n’aproche plus que a .l. ou .xl. brasses, se tu n’y es de jour. Car saches que en la route de Belisle le Glenan a cinquante brasses tu seras bien pres de la terre : et vous gardés, car il y a faulses sondes en travers de Glenan et de Penmarch.

Comment les terres de Bretaigne et d’Espaigne gisent et quantes lieues a de l’un a l’autre.

La basse Frede et Cap gisent nort nordest et su suruoest. Pellen Penmarch et Sissergues gisent nornoest et suruoest ung quart de su, et de nort, et il y a entre eulx .xvi. veues. Glenan & aussi Sainct Vincent de la Bacquere gisent nort & su & y a entre eulx .iiii.xx.v. lieues. Groye et Sainct André gisent nort & su et y a entre eulx .iiii.xx.v. lieues. Belisle et Laredou gisent nort et su et a entre eulx .lxviii. lieues. L’isle Dieux & Martichaco gisent nort & su & a entre eulx .xlii. lieues. La Hollonne et Sainct Sebastien gisent nort et su.

Les lieues du boucqueau de Gironde jusques au boucqueau de Bayonne le long de la coste d’Espaigne et de Portingal.

Du boucqueau de Gironde jusques au boucqueau de Bayonne il a vingt et cinq lieues.

De Bayonne a Fonterabie .viii. lieues,

de Fonterabie a Sainct Sebastien .iii. lieues,

de Sainct Sebastien a Quitaire .iii. lieues,

de Quitaire a Montrigo .iii. lieues,

de Montrigo a Vermeo .v. lieues,

de Vermeo a Bilbau .vi. lieues,

de Bilbau a Castres .iiii. lieues,

de Castres a la Radde .iii. lieues,

de la Radde a Sainct André .vi. lieues,

de Sainct André a Sainct Martin .v. lieues,

de Sainct Martin a Sainct Vinceut de la Barquere cinq lieues,

de Sainct Vincent a Lagues .v. lieues,

de Lagues a Ribedecelle .v. lieues,

de Ribedecelle a ville Vicieusse .v. lieues,

de Vicieusse a Gignon .iiii. lieues,

de Gignon a Pennes de Gonson .ii. lieues,

de Gonson a Veilles .ii. lieues,

de Veilles a Pronne .ii. lieues,

de Pronne a Lienarque .ix. lieues,

de Lienarque a Ribedaine .v. lieues,

de Ribedaine a Sainct Fabien .v. lieues,

de Sainct Fabien a Umero .ii. lieues,

de Umero a cap de Vere .ii. lieues,

de cap de Vere a Ortiguer .ii. lieues,

de Ortiguer a Sidera .iiii. lieues,

de Sidera a cap de Prioul .iiii. lieues,

de cap de Prioul a la Couloigne .iii. lieues,

de la Couloigne a Sissergues .v. lieues,

de Sissergues a Cormes .iiii. lieues,

de Cormes a Mongie .v. lieues,

de Mongie au cap de Fine terre .iiii. lieues,

du cap a Cea .v. lieues,

de Cea a Mores cinq lieues,

de Mores a Bayonne de Moror .viii. lieues,

de Bayonne a Camino .iiii. lieues,

de Camino a Vienne .iiii. lieues,

de Vienne a la ville de Conte .v. lieues,

de la ville de Conte a Porte en Portingal y a quatre lieues,

de Porto Vero de Montego neuf lieues,

de Mondego a Parades neuf lieues,

de Parades a Berlingues neuf lieues,

de Berlingues a Rocque de Cintre .xii. lieues,

de Rocque de Cintre au cap de Ficher .x. lieues,

de cap de Ficher au cap de Saint Vincent il y a vingt et huyt lieues,

de cap de Sainct Vincent au cap de Saincte Marie .xviii. lieues,

entre cap de Saincte Marie et l’abbaye d’Olues a .xviii. lieues,

entre l’abbaye d’Olues et Sainct Lucas de Baremado .xiii. lieues.

Routes de Ponteau de Feron jusques au fleuve Jourdain, et quantes lieues a de l’un a l’autre.

Ponteau de Feron et l’isle de Calix gisent est et uoest, et y a entre eulx vingt lieues.

L’isle de Calix et Trefalgar gisent est suest et uoest & nornoest & y a entre eulx .viii. lieues.

Trefalgar & le destrois de Maroc gisent est et uoest ung quart de suest et de noruoest, et a entre eux .xii. lieues.

L’estrois de Maroc et cap de Gatte gisent est et uoest ung quart de nordest et de suruoest et y a de l’un a l’autre .lxv. lieues.

Cap de Gatte et les Formingues gisent nordest et suruoest et a entre eulx .lx. lieues.

Les Formingues et Maillorgues gisent nordest & suruoest et a entre eulx .xxx. lieues.

L’isle de Maillorgues a de long .xxxviii. lieues.

Maillorgues et Sardaine gisent est et uoest et y a entre eulx .xc. lieues.

Sardaine & Fozille gisent est et uoest quart de suest et ung quart de noruoest, et a entre eulx .xxii. lieues.

L’isle de Fozille a de longueur environ .lxii. lieues.

L’isle de Cecille et l’isle de Sapience gisent est et uoest, et a entre eulx .xii. lieues.

L’isle de Sapience et l’isle de Candre gisent est et uoest ung quart de suest et ung quart de noruoest, et a entre eulx .lxii. lieues.

L’isle de Candre a de long .lii. lieues.

L’isle de Candre et l’isle de Famagosse gisent est et uoest, et y a entre eulx .cxv. lieues.

L’isle de Famagosse a de longueur .c. lieues.

L’isle de Famagosse et cap de Cinaco gisent est et uoest.

Cap de Dionaco et fleuve de Jourdain gisent nort & su, et y a entre eulx .xc. lieues.