Le Routier de la mer jusques au fleuve de Jourdain
Cy commencent les jugemens de la mer des nefz, des maistres, des mariniers, et aussi des marchans et de tout leur estre.
Et premierement l’en fait ung homme maistre d’une nef, la nef est a plusieurs compaignons, la nef se part du pays dont elle est et vient a Bourdeaulx ou en aultre lieu & se frete a aller en pays estrange. Le maistre ne peult mie vendre la nef s’il n’a procuration ou mandement des seigneurs. Mais s’il a mestier d’argent pour les despens de la nef il peult mettre aucuns des appareilz en gaige par le conseil des mariniers de la nef. C’est le jugement en tel cas.
Une nef est a ung havre, et demoure pour attendre son fret et son temps, et quant il vient a soy departir le maistre doit prendre conseil a ses compaignons & leur dire. Seigneurs vous haite ce temps ? Aucun y aura qui dira. Ce temps n’est mie bon, car il est nouvel devenu, et le devons laisser asseoir. Et les aultres diront : le temps est bel et bon. Le maistre est tenu foy accorder o le plus de ses compaignons, et s’il le faisoit aultrement et la nef se perdoit, il est tenu de rendre la nef ou la somme qu’elle seroit prisee s’il a dequoy. C’est de ce le jugement.
Item si une nef se pert en aucunes terres en quelque lieu que ce soit les mariniers sont tenus de sauver le plus que ilz pourront des biens de la nef et des denrees. Mais s’ilz aydent a les sauver le maistre est tenu de leur bailler leurs coustz raisonnablement a venir en leur terre. Et aussi s’ilz ont tant sauvé parquoy le maistre le puisse faire, et peult bien le maistre engaiger des choses qui seront sauvees a aucun preudhomme pour les avoir, et s’ilz n’aydent desdictes choses sauver, il n’est mie tenu a les pourveoir en riens, ainçois perdent leurs loyers quant la nef est perdue.
Et aussi ne peut le maistre vendre les appareilz de la nef s’il n’a mandement ou procuration des seigneurs, ainçois il les doit mettre a sauvegarde jusques a tant que il sache la voulenté des seigneurs, et le doit faire le plus loyallement qu’il pourra, et s’il faisoit aultrement il est tenu a le amender s’il a dequoy. C’est le jugement.
Item une nef se part de Bourdeaulx ou d’aultre part chargee, il advient aucunesfois que la nef s’empire, l’on sauve le plus que l’on peult des denrees. Les marchans & le maistre sont en grant debat & demandent les marchans a avoir du maistre leurs denrees, ils les doivent bien avoir payant le fret d’autant que la nef aura fait tel voyage lieue par lieue, cours par cours s’il plaist au maistre. Et se le maistre veult il peult adouber sa nef, et s’il est en cas qu’elle peust estre prestement adoubee, et sinon il peult louer une aultre nef a achever son voyage. Et aura le maistre son fret de tant comme il aura des denrees sauvees. Et doit le fret desdictes denrees qui sont sauvees estre conté tout livre a livre & les denrees a payer son advenant des coustz qui auroient esté mis esdites denrees sauver. Et se ainsi estoit que le maistre & les marchans promissent aux gens qui leur ayderoient a sauver la nef & lesdictes denrees la tierce partie ou la moitié desdictes denrees qui pourroient estre sauvees pour le peril ou ilz sont la justice du pays doit bien garder quelle peine & quel labeur ilz auront mis a les sauver, et selon celle peine non contenant celle promesse que lesdictz maistres et marchans leur auroient faicte les guerdonner. C’est le jugement.
Item une nef se part d’aucune part chargee ou vuide et est arrivee en aucune part, les mariniers ne doivent yssir sans le congié du maistre, car se la nef perdoit ou empiroit par aucune adventure ilz sont tenus a amender. Mais se la nef estoit en lieu ou elle estoit ancree de deux amarees ou de trois ilz pevent bien yssir sans le congié du maistre laissant une partie desditz mariniers a garder la nef & les denrees a eulx revenir par temps en leur nef & se ilz estoient en demeure ilz les doivent amender s’ilz ont parquoy. Et est tel le jugement.
Mariniers se louent avecques leur maistre, et sont deux qui s’en issent hors de la nef sans le congié de leur maistre et s’en yvrent et puis font contemps et meslees desquelz y en a aucuns qui sont navrez, le maistre n’est mie tenu a les faire guarir ne a les pourveoir en riens ains les peult bien mettre hors de la nef eulx et leurs escours : et se ilz cousterent ilz sont tenuz a payer le plus au maistre. Mais se le maistre les envoye en aucun service pour le prouffit de la nef et ilz se blesseroient, ou on leur fist chose grevante ilz doivent estre guariz sur le coust de la nef. C’est le jugement.
Quant il advient que aucune maladie prent ung des mariniers de la nef en faisant le service de la nef : le maistre le doibt mettre hors de ladicte nef et si luy doibt querir hostel et luy doit querir lumiere comme ung grasset ou chandelle : et lui doit bailler ung varlet de la nef pour le garder, ou lui louer une femme qui prenne garde de luy : et si lui doit pourveoir de telles viandes comme l’en use en la nef, c’est assavoir autant comme il prenoit quant il estoit en santé ne rien plus s’il ne plaist au maistre : et s’il veult avoir viandes plus delicieuses le maistre n’est mie tenu le querre, se n’est a ses despens, et se la nef estoit preste a s’en partir elle ne doit mie demourer pour luy. S’il guerist il doit avoir son loyer tant en loyer competant & rabatant le fret se le maistre lui a fait et s’il meurt sa femme ou ses prochains amis le doivent avoir pour luy. Et tel est le jugement.
Item une nef est chargee a aller Bordeaulx ou en aultre lieu et advient que tourment la prent en la mer, et qu’elle ne peult eschaper sans getter les denrees de la nef : le maistre doit dire. Seigneurs il convient jetter hors ces denrees pour saulver la nef, et s’il n’y a nulz marchans qui respondent leurs voulentés : et greent le git bien les raisons au maistre sont plus clers ou maistre, s’ilz ne greent le maistre ne doit mie pource laisser qu’il ne jetteroit tant qu’il verroit que bien seroit jurant luy et le tiers de ses compaignons sur la saincte Evangille de Dieu quant il venoit a sa droicte voye descharger qu’il le faisoit pour saulver le corps de la nef & aussi les aultres denrees qui encores y sont, et les vins qui seront gettez doivent estre prisagez au feur de ceulx qui seroyent venuz a saulveté, et quant ils seront vendus si les doit on partir a la livre entre lesdictz marchans, et le maistre y doit partir et compter la nef ou le fret a son choix et pour recouvrer le dommaige : & les mariniers doivent avoir ung tonneau franc, l’autre se doit partir au giect selon ce qu’il aura s’il se deffend comme bon homme en la mer et s’il ne se deffend il n’aura rien de franchise, et pevent bien les marchans charger le maistre par son serment. C’est le jugement.
S’il advient que le maistre couppe son mast pour force de temps, il doit appeller les marchans qui ont les denrees en la nef s’il y en a nul & leur dire : il convient coupper ce mast pour saulver la nef, et les denrees y fust renable par loyaulté, et aussi aucunesfois advient que l’on couppe chables : et laisse l’on chables, et austier pour sauver la nef & les denrees. Toutes les choses sont comptees livre a livre comme giect, et quant Dieu donne que le navire est venu a sa droicte descharge a sauveté, tous les marchans doyvent payer leur advenant sans delay, ou vendre gaiger d’argent tout avant que les denrees soient mises hors de la nef. Et se la nef est a louaige et que le maistre y demourast par raison de leur debat, et il voit coullaison, le maistre ne y doit mie partir, ains doit avoir son fret ainsi comme se les tonneaulx fussent plains. C’est le jugement.
Item ung maistre d’une nef vient a sauveté a sa droicte descharge il doit monstrer aux marchans le cordaige auquel il guindera, et s’ilz voyent qu’il y ait que amender le maistre le doit amender : car se le tonneau se perdoit par defaulte de guindaige ou de cordaige le maistre est tenu de le payer aux marchans entre luy & ses mariniers, et si doit le maistre payer selon ce qu’il doit prendre de guindaige, et doit ledit guindaige estre mis a recouvrer le dommaige premierement, et le remenant doit estre parti entre eulx. Mais se d’aventure les cordaiges rompent sans que le maistre les monstrast aux marchans ilz sont tenus a rendre le dommaige. Mais se les marchans disent : le cordaige est bel & bon, et ilz rompent chascun doit partir au dommaige, c’est assavoir le marchant a qui le vin sera tant seulement et le maistre et les mariniers. C’est le jugement de ce cas.
Item une nef est chargee a Bourdeaulx ou aultre part, et lieve la voile pour mener ses vins et n’offre mie le maistre & ses mariniers leur voile comme ilz deussent, et les prent mauvais temps en la mer en telle maniere que la futaille crole ou effonce tonnel ou pipe, le navire arrive a saulveté a sa droicte descharge, le marchant dit au maistre que par la futaille est perdu leur vin, le maistre dit que non. Se le maistre peut jurer luy & ses mariniers soient trois ou quatre ou six, ou de ceulx que les marchans vouldroient, que les vins ne perdirent par eulx ne par leur futaille ne par leur deffault comme les marchans leur mettent sus ilz doivent estre quittes & delivres. Mais se ainsi est qu’ilz ne veullent jurer ilz sont tenus a officer leur voile bien et justement avant que partir de leur charge. C’est le jugement.
Item ung maistre loue ses mariniers & les doit bien tenir en paix, et offre estre leur juge et s’il y a nul qui desmente l’autre pourquoy ilz ayent vin & pain a table, celuy qui desmentira doit payer .iiii. deniers. Et si nul desment le maistre payera .viii. deniers. Et aussi se le maistre desment nul il payera aussi .viii. deniers. Et se ainsi est que le maistre frappe aucun de ses mariniers, le marinier doit attendre la premiere collee comme du poing ou de paulme. Et s’il le fiert plus il se peult deffendre. Et si le marinier fiert le maistre il doit payer .v. soulz, ou perdre le poing. C’est le jugement.
Une nef se frete a Bourdeaulx ou en aultre lieu, et vient a sa droicte descharge, et sont chargez my partie tonnaige : et petis lomauz servantes sont sur les marchans. La coustume de Bretaigne est : tous ceulx que l’en prent depuis que l’en passe l’isle de Bas et l’en soit paiuz la main ; et ceulx de Normendie, et d’Angleterre puis qu’on passe Grenese, et ceulx de Flandres puis qu’on passe celle Grenese, et ceulx de Copuers puis qu’on passe Gernesse mie. C’est le jugement.
Si contens se siect entre le maistre d’une nef et les mariniers, le maistre doit oster touaille trois fois devant son marinier avant que le mettre hors. Et se le marinier se offre a faire l’amende au regard des mariniers qui sont a table, et se le maistre est tel qu’il n’en vueille rien faire et le met hors, le marinier s’en peult aller suyvre de la nef jusques a sa droicte descharge, et doit avoir aussi bon loyer comme s’il estoit venu dedens amendant le meffaict au regard des compaignons. Et se ainsi est que le maistre ne prenne aussi bon compaignon comme celuy en la nef, et la nef s’empire par aucune adventure, le maistre est tenu a rendre la nef et la marchandise s’il a parquoy. C’est le jugement.
Item une nef est en ung cours liee & maree, une aultre nef vient dehors de la mer et ne se gouverne mie bien, et se fiert a la nef qui est en sa voye, si que la nef est dommaigee du coup que l’autre nef luy a donné, et a des vins fouldrees d’une partie et d’autre par la raison de cest coup, le dommaige doit estre parti et prisaigé moytié par moytié les deux nefz, et les vins qui sont dedens les deux nefz partir et le dommage aussi entre les marchans & le maistre de la nef qui a feru l’autre est tenu a jurer sur sainctes Evangilles luy et ses marchans qu’ilz ne le firent mie de leur gré. Et est raison pourquoy ce jugement fut fait.
Premierement que une vieille nef ne se met myz voulentiers en la voye d’une meilleurre si avant qu’elle endommaige chose pour grever la nef, mais quant elle sçait bien qu’elle y doit partir jusques a la moytié elle se trenche voulentiers hors de sa voye. Et tel est le jugement.
Item deux nefz ou plusieurs sont en ung havre et y a peu eaue & si asseche l’ancre de la nef et le maistre de celle nef doit dire : Maistre levés vostre ancre, car elle est trop pres de nous et nous pourroit faire dommaige, & ils ne veulent mie lever, le maistre & ses mariniers qui pourront partir du dommaige le pevent lever et eslongner d’eulx et s’ilz deffendent a lever l’ancre et l’ancre leur face dommage ilz sont tenuz a amender tout au long. Et aussi pareillement se ainsi estoit que ilz ne eussent mis bonuic et il fait dommaige ilz sont tenus a rendre le dommaige tout au long, et si ainsi estoit qu’ilz soient en ung havre assechés ilz sont tenus de mettre aloingnes a leurs ancres qui apparoissoient au plain de la mer. Et tel est le jugement.
Une nef est arrivee o sa charge a Bourdeaulx ou aultre lieu le maistre est tenu dire a ses compaignons : seigneurs frettez o nous amareges ou vous louerés au fret de la nef, ilz sont tenus a respondre lequel ilz feront et se ilz prennent au fret de la nef ilz auront comme la nef aura et s’ilz veulent freter par eulx ilz doivent freter en telle maniere que la nef ne soit mie demourant, et s’il advint chose qu’il ne trouvassent fret le maistre n’y a nul blasme, et leur doit monstrer leur remage, et peult mettre le pesant de leur mareage chascun, et se ilz veulent mettre tonneau d’eaue ilz le pevent mettre pour tonneau de vin, et se getaison se faisoit en la mer leur tonneau d’eaue doit estre pour tonneau de vin ou pour aultres denrees livre a livre parquoy les mariniers se puissent defendre en la mer, et se ainsi est qu’il le fretegent es marchans telle franchise comme le marinier aura doit avoir le marchant. C’est le jugement.
Les mariniers de Bretaigne ne doivent avoir que une cuisine le jour par raison, car ilz ont bruvaiges allans & venans, et ceulx de Normendie doivent avoir deux mes de cuisine le jour : pource qu’ilz n’ont que eaue a aller aux despens de la nef, & puis que la nef est a la terre au vin : les mariniers doivent avoir bruvaiges, et ce leur doit le maistre querir. C’est le jugement.
Une nef vient a descharger, les mariniers veulent avoir leur fret, aucuns y a qui n’ont mie lit ne arche en la nef, le maistre peult retenir de leur loyer pour rendre la nef ou ils la prindrent s’ilz ne donnent bonne cauption de fournir tout le voiage. C’est le jugement.
Le maistre d’une nef loue ses mariniers en la ville dont la nef est et les loue les uns a mareage les aultres a deniers, il advient que la nef ne peult trouver fret a venir es parties et leur convient aller plus loing, ceulx qui sont a mareage le doivent suivre, mais ceulx qui sont a deniers le maistre leur doit croistre loyer veue par veue et cours par cours par la raison qu’il les auroit louez pour aller en certain lieu, et s’ilz vont plus pres que le lieu ou l’abonnement fut prins ilz doivent avoir tout loyer, mais ilz doivent rendre la nef ou ilz la prindrent et la mettre a l’adventure de Dieu. C’est le jugement.
Item il advient que une nef vient a Bourdeaux ou en aultre lieu de telle cuisine il aura en la nef, deux des mariniers en pevent porter ung metz a la mer demi metz tel comme ils sont trenchés en la nef, et tel pain comme il aura selon ce qu’ilz pourront menger a une fois, & du bruvaige rien, et doivent ceulx tost et appertement retourner pourquoy le maistre ne perde l’erre de la nef, car si le maistre le perdoit et il y eust dommaige ilz sont tenus a l’amender, ou se ung des compaignons se blece par besoin d’ayde, ilz sont tenus a le faire guarir & l’amender au dit d’un des compaignons et au dit de son maistre & de ceulx de la table. Et tel est le jugement.
Ung maistre frete la nef a ung marchant devise d’un certain terme loyaument dedens quant le marchant doit charger la nef a estre preste a s’en aller, le marchant ne le fait ains tient le maistre et ses mariniers par l’espace de .viii. jours ou de .xv. ou de plus aucunesfois il pert sa muaison en son temps par defaulte du marchant. Le marchant est tenu a amender au maistre. Et telle amende comme le maistre aura fait les mariniers en doivent avoir le quart, et le maistre les trois pars par raison qu’il leur treuve leurs despens. C’est le jugement.
Ung marchant frete une nef et la charge et la met au chemin. Celle nef entre en ung port et demeurent tant que denier leur fault. Le maistre doit envoyer bien tost en son pays pour querir de l’argent, mais il ne doit mie perdre son armogan. S’il le fait il est tenu a rendre aux marchans tous coustz, interestz, ou dommaiges qu’ilz y pourroient avoir, mais le maistre peult bien prendre du vin et des denrees aux marchans & en vendre pour querir son estorment, et quant la nef sera venue a sa droicte descharge les vins que le maistre aura prins doivent estre asseurés et mis au feur que les aultres seroient vendus communement ne a plus ne a moins. Et doit le maistre avoir son fret des vins qu’il aura prins. C’est le jugement.
Ung locman prent une nef a mener a Sainct Malo ou en aultre lieu. S’il fault et la nef s’empire pour faulte qu’il ne la sache conduire les marchans aient dommaige il est tenu de rendre les dommaiges s’il a dequoy, et s’il n’a dequoy il doit avoir la teste couppee. Et se le maistre, ou aucuns des mariniers, ou aucuns des marchans lui couppent la teste, ilz ne sont pas tenus a payer amendement. Mais toutesfois l’en doit sçavoir avant ce faire s’il a dequoy amender. C’est le jugement.
Une nef guinde a sa descharge & se met a seche ou elle est si jolie que les mariniers prennent a sur voile ou a au sourtil devant ou derriere le maistre leur doit croistre leur loyer veue pour veue. Et guindent vins, et advient qu’ilz laissent une broche ouverte ou tonneau qu’on guinde et ne l’ont mie amaree aux cordes au bout de la nef, et le tonneau defraude et chiet et se pert & s’afonse sur ung aultre sur lequel il chiet et sont tous deux perdus. Le maistre et les mariniers les doivent rendre aux marchans. Et les marchans doivent payer le fret des deux tonneaulx par raison que on leur doit payer au feur des aultres qui sont vendus. Le maistre et les mariniers doivent mettre leur guidage premierement a recouvrer leur dommaige livre a livre. Les seigneurs de la nef ne doivent rien prendre : car c’est par faulte du maistre & des mariniers de mareer le tonneau. C’est le jugement.
Deux vaisseaulx sont compaignons pour aller es harencz ou es maquereaulx, et doivent mettre autant d’engins l’un comme l’autre, a gré sont de partir la gaigne par moitié entre eulx. Et s’il advient que Dieu face sa voulenté d’un des vaisseaulx de la gent, et des engins et des aultres choses l’un s’eschappe et vient a sauveté. Il est ainsi que les amis d’iceluy qui est mort leur demandent a avoir partie du gaing qu’ilz ont fait tant es engins que es harencz et au vaissel. Ilz auront leur partie et leur gaing des engins et des harencz par le serment de ceulx qui seront eschappez mais au vaissel ilz n’auront nulle chose. Et tel est le jugement.
Tesmoing le seel de l’isle d’Ausleron establi es contractz de ladicte isle le jour du mardi apres la feste sainct André. L’an Mil .cc.lxvi.
Cy finissent les jugemens de la mer, des nefz, des maistres, des mariniers, des marchans & de tout leur estre avecques le Routier. Imprimé a Rouen, pour Jacques le Forestier demourant audict lieu devant Nostre Dame a l’enseigne de la fleur de lis.