Poésies de Charles d'Orléans

Aux officiers de nostre Parlement

Qu'ilz le traictent et aident doulcement

En tout affaire,

A son besoing, sans venir au contraire;

Si chier qu'ilz ont nous obeir et plaire,

Et qu'ilz doubtent envers nous de forfaire

En corps et biens,

Le soustenant, sans y epargnier riens,

Contre Dangier avecques tous les siens,

Malle bouche plaine de faulx maintiens,

Et jalousie;

Car chascun d'eulx de grever estudie

Les vraiz subgietz de nostre Seigneurie,

Dont il est l'un, et sera à sa vie,

Car son serment

De nous servir devant tout ligement

Avons receu, et pour plus fermement,

Nous asseurer qu'il fera loyaument

Entier devoir,

Avons voulu en gaige recevoir

Le cueur de lui, lequel, de bon vouloir,

A tout soubzmis en noz mains et povoir;

Pourquoy tenus

Sommes à luy par ce de plus en plus,

Si ne seront pas ses biensfaiz perdus,

Ne ses travaulx pour neant despendus;

Mais pour monstrer

A toutes gens bon exemple d'amer,

Nous le voulons richement guerdonner,

Et de noz biens, à largesse donner,

Tesmoing nos seaulx

Cy actachiez, devant tous nos feaulx,

Gens de conseil, et serviteurs loyaulx

Venus vers nous par mandemens royaulx,

Pour nous servir.

Donné le jour saint Valentin martir,

En la cité de gracieux desir,

Où avons fait nostre conseil tenir.

LE DESSOUBZ DE LA RETENUE

Par Cupido et Venus souverains,

A ce presens plusieurs plaisirs mondains.

BALADE.

Belle, bonne, nompareille plaisant,

Je vous suppli vueilliez me pardonner

Se moy qui sui vostre grace actendant,

Viens devers vous pour mon fait raconter,

Plus longuement je ne le puis celer

Qu'il ne faille que saichiez ma destresse,

Comme celle qui me peut conforter,

Car je vous tiens pour ma seule maistresse.

Se cy à plain vous vois mes maulx disant,

Force d'amours me fait ainsi parler;

Car je devins vostre loyal servant,

Le premier jour que je peuz regarder

La grant beaulté que vous avez sans per,

Qui me feroit avoir toute liesse,

Se serviteur vous plaisoit me nommer;

Car je vous tiens pour ma seule maistresse.

Que me donnez en octroy don si grant,

Je ne l'ose dire, ne demander;

Mais s'il vous plaist que, de cy en avant,

En vous servant puisse ma vie user,

Je vous supply que sans me refuser

Vueillez souffrir qu'y mecte ma jeunesse,

Nul autre bien je ne vueil souhaidier,

Car je vous tiens pour ma seule maistresse.

BALADE.

Vueilliez voz yeulx emprisonner,

Et sur moy plus ne les gectez;

Car quant vous plaist me regarder,

Par Dieu, Belle, vous me tuez;

Et en tel point mon cueur mectez

Que je ne scay que faire doye;

Je suis mort se vous ne m'aidez,

Ma seule souveraine joye,

Je ne vous ose demander

Que vostre cueur vous me donnez,

Mais, se droit me voulez garder

Puisque le cueur de moy avez,

Le vostre fault que me laissiez;

Car sans cueur vivre ne pourroye;

Faictes en, comme vous vouldrez,

Ma seule souveraine joye.

Trop hardy suis d'ainsi parler,

Mais, pardonner le me devez

Et n'en devez autruy blasmer,

Que le gent corps que vous portez

Qui m'a mis, comme vous veez,

Si fort en l'amoureuse voye,

Qu'en vostre prison me tenez,

Ma seule souveraine joye.

L'ENVOY.

Ma Dame, plus que ne savez,

Amour, si tres fort me guerroye,

Qu'à vous me rens, or me prenez,

Ma seule souveraine joye.

BALADE.

C'est grand peril de regarder

Chose dont peut venir la mort,

Combien qu'on ne s'en scet garder

Aucunes foiz, soit droit ou tort,

Quant plaisance si est d'accord

Avecques ung jeune desir,

Nul ne pourroit son coeur tenir

D'envoyer les yeulx en messaige;

On le voit souvent avenir,

Aussi bien au fol comme au saige.

Lesquelz yeulx viennent raporter

Ung si tres gracieulx raport

Au cueur, quant le veult escouter,

Que s'il a eu d'amer l'effort,

Encores l'aura il plus fort;

Et le font du tout retenir

Ou service, sans departir

D'amours, à son tres grant dommaige

On le voit souvent avenir,

Aussi bien au fol comme au saige.

Car mains maulx lui fault endurer,

Et de soussy passer le port,

Avant qu'il puisse recouvrer

L'acointance de Reconfort,

Qui plusieurs foiz au besoing dort,

Quant on se veult de lui servir;

Et lors il est plus que martir;

Car son mal vault trop pis que raige,

On le voit souvent avenir,

Aussi bien au fol comme au saige.

L'ENVOY.

Amour, ne prenez desplaisir

S'ay dit le mal que fault souffrir,

Demourant en vostre servaige;

On le voit souvent avenir,

Aussi bien au fol comme au saige.

BALADE.

Comment se peut ung povre cueur deffendre,

Quand deux beaulx yeulx le viennent assaillir;

Le cueur est seul, desarmé, nu et tendre,

Et les yeulx sont bien armez de plaisirs;

Contre tous deux ne pourroit pié tenir.

Amour aussi est de leur aliance,

Nul ne tendroit contre telle puissance.

Il lui convient ou mourir ou se rendre,

Trop grant honte lui seroit de fuir;

Plus baudement les oseroit actendre,

S'il eust pavais dont il se peust couvrir;

Mais point n'en a, si lui vault mieux souffrir,

Et se mectre tout en leur gouvernance,

Nul ne tendroit contre telle puissance.

Qu'il soit ainsi bien me le fist aprendre

Ma maistresse, mon souverain desir,

Quand il lui pleut ja pieca entreprendre

De me vouloir de ses doulx yeulx ferir;

Oncques depuis mon cueur ne peut guerir,

Car lors fut il desconfit à oultrance;

Nul ne tendroit contre telle puissance.

BALADE.

Espargniez vostre doulx actrait,

Et vostre gracieux parler,

Car Dieu scet les maulx qu'ilz ont fait

A mon povre cueur endurer;

Puisque ne voulez m'acorder

Ce qui pourroit mes maulx guerir,

Laissiez moy passer ma meschance,

Sans plus me vouloir assaillir

Par vostre plaisant acointance.

Vers Amours faictes grant forfait,

Je l'ose pour vray advouer;

Quant me ferez d'amoureux trait,

Et ne me voulez conforter,

Je croy que me voulez tuer.

Pleust à Dieu que peussiez sentir

Une foiz la dure grevance

Que m'avez fait longtemps souffrir

Par vostre plaisant acointance.

Helas! que vous ay je meffait

Par quoy me doyez tourmenter;

Quant mon cueur d'amer se retrait,

Tantost le venez rappeller;

Plaise vous en paix le laissier,

Ou lui acorder son desir;

Honte vous est, non pas vaillance,

D'un loyal cueur ainsi meurdrir

Par vostre plaisant acointance.

BALADE.

N'a pas longtemps qu'alay parler

A mon cueur tout secretement,

Et lui conseillay de s'oster

Hors de l'amoureux pensement;

Mais me dist bien fellement:

Ne m'en parlez plus, je vous prie;

J'ameray tousjours, se m'aist Dieux,

Car j'ay la plus belle choisie,

Ainsi m'ont raporté mes yeulx.

Lors dis: Vueilliez me pardonner,

Car je vous jure mon serement

Que conseil vous cuide donner,

A mon povoir, tres loyaument;

Voulez vous sans allegement

En douleur finer vostre vie?

Nennil dya, dist il, j'auray mieulx;

Ma Dame m'a fait chiere lie,

Ainsi m'ont raporté mes yeulx.

Cuidez vous scavoir sans doubter

Par ung regart tant seulement,

Se, dis je, du tout son penser

Ou par ung doulx acointement.

Taisiez vous, dist il, vrayement

Je ne croiray chose qu'on die;

Mais la serviray en tous lieux,

Car de tous biens est enrichie,

Ainsi m'ont raporté mes yeulx.

BALADE.

De jamais n'amer par amours

J'ay aucune foiz le vouloir,

Pour les ennuieuses dolours

Qu'il me fault souvent recevoir,

Mais en la fin, pour dire voir,

Quelque mal que doye porter,

Je vous asseure par ma foy,

Que je n'en sauroye garder

Mon cueur qui est maistre de moy.

Combien qu'ay eu d'estranges tours,

Mais j'ai tout mis à nonchaloir,

Pensant de recouvrer secours

De Confort ou d'ung doulx espoir:

Hélas! se j'eusse le povoir

D'aucunement hors m'en bouter,

Par le serement qu'à Amours doy,

Jamais n'y lairroye rentrer

Mon cueur qui est maistre de moy.

Car je scay bien que par doulcours

Amour le scet si bien avoir,

Qu'il vouldroit ainsi tous les jours

Demourer sans ja s'en mouvoir;

Nil ne veult oir ne savoir

Le mal qu'il me fait endurer,

Plaisance l'a mis en ce ploy,

Elle fait mal de le m'oster

Mon cueur qui est maistre de moy.

L'ENVOY.

Il me desplaist d'en tant parler,

Mais, par le Dieu en qui je croy,

Ce fait desir de recouvrer

Mon cueur qui est maistre de moy.

BALADE.

Quand je suis couchié en mon lit,

Je ne puis en paix reposer;

Car toute la nuit mon cueur lit

Ou rommant de plaisant penser,

Et me prie de l'escouter;

Si ne l'ose desobeir,

Pour dobte de le courroucier,

Ainsi je laisse le dormir.

Ce livre si est tout escript

Des faiz de ma Dame sans per;

Souvent mon cueur de joye rit,

Quand il les list ou oyt compter;

Car certes tant sont à louer,

Qu'il y prent souverain plaisir,

Moy mesmes ne m'en puis lasser,

Ainsi je laisse le dormir.

Se mes yeux demandent respit

Par sommeil qui les vient grever,

Il les tense par grant despit,

Et si ne les peut surmonter;

Il ne cesse de souspirer

A part soy; j'ay lors, sans mentir,

Grant paine de le rapaisier,

Ainsi je laisse le dormir.

L'ENVOY.

Amour, je ne puis gouverner

Mon cueur; car tant vous veult servir

Qu'il ne scet jour ne nuit cesser,

Ainsi je laisse le dormir.

BALADE.

Fresche beaulté tres riche de jeunesse,

Riant regart trait amoureusement,

Plaisant parler gouverné par sagesse,

Port femenin en corps bien fait et gent,

Haultain maintien demené doulcement,

Acueil humble plain de maniere lie,

Sans nul dangier bonne chiere faisant,

Et de chascun pris et los emportant;

De ces grans biens est ma Dame garnie.

Tant bien lui siet à la noble Princesse

Chanter, dancer et tout esbatement,

Qu'on la nomme de ce faire maistresse,

Elle fait tout si gracieusement,

Que nul n'y scet trouver amendement:

L'escolle peut tenir de courtoisie,

En la voyant aprent qui est saichant,

Et en ses faiz qui va garde prenant,

De ces grans biens est ma Dame garnie.

Bonté, Honneur, avecques Gentillesse

Tiennent son cueur en leur gouvernement,

Et Loyaulté nuit et jour ne la laisse;

Nature mist tout son entendement

A la fourmer, et faire proprement;

De point en point, c'est la mieux accomplie

Qui aujourdui soit ou monde vivant,

Je ne dy riens que tous ne vont disant;

De ces grans biens est ma Dame garnie.

Elle semble mieulx que femme Deesse,

Si croy que Dieu l'envoya seulement

En ce monde, pour monstrer la largesse

De ces haults dons qu'il a entierement

En elle mis abandonnement.

Elle n'a per, plus ne scay que je dye,

Pour fol me tiens de l'aler devisant,

Car moy ne nul n'est à ce souffisant,

De ces grans biens est ma Dame garnie.

S'il est aucun qui soit prins de tristesse

Voise voir son doulx maintenement,

Je me fais fort que le mal qui le blesse

Le laissera pour lors soudainement,

Et en oubly sera mis plainement;

C'est Paradis que de sa compaignie,

A tous complaist, à nul n'est ennuyant,

Qui plus la voit plus en est désirant,

De ces grans biens est ma Dame garnie.

L'ENVOY.

Toutes dames qui oyez cy comment

Prise celle que j'ayme loyaument,

Ne m'en saichiez maugré, je vous en prie;

Je ne parle pas en vous desprisant,

Mais comme sien je dy en m'acquittant:

De ces grans biens est ma Dame garnie.

BALADE.

A ma Dame je ne scay que je dye,

Ne par quel bout je doye commencer,

Pour vous mander la doloreuse vie

Qu'Amour me fait chascun jour endurer;

Trop mieulx vaulsist me taire que parler,

Car prouffiter ne me pevent mes plains,

Ne je ne puis guerison recouvrer,

Puisqu'ainsi est que de vous suis loingtains.

Quanque je voy me desplaist et ennuye,

Et n'en ose contenance monstrer,

Mais ma bouche fait semblant qu'elle rie,

Quant mainteffoiz je sens mon cueur plourer.

Au fort, martir on me devra nommer,

Se Dieu d'amours fait nulz amoureux Saints,

Car j'ay des maulx plus que ne scay compter,

Puisqu'ainsi est que de vous suis loingtains.

Et non pourtant humblement vous mercie,

Car par escript vous a pleu me donner

Ung doulx confort que j'ay à chiere lie

Receu de cueur, et de joyeulx penser,

Vous suppliant que ne vueilliez changier,

Car en vous sont tous mes plaisirs mondains

Desquelz me fault à present deporter,

Puisqu'ainsi est que de vous suis loingtains.

BALADE.

Loingtain de vous, ma tres belle maistresse,

Fors que de cueur que laissié je vous ay,

A compaignie de Deuil et de Tristesse,

Jusques à tant que reconfort auray

D'un doulx plaisir, quant reveoir pourray

Vostre gent corps, plaisant et gracieux;

Car lors lairray tous mes maulx ennuyeux

Et trouveray, se m'a dit Esperance,

Par le pourchas du regard de mes yeulx

Autant de bien que j'ay de desplaisance

Car s'oncques nul sceut que c'est de destresse,

Je pense bien que j'en ay fait l'essay;

Si tres avant et à telle largesse

Qu'en dueil pareil nulluy de moy ne scay;

Mais ne m'en chault; certes j'endureray

Au desplaisir des jaloux envieux,

Et me tendray par semblance joyeulx,

Car quand je suy en greveuse penance,

Ilz recoyvent, que mal jour leur doint Dieux,

Autant de bien que j'ay de desplaisance.

Tout prens en gré jeune, gente Princesse,

Mais qu'en saichiez tant seulement le vray,

En actendant le gueredon de Liesse

Qu'à mon povoir vers vous desserviray;

Car le conseil de Loyaulté feray,

Que garderay pres de moy en tous lieux,

Vostre tousjours soye, jeunes ou vieulx,

Priant, a Dieu ma seule desirance,

Qu'il vous envoit, savoir ne povez mieulx,

Autant de bien que j'ay que desplaisance.

BALADE.

Puisqu'ainsi est que loingtain de vous suis,

Ma Maistresse, dont Dieu scet s'il m'ennuye,

Si chierement vous requier que je puis,

Qu'il vous plaise de vostre courtoisie,

Quant vous estes seule sans compaignie,

Me souhaidier ung baisier amoureux

Venant du cueur et de pensée lie,

Pour alegier mes griefz maulx doloureux.

Quant en mon lit doy reposer de nuis,

Penser m'assault, et Désir me guerrye;

Et en pensant mainteffoiz m'est advis

Que je vous tiens entre mes bras, m'amye;

Lors accolle mon oreillier, et crie:

Mercy Amours, faictes moy si eureux,

Qu'avenir puist mon penser en ma vie,

Pour alegier mes griefz maulx doloureux.

Espoir m'a dit et par sa foy promis

Qu'il m'aidera, et que ne m'en soussie;

Mais tant y met qu'un an me semble dix,

Et non pourtant, soit ou sens ou folie,

Je m'y actens, et en lui je m'afie

Qu'il fera tant que Dangier le crueux

N'aura briefment plus sur moy seigneurie,

Pour alegier mes griefz maulx doloureux.

L'ENVOY.

A Loyaulté de plus en plus m'alye,

Et à Amours humblement je supplie

Que de mon fait vueillent estre piteux,

En me donnant de mes vouloirs partie,

Pour alegier mes griefz maulx doloureux.

BALADE.

Pourtant se souvent ne vous voy,

Pensez vous plus que vostre soye;

Par le serement que je vous doy,

Si suis autant que je souloye;

N'il n'est ne plaisance, ne joye,

N'autre bien qu'on rac puist donner,

Je le vous prometz loyaument,

Qui me puist ce vouloir oster

Fors que la mort tant seulement.

Vous savez que je vous feis foy

Pieca de tout ce que j'avoye,

Et vous laissay, en lieu de moy,

Le gaige que plus chier j'amoye;

C'estoit mon cueur que j'ordonnoye

Pour avecques vous demourer,

A qui je suis entierement;

Nul ne m'en pourroit destourber

Fors que la mort tant seulement.

Combien certes que je recoy

Tel mal que, se le vous disoye,

Vous auriez, comme je croy,

Pitié du mal qui me guerroye;

Car de tout dueil suis en la voye,

Vous le povez assez penser,

Et ay esté si longuement,

Que je ne doy riens desirer

Fors que la mort tant seulement.

L'ENVOY.

Belle que tant veoir vouldroye,

Je prie à Dieu que brief vous voye;

Ou s'il ne le veult accorder,

Je lui supply tres humblement

Que riens ne me vueille donner

Fors que la mort tant seulement.

BALADE.

Quelles nouvelles, ma Maistresse,

Comment se portent noz amours?

De ma part je vous fais promesse

Qu'en ung propos me tiens tousjours,

Sans jamais penser le rebours;

C'est que seray toute ma vie

Vostre du tout entierement,

Et pour ce de vostre partie

Acquittez vous pareillement.

Combien que Dangier et Destresse

Ont fait longuement leurs sejours

Avec mon cueur, et par rudesse

Lui ont monstré d'estranges tours,

Helas! en amoureuses cours,

C'est pitié qu'ilz ont seigneurie;

Si mectray paine que briefment

Loyaulté sur eulx ait maistrie,

Acquittez vous pareillement.

Quoyque la nue de Tristesse

Par ung longtemps ait fait son cours;

Apres le beau temps de Liesse

Vendra qui donnera secours

A noz deux cueurs, car mon recours

J'ay en espoir, en qui me fie,

Et en vous, Belle, seulement,

Car jamais je ne vous oublie;

Acquittez vous pareillement.

L'ENVOY.

Soyez seure, ma doulce amye,

Que je vous ayme loyaument,

Or vous requier et vous supplie

Acquittez vous pareillement.

BALADE.

Belle que je tiens pour amye,

Pensez, quelque part que je soye,

Que jamais je ne vous oublie;

Et pour ce prier vous vouldroye,

Jusques à tant que vous revoye,

Qu'il vous souviengne de cellui

Qui a trouvé peu de mercy

En vous, se dire je l'osoye.

Combien que je ne dye mie

Que n'aye receu bien et joye,

En vostre doulce compaignie,

Plus que desservir ne sauroye;

Non pourtant voulentiers j'auroye

Le guerdon de loyal amy,

Qu'oncques ne trouvay jusqu'à cy

En vous, se dire je l'osoye.

Je vous ai longement servie,

Si m'est advis qu'avoir devroye

Le don que de sa courtoisie

Amour à ses servans envoye;

Or faictes qu'estre content doye,

Et m'accordez ce que je dy,

Car trop avez refus nourry

En vous, se dire je l'osoye.

BALADE.

Ma Dame, vous povez savoir

Les biens qu'ay euz à vous servir;

Car par ma foy, pour dire voir,

Oncques je n'y peuz acquerir

Tant seulement ung doulx plaisir,

Que sitost que je le tenoye,

Dangier le me venoit tollir

Ce peu de plaisir que j'avoye.

Je n'en savoye nul avoir

Qui peust contenter mon desir,

Se non quant vous povoye voir,

Ma joye, mon seul souvenir;

Or m'en a fait Dangier bannir,

Tant qu'il faut que loing de vous soye,

Par quoy a fait de moy partir

Ce peu de plaisir que j'avoye.

Non pas peu, car de bon vouloir

Content m'en devoye tenir,

En esperant de recevoir

Ung trop plus grant bien advenir;

Je n'y cuidoye point faillir

A la paine que g'y mectoye,

Cela me faisoit enrichir

Ce peu de plaisir que j'avoye.

L'ENVOY.

Belle, je vous vueil requerir,

Pensez, quant serez de loisir,

Qu'en grant mal qui trop me guerroye,

Est tourné, sans vous en mentir,

Ce peu de plaisir que j'avoye.

BALADE.

En ce joyeulx temps du jourduy

Que le mois de may ce commance,

Et que l'en doit laissier ennuy,

Pour prendre joyeuse plaisance,

Je me trouve sans recouvrance,

Loingtain de joye conquester;

De tristesse si bien renté

Que j'ay, je m'en puis bien vanter,

Le rebours de ma voulenté.

Las! Amours je ne voy nulluy

Qui n'ait aucune souffisance,

Fors que moy seul qui suis celluy

Qui est le plus dolent de France.

J'ay failli à mon esperance;

Car quant à vous me voulz donner

Pour estre vostre serementé,

Jamais ne cuidoye trouver

Le rebours de ma voulenté.

Au fort, puisqu'en ce point je suy,

Je porteray ma grant penance,

Ayant vers Loyaulté refuy

Où j'ay mis toute ma fiance;

Ne Dangier qui ainsi m'avance,

Quelque mal que doye porter,

Combien que trop m'a tourmenté,

Ne pourra ja en moy bouter

Le rebours de ma voulenté.

L'ENVOY.

D'aucun reconfort acointer

Plusieurs foiz m'en suy dementé;

Mais j'ay tousjours au par aler

Le rebours de ma voulenté.

BALADE.

Quant je party derrainement

De ma souveraine sans per,

Que Dieu gard et luy doint briefment

Joye de son loyal penser,

Mon cueur lui laissay emporter;

Oncques puis ne le peuz ravoir,

Si m'esmerveille, main et soir,

Comment j'ai vesqu tant de jours

Depuis sans cueur, mais pour tout voir,

Ce n'est que miracle d'Amours.

Qui est cellui qui longuement

Peut vivre sans cueur, ou durer

Comme j'ay fait en grief tourment;

Certes nul, je m'en puis vanter.

Mais Amours ont voulu monstrer

En ce leur gracieux povoir,

Pour donner aux amans vouloir

D'eulx fier en leur doulx secours;

Car bien pevent apparcevoir,

Ce n'est que miracle d'Amours.

Quant pitié vit que franchement

Voulu mon cueur abandonner

Envers ma Dame, tellement

Traicta que lui fist me laissier

Son cueur, me chargeant le garder,

Dont j'ay fait mon loyal devoir,

Maugré Dangier qui recevoir

M'a fait chascun jour de telz tours,

Que sans mort en ce point manoir

Ce n'est que miracle d'Amours.

BALADE.

Douleur, courroux, desplaisir et tristesse,

Quelque tourment que j'aye main et soir,

Ne pour doubte de mourir de destresse,

Ja ne sera en tout vostre povoir

De me changier le tres loyal vouloir

Qu'ay eu tousjours de la Belle servir,

Par qui je puis, et pense recevoir

Le plus grand bien qui me puist avenir.

Quant j'ay par vous aucun mal qui me blesse,

Je l'endure par le conseil d'Espoir

Qui ma promis qu'à ma seule maistresse

Lui fera brief mon angoisse savoir,

En lui mandant qu'en faisant mon devoir,

J'ay tous les maulx que nul pourrait souffrir;

Lors trouveray, je ne scay s'il dist voir,

Le plus grant bien qui me puist avenir.

Ne m'espargniez donc en rien de rudesse,

Je vous feray bien brief apparcevoir

Qu'aura y secours d'un Confort de liesse;

Longtemps ne puis en ce point remanoir,

Pour ce je metz du tout à nonchaloir

Les tres grans maulx que me faictes sentir;

Bien aurez dueil, se me voyez avoir

Le plus grant bien qui me puist avenir.

L'ENVOY.

Je suis cellui au cueur vestu de noir

Qui dy ainsi qui que le vueille ouyr,

J'auray briefment, Loyaulté m'en fait hoir,

Le plus grant bien qui me puist avenir.

BALADE.

Jeune, gente, plaisant et debonnaire,

Par ung prier qui vault commandement

Chargié m'avez d'une balade faire;

Si l'ay faicte de cueur joyeusement;

Or la vueilliez recevoir doulcement,

Vous y verrez, s'il vous plaist à la lire,

Le mal que j'ay combien que vrayement

J'aymasse mieulx de bouche le vous dire.

Vostre doulceur m'a sceu si bien atraire

Que tout vostre je suis entierement,

Tres desirant de vous servir et plaire,

Mais je seuffre maint doloreux tourment,

Quant à mon gré je ne vous voy souvent,

Et me desplaist quant me fault vous escrire,

Car se faire ce povoit autrement,

J'aymasse mieulx de bouche le vous dire.

C'est par Dangier mon cruel adversaire

Qui m'a tenu en ses mains longuement,

En tous mes faiz je le trouve contraire,

Et plus se rit, quant plus me voit dolent;

Se vouloye raconter plainement

En cest escript mon ennuyeux martire.

Trop long seroit pour ce certainement,

J'aymasse mieulx de bouche le vous dire.

BALADE.

Loué soit cellui qui trouva

Premier la manière d'escrire,

En ce grand confort ordonna

Pour amans qui sont en martire;

Car quant ne pevent aler dire

A leurs dames leur grief tourment,

Ce leur est moult d'alegement,

Quant par escript pevent mander

Les maulx qu'ilz portent humblement,

Pour bien et loyaument amer.

Quand ung amoureux escrira

Son dueil, qui trop le tient de rire,

Au plustost qu'envoyé l'aura

A celle qui est son seul mire;

S'il lui plaist à la lectre lire,

Elle peut veoir clerement

Son doloreux gouvernement,

Et lors pitié lui scet monstrer

Qu'il dessert bon guerdonnement,

Pour bien et loyaument amer.

Par mon cueur je congnois pieca

Ce mestier, car quant il souspire,

Jamais rapaisié ne sera,

Tant qu'il ait envoyé de tire

Vers la belle que tant desire;

Et puis s'il peut aucunement

Oir nouvelles seulement

De sa doulce beaulté sans per,

Il oublie l'ennuy qu'il sent,

Pour bien et loyaument amer.

L'ENVOY.

Ma Dame, Dieu doint que briefment

Vous puisse de bouche compter

Ce que j'ay souffert longuement,

Pour bien et loyaument amer.

BALADE.

Belle combien que de mon fait

Je croy qu'avez peu souvenance,

Toutesfoiz se savoir vous plaît

Mon estat, et mon ordonnance;

Saichiez que loingtain de Plaisance,

Je suis de tous maulx bien garny,

Autant que nul qui soit en France,

Dieu scet en quel mauvais party.

Helas! or n'ay je riens forfait

Dont porter je doye penance,

Car tousjours je me suis retrait

Vers Loyaulté et Esperance,

Pour acquerir leur bienvueillance;

Mais au besoing ilz m'ont failly

Et m'ont laissié sans recouvrance,

Dieu scet en quel mauvais party.

Dangier m'a joué de ce trait,

Mais se je puis avoir puissance,

Je feray maugré qu'il en ait,

Encontre lui une aliance,

Et si lui rendray la grevance,

Le mal, le dueil et le soussy,

Où il m'a mis jusqu'à oultrance,

Dieu scet en quel mauvais party.

L'ENVOY.

Aydiez moy à l'oultrecuidance

Vengier, com en vous ay fiance,

Ma Maistresse, je vous supply

De ce faulx Dangier qui m'avance

Dieu scet en quel mauvais party.

BALADE.

Loyal espoir, trop je vous voy dormir,

Resveilliez vous et joyeuse pensée,

Et envoyez ung plaisant souvenir

Devers mon cueur, de la plus belle née

Dont aujourduy coure la renommée;

Vous ferez bien d'ung peu le resjoir,

Tristesse s'est avecques lui logiée,

Ne lui vueilliez à son besoing faillir.

Car Dangier l'a desrobé de plaisir,

Et que pis est, a de lui eslongnée

Celle qui plus le povoit enrichir;

C'est sa dame tres loyaument amée.

Oncques cueur n'eut si dure destinée

Pour Dieu, Espoir, venez le secourir,

Il a en vous sa fiance fermée,

Ne lui vueilliez à son besoing faillir.

Par povreté lui fault son pain querir

A l'uis d'Amours par chascune journée,

Or lui vueilliez l'aumosne departir

De liesse, que tant a désirée:

Avancez vous, sans faire demourée

Pensez de lui, vous savez son desir,

Par vous lui soit quelque grace donnée,

Ne lui vueilliez à son besoing faillir.

L'ENVOY.

Seule sans per, de toutes gens louée,

Et de tous biens entierement douée,

Mon cueur ces maulx seuffre pour vous servir,

Sa loyaulté vous soit recommandée

Ne lui vueilliez à son besoing faillir.

BALADE.

Mon cueur au derrain entrera

Ou Paradis des amoureux,

Autrement tort fait lui sera,

Car il a de maulx doloreux

Plus d'un cent, non pas ung ou deux,

Pour servir sa belle maistresse;

Et le tient Dangier le crueulx

Ou Purgatoire de Tristesse.

Ainsi l'a tenu, longtemps a,

Ce faulx traître, vilain, hideux;

Espoir dit que hors le mectra,

Et que n'en soye ja doubteux;

Mais trop y met dont je me deulx,

Dieu doint qu'il tiengne sa promesse

Vers lui, tant est angoisseux

Ou Purgatoire de Tristesse.

Amour grant aumosne fera

En ce fait cy, d'estre piteux,

Et bon exemple monstrera

A toutes celles et à ceulx

Qui le servent, quant desireux

Le verront par sa grant humblesse,

D'aidier ce povre souffreteux

Ou Purgatoire de Tristesse.

L'ENVOY.

Amour! faictes moy si eureux

Que mectez mon cueur en liesse;

Laissiez Dangier et Dueil tous seulx

Ou Purgatoire de Tristesse.

BALADE.

Mon cueur a envoyé querir

Tous ses bienvueillans et amis,

Il veult son grant conseil tenir

Avec eulx, pour avoir advis

Comment pourra ses ennemis,

Soussy, Dueil, et leur aliance

Surmonter, et tost desconfire,

Qui desirent de le destruire

En la prison de Desplaisance.

En desert ont mis son plaisir,

Et joye tenue en pastis;

Mais Confort lui a sans faillir

De nouvel loyaument promis

Qu'ilz seront desfaiz et bannis;

De ce se fais fort Esperance,

Et plus avant que n'ose dire,

C'est ce qui estaint son martire

En la prison de Desplaisance.

Briefment voye le temps venir,

J'en prie à Dieu de Paradis,

Que chascun puist vers son desir

Aler sans avoir saufconduis;

Adonc Amour et ses nourris

Auront de Dangier moins doubtance,

Et lors sentiray mon cueur rire

Qui à present souvent souspire

En la prison de Desplaisance.

L'ENVOY.

Pour ce que veoir ne vous puis,

Mon cueur se complaint jours et nuis,

Belle nompareille de France;

Et m'a chargié de vous escrire

Qu'il n'a pas tout ce qu'il desire

En la prison de Desplaisance.

BALADE.

Desployez vostre banniere,

Loyaulté, je vous en prie,

Et assailliez la frontiere

Où Dueil et Merencolie,

A tort et par felonnie,

Tiennent Joye prisonnière,

De moy la font estrangiere;

Je pry Dieu qu'il les maudie.

Quant je deusse bonne chiere

Demener en compaignie,

Je n'en fais que la maniere,

Car, quoique ma bouche rie,

Ou parle parolle lye,

Dangier et Destresse fiere

Boutent mon plaisir arriere;

Je pry Dieu qu'il les maudie.

Helas! tant avoye chiere,

Ja pieca, joyeuse vie;

Se Raison fust droicturiere,

J'en eusse quelque partie;

Or est de mon cueur bannie

Par Fortune losengiere

Et Durté sa conseilliere;

Je pry Dieu qui les maudie.

L'ENVOY.

Se j'avoye la maistrie

Sur ceste faulse mesgnie,

Je les meisse tous en biere;

Si est telle ma priere,

Je pry Dieu qui les maudie.

BALADE.

Ardant desir de veoir ma maistresse

A assailly de nouvel le logis

De mon las cueur, qui languist en tristesse,

Et puis dedens partout a le feu mis;

En grant doubte certainement je suis

Qu'il ne soit pas legierement estaint;

Sans grant grace, si vous pry, Dieu d'amours,

Sauvez mon cueur, ainsi qu'avez fait maint,

Je l'oy crier piteusement secours.

J'ay essayé par lermes à largesse

De l'estaindre; mais il n'en vault que pis:

C'est feu Gregeois, ce croy je, qui ne cesse

D'ardre, s'il n'est estaint par bon avis.

Au feu, au feu, courez tous mes amis;

S'aucun de vous, comme lasche, remaint

Sans y aler, je le hé pour tousjours;

Avancez vous, nul de vous ne soit faint,

Je l'oy crier piteusement secours.

S'il est ainsi mort par vostre peresse,

Je vous requier, au moins tant que je puis,

Chascun de vous donnez lui une messe,

Et j'ay espoir que brief ou Paradis

Des amoureux sera moult hault assis,

Comme martir et tres honnoré Saint,

Qui a tenu de Loyaulté le cours;

Grant tourment a, puisque si fort se plaint.

Je l'oy crier piteusement secours.

BALADE.

En la nef de bonne nouvelle

Espoir a chargié Reconfort,

Pour l'amener de par la belle

Vers mon cueur qui l'ayme si fort.

A joye puist venir au port

De Desir, et pour tost passer

La mer, de fortune trouver

Ung plaisant vent venant de France,

Où est à present ma maistresse

Qui est ma doulce souvenance,

Et le tresor de ma liesse.

Certes moult suy tenu à elle,

Car j'ay sceu par loyal raport,

Que contre Dangier le rebelle

Qui mainteffoiz me nuist à tort,

Elle veult faire son effort

De tout son povoir de m'aidier,

Et, pour ce, lui plaist m'envoyer

Ceste nef plaine de Plaisance

Pour estoffer la forteresse,

Où mon cueur garde l'Esperance,

Et le tresor de ma liesse.

Pour ce, ma voulenté est telle,

Et sera jusques à la mort,

De tousjours tenir la querelle

De Loyaulté, où mon ressort

J'ay mis; mon cueur en est d'accort;

Si vueil en ce point demourer,

Et souvent Amour mercier,

Qui me fist avoir l'acointance

D'une si loyalle Princesse,

En qui puis mectre ma fiance

Et le tresor de ma liesse.

L'ENVOY.

Dieu vueille celle nef garder

Des robeurs, escumeurs de mer,

Qui ont à Dangier aliance;

Car, s'ilz povoient, par rudesse

M'osteroient ma desirance,

Et le tresor de ma liesse.

BALADE.

Je ne crains Dangier, ne les siens,

Car j'ay garny la forteresse

Où mon cueur a retrait ses biens,

De Reconfort et de Liesse;

Et ay fait Loyaulté maistresse,

Qui la place bien gardera;

Dangier deffy, et sa rudesse,

Car le Dieu d'amours m'aidera.

Raison est et sera des miens,

Car ainsi m'en a fait promesse,

Et Espoir mon chier amy tiens,

Qui a mainteffoiz, par proesse,

Bouté hors d'avec moy Destresse;

Dont Dangier, dueil et despit a;

Mais ne me chault de sa tristesse,

Car le Dieu d'amours m'aidera.

Pour ce, requerir je vous viens,

Mon cueur, que prenez hardiesse;

Courez lui sus, sans craindre riens,

A dangier qui souvent vous blesse;

Sitost que vous prandrez l'adresse

De l'assaillir, il se rendra;

Je vous secourray sans peresse,

Car le Dieu d'amours m'aidera.

L'ENVOY.

Se vous m'aidiez, gente Princesse,

Je croy que brief le temps vendra

Que j'auray des biens à largesse,

Car le Dieu d'amours m'aidera.

BALADE.

Belle, bien avez souvenance,

Comme certainement je croy,

De la tres plaisant aliance

Qu'Amour fist entre vous, et moy;

Son secretaire Bonne foy

Escrist la lectre du traictié,

Et puis la scella Loyaulté

Qui la chose tesmoingnera,

Quant temps et besoing en sera.

Joyeux desir fut en presence,

Qui alors ne se tint pas coy;

Mais mist le fait en ordonnance,

De par Amour le puissant Roy;

Et selon l'amoureuse loy,

De noz deux vouloirs, pour seurté,

Fist une seule voulenté;

Bien m'en souvient, et souvendra,

Quant temps et besoing en sera.

Mon cueur n'a en nully fiance

De garder la lectre, qu'en soy;

Et certes ce m'est grant plaisance,

Quant si tres loyal je le voy,

Et lui conseille, comme doy,

De tousjours hair Faulceté;

Car quiconque l'a en chierté,

Amour chastier l'en fera,

Quant temps et besoing en sera.

L'ENVOY.

Pensez en ce que j'ay compté,

Ma Dame, car en verité

Mon cueur de soy vous requerra,

Quant temps et besoing en sera.

BALADE.

Venez vers moy, Bonne nouvelle,

Pour mon las cueur reconforter.

Contez moy comment fait la belle,

L'avez vous point oy parler

De moy, et amy me nommer?

A elle point mis en oubly

Ce qu'il lui pleut de m'accorder,

Quant me donna le don d'amy.

Combien que Dangier le rebelle

Me fait loing d'elle demourer;

Je congnois tant de biens en elle,

Que je ne pourroye penser

Que tousjours ne vueille garder

Ce que me promist sans nul sy,

Faisant nos deux mains assembler,

Quant me donna le don d'amy.

Pitié seroit, se Dame telle

Qui doit tout honneur desirer,

Failloit de tenir la querelle

De bien et loyaument amer;

Son sens lui scet bien remonstrer

Toutes les choses que je dy,

Et ce qu'Amour nous fist jurer

Quant me donna le don d'amy.

L'ENVOY.

Loyaulté, vueilliez asseurer

Ma Dame que sien suy, ainsi

Qu'elle me voulu commander,

Quant me donna le don d'amy.

BALADE.

Belle, s'il vous plaist escouter

Comment j'ay gardé en chierté

Vostre cueur qu'il vous pleut laissier

Avec moy, par vostre bonté;

Saichez qu'il est enveloppé

En ung cueuvrechief de Plaisance,

Et enclos, pour plus grant seurté,

Ou coffre de ma souvenance.

Et pour nectement le garder,

Je l'ay souventesfoiz lavé

En lermes de piteux penser;

Et regrectant vostre beaulté,

Apres ce, sans delay porté,

Pour seicher, au feu d'Esperance,

Et puis doulcement rebouté

Ou coffre de ma souvenance.

Pour ce, vueillez vous acquieter

De mon cueur que vous ay donné;

Humblement vous en vueil prier,

En le gardant en loyaulté,

Soubz clef do bonne voulenté,

Comme j'ay fait, de ma puissance,

Le vostre que tiens enfermé

Ou coffre de ma souvenance.

L'ENVOY.

Ma Dame, je vous ay compté

De vostre cueur la gouvernance,

Comment il est et a esté

Ou coffre de ma souvenance.

BALADE.

L'AMANT.

Se je vous dy bonne nouvelle,

Mon cueur, que voulez vous donner?

LE CUEUR.

Elle pourroit bien estre telle

Que moult chier la vueil acheter.

L'AMANT.

Nul gueredon n'en quier demander.

LE CUEUR.

Dictes tost doncques, je vous prie,

J'ay grand desir de la savoir.

L'AMANT.

C'est de vostre Dame et amye

Qui loyaument fait son devoir.

LE CUEUR.

Que me savez vous dire d'elle?

Dont me puisse reconforter.

L'AMANT.

Je vous dy, sans que plus le celle,

Qu'elle vient par deca la mer.

LE CUEUR.

Dictes vous vray? Sans vous mocquer.

L'AMANT.

Ouil, je vous le certiffie,

Et dit que c'est pour vous veoir.

LE CUEUR.

Amour humblement j'en mercie,

Qui loyaument fait son devoir.

L'AMANT.

Que pourrait plus faire la belle

Que de tant pour vous se pener?

LE CUEUR.

Loyaulté soustient ma querelle,

Qui lui fait faire sans doubter.

L'AMANT.

Pensez doncques de bien l'amer.

LE CUEUR.

Si feray je toute ma vie,

Sans changier, de tout mon povoir.

L'AMANT.

Bien doit estre dame cherie,

Qui loyaument fait son devoir.

BALADE.

Mon cueur, ouvrez l'uis de Pensée,

Et recevez un doulx present

Que la tres loyaument amée

Vous envoye nouvellement;

Et vous tenez joyeusement;

Car, bien devez avoir liesse,

Quant la trouvez sans changement

Tousjours tres loyalle maistresse.

Bien devez prisier la journée

Que fustes sien premierement;

Car sa grace vous a donnée,

Sans faintise, tres loyaument;

Vous le povez veoir clerement,

Car elle vous tient sa promesse,

Soy monstrant vers vous fermement

Tousjours tres loyalle maistresse.

Par vous soit doncques honnourée,

Et servie soigneusement;

Tant comme vous aurez durée,

Sans point faire departement;

Car vous aurez certainement,

Par elle des biens à largesse,

Puisqu'elle est si entierement

Tousjours tres loyalle maistresse.

L'ENVOY.

Grans mercis des foiz plus de cent,

Ma Dame, ma seule Princesse,

Car je vous trouve vrayement

Tousjours tres loyalle maistresse.

BALADE.

J'ay ou tresor de ma pensée

Ung mirouer qu'ay acheté;

Amour, en l'année passée,

Le me vendy de sa bonté;

Ou quel voy tousjours la beaulté

De celle que l'en doit nommer,

Par droit, la plus belle de France;

Grant bien me fait à m'y mirer,

En actendant bonne esperance.

Je n'ay chose qui tant m'agrée,

Ne dont tiengne si grant chierté,

Car, en ma dure destinée,

Mainteffoiz m'a reconforté;

Ne mon cueur n'a jamais santé,

Fors, quant il y peut regarder

Des yeulx de joyeuse plaisance,

Il s'y esbat pour temps passer,

En actendant bonne esperance.

Advis m'est, chascune journée

Que m'y mire, qu'en verité

Toute douleur si m'est ostée;

Pour ce, de bonne voulenté,

Par le conseil de Leaulté,

Mectre le vueil et enfermer

Ou coffre de ma souvenance,

Pour plus seurement le garder,

En actendant bonne esperance.

BALADE.

Je ne vous puis, ne scay amer,

Ma Dame, tant que je vouldroye;

Car escript m'avez pour m'oster

Ennuy qui trop fort me guerroye:

Mon seul amy, mon bien, ma joye,

Cellui que sur tous amer veulx,

Je vous pry que soyez joyeux

En esperant que brief vous voye.

Je sens ces motz mon cueur percer

Si doulcement, que ne sauroye

Le confort, au vray, vous mander.

Que vostre messaige m'envoye;

Car vous dictes que querez voye

De venir vers moy, se m'aid Dieux,

Demander ne vouldroye mieulx.

En esperant que brief vous voye.

Et quant il vous plaist souhaidier

D'estre empres moy, où que je soye;

Par Dieu, nom pareille sans per,

C'est trop fait, se dire l'osoye;

Se suy je qui plus le devroye

Souhaidier de cueur tres soingneux,

C'est ce dont tant suis desireux,

En esperant que brief vous voye.

BALADE.

L'autrier alay mon cueur veoir,

Pour savoir comment se portoit;

Si trouvay avec lui Espoir

Qui doulcement le confortoit,

Et ces parolles lui disoit:

Cueur, tenez vous joyeusement,

Je vous fais loyalle promesse,

Que je vous garde seurement

Tresor d'amoureuse richesse.

Car je vous fais pour vray savoir,

Que la plus tres belle qui soit

Vous ayme de loyal vouloir,

Et voulentiers pour vous feroit

Tout ce qu'elle faire pourroit;

Et vous mande que vrayement,

Maugré Dangier et sa rudesse,

Departir vous veult largement

Tresor d'amoureuse richesse.

Alors mon cueur, pour dire voir,

De joye souvent souspiroit,

Et, combien qu'il portast le noir,

Toutesfoiz pour lors oublioit

Toute la douleur qu'il avoit;

Pensant de recouvrer briefment

Plaisance, Confort et Liesse,

Et d'avoir en gouvernement

Tresor d'amoureuse richesse.

L'ENVOY.

A bon espoir mon cueur s'actent,

Et à vous, ma belle maistresse,

Que lui espargniez loyaument

Tresor d'amoureuse richesse.

BALADE.

Haa, Doulx penser, jamais je ne pourroye

Vous desservir les biens que me donnez,

Car, quant Ennuy mon povre cueur gerroye,

Par fortune, comme bien le savez,

Toutes les foiz qu'amener me voulez

Ung souvenir de ma belle maistresse;

Tantost Doleur, Desplaisir et Tristesse

S'en vont fuiant; ilz n'osent demourer,

Ne se trouver en vostre compaignie;

Mais se meurent de courrous et d'envie,

Quant il vous plaist d'ainsi me conforter.

L'aise que j'ay, dire je ne sauroye,

Quant Souvenir et vous me racontez

Les tres doulx fais, plaisans et plains de joye

De ma Dame, qui sont congneuz assez

En plusieurs lieux, et si bien renommés,

Que d'en parler chascun en a liesse.

Pour ce, tous deux pour me tollir Destresse,

D'elle vueilliez nouvelles m'aporter,

Le plus souvent que pourrez, je vous prie;

Vous me sauvez, et maintenez la vie,

Quant il vous plaist d'ainsi me conforter.

Car lors Amour par vous deux si m'envoye

Ung doulx espoir que vous me presentez,

Qui me donne conseil que joyeux soye;

Et puis apres tous trois me promectez

Qu'à mon besoing jamais ne me fauldrez;

Ainsi m'actens tout à vostre promesse,

Car par vous puis avoir, à grant largesse,

Des biens d'Amours, plus que ne scay nombrer,

Maugré Dangier, Dueil et Merencolie,

Que je ne crains en riens; mais les deffie,

Quant il vous plaist d'ainsi me conforter.

L'ENVOY.

Jeune, gente, nompareille Princesse,

Puisque ne puis veoir vostre jeunesse,

De m'escrire ne vous vueilliez lasser;

Car vous faictes, je le vous certiffie,

Grant aumosne dont je vous remercie,

Quant il vous plaist d'ainsi me conforter.

BALADE.

Se je povoye mes souhais

Et mes souspirs faire voler,

Si tost que mon cueur les a fais,

Passer leur feroye la mer,

Et vers celle, tout droit aler,

Que j'ayme du cueur si tres fort.

Comme ma liesse mondaine

Que je tendray jusqu'à la mort.

Pour ma maistresse souveraine.

Helas! la verray je jamais?

Qu'en dictes vous, tres doulx penser?

Espoir m'a promis, ouil, mais

Trop longtemps me fait endurer;

Et, quant je lui viens demander

Secours à mon besoing, il dort.

Ainsi suis chascune sepmaine

En maint ennuy, sans reconfort,

Pour ma maistresse souveraine.

Je ne puis demourer en paix,

Fortune ne m'y veult laisser;

Au fort, à présent je me tais,

Et vueil laisser le temps passer;

Pensant d'avoir au par aler,

Par Loyaulté où mon ressort

J'ay mis, de Plaisance l'estraine,

En guerdon des maulx qu'ay à tort

Pour ma maistresse souveraine.

BALADE.

Fortune, vueilliez moy laissier

En paix une fois, je vous prie;

Trop longuement, à vray compter,

Avez eu sur moy seigneurie.

Tousjours faictes la rencherie

Vers moy, et ne voulez ouir

Les maulx que m'avez fait souffrir,

Il a ja plusieurs ans passez;

Doy je tousjours ainsi languir?

Helas! et n'est ce pas assez?

Plus ne puis en ce point durer;

A Mercy, mercy je crie;

Souspirs m'empeschent le parler;

Veoir le povez, sans mocquerie.

Il ne fault ja que je le dye;

Pour ce, vous vueil je requerir.

Qu'il vous plaise de me tollir

Les maulx que m'avez amassez,

Qui m'ont mis jusques au mourir;

Helas! et n'est ce pas assez?

Tous maulx suis content de porter,

Fors ung seul, qui trop fort m'ennuye,

C'est qu'il me fault loing demourer

De celle que tiens pour amye;

Car pieca en sa compaignie

Laissay mon cueur et mon desir;

Vers moy ne veulent revenir,

D'elle ne sont jamais lassez;

Ainsi suy seul, sans nul plaisir,

Helas! et n'est ce pas assez?

L'ENVOY.

De balader j'ay beau loisir,

Autres deduiz me sont cassez,

Prisonnier suis, d'Amours martir;

Helas! et n'est ce pas assez?

BALADE.

Espoir m'a apporté nouvelle

Qui trop me doit reconforter,

Il dit que Fortune la felle

A voulu de soy raviser,

Et toutes faultes amender,

Qu'a faictes contre mon plaisir,

En faisant sa roe tourner.

Dieu doint qu'ainsi puist avenir!

Quoy que m'ait fait guerre mortelle,

Je suis content de l'esprouver,

Et le desbat qu'ay et querelle,

Vers elle je veuil delaisser,

Et tout courroux lui pardonner:

Car d'elle me puis bien servir.

Se loyaument veult s'acquicter...

Dieu doint qu'ainsi puist avenir!

Se la povoye trouver telle

Qu'elle me voulsist tant aidier;

Qu'en mes bras, je peusse la belle

Une foiz à mon gré trouver;

Plus ne vouldroye demander,

Car lors j'auroye mon desir,

Et tout quanque doy souhaidier.

Dieu doint qu'ainsi puist avenir!

L'ENVOY.

Amour, s'il vous plaist commander

A Fortune de me cherir,

Je pense joye recouvrer;

Dieu doint qu'ainsi puist avenir!

BALADE.

Je ne me scay en quel point maintenir,

Ce premier jour de May plein de liesse;

Car d'une part puis dire sans faillir

Que, Dieu mercy, j'ay loyalle maistresse,

Qui de tous biens a trop plus qu'à largesse;

Et si pense que, la sienne mercy,

Elle me tient son servant et amy;

Ne doy je bien doncques joye mener,

Et me tenir en joyeuse plaisance?

Certes ouil! et Amour mercier

Tres humblement de toute ma puissance.

Mais d'autre part, il me convient souffrir

Tant de doleur et de dure destresse

Par Fortune, qui me vient assaillir

De tous costez, qui de maulx est princesse;

Passer m'a fait le plus de ma jeunesse,

Dieu scet comment, en doloreux party;

Et si me fait demourer en soussy,

Loings de celle par qui puis recouvrer

Le vray tresor de ma droicte esperance,

Et que je vueil obeir, et amer

Tres humblement de toute ma puissance.

Et pour ce May, je vous viens requerir,

Pardonnez moy de vostre gentillesse,

Se je ne puis à present vous servir

Comme je doy, car je vous fais promesse;

J'ay bon vouloir envers vous, mais Tristesse

M'a si longtemps en son dangier nourry,

Que j'ay du tout joye mis en oubly;

Si me vault mieulx seul de gens eslongner,

Qui dolent est ne sert que d'encombrance;

Pour ce, reclus me tendray en penser

Tres humblement de toute ma puissance.

L'ENVOY.

Doulx souvenir, chierement je vous pry,

Escrivez tost ceste balade cy;

De par mon cueur la feray presenter

A ma Dame, ma seule desirance,

A qui pieca je le voulu donner

Tres humblement, de toute ma puissance.

BALADE.

Mon cueur est devenu hermite

En l'ermitaige de Pensée;

Car Fortune la tres despite

Qui l'a hay mainte journée,

S'est nouvellement aliée,

Contre lui, avecques Tristesse,

Et l'ont banny hors de liesse;

Place n'a où puis demourer,

Fors ou bois de Merencolie,

Il est content de s'y logier;

Si lui dis je que c'est folie.

Mainte parolle lui ay dicte,

Mais il ne l'a point escoutée:

Mon parler riens ne lui proufite,

Sa voulenté y est fermée;

De legier ne seroit changée,

Il se gouverne par Destresse

Qui, contre son prouffit, ne cesse

Nuit et jour de le conseillier;

De si pres lui tient compaignie

Qu'il ne peut ennuy delaissier,

Si lui dis je que c'est folie.

Pour ce saichiez, je m'en acquicte,

Belle tres loyaument amée,

Se lectre ne lui est escripte

Par vous, ou nouvelle mandée,

Dont sa doleur soit allegée,

Il a fait son veu et promesse

De renoncer à la richesse

De plaisir, et de doulx penser;

Et apres ce, toute sa vie,

L'abit de Desconfort porter,

Si lui dis je que c'est folie.

L'ENVOY.

Se par vous n'est Belle sans per,

Pour quelque chose que lui dye,

Mon cueur ne se veult conforter,

Si lui dis je que c'est folie.

BALADE.

Dangier, je vous gecte mon gant,

Vous appellant de traison,

Devant le Dieu d'amours puissant

Qui me fera de vous raison;

Car vous m'avez, mainte saison,

Fait douleur à tort endurer,

Et me faictes loings demourer

De la nompareille de France.

Mais vous l'avez tousjours d'usance

De grever loyaulx amoureux,

Et pour ce que je suis l'un d'eulx,

Pour eulx et moy prens la querelle;

Par Dieu, vilain, vous y mourrez

Par mes mains, point ne le vous celle,

S'à Loyaulté ne vous rendez.

Comment avez vous d'orgueil tant?

Que vous osez sans achoison

Tourmenter aucun vray amant

Qui, de cueur et d'entencion,

Sert Amours sans condicion;

Certes moult estes à blasmer,

Pensez donques de l'amender,

En laissant vostre malvueillance,

Et par tres humble repentance,

Alez crier mercy à ceulx

Que vous avez faiz doloreux,

Et qui vous ont trouvé rebelle;

Autrement pour seur vous tenez

Que gaige je vous appelle,

S'à Loyaulté ne vous rendez,

Vous estes tous temps mal pensant,

Et plain de faulse soupecon;

Ce vous vient de mauvais talant

Nourry en couraige felon;

Quel mal ou ennuy vous fait on?

Se par amours on veult amer,

Pour plus aise le temps passer

En lyee joyeuse plaisance;

C'est gracieuse desirance.

Pour ce, faulx, vilain, orgueilleux,

Changiez voz vouloirs oultragieux,

Ou je vous feray guerre telle

Que, sans faillir, vous trouverez

Qu'elle vauldra pis que mortelle,

S'à Loyaulté ne vous rendez.

BALADE.

Se Dieu plaist, briefment la nuée

De ma tristesse passera,

Belle tres loyaument amée,

Et le beau temps se monstrera:

Mais savez vous quant ce sera?

Quant le doulx souleil gracieux

De vostre beaulté entrera

Par les fenestres de mes yeulx.

Lors la chambre de ma pensée

De grant plaisance reluira,

Et sera de joye parée,

Adonc mon coeur s'esveillera

Qui en dueil dormy longtemps a,

Plus ne dormira, se m'aid Dieux,

Quant ceste clarté le ferra

Par les fenestres de mes yeulx.

Helas! quant vendra la journée,

Qu'ainsi avenir me pourra

Ma maistresse tres desirée,

Pensez vous que brief avendra;

Car mon cueur tousjours languira

En ennuy sans point avoir mieulx,

Jusqu'à tant que ce cy verra

Par les fenestres de mes yeulx.

L'ENVOY.

De Reconfort mon cueur aura

Autant que nul dessoubz les cieulx,

Belle, quant vous regardera,

Par les fenestres de mes yeulx.

BALADE.

Au court jeu de tables jouer,

Amour me fait moult longuement;

Car tousjours me charge garder

Le point d'actente seulement;

En me disant que vrayement

Se ce point lye scay tenir,

Qu'au derrain je doy, sans mentir,

Gaaingnier le jeu entierement.

Je suy pris, et ne puis entrer

Ou point que desire souvent;

Dieu me doint une fois gecter

Chance qui soit aucunement

A mon propos, car autrement

Mon cueur sera pis que martir,

Se ne puis, ainsi qu'ay desir,

Gaaingnier le jeu entierement.

Fortune fait souvent tourner

Les dez contre moy mallement;

Mais Espoir, mon bon conseillier,

M'a dit et promis seurement,

Que Loyaulté prochainement

Fera Boneur vers moy venir

Qui me fera, à mon plaisir,

Gaaingnier le jeu entierement.

L'ENVOY.

Je vous supply tres humblement,

Amour, aprenez moy comment

J'asserray les dez sans faillir;

Par quoi puisse, sans plus languir,

Gaaingnier le jeu entierement.

BALADE.

Vous, soyez la tres bien venue

Vers mon cueur, Joyeuse nouvelle,

Avez vous point ma Dame veue?

Contez moi quelque chose d'elle;

Dictes moy, n'est elle pas telle

Qu'estoit? quant derrenierement,

Pour m'oster de merencolie,

M'escrivy amoureusement:

C'estes vous de qui suis amye.

Son vouloir jamais ne se mue,

Ce croy je, mais tient la querelle

De Loyaulté, qu'a retenue

Sa plus prochaine damoiselle;

Bien le monstre, sans que le celle,

Qu'elle se maintient loyaument,

Quant lui plaist, dont je la mercie,

Me mander si tres doulcement:

C'estes vous de qui suis amye.

Pour le plus eureux soubz la nue

Me tiens, quant m'amye s'appelle;

Car en tous lieux, où est congneue,

Chascun la nomme la plus belle;

Dieu doint que, maugré le rebelle

Dangier, je la voye briefment,

Et que de sa bouche me die:

Amy, pensez que seulement

C'estes vous de qui suis amye.

L'ENVOY.

J'ay en mon cueur joyeusement

Escript, afin que ne l'oublie,

Ce refrain qu'ayme chierement:

C'estes vous de qui suis amye.

BALADE.

Trop longtemps vous voy sommeillier,

Mon cueur, en dueil et desplaisir;

Vueilliez vous ce jour esveillier,

Alons au bois le May cueillir,

Pour la coustume maintenir.

Nous orrons des oyseaulx le glay,

Dont ilz font les bois retentir,

Ce premier jour du mois de May,

Le Dieu d'amours est coustumier,

A ce jour, de feste tenir,

Pour amoureux cueurs festier

Qui desirent de le servir;

Pour ce, fait les arbres couvrir

De fleurs, et les champs de vert gay;

Pour la feste plus embellir,

Ce premier jour du mois de May.

Bien scay, mon cueur, que faulx Dangier

Vous fait mainte paine souffrir;

Car il vous fait trop eslongner

Celle qui est vostre desir;

Pourtant vous fault esbat querir;

Mieux conseiller, je ne vous scay,

Pour vostre doleur amendrir,

Ce premier jour du mois de May.

L'ENVOY.

Ma Dame, mon seul souvenir,

En cent jours n'auroye loisir

De vous raconter, tout au vray,

Le mal qui tient mon cueur martir,

Ce premier jour du mois de May.

BALADE.

J'ay mis en escript mes souhais

Ou plus parfont de mon penser;

Et combien, quant je les ay fais,

Que peu me pevent profiter;

Je ne les vouldroye donner

Pour nul or, qu'on me sceust offrir,

En esperant, qu'au par aler,

De mille l'un puist avenir.

Par la foy de mon corps! jamais

Mon cueur ne se peut d'eulx lasser;

Car si richement sont pourtrais,

Que souvent les vient regarder,

Et s'y esbat pour temps passer,

En disant par ardent desir:

Dieu doint que, pour me conforter,

De mille l'un puist avenir!

C'est merveille, quant je me tais,

Que j'oy mon cueur ainsi parler;

Et tient avec Amour ses plais,

Que tousjours veult acompaignier;

Car il dit que des biens d'amer

Cent mille lui veult departir;

Plus ne quier, mais que sans tarder,

De mille l'un puist avenir.

L'ENVOY.

Vueilliez à mon cueur accorder,

Sans par parolles le mener,

Amour, que par vostre plaisir,

Des biens que lui voulez donner,

De mille l'un puist avenir.

BALADE.

Par le commandement d'Amours

Et de la plus belle de France,

J'enforcis mon chastel tousjours

Appellé Joyeuse plaisance,

Assis sur roche d'Esperance,

Avitaillé l'ay de Confort;

Contre Dangier et sa puissance,

Je le tendray jusqu'à la mort.

En ce chastel y a trois tours,

Dont l'une se nomme Fiance

D'avoir briefment loyal secours,

Et la seconde Souvenance,

La tierce Ferme desirance.

Ainsi le chastel est si fort

Que nul n'y peut faire grevance;

Je le tendray jusqu'à la mort.

Combien que Dangier, par faulx tours,

De le m'oster souvent s'avance;

Mais il trouvera le rebours,

Se Dieu plaist, de sa malvueillance;

Bon droit est de mon aliance,

Loyaulté et lui sont d'accort

De m'aidier, pour ce, sans doubtance;

Je le tendray jusqu'à la mort.

L'ENVOY.

Faisons bon guet sans decevance

Et assaillons par ordonnance,

Mon cueur, Dangier qui nous fait tort;

Se prandre le puis par vaillance,

Je le tendray jusqu'à la mort.

BALADE.

La premiere foiz, ma Maistresse,

Qu'en vostre presence vendray,

Si ravi seray de liesse,

Qu'à vous parler je ne pourray;

Toute contenance perdray,

Car, quant vostre beaulté luira

Sur moy, si fort esbloira

Mes yeulx que je ne verray goute;

Mon cueur aussi se pasmera,

C'est une chose que fort doubte.

Pour ce, nompareille Princesse,

Quant ainsi devant vous seray,

Vueilliez, par vostre grant humblesse,

Me pardonner, se je ne scay

Parler à vous, comme devray;

Mais tost apres, s'asseurera

Mon cueur, et puis vous contera

Son fait, mais que nul ne l'escoute;

Dangier grant guet sur lui fera,

C'est une chose que fort doubte.

Et se mectra souvent en presse

D'ouir tout ce que je diray;

Mais je pense que par sagesse

Si tres bien me gouverneray,

Et telle maniere tendray,

Que faulx Dangier trompé sera,

Ne nulle riens n'appercevra;

Si mectra il sa paine toute

D'espier tout ce qu'il pourra;

C'est une chose que fort doubte.

BALADE.

Me mocquez vous, Joyeulx Espoir,

Par parolles trop me menez,

Pensez vous de me decevoir;

Chascun jour vous me promectez

Que briefment veoir me ferez

Ma Dame, la gente Princesse,

Qui a mon cueur entierement;

Pour Dieu, tenez vostre promesse,

Car trop ennuié qui actent.

Il a longtemps, pour dire voir,

Que tout mon estat congnoissez;

N'ay je fait mon loyal devoir

D'endurer, comme bien savez,

Ouil, ce croy je plus qu'assez;

Temps est que me donnez liesse,

Desservie l'ay loyaument,

Pardonnez moy, se je vous presse,

Car trop ennuié qui actent.

Ne me mectez à nonchaloir,

Honte sera se me failliez,

Veu que me fie main et soir

En tout ce que faire vouldrez,

Se mieulx faire ne me povez,

Au moins monstrez moy ma maistresse

Une foiz, pour aucunement

Allegier le mal qui me blesse,

Car trop ennuié qui actent.

L'ENVOY.

Espoir, tousjours vous m'asseurez

Que bien mon fait ordonnerez,

Bel me parlez, je le confesse;

Mais, tant y mectez longuement,

Que je languis en grant destresse,

Car trop ennuié qui actent.

BALADE.

Le premier jour du mois de May

S'acquicte vers moy grandement;

Car, ainsi qu'à présent, je n'ay

En mon cueur que deuil et tourment;

Il est aussi pareillement

Troublé, plain de vent et de pluie;

Estre souloit tout autrement,

Ou temps qu'ay congneu en ma vie.

Je croy qu'il se met en essay

De m'acompaignier loyaulment;

Content m'en tiens, pour dire vray,

Car meschans, en leur pensement,

Recoivent grand allegement,

Quant en leurs maulx ont compaignie;

Essayé l'ay certainement,

Ou temps qu'ay congneu en ma vie.

Las! j'ay veu May joyeux et gay,

Et si plaisant à toute gent,

Que raconter au long ne scay

Le plaisir et esbatement

Qu'avait en son commandement;

Car Amour, en son abbaye,

Le tenoit chief de son couvent,

Ou temps qu'ay congneu en ma vie.

L'ENVOY.

Le temps va je ne scay comment,

Dieu l'amende prouchainement!

Car Plaisance est endormie,

Qui souloit vivre lyement,

Ou temps qu'ay congneu en ma vie.

BALADE.

Pour Dieu, gardez bien souvenir

Enclos dedens vostre pensée,

Ne le laissiez dehors yssir,

Belle tres loyaument amée;

Faictes que chascune journée

Vous ramentoive bien souvent

La maniere quoy et comment,

Ja pieca, me feistes promesse,

Quant vous retins premierement

Ma Dame, ma seule maistresse.

Vous savez que, par franc desir

Et loyal amour conseillée,

Me deistes que, sans departir,

De m'amer estiez fermée;

Tant comme j'auroye durée.

Je metz en vostre jugement

Se ma bouche dit vray ou ment;

Si tiens que parler de princesse

Vient du cueur, sans decevement,

Ma dame, ma seule maistresse.

Non pourtant, me fault vous ouvrir

La double qu'en moy est entrée:

C'est que j'ay paour, sans vous mentir,

Que ne m'ayez, tres belle née,

Mis en oubly; car mainte année

Suis loingtain de vous longuement,

Et n'oy de vous aucunement

Nouvelle pour avoir liesse;

Pourquoy vis douloreusement,

Ma Dame, ma seule maistresse.

Nul remede ne scay querir,

Dont ma doleur soit allegée;

Fors que souvent vous requerir,

Que la foy que m'avez donnée

Soit par vous loyaument gardée;

Car vous congnoissiez clerement

Que, par vostre commandement,

Ay despendu de ma jeunesse,

Pour vous actendre seulement,

Ma Dame, ma seule maistresse.

Plus ne vous convient esclarsir

La chose que vous ay comptée;

Vous la congnoissiez, sans faillir;

Pour ce, soyez bien advisée

Que je ne vous trouve muée;

Car, s'en vous trouve changement,

Je requerray tout haultement,

Devant l'amoureuse Deesse,

Que j'aye de vous vengement,

Ma dame, ma seule maistresse.

L'ENVOY.

Se je puis veoir seurement

Que m'amez tousjours loyaument,

Content suis de passer destresse

En vous servant joyeusement,

Ma Dame, ma seule maistresse.

BALADE.

Helas! helas! qui a laissié entrer

Devers mon cueur doloreuse nouvelle?

Conté lui a plainement, sans celer,

Que sa Dame, la tres plaisant et belle,

Qu'il a longtemps tres loyaument servie,

Est à present en griefve maladie;

Dont il est cheu en desespoir si fort,

Qu'il souhaide piteusement la mort,

Et dit qu'il est ennuyé de sa vie.

Je suis alé pour le reconforter,

En lui priant qu'il n'ait nul soussy d'elle,

Car, se Dieu plaist, il orra brief conter

Que ce n'est pas maladie mortelle,

Et que sera prochainement guerrie;

Mais ne lui chault de chose que lui die;

Aincois en pleurs, a tousjours son ressort

Par Tristesse qui asprement le mort,

Et dit qu'il est ennuyé de sa vie.

Quant je lui dy qu'il ne se doit doubter,

Car Fortune n'est pas si tres cruelle,

Qu'elle voulsist hors de ce monde oster

Celle qui est des princesses l'estoille,

Qui partout luist des biens dont est garnie;

Il me respond; qu'il est fol qui se fie

En Fortune qui a fait à maint tort.

Ainsi ne voult recevoir reconfort,

Et dit qu'il est ennuyé de sa vie.

L'ENVOY.

Dieu tout puissant, par vostre courtoisie

Guerissez la, ou mon cueur vous supplie

Que vous souffrez que la mort son effort

Face sur lui, car il en est d'accort,

Et dit qu'il est ennuyé de sa vie.

BALADE.

Sitost que l'autre jour j'ouy

Que ma souveraine sans per

Estoit guerie, Dieu mercy,

Je m'en alay sans point tarder

Vers mon cueur pour le lui conter;

Mais certes tant le desiroit,

Qu'à paine croire le povoit,

Pour la grant amour qu'a en elle,

Et souvent a par soy disoit:

Saint Gabriel, bonne nouvelle.

Je lui dis: mon cueur, je vous pry,

Ne vueilliez croire ne penser

Que moy, qui vous suy vray amy,

Vous vueille mensonges trouver,

Pour en vain vous reconforter;

Car, trop mieulx taire me vaudroit,

Que le dire se vray n'estoit;

Mais la vérité si est telle,

Soyez joyeulx comment qu'il soit.

Saint Gabriel, bonne nouvelle.

Alors mon cueur me respondy:

Croire vous vueil sans plus doubter,

Et tout le courroux et soussy

Qu'il m'a convenu endurer,

En joye le vueil retourner;

Puis apres, ses yeulx essuyoit

Que de plourer moilliez avoit,

Disant: il est temps que rappelle

Espoir qui delaissié m'avoit.

Saint Gabriel, bonne nouvelle.

L'ENVOY.

Il me dist aussi qu'il feroit,

Dedens l'amoureuse chapelle,

Chanter la messe qu'il nommoit:

Saint Gabriel, bonne nouvelle.

BALADE.

Las! Mort qui t'a fait si hardie.

De prendre la noble Princesse

Qui estait mon confort, ma vie,

Mon bien, mon plaisir, ma richesse;

Puisque tu as prins ma maistresse,

Prens moy aussi son serviteur,

Car j'ayme mieulx prouchainement

Mourir, que languir en tourment,

En paine, soussy et doleur.

Las! de tous biens estoit garnie,

Et en droicte fleur de jeunesse;

Je pry à Dieu qu'il te maudie,

Faulse mort, plaine de rudesse;

Se prise l'eusses en vieillesse,

Ce ne fust pas si grant rigueur;

Mais prise l'as hastivement,

Et m'as laissié piteusement

En paine, soussy et doleur.

Las! je suis seul, sans compaignie,

Adieu ma Dame, ma liesse;

Or est nostre amour departie,

Non pourtant, je vous fais promesse

Que de prieres, à largesse,

Morte vous serviray de cueur,

Sans oublier aucunement,

Et vous regrecteray souvent

En paine, soussy et doleur

L'ENVOY.

Dieu, sur tout souverain Seigneur,

Ordonnez, par grace et doulceur,

De l'ame d'elle, tellement

Qu'elle ne soit pas longuement

En paine, soussy et doleur.

BALADE.

J'ai aux esches joué devant Amours,

Pour passer temps, avecques faulx Dangier,

Et seurement me suy gardé tousjours,

Sans riens perdre jusques au derrenier,

Que Fortune lui est venu aidier,

Et par meschief, que maudite soit elle!

A ma Dame prise soudainement;

Par quoy suy mat, je le voy clerement,

Se je ne fais une Dame nouvelle.

Eu ma Dame j'avoye mon secours,

Plus qu'en autre, car souvent d'encombrier

Me delivroit, quant venoit à son cours,

Et en gardes faisoit mon jeu lier;

Je n'avoye Pion, ne Chevalier,

Auffin ne Rocq qui peussent ma querelle

Si bien aidier; il y pert vrayement,

Car j'ay perdu mon jeu entierement,

Se je ne fais une Dame nouvelle.

Je ne me scay jamais garder des tours

De Fortune, qui mainteffoiz changier

A fait mon jeu, et tourner à rebours;

Mon dommaige scet bientost espier,

Elle m'assault sans point me desfier;

Par mon serement, oncques ne congneu telle;

Enjeu party suy si estrangement,

Que je me rens, et n'y voy sauvement,

Se je ne fais une Dame nouvelle.

BALADE.

Je me souloye pourpenser

Au commencement de l'année,

Quel don je pourroye donner

A ma Dame la bien amée;

Or suis hors de ceste pensée,

Car Mort l'a mise soubz la lame,

Et l'a hors de ce monde ostée,

Je pry à Dieu qu'il en ait l'ame.

Non pourtant, pour tousjours garder

La coustume que j'ay usée,

Et pour à toutes gens monstrer

Que pas n'ay ma Dame oubliée,

De messes je l'ay estrenée;

Car ce me seroit trop de blasme

De l'oublier ceste journée,

Je pry à Dieu qu'il en ait l'ame.

Tellement lui puist prouffiter

Ma priere, que confortée

Soit son ame, sans point tarder,

Et de ses biensfaiz guerdonnée

En Paradis, et couronnée

Comme la plus loyalle Dame

Qu'en son vivant j'aye trouvée;

Je pry à Dieu qu'il en ait l'ame

L'ENVOY.

Quant je pense à la renommée

Des grans biens dont estoit parée,

Mon povre cueur de dueil se pasme;

De lui souvent est regrectée,

Je pry à Dieu qu'il en ait l'ame.

BALADE.

Quant Souvenir me ramentoit

La grant beaulté dont estoit plaine,

Celle que mon cueur appeloit

Sa seule Dame souveraine,

De tous biens la vraye fontaine,

Qui est morte nouvellement,

Je dy, en pleurant tendrement,

Ce monde n'est que chose vaine.

Ou vieil temps grant renom couroit

De Creseide, Yseud, Elaine

Et mainte autres, qu'on nommoit

Parfaictes en beaulté haultaine.

Mais, au derrain, en son demaine

La Mort les prist piteusement;

Parquoy puis veoir clerement,

Ce monde n'est que chose vaine.

La Mort a voulu et vouldroit,

Bien le cognois, mectre sa paine

De destruire, s'elle povait,

Liesse et Plaisance mondaine,

Quant tant de belles dames maine

Hors du monde; car vrayement

Sans elles, à mon jugement,

Ce monde n'est que chose vaine.

L'ENVOY.

Amours, pour verité certaine,

Mort vous guerrie fellement;

Se n'y trouvez amendement,

Ce monde n'est que chose vaine.

BALADE.

Le premier jour du mois de May,

Trouvé me suis en compaignie

Qui estoit, pour dire le vray,

De gracieuseté garnie;

Et, pour oster merencolie,

Fut ordonné qu'on choisiroit,

Comme fortune donneroit,

La fueille plaine de verdure,

Ou la fleur pour toute l'année;

Si prins la feuille pour livrée,

Comme lors fut mon aventure.

Tantost apres je m'avisay,

Qu'à bon droit, je l'avoye choisie;

Car, puisque par mort perdu ay

La fleur, de tous biens enrichie,

Qui estoit ma Dame, m'amie,

Et qui de sa grace m'amoit,

Et pour son amy me tenoit,

Mon cueur d'autre fleur n'a plus cure:

Adonc congneu que ma pensée

Accordoit à ma destinée,

Comme lors fut mon aventure.

Pour ce, la fueille porteray

Cest an, sans que point je l'oublie;

Et à mon povoir me tendray

Entierement de sa partie;

Je n'ay de nulle fleur envie,

Porte la qui porter la doit,

Car la fleur, que mon cueur amoit

Plus que nulle autre creature,

Est hors de ce monde passée,

Qui son amour m'avoit donnée,

Comme lors fut mon aventure.

L'ENVOY.

Il n'est fueille, ne fleur qui dure

Que pour ung temps, car esprouvée

J'ay la chose que j'ay comptée,

Comme lors fut mon aventure.

BALADE.

Le lendemain du premier jour de May,

Dedens mon lit, ainsi que je dormoye,

Au point du jour m'avint que je songay

Que devant moy une fleur je veoye,

Qui me disoit: Amy, je me souloye

En toy fier, car pieca mon party

Tu tenoies, mais mis l'as en oubly,

En soustenant la fueille contre moy;

J'ay merveille que tu veulx faire ainsi,

Riens n'ay meffait, ce pense je, vers toy.

Tout esbahy alors je me trouvay,

Si respondy au mieulx que je savoye:

Tres belle fleur, oncques je ne pensay

Faire chose qui desplaire te doye;

Se, pour esbat, aventure m'envoye

Que je serve la fueille cest an cy,

Doy je pourtant estre de toy banny?

Nennil certes, je fais comme je doy,

Et, se je tiens le party qu'ay choisy,

Riens n'ay meffait, ce pense je, vers toy.

Car non pourtant honneur te porteray

De bon vouloir, quelque part que je soye,

Tout pour l'amour d'une fleur que j'amay

Ou temps passé; Dieu doint que je la voye

En Paradis, apres ma mort, en joye;

Et pour ce, fleur, chierement je te pry,

Ne te plains plus, car cause n'as pourquoy,

Puisque je fais ainsi que tenu suy,

Riens n'ay meffait, ce pense je, vers toy.

L'ENVOY.

La vérité est telle que je dy,

J'en fais juge Amour le puissant Roy;

Tres doulce fleur, point ne te cry mercy,

Riens n'ay meffait, ce pense je, vers toy.

BALADE.

En la forest d'ennuieuse tristesse,

Ung jour m'avint qu'à par moy cheminoye,

Si rencontray l'amoureuse Deesse

Qui m'appella, demandant où j'aloye.

Je respondy que par Fortune estoye

Mis en exil en ce bois, longtemps a,

Et, qu'à bon droit, appeller me povoye

L'omme esgaré qui ne scet où il va.

Et soubzriant, par sa tres grant humblesse,

Me respondy: Amy, se je savoye

Pourquoy tu es mis en ceste destresse,

A mon povoir, voulentiers t'aideroye;

Car, ja pieca, je mis ton cueur en voye

De tout plaisir, ne scay qui l'en osta;

Or me desplaist qu'à present je te voye

L'omme esgaré qui ne scet où il va.

Helas! dis je, souveraine Princesse,

Mon fait savez, pourquoy le vous diroye?

C'est par la Mort qui fait à tous rudesse,

Qui m'a tollu celle que tant amoye,

En qui estoit tout l'espoir que j'avoye,

Qui me guidoit, si bien m'acompaigna

En son vivant, que point ne me trouvoye

L'omme esgaré qui ne scet où il va.

L'ENVOY.

Aveugle suy, ne scay où aler doye;

De mon baston affin que ne forvoye,

Je vois tastant mon chemin ca et là;

C'est grant pitié qu'il convient que je soye

L'omme esgaré qui ne scet où il va.

BALADE.

J'ay esté de la compaignie

Des amoureux moult longuement,

Et m'a Amour, dont le mercie,

Donné de ses biens largement;

Mais au derrain, ne scay comment,

Mon fait est venu au contraire;

Et, à parler ouvertement,

Tout est rompu, c'est à reffaire

Certes, je ne cuidoye mie

Qu'en amer eust tel changement;

Car, chascun dit que c'est la vie

Où il a plus d'esbatement;

Helas! j'ay trouvé autrement;

Car, quant en l'amoureux repaire

Cuidoye vivre seurement,

Tout est rompu, c'est à reffaire.

Au fort, en Amour je m'affie

Qui m'aidera aucunement,

Pour l'amour de sa seigneurie

Que j'ay servie loyaument;

N'oncques ne fis, par mon serement,

Chose qui lui doye desplaire,

Et non pourtant estrangement,

Tout est rompu, c'est à reffaire.

L'ENVOY.

Amour, ordonnez tellement

Que j'aye cause de me taire,

Sans plus dire de cueur dolent:

Tout est rompu, c'est à reffaire.

BALADE.

Plaisant Beaulté mon cueur nasvra

Ja pieca, si tres durement

Qu'en la fievre d'amours entra,

Qui l'a tenu moult asprement;

Mais, de nouvel presentement,

Ung bon medicin qu'on appelle

Nonchaloir, que tiens pour amy,

M'a guery, la sienne mercy,

Se la playe ne renouvelle.

Quant mon cueur tout sain se trouva,

Il l'en mercia grandement;

Et humblement lui demanda:

S'en santé serait longuement?

Il respondy tres saigement:

Mais que gardes bien ta fourcelle

Du vent d'Amours qui te fery,

Tu es en bon point jusqu'à cy,

Se la playe ne renouvelle.

L'embusche de Plaisir entra

Parmy tes yeulx soutifvement;

Jeunesse le mal pourchassa,

Qui t'avoit en gouvernement;

Et puis bouta priveement

Dedens ton logis l'estincelle

D'Ardant desir qui tout ardy;

Lors fus nasvré, or t'ay guery,

Se la playe ne renouvelle.

BALADE.

Le beau souleil, le jour saint Valentin,

Qui apportait sa chandelle alumée,

N'a pas longtemps, entra ung bien matin

Priveement en ma chambre fermée.

Celle clarté, qu'il avoit apportée,

Si m'esveilla du somme de Soussy,

Où j'avoye toute la nuit dormy

Sur le dur lit d'ennuieuse pensée.

Ce jour aussi, pour partir leur butin

Des biens d'Amours, faisoient assemblée

Tous les oyseaulx, qui parlans leur latin,

Crioyent fort, demandans la livrée

Que Nature leur avoit ordonnée;

C'estoit d'un per comme chascun choisy;

Si ne me peu rendormir, pour leur cry,

Sur le dur lit d'ennuieuse pensée.

Lors en moillant de larmes mon coessin,

Je regrectay ma dure destinée,

Disant: Oyseaulx je vous voy en chemin

De tout plaisir et joye désirée;

Chascun de vous a per qui lui agrée,

Et point n'en ay, car Mort, qui m'a trahy,

A prins mon per, dont en dueil je languy

Sur le dur lit d'ennuieuse pensée.

L'ENVOY.

Saint Valentin choisissent ceste année

Ceulx et celles de l'amoureux party;

Seul me tendray, de confort desgarny,

Sur le dur lit d'ennuieuse pensée.

BALADE.

Mon cueur dormant en nonchaloir,

Reveilliez vous joyeusement,

Je vous fais nouvelles savoir,

Qui vous doit plaire grandement;

Il est vray que presentement

Une Dame tres honnorée

En toute bonne renommée,

Desire de vous acheter,

Dont je suy joyeulx et d'accort;

Pour vous, son cueur me veult donner,

Sans departir, jusqu'à la mort.

Ce change doy je recevoir

En grant gré, tres joyeusement;

Or, vous charge d'entier povoir

Si chier et tant estroictement,

Que je puis plus que loyaument

Soit par vous cherie et amée;

Et, en tous lieux, nuit et journée

L'acompaignier, sans la laissier,

Tant que j'en aye bon rapport;

Il vous convient sien demourer,

Sans departir, jusqu'à la mort.

Alez vous logier ou manoir

De son tres gracieux corps gent,

Pour y demourer main et soir,

Et l'onnourer entierement;

Car, par son bon commandement,

Lieutenant vous veult ordonner

De son cueur, en joyeulx deport;

Pensez de bien vous gouverner,

Sans departir, jusqu'à la mort.

BALADE.

Belle, se ne m'osez donner

De voz doulx baisiers amoureux,

Pour paour de Dangier courroucer,

Qui tousjours est fel et crueux;

J'en embleray bien ung ou deux;

Mais que, n'y prenez desplaisir,

Et que le vueilliez consentir,

Maugré Dangier et ses conseulx.

De ce faulx vilain aveugler,

Dieu scet se j'en suis desireux;

Nul ne le peut aprivoiser,

Tout temps est si souspeconneux,

Qu'en penser languist doloreux,

Quant il voit Plaisance venir;

Mais elle se scet bien chevir,

Maugré Dangier et ses conseulx.

Quand estroit la cuide garder,

Hardy cueur, secret et eureux,

S'avecques lui scet amener

Avis bon et aventureux,

Desguisé soubz maintien honteux;

Bien pevent Dangier endormir;

Lors Plaisance fait son desir,

Maugré Dangier et ses conseulx.

L'ENVOY.

Bien dessert guerdon plantureux

Advis, qui scet si bien servir

Au besoing, et trouver loisir,

Maugré Dangier et ses conseulx.

BALADE.

J'ay fait l'obseque de ma Dame

Dedens le moustier amoureux,

Et le service pour son ame

A chanté Penser doloreux;

Mains sierges de souspirs piteux

Ont esté en son luminaire;

Aussy j'ay fait la tombe faire

De regretz, tous de lermes pains,

Et tout entour, moult richement,

Est escript: Cy gist vrayement

Le tresor de tous biens mondains.

Dessus elle, gist une lame

Faictes d'or et de saffirs bleux;

Car saffir est nommé la jame

De Loyaulté, et l'or eureux;

Bien lui appartiennent ces deux;

Car Eur et Loyaulté pourtraire

Voulu, en la tres debonnaire,

Dieu, qui la fist de ses deux mains,

Et fourma merveilleusement;

C'estoit, à parler plainement,

Le tresor de tous biens mondains.

N'en parlons plus, mon cueur se pasme

Quant il oyt les faiz vertueux

D'elle, qui estoit sans nul blasme;

Comme jurent celles et ceulx

Qui congnoissoient ses conseulx;

Si croy que Dieu la voulu traire

Vers lui, pour parer son repaire

De Paradis, où sont les sains,

Car c'est d'elle bel parement,

Que l'en nommoit communement

Le tresor de tous biens mondains.

L'ENVOY.

De riens ne servent pleurs, ne plains;

Tous mourrons, ou tart ou briefment;

Nul ne peut garder longuement

Le tresor de tous biens mondains.

BALADE.

Puisque Mort a prins ma maistresse,

Que sur toutes amer souloye,

Mourir me convient en tristesse,

Certes plus vivre ne pourroye;

Pour ce, par deffaulte de joye

Tres malade, mon testament

J'ai mis en escript doloreux,

Lequel je presente humblement

Devant tous loyaulx amoureux.

Premierement, à la haultesse

Du Dieu d'amours donne et envoye

Mon esperit, et en humblesse

Lui supplie qu'il le convoye

En son Paradis, et pourvoye;

Car je jure que loyaument

L'a servi de vueil desireux;

Advouer le puis vrayement

Devant tous loyaulx amoureux.

Oultre plus, vueil que la richesse

Des biens d'Amours qu'avoir souloye,

Departie, soit à largesse,

A vraiz amans, et ne vouldroye

Que faulx amans, par nulle voye,

En eussent part aucunement;

Oncques n'euz amistié à eulx;

Je le prans sur mon sauvement

Devant tous loyaulx amoureux.

L'ENVOY.

Sans espargnier or, ne monnoye,

Loyaulté veult qu'en terre soye

En sa chapelle grandement;

Dont je me tiens pour bien eureux,

Et l'en mercie chierement

Devant tous loyaulx amoureux.

BALADE.

J'oy estrangement

Plusieurs gens parler,

Qui trop mallement

Se plaingnent d'amer;

Car, legierement,

Sans paine porter,

Vouldroient, briefment.

A fin amener

Tout leur pensement.

C'est fait follement

D'ainsi desirer;

Car, qui loyaument

Veulent acquester

Bon guerdonnement,

Maint mal endurer

Leur fault, et souvent

A rebours trouver

Tout leur pensement.

S'Amour humblement

Veulent honnourer,

Et soingneusement

Servir, sans faulser;

Des biens largement

Leur fera donner;

Mais, premierement,

Il veult esprouver

Tout leur pensement.

SONGE EN COMPLAINTE.

Apres le jour qui est fait pour traveil,

Ensuit la nuit pour repos ordonnée;

Pour ce, m'avint que chargié de sommeil

Je me trouvav moult fort une vesprée.

Pour la peine que j'avoye portée

Le jour devant, si fis mon appareil

De me couchier, sitost que le souleil

Je vy retrait, et sa clarté mussée.

Quant couchié fu, de legier m'endormy;

Et en dormant, ainsi que je songoye,

Advis me fu que, devant moy, je vy

Ung vieil homme que point ne congnoissoye;

Et non pourtant autresfoiz veu l'avoye,

Ce me sembla; si me trouvay marry

Que j'avoye son nom mis en oubly,

Et, pour honte, parler à lui n'osoye.

Ung peu se teut, et puis m'araisonna,

Disant: Amy, n'avez vous de moy cure?

Je suis Aage qui lectres apporta

A Enfance, de par Dame Nature,

Quant lui chargeay que plus la nourriture

N'auroit de vous, alors vous delivra

A Jeunesse, qui gouverné vous a

Moult longuement, sans raison et mesure.

Or est ainsi, que Raison qui sur tous

Doit gouverner, a fait tres grant complainte

A Nature, de Jeunesse et de vous,

Disant qu'avez tous deux fait faulte mainte,

Avisez vous, ce n'est pas chose fainte;

Car Vieillesse, la mere de courrous,

Qui tout abat et amaine au dessoubz,

Vous donnera dedens brief une atainte.

Au derrenier, ne la povez fuir;

Si vous vault mieulx, tandis qu'avez jeunesse,

A vostre honneur de folie partir,

Vous esloingnant de l'amoureuse adresse;

Car, en discort, sont Amours et Vieillesse,

Nul ne les peut à leur gré bien servir;

Amour vous doit pour excuse tenir,

Puisque la Mort a prins vostre maistresse.

Et tout ainsi, qu'assez est avenant

A jeunes gens, en l'amoureuse voye

De temps passer, c'est aussi mal seant,

Quant en amours ung vieil homme folloye;

Chascun s'en rit, disant: Dieu qu'elle joye!

Ce foul vieillart veult devenir enfant;

Jeunes et vieulx du doy le vont monstrant,

Mocquerie par tous lieux le convoye.

A vostre honneur povez Amours laisser

En jeune temps, comme par nonchalance;

Lors ne pourra nul de vous raconter,

Que l'ayez fait par faulte de puissance;

Et dira l'en que c'est par desplaisance

Que ne voulez en autre lieu amer,

Puisqu'est morte vostre Dame sans per,

Dont loyaument gardez la souvenance,

Au Dieu d'amours, requerez humblement

Qu'il lui plaise de reprandre l'ommaige

Que lui feistes, par son commandement,

Vous rebaillant vostre cueur qu'a en gaige;

Merciez le des biens qu'en son servaige

Avez receuz, lors gracieusement

Departirez de son gouvernement,

A grant honneur comme loyal et saige.

Puis requerez à tous les amoureux

Que chascun d'eulx tout ouvertement die,

Se vous avez riens failly envers eulx,

Tant que suivy avez leur compaignie,

Et que par eulx soit la faulte punie;

Leur requerant pardon de cueur piteux,

Car de servir estiez desireux

Amours, et tous ceulx de sa seigneurie.

Ainsi pourrez departir du povoir

Du Dieu d'amours, sans avoir charge aucune;

C'est mon conseil, faictes vostre vouloir,

Mais gardez vous que ne croiez Fortune

Qui de flater est à chascun commune;

Car tousjours dit qu'on doit avoir espoir

De mieulx avoir, mais c'est pour decevoir.

Je ne congnois plus faulse soubz la lune.

Je scay trop bien, s'escouter la voulez,

Et son conseil plus que le mien eslire,

Elle dira que, s'amours delaissiez,

Vous ne povez mieulx vostre cueur destruire;

Car vous n'aurez lors à quoy vous deduire,

Et tout plaisir à nonchaloir mectrez;

Ainsi, le temps en grant ennuy perdrez,

Qui pis vauldra que l'amoureux martire.

Et puis apres, pour vous donner confort,

Vous promectra que recevrez amande

De tous les maulx qu'avez souffers à tort,

Et que c'est droit qu'aucun guerdon vous rende;

Mais il n'est nul qui à elle s'atende,

Qui tost ou tard ne soit, je m'en fais fort,

Deceu d'elle, à vous je m'en raport;

Si pry à Dieu que d'elle vous deffende.

En tressaillant, sur ce point m'esveillay,

Tremblant ainsi que sur l'arbre la fueille,

Disant: Helas! oncques mais ne songay

Chose dont tant mon povre cueur se dueille;

Car, s'il est vray que Nature me vueille

Abandonner, je ne scay que feray;

A Vieillesse tenir pié ne pourray,

Mais convendra que tout ennuy m'acueille.

Et non pourtant le vieil homme qu'ay veu

En mon dormant, lequel Aage s'appelle,

Si m'a dit vray; car j'ay bien aperceu

Que Vieillesse veult emprandre querelle

Encontre moy, ce m'est dure nouvelle;

Et ja soit ce qu'à present suy pourveu

De jeunesse, sans me trouver recreu,

Ce n'est que sens de me pourveoir contre elle.

A celle fin que quant vendra vers moy,

Je ne soye despourveu comme nice;

C'est pour le mieulx, s'avant je me pourvoy;

Et trouveray Vieillesse plus propice,

Quant cognoistra qu'ay laissé tout office

Pour la servir; alors, en bonne foy

Recommandé m'aurra, comme je croy,

Et moins soussy auray en son service.

Si suis content, sans changier desormais,

Et pour tousjours entierement propose

De renoncer à tous amoureux fais;

Car il est temps que mon cueur se repose;

Mes yeulx cligniez et mon oreille close

Tendray, afin que n'y entre jamais,

Par Plaisance, les amoureux atrais;

Tant les congnois qu'en eulx fier ne m'ose.

Qui bien se veult garder d'amoureux tours,

Quant en repos sent que son cueur sommeille,

Garde ses yeulx emprisonnez tousjours;

S'ils eschapent, ils crient en l'oreille

Du cueur qui dort, tant qu'il fault qu'il s'esveille;

Et ne cessent de lui parler d'Amours,

Disans qu'ilz ont souvent hanté ses cours,

Où ilz ont veu plaisance nompareille.

Je scay par cueur ce mestier bien à plain,

Et m'a longtemps esté si agreable

Qu'il me sembloit qu'il n'estoit bien mondain,

Fors en amours, ne riens si honnorable;

Je trouvoye, par maint conte notable,

Comment Amour, par son povoir haultain.

A avancié comme Roy souverain,

Ses serviteurs en estat prouffitable.

Mais en ce temps, ne congnoissoye pas

La grant douleur qu'il convient que soustiengne

Ung povre cueur, pris es amoureuxlas;

Depuis l'ay sceu, bien scay à quoy m'entiengne,

J'ay grant cause que tousjours m'en souviengne;

Or en suis hors, mon cueur en est tout las,

Il ne veult plus d'Amours passer le pas,

Pour bien ou mal que jamais lui adviengne.

Pour ce tantost, sans plus prendre respit,

Escrire vueil, en forme de requeste,

Tout mon estat, comme devant est dit;

Et quant j'auray fait ma cedule preste,

Porter la vueil à la premiere feste

Qu'Amours tendra, lui monstrant par escript

Les maulx qu'ay euz, et le peu de prouffit,

En poursuivant l'amoureuse conqueste.

Ainsi d'Amours, devant tous les amans,

Prendray congié en honneste maniere,

En estouppant la bouche aux mesdisans

Qui ont langue pour mesdire legiere;

Et requerray, par tres humble priere,

Qu'il me quicte de tous les convenans

Que je lui fis, quant l'ung de ses servans

Devins pieca de voulenté entiere.

Et reprendray hors de ses mains mon cueur,

Que j'engagay par obligacion,

Pour plus seurté d'estre son serviteur,

Sans faintise, ou excusacion;

Et puis, apres recommandacion,

Je delairay, à mon tres grant honneur,

A jeunes gens qui sont en leur verdeur;

Tous fais d'Amours par resignacion.

LA REQUESTE

AUX EXCELLENS, ET PUISSANS EN NOBLESSE,

DIEU CUPIDO ET VENUS LA DEESSE.

Supplie presentement,

Humblement,

CHARLES LE DUC D'ORLÉANS

Qui a esté longuement,

Ligement

L'un de voz obeissans,

Et entre les vraiz amans,

Voz servans,

A despendu largement

Le temps de ses jeunes ans

Tres plaisans,

A vous servir loyaument.

Qu'il vous plaise regarder,

Et passer

Ceste requeste presente,

Sans la vouloir refuser;

Mais penser

Que d'umble vueil la presente

A vous, par loyalle entente,

En actente

De vostre grace trouver,

Car sa fortune dolente

Le tourmente,

Et le contraint de parler.

Comme ainsi soit que la Mort,

A grant tort,

En droicte fleur de jeunesse

Lui ait osté son deport,

Son ressort,

Sa seule Dame et liesse,

Dont a fait veu et promesse,

Par destresse,

Desespoir et desconfort,

Que jamais n'aura Princesse,

Ne maistresse,

Car son cueur en est d'accord.

Et pour ce que, ja pieca,

Vous jura

De vous loyaument servir,

Et en gaige vous laissa,

Et donna

Son cueur, par loyal desir;

Il vient pour vous requerir

Que tenir

Le vueilliez, tant qu'il vivra,

Excusé; car sans faillir.

Pour mourir,

Plus amoureux ne sera.

Et lui vueilliez doulcement,

Franchement,

Rebaillier son povre cueur,

En lui quictant son serement,

Tellement

Qu'il se parte, à son honneur,

De vous, car bon serviteur,

Sans couleur,

Vous a esté vrayement;

Monstrez lui quelque faveur,

En doulceur,

Au moins à son partement.

A Bonnefoy que tenez,

Et nommez

Vostre principal notaire,

Estroictement ordonnez,

Et mandez,

Sur peine de vous desplaire,

Qu'il vueille, sans delay traire,

Lectre faire,

En laquelle affermerez

Que congié de soy retraire,

Sans forfaire,

Audit cueur donné avez.

Afin que le suppliant,

Cy devant

Nommé, la puisse garder,

Pour sa descharge et garant,

En monstrant

Que nul ne le doit blasmer,

S'Amours a voulu laisser;

Car d'amer

N'eut oncques puis son talant

Que Mort lui voulut oster

La nomper

Qui fust ou monde vivant.

Et s'il vous plaist faire ainsi

Que je dy,

Ledit suppliant sera

Allegié de son soussy;

Et ennuy

D'avec son cueur bannira;

Et apres, tant que vivra,

Priera

Pour vous, sans mectre en oubly

La grace qu'il recevra,

Et aura,

Par vostre bonne mercy.

LA DESPARTIE D'AMOURS EN BALADES.

Quant vint à la prochaine feste,

Qu'Amour tenoit son Parlement,

Je lui presentay ma requeste

Laquelle leut tres doulcement,

Et puis me dist: Je suis dolent

Du mal qui vous est advenu;

Mais il n'a nul recouvrement,

Quant la Mort a son cop feru.

Eslongnez hors de vostre teste

Vostre doloreux pensement,

Monstrez vous homme, non pas beste,

Faictes que, sans empeschement,

Ait en vous le gouvernement

Raison, qui souvent a pourveu

En maint meschief, tres saigement,

Quant la Mort a son cop feru.

Reprenez nouvelle conqueste,

Je vous aideray tellement

Que vous trouverez Dame preste

De vous amer tres loyaument,

Qui de biens aura largement;

D'elle serez amy tenu;

Je n'y voy autre amendement,

Quant la Mort a son cop feru.

BALADE.

Helas! sire, pardonnez moi,

Se dis je, car, toute ma vie,

Je vous asseure par ma foy,

Jamais n'auray Dame, n'amie;

Plaisance s'est de moy partie,

Qui m'a de liesse forclos,

N'en parlez plus, je vous supplie,

Je suis bien loing de ce propos.

Quant ces parolles de vous oy,

Vous m'essayez, ne faictes mye;

A vous dire vray, je le croy,

Ou ce n'est dit qu'en mocquerie;

Ce me seroit trop grant folie,

Quant demeurer puis en repos,

De reprendre merencolie,

Je suis bien loing de ce propos.

Acquictié me suis, comme doy,

Vers vous et vostre seigneurie,

Desormais me vueil tenir coy;

Pour ce, de vostre courtoisie,

Accordez moi, je vous en prie,

Ma requeste, car à briefz mos,

De plus amer, quoique nul die,

Je suis bien loing de ce propos.

BALADE.

Amour congnu bien que j'estoye

En ce propos, sans changement,

Pour ce respondy: Je vouldroye

Que voulsissiez faire autrement,

Et me servir plus longuement,

Mais je voy bien que ne voulez,

Si vous accorde franchement

La requeste que faicte avez.

Escondire ne vous pourroye,

Car servy m'avez loyaument,

N'oncques ne vous trouvay en voye,

N'en voulenté aucunement

De rompre le loyal serement

Que me feistes, comme savez;

Ainsi le compte largement

La requeste que faicte avez.

Et afin que tout chascun voye

Que de vous je suis tres content,

Une quictance vous octroye,

Passée par mon Parlement,

Qui relaissera plainement

L'ommaige que vous me devez,

Comme contient ouvertement

La requeste que faicte avez.

BALADE.

Tantost Amour, en grant array,

Fist assembler son Parlement;

En plain conseil mon fait comptay,

Par congié et commandement;

Là fust passée plainement

La quictance que demandoye,

Baillée me fut franchement,

Pour en faire ce que vouldroye.

Oultre plus, mon cueur demanday,

Qu'Amour avoit eu longuement,

Car en gaige le lui baillay,

Quant je me mis premierement

En son service ligement;

Il me dist que je le rauroye,

Sans refuser aucunement,

Pour en faire ce que vouldroye.

A deux genoilz m'agenoillay,

Merciant Amour humblement

Qui tira mon cueur, sans delay,

Hors d'un escrin priveement,

Le me baillant courtoisement,

Lyé en ung noir drap de soye;

En mon sain le mist doulcement,

Pour en faire ce que vouldroye.

COPIE DE LA QUICTANCE DESSUS DICTE.

Saichent presens et avenir,

Que nous, Amours, par franc desir

Conseillez, sans nulle contraincte,

Apres qu'avons oy la plainte

De CHARLES LE DUC D'ORLÉANS

Qui a esté, par plusieurs ans,

Nostre vray loyal serviteur

Rebaillé lui avons son cueur

Qu'il nous bailla, pieca, en gaige,

Et le serment, foy et hommaige,

Qu'il nous devoit quictié avons,

Et par ces presentes quictons;

Oultre plus, faisons assavoir,

Et certiffions, pour tout voir,

Pour estoupper aux mesdisans

La bouche, qui trop sont nuisans,

Qu'il ne part de nostre service

Par deffaulte, forfait ou vice,

Mais seulement la cause est telle:

Vray est que la Mort trop cruelle

A tort lui est venu oster

Celle que tant souloit amer,

Qui estoit sa Dame et maistresse,

S'amie, son bien, sa leesse;

Et pour sa loyaulté garder,

Il veult desormais ressembler

A la loyalle turterelle

Qui seule se tient, à par elle,

Apres qu'elle a perdu son per;

Si lui avons voulu donner

Congié du tout de soy retraire

Hors de nostre court, sans forfaire.

Fait par bon conseil et advis

De nos subgietz et vraiz amis,

En nostre present Parlement

Que nous tenons nouvellement;

En tesmoing de ce, avons mis

Nostre scel, plaqué et assis,

En ceste presente quictance,

Escripte par nostre ordonnance,

Presens mains notables recors,

Le jour de la feste des morts,

L'an mil quatre cent trente et sept,

Ou chastel de Plaisant recept.

BALADE.

Quant j'euz mon cueur et ma quictance,

Ma voulenté fut assouvie,

Et non pourtant, pour l'acoinctance

Qu'avoye de la seigneurie

D'Amour, et de sa compaignie,

Quant vins à congié demander,

Trop mal me fist la departie,

Et ne cessoye de plourer.

Amour vit bien ma contenance,

Si me dist: Amy, je vous prie,

S'il est riens dessoubz ma puissance

Que vueilliez, ne l'espargniez mie.

Tant plain fu de merencolie,

Que je ne peuz à lui parler

Une parolle ne demie,

Et ne cessoye de plourer.

Ainsi party en desplaisance

D'Amour, faisant chiere marrie,

Et comme tout ravi en trance,

Prins congié, sans que plus mot dye.

A Confort dist qu'il me conduye,

Car je ne m'en savoye aler,

J'avois la veue esbluye,

Et ne cessoye de plourer.

BALADE.

Confort, me prenant par la main,

Hors de la porte me convoye;

Car Amour, le Roy souverain,

Lui chargea moy monstrer la voye

Pour aler où je desiroye;

C'estoit vers l'ancien manoir

Où en enffance demouroye,

Que l'en appelle Nonchaloir.

A confort dis: Jusqu'à demain

Ne me laissiez, car je pourroye

Me forvoier, pour tout certain,

Par desplaisir, vers la saussoye

Où est Vieillesse rabat joye;

Se nous travaillons fort ce soir,

Tost serons au lieu que vouldroye,

Que l'en appelle Nonchaloir.

Tant cheminasmes qu'au derrain

Veismes la place que queroye;

Quant de la porte fu prouchain,

Le portier, qu'assez congnoissoye,

Sitost comme je l'appelloye,

Nous receut, disant que pour voir

Ou dit lieu bien venu estoye,

Que l'en appelle Nonchaloir.

BALADE.

Le gouverneur de la maison

Qui Passetemps se fait nommer,

Me dist: Amy, ceste saison

Vous plaist il ceans sejourner?

Je respondy qu'à brief parler,

Se lui plaisoit ma compaignie,

Content estoye de passer

Avecques lui, toute ma vie.

Et lui racontay l'achoison

Qui me fist Amour delaisser;

Il me dist qu'avoye raison,

Quant eut veu ma quictance au cler,

Que je lui baillay à garder.

Aussi de ce me remercie

Que je vouloye demourer

Avecques lui, toute ma vie.

Le lendemain lectres foison

A Confort baillay à porter,

D'umble recommandation,

Et le renvoyay sans tarder

Vers Amour, pour lui raconter

Que Passetemps, à chiere lye,

M'a voit receu pour reposer

Avecques lui, toute ma vie.

A TRES NOBLE, HAULT ET PUISSANT SEIGNEUR

AMOUR, PRINCE DE MONDAINE DOULCEUR.

Tres excellent, tres hault et noble Prince,

Tres puissant Roy en chascune province,

Si humblement que se peut serviteur

Recommander à son maistre et seigneur,

Me recommande à vous, tant que je puis,

Et vous plaise savoir que toujours suis

Tres desirant oir souvent nouvelles

De vostre estat, que Dieu doint estre telles,

Et si bonnes, comme je le desire,

Plus que ne scay raconter ou escrire;

Dont vous suppli que me faictes sentir

Par tous venans, s'il vous vient à plaisir,

Car d'en oir en bien, et en honneur,

Ce me sera parfaicte joye au cueur;

Et s'il plaisoit à vostre seigneurie

Vouloir oir, par sa grant courtoisie,

De mon estat; je suis en tres bon point,

Joyeux de cueur, car soussy n'ay je point,

Et Passetemps, ou lieu de Nonchaloir,

M'a retenu pour avec lui manoir

Et sejourner, tant comme me plaira,

Jusques à tant que Vieillesse vendra;

Car lors fauldra qu'avec elle m'en voise

Finer mes jours; ce penser fort me poise

Dessus le cueur, quant j'en ai souvenance,

Mais, Dieu mercy, loing suis de sa puissance,

Presentement je ne la crains en riens,

N'en son dangier aucunement me tiens.

En oultre plus, saichez que vous renvoye

Confort, qui m'a conduit la droicte voye

Vers Nonchaloir, dont je vous remercie

De sa bonne, joyeuse compaignie,

En ce fait, à vostre commandement,

De bon vouloir et tres soingneusement,

Auquel vueilliez donner foy et fiance,

En ce que lui ay chargié en creance,

De vous dire plus pleinement de bouche;

Vous suppliant qu'en tout ce qui me touche,

Bien à loisir, le vueilliez escouter,

Et vous plaise me vouloir pardonner

Se je n'escris devers vostre Excellence,

Comme je doy, en telle reverence

Qu'il appartient, car c'est par non savoir

Qui destourbe d'acomplir mon vouloir.

En oultre plus, vous requerant mercy,

Je cognois bien que grandement failly,

Quant me party derrainement de vous,

Car j'estoye si rempli de courrous

Que je ne peu ung mot à vous parler,

Ne mon congié, au partir, demander;

Avecques ce, humblement vous mercie

Des biens qu'ay euz soubz vostre seigneurie.

Autre chose n'escris, quant à present,

Fors que je pry à Dieu, le tout puissant,

Qu'il vous octroit honneur et longue vie,

Et que puissiez tousjours la compaignie

De faulx Dangier surmonter, et deffaire,

Qui en tous temps vous a esté contraire.

Escript ce jour troisiesme vers le soir,

En Novembre ou lieu de Nonchaloir.

Le Bien vostre CHARLES DUC D'ORLÉANS

Qui jadis fut l'un de voz vrays servans.

BALADE.

Balades, chancons et complaintes

Sont pour moy mises en oubly,

Car ennuy et pensées maintes

M'ont tenu longtemps endormy;

Non pourtant, pour passer soussy,

Essayer vueil se je sauroye

Rimer, ainsi que je souloye,

Au moins j'en feray mon povoir,

Combien que je congnois et scay

Que mon langaige trouveray

Tout enroillié de nonchaloir.

Plaisans parolles sont estaintes

En moy qui deviens rassoty;

Au fort, je vendray aux actaintes,

Quant beau parler m'aura failly;

Pourquoy pry ceulx qui m'ont oy

Langaigier, quant pieca j'estoye

Jeune, nouvel et plain de joye,

Que vueillent excusé m'avoir;

Oncques mais je ne me trouvay

Si rude, car je suis, pour vray,

Tout enroillié de nonchaloir.

Amoureux ont parolles paintes,

Et langaige frais et joly;

Plaisance dont ilz sont acointes

Parle pour eulx; en ce party

J'ay esté, or n'est plus ainsy;

Alors, de beau parler trouvoye

A bon marchié, tant que vouloye;

Si ay despendu mon savoir,

Et s'ung peu espargné en ay,

Il est, quant vendra à l'essay,

Tout enroillié de nonchaloir.

L'ENVOY.

Mon Jubile faire devroye,

Mais on diroit que me rendroye

Sans cop ferir, car Bon espoir

M'a dist que renouvelleray;

Pour ce, mon cueur fourbir feray

Tout enroillié de nonchaloir.

BALADE.

L'emplastre de nonchaloir,

Que sus mon cueur pieca mis,

M'a guéri, pour dire voir,

Si nectement que je suis

En bon point, ne je ne puis

Plus avoir, jour de ma vie,

L'amoureuse maladie.

Si font mes yeulx leur povoir

D'espier par le pays,

S'ilz pourroyent plus veoir

Plaisant beaulté, qui jadis

Fut l'un de mes ennemis,

Et mist, en ma compaignie,

L'amoureuse maladie.

Mes yeux tense main et soir,

Mais ilz sont si tres hastis,

Et trop plains de leur vouloir;

Au fort, je les metz au pis,

Facent selon leur advis;

Plus ne crains, dont Dieu mercie,

L'amoureuse maladie.

L'ENVOY.

Quant je voy en doleur pris

Les amoureux, je m'en ris;

Car je tiens, pour grant folie,

L'amoureuse maladie.

BALADE.

Mon cueur m'a fait commandement

De venir vers vostre jeunesse,

Belle que j'ayme loyaument,

Comme doy faire ma Princesse;

Se vous demandez pourquoi esse?

C'est pour savoir quant vous plaira

Alegier sa dure destresse,

Ma Dame, le sauray je ja?

Dictez le, par vostre serment

Je vous fais loyalle promesse,

Nul ne le saura, seulement

Fors que lui, pour avoir leesse;

Or lui monstrez qu'estes maistresse,

Et lui mandez qu'il guerira,

Ou s'il doit mourir de destresse,

Ma Dame, le saurai je ja?

Penser ne pourroit nullement

Que la doleur, qui tant le blesse,

Ne vous desplaise aucunement;

Or faictes donc tant qu'elle cesse,

Et le remectez en l'adresse

D'Espoir, dont il party pieca;

Respondez sans que plus vous presse.

Ma Dame, le sauray je ja?

BALADE.

Je meurs de soif, en cousté la fontaine;

Tremblant de froit, ou feu des amoureux;

Aveugle suis, et si les autres maine;

Povre de sens, entre saichans l'un d'eulx;

Trop negligent, en vain souvent soigneux;

C'est de mon fait une chose faiée,

En bien et mal par fortune menée.

Je gaingne temps, et pers mainte sepmaine;

Je joue et ris, quant me sens douloreux;

Desplaisance j'ay, d'esperance plaine;

J'actens boneur en regret angoisseux;

Rien ne me plaist, et si suis desireux;

Je m'esjois, et courre à ma pensée,

En bien et mal par fortune menée.

Je parle trop, et me tais à grant paine;

Je m'esbahys, et si suis courageux;

Tristesse tient mon confort en demaine,

Faillir ne puis, au moins à l'un des deux;

Bonne chierre je faiz, quant je me deulx;

Maladie m'est en santé donnée,

En bien et mal par fortune menée.

L'ENVOY.

Prince, je dy que mon fait maleureux,

Et mon prouffit aussi avantageux,

Sur ung hasart j'asseray quelque année,

En bien et mal par fortune menée.

BALADE.

Comment voy je les Anglois esbahys,

Resjoys toy, franc royaume de France,

On apparcoit que de Dieu sont hays;

Puis qu'ilz n'ont plus couraige ne puissance;

Bien pensoient, par leur oultrecuidance,

Toy surmonter, et tenir en servaige;

Et ont tenu à tort ton heritaige;

Mais à present Dieu pour toy se combat,

Et se monstre du tout de ta partie,

Leur grant orgueil entierement abat,

Et t'a rendu Guyenne et Normendie.

Quant les Anglois as pieca envays,

Rien ny valoit ton sens, ne ta vaillance;

Lors estoies ainsi que fut Tays

Pecheresse qui pour faire penance,

Enclouse fut par divine ordonnance;

Ainsi as tu esté en reclusaige

De desconfort, et douleur de couraige.

Et les Anglois menoient leur sabat,

En grans pompes, baubans et tirannie.

Or, a tourné Dieu ton dueil en esbat,

Et t'a rendu Guyenne et Normendie.

N'ont pas Anglois souvent leurs Rois trays?

Certes ouil. tous en ont congnoissance;

Et encore, le Roy de leur pays

Est maintenant en doubteuse balance;

D'en parler mal, chascun Anglois s'avance;

Assez monstrent, par leur mauvais langage,

Que voulentiers ilz lui feroyent oultrage;

Qui sera Roy entr'eulx est grant desbat;

Pour ce, France, que veulx tu que te dye?

De sa verge Dieu, les punist et bat,

Et t'a rendu Guyenne et Normendie.

PRINCE.

Roy des Français gaigné as l'asvantaige,

Parfaiz ton jeu, comme vaillant et saige,

Maintenant l'as plus belle qu'au rabat.

De ton boneur, France, Dieu remercie;

Fortune en bien avecques toi s'embat,

Et t'a rendu Guyenne et Normendie.

BALADE.

On parle de religion

Qui est d'estroicte gouvernance,

Et, par ardant devocion,

Portent mainte dure penance;

Mais, ainsi que j'ay congnoissance,

Et selon mon entencion,

Entre tous, j'ay compassion

Des amoureux de l'observance

Toujours par contemplacion

Tiennent leurs cueurs raviz en trance;

Pour venir par perfection

Au hault Paradis de Plaisance:

Chault, froit, soif et faim d'esperance,

Souffrent en mainte nacion;

Telle est la conversacion

Des amoureux de l'observance.

Piez nuz, de consolacion

Quierent l'aumosne d'alegence;

Or ne veulent ne pension,

Fors de pitié pour pitance;

En bissacs plains de souvenance,

Pour leur simple provision,

N'est ce saincte condicion

Des amoureux de l'observance?

L'ENVOY.

Des bigotz ne quiers l'accointance,

Ne loue leur oppinion,

Mais me tiens, par affection,

Des amoureux de l'observance.

OBLIGATION DE VAILLANT.

Present le notaire d'Amours,

Sans alleguer decepcion,

En renoncant tous droiz d'amours,

Coustume, loy, condicion,

De tres loyalle entencion,

A vous servir sans me douloir,

Passe ceste obligacion

Soubz le scel de vostre vouloir.

De cueur, corps, biens, sans nul recours.

Vous fais renunciacion,

Presens, advenir, à tousjours.

Et vous mets en possession

Ne nulle part, ne porcion

N'y aura, et, pour mieulx valoir,

Le jure en ma dampnacion

Soubz le scel de vostre vouloir.

Et quant je feray le rebours,

Pour recevoir punicion,

Me soubzmetz, sans estre ressours,

A vostre juridiction;

Et à bon droit, et action,

Pourrez, de vostre plain povoir:

Me mectre à execution

Soubz le scel de vostre vouloir.

L'ENVOY.

En l'an de ma grant passion

Mectant toutes à nonchaloir,

Feis ceste presentacion,

Soubz le scel de vostre vouloir.

VIDIMUS DE LA DICTE OBLIGACION

PAR LE DUC D'ORLÉANS.

A ceulx qui verront ces presentes,

Le Bailly d'Amoureux espoir,

Salut plain de bonnes ententes,

Mandons et faisons assavoir

Que le tabellion Devoir,

Juré des centraux en amours,

A veu nouvellement, à Tours,

De Vaillant l'obligacion

Entiere de bien vraye sorte,

Dont en fait la relacion,

Ainsi que ce vidimus porte.

A double queue, par patentes,

En cire vert, pour dire voir,

Oblige, soubzmectant ses rentes,

Cueur, corps et biens, sans decevoir,

Soubz le seau d'autruy vouloir,

Pour recouvrer joyeulx secours,

Qu'il a desservy par mains jours;

Faisant ratifficacion,

Ledit notaire le rapporte,

Par sa certifficacion,

Ainsi que ce vidimus porte.

Et deust il mectre tout en ventes,

Des biens qu'il pourra recevoir,

Veult paier ses debtes contentes,

Tant qu'on pourra apparcevoir,

Qu'il fera trop plus que povoir;

Combien qu'ait eu d'estranges tours

Qui lui sont venuz au rebours;

En soit faicte informacion,

Car à Loyaulté se conforte,

Qu'en fera la probacion,

Ainsi que ce vidimus porte.

L'ENVOY.

Pour plus abreviacion,

De l'an et jour je me deporte,

On en voit declaracion,

Ainsi que ce vidimus porte.

ENTENDIT DE LA DICTE OBLIGACION

Par Maistre Jehan Caillau.

Intendit le nommé Vaillant

Qui fait ceste obligation,

Vous resigne tout son vaillant,

Par simple resignacion;

Ne ne fait supplicacion

De gueredon, pour mieulx valoir,

Fors tout à vostre oppinion,

Soubz le scel de vostre vouloir.

Lequel, d'estoc et de taillant.

Endure mainte passion

D'Amours, qui le vont assaillant;

Mais, soubz dissimulacion,

Porte sa tribulacion,

Faisant semblant de non doloir,

Actendant doulce pension,

Soubz le scel de vostre vouloir.

Pour ce, ne doit estre faillant

A la renumeracion,

Car, s'il y estoit deffaillant,

Ce serait sa perdicion;

Et, par Dieu, si bon champion

Ne devez mectre à nonchaloir;

Si faictes qu'ait provision,

Soubz le scel de vostre vouloir.

L'ENVOY.

J'en parle par compacion,

Mais grant bien lui devez vouloir,

Puis que met son entencion

Soubz le scel de vostre vouloir.

BALADE.

En la forest de longue actente,

Chevauchant par divers sentiers,

M'en voys, ceste année presente,

Ou voyage de desiriers;

Devant sont allez mes fourriers,

Pour appareiller mon logis

En la cité de Destinée,

Et, pour mon cueur et moy, ont pris

L'ostellerie de Pensée.

Je mene des chevaulx quarente,

Et autant pour mes officiers,

Voire, par Dieu, plus de soixante,

Sans les bagaiges et sommiers.

Loger nous fauldra par quartiers,

Se les hostelz sont trop petis

Touteffoiz pour une vesprée

En gré prandray, soit mieulx ou pis,

L'ostellerie de Pensée.

Je despens chascun jour ma rente

En maints travaulx avanturiers,

Dont est Fortune mal contente,

Qui soustient contre moy Dangiers;

Mais, Espoirs, s'ilz sont droicturiers,

Et tiennent ce qui qu'ilz m'ont promis,

Je pense faire telle armée,

Qu'auray malgré mes ennemis,

L'ostellerie de Pensée.

L'ENVOY.

Prince, vray Dieu de paradis,

Vostre grace me soit donnée,

Telle que trouve à mon devis,

L'ostellerie de Pensée.

BALADE.

Je cuide que ce sont nouvelles,

J'oy nouveau bruit, et qu'est ce là?

Helas! pourroy je savoir d'elles

Quelque chose qui me plaira;

Car j'ay desiré, longtemps a,

Qu'Espoir m'estraynast de liesse,

Je ne scay pas qu'il en fera,

Le beau menteur plain de promesse.

S'il ne sont ou bonnes ou belles,

Au fort, mon cueur endurera,

En actendant d'avoir de celles

Que Bon eur lui apportera,

Et de l'endormye beuvra;

De nonchaloir, en sa destresse,

Espoir plus ne l'esveillera,

Le beau menteur plain de promesse.

Pour ce, mon cueur, se tu me celles

Reconfort, quant vers toy vendra,

Tu feras mal, car tes querelles

J'ay gardées, or y perra;

Adviengne qu'avenir pourra!

Je suis gouverné par Vieillesse,

Qui de legier n'escoutera

Le beau menteur plain de promesse.

L'ENVOY.

Ma bouche plus n'en parlera,

Raison sera d'elle maistresse;

Mais au derrain, blasmé sera

Le beau menteur plain de promesse.

BALADE.

N'a pas longtemps qu'escoutoye parler

Ung amoureux, qui disoit à s'amye:

De mon estat plaise vous ordonner,

Sans me laisser ainsi finer ma vie,

Je meurs pour vous, je le vous certiffie.

Lors respondit, la plaisante aux doulx yeulx,

Assez le croy, dont je vous remercie,

Que m'aymez bien, et vous encores mieulx,

Il ne fault ja vostre pousse taster,

Fievre n'avez que de merencolie,

Vostre orine ne aussi regarder,

Tost se garist legiere maladie,

Medicine devez prendre d'oublie;

D'autres ay veu trop pis, en plusieurs lieux,

Que vous n'estes, et, pour ce, je vous prie,

Que m'aymez bien, et vous encores mieulx.

Je ne vueil pas de ce vous destourber,

Que ne m'amiez de vostre courtoisie;

Mais que pour moy, doyez mort endurer,

De le croire, ce me seroit folie;

Pensez de vous, et faictes chiere lye;

J'en ay ouy parler assez de tieulx

Qui sont tous sains; quoyque point ne desnye

Que m'aymez bien, et vous encores mieulx.

L'ENVOY.

Telz beaulx parlers ne sont en compaignie

Qu'esbatemens, entre jeunes et vieulx;

Contente suis, combien que je m'en rye,

Que m'aymez bien, et vous encores mieulx.

BALADE.

Portant harnois rouillé de nonchaloir,

Sus monteure foulée de foiblesse,

Mal abillé de desireulx vouloir,

On m'a croizé, aux montres de liesse,

Comme cassé des gaiges de jeunesse;

Je ne congnois où je puisse servir,

L'arriere ban a fait crier Vieillesse,

Las! fauldra il son soudart devenir?

Le bien, que puis avecques elle avoir,

N'est que d'un peu d'atrempée sagesse;

En lieu de ce, me fauldra recevoir

Ennuy, soussy, desplaisir et destresse;

Par Dieu! Bon temps, mal me tenez promesse,

Vous me deviez contre elle soustenir,

Et je voy bien qu'elle sera maistresse,

Las! fauldra il son soudart devenir?

Foibles jambes porteront bon vouloir,

Puisqu'ainsy est, endurant en humblesse,

Prenant confort d'un bien joyeulx espoir,

Quant, Dieu mercy, maladie ne presse;

Mais loing se tient, et mon corps point ne blesse,

C'est ung tresor que doy bien chier tenir,

Veu que la fin de menasser ne cesse,

Las! fauldra il son soudart devenir?

L'ENVOY.

Prince, je dy que c'est peu de richesse

De ce monde, ne de tout son plaisir,

La mort depart ce qu'on tient à largesse,

Las! fauldra il son soudart devenir?

BALADE.

Dieu vueille sauver ma galée,

Qu'ay chargée de marchandise

De mainte diverse pensée

Enpris de loyaulté assise;

Destourbée ne soit, ne prise

Des robeurs, escumeurs de mer;

Vent, ne marée ne luy nuyse,

A bien aler et retourner.

A Confort l'ay recommandée,

Qu'il en face tout à sa guise,

Et pencarte lui ay baillée,

Qui d'estranges pays devise,

Affin que dedens il advise

A quel port pourra arriver,

Et le chemin à chois eslise,

A bien aler et retourner.

Pour acquicter joye empruntée,

L'envoye, sans espargner mise,

Riche devendray, quelque année,

Se mon entente n'est surprise;

Conscience n'auray reprise

De gaing à tort au par aler,

En eur viengne mon entreprise,

A bien aler et retourner.

L'ENVOY.

Prince, se maulx fortune atise,

Sagement s'y fault gouverner:

Le droit chemin jamais ne brise,

A bien aler et retourner.

BALADE.

(Jacques bastart de la Tremoille.)

Pour la conqueste de mercy,

Où les vaillans hommes et saiges

Ont été pris, et mors aussi,

En acquerant leurs avantaiges;

Amours accroissant les couraiges

Des mieulx venuz, lectre patente

A tous a donné leurs usaiges,

En la forest de longue actente.

Les piteux s'arment de soussy,

Les francs se mectent en servaige,

Maigres de corps, le cueur noircy

De dueil, et pales les visaiges;

A tant pour services et gaiges,

Auront trois cens maulx jours de rente

Par an, avec les arreraiges,

En la forest de longue actente.

Ceulx qui Amours servent ainsy,

En lui faisant foys et hommaiges,

Il les fait apres eureux sy

Qu'ilz s'eschappent des brigandaiges

De Dangiers, par petiz boucaiges,

Puis les duit en la droicte sente;

Mais premier, paient leurs truaiges,

En la forest de longue actente.

L'ENVOY.

Prince, pour duire cueurs volaiges,

Affin que nul ne s'en exempte,

Mectez les tous en hermitaiges,

En la forest de longue actente.

BALADE.

Ha! Dieu Amours, où m'avez vous logié?

Tout droit au trait de desir et plaisance,

Où, de legier, je puis estre blecié

Par doulx regart, et plaisant atraiance.

Jusqu'à la mort, dont trop suis en doubtance,

Pour moy couvrir prestez moy ung pavaiz,

Desarmé suis, car pieca mon harnaiz

Je le vendy, par le conseil d'oiseuse.

Comme lassé de la guerre amoureuse.

Vous savez bien que me suis esloingné,

Des longtemps a, d'amoureuse vaillance,

Où j'estoye moult fort embesoingné,

Quant m'aviez en vostre gouvernance;

Or en suis hors, Dieu me doint la puissance

De me garder que n'y rentre jamais;

Car, quant congneu j'ay les amoureux fais,

Retrait me suis de vie si peneuse,

Comme lassé de la guerre amoureuse.

Et non pourtant, j'ay esté advisé

Que Bel acueil a fait grant aliance

Encontre moy, et qu'il est embusché

Pour me prandre, s'il peut, par decevance;

Ung de ses gens, appellé Acointance,

M'assault tousjours; mais souvent je me taiz,

Monstrant semblant que je ne quiers que paiz.

Sans me bouter en paine dangereuse,

Comme lassé de la guerre amoureuse.

L'ENVOY.

Voisent faire jeunes gens leurs essaiz,

Car reposer, je me vueil desormaiz;

Plus cure n'ay de pensée soingneuse,

Comme lassé de la guerre amoureuse.

BALADE.

Yeulx rougis, plains de piteux pleurs,

Fourcelle d'espoir reffroidie,

Teste enrumée de douleurs,

Et troublée de frénésie,

Corps percus sans plaisance lye,

Cueur du tout pausmé en rigueurs,

Voy souvent avoir à plusieurs,

Par le vent de merencolie.

Migraine de plaingnans ardeurs,

Transe de sommeil mi partie,

Fievre frissonnans de maleurs,

Chault ardant fort en reverie,

Soif que confort ne rassasie,

Dueil baigné en froides sueurs.

Begayant, et changeant couleurs,

Par le vent de merencolie.

Toute tourmentant en langueurs,

Colique de forcenerie,

Gravelle de soings assailleurs,

Raige de desirant folie,

Anuys enflans d'ydropisie,

Maulx ethiques aussi ailleurs

Assourdissent les escouteurs,

Par le vent de merencolie.

L'ENVOY.

Guerir ne se peut maladie

Par phisique, ne cireurgie,

Astronomans, n'enchanteurs,

Des maulx que souffrent povres cueurs

Par le vent de merencolie.

BALADE.

Ce que l'ueil despend en plaisir,

Le cueur l'achete chierement,

Et, quand vient à compte tenir,

Raison, president saigement,

Demande pourquoi et comment

Est despendue la richesse,

Dont Amours deppart largement,

Sans grant espargne de liesse.

Lors respond Amoureux desir:

Amours me fist commandement

De joyeuse vie servir,

Et obeir entierement;

Et, s'ay failly aucunement,

On n'en doit blasmer que jeunesse

Qui m'a fait ouvrer sotement,

Sans grant espargne de liesse.

Pas ne mourray sans repentir,

Car je m'en repens grandement,

Trouvé me suis pis que martir,

Souffrant maint doloureux tourment;

Desormais en gouvernement

Me metz, et es mains de Vieillesse,

Bien scay qu'y vivray soubrement,

Sans grant espargne de liesse.

L'ENVOY.

Le temps passe comme le vent,

Il n'est si beau jeu qui ne cesse,

En tout fault avoir finement,

Sans grant espargne de liesse.

BALADE.

Je, qui suis Fortune nommée,

Demande la raison pourquoy

On me donne la renommée,

Qu'on ne se peut fier en moy,

Et n'ay ne fermeté ne foy;

Car, quant aucuns en mes mains prens,

D'en bas je les monte en haultesse,

Et d'en hault en bas les descens,

Monstrant que suis Dame et maistresse.

En ce, je suis à tort blasmée,

Tenant l'usaige de ma loy,

Que de longtemps m'a ordonnée

Dieu, sur tous le souverain Roy,

Pour donner au monde chastoy;

Et, se de mes biens je despens

Souventesfoiz, à grant largesse,

Quant bon me semble, les suspens,

Monstrant que suis Dame et maistresse.

C'est ma maniere acoustumée,

Chascun le scet, comme je croy.

Et n'est pas nouvelle trouvée,

Mais, fays ainsi comme je doy;

Me mocquant, je les monstre au doy

Tous ceulx qui en sont mal contens:

En gré pregnent joye ou destresse,

Qu'ayent l'un des deux me consens,

Monstrant que suis Dame et maistresse.

L'ENVOY.

Sur ce, s'advise qui a sens,

Soit en jeunesse, ou en vieillesse,

Et qui ne m'entent, je m'entens,

Monstrant que suis Dame et maistresse.

BALADE.

Fortune, je vous oy complaindre

Qu'on vous donne renom, à tort,

De savoir, et aider, et faindre,

Donnant plaisir et desconfort;

C'est vray, et encore plus fort.

Souvent effoiz, contre raison,

Boutez de hault plusieurs en bas,

Et de bas en hault; telz debas

Vous usez en vostre maison.

Bien savez de plaisance paindre,

Et d'espoir, quand prenez depport.

Apres effacer et destaindre

Toute joye, sans nul support.

Et mener à douloureux port,

Ne vous chault en quelle saison;

Jamais vous n'ouvrez par compas;

Beaucoup pis, que je ne dy pas,

Vous usez en vostre maison.

Pour Dieu, vueillez vous en reffraindre,

Affin qu'on ne face rapport,

Qui vouldra vostre fait actaindre,

Que vous soyez digne de mort;

Vostre maniere chascun mort,

Plus qu'autre, sans comparaison,

Qui regarde par tous estats,

Anuy et meschief, à grant tas,

Vous usez en vostre maison.

L'ENVOY.

Ne jouez plus de vostre sort,

Car trop le passez oultre bort;

Se gens ne laissiez en pais, on

Appellera les advocas,

Qui plaideront que tres faulx cas

Vous usez en vostre maison.

BALADE.

Or ca, puisque il faut que responde,

Moy, Fortune, je parleray,

Si grant n'est, ne puissant ou monde,

A qui bien parler n'ozeray.

J'ay fait, faiz encores, et feray,

Ainsi que bon me semblera,

De ceulx qui sont soubz ma puissance;

Parle qui parler en vouldra,

Je n'en feray qu'à ma plaisance.

Quant les biens, qui sont en la ronde,

Sont miens, et je les donneray

Par grant largesse, dont j'abonde,

Et apres je les reprendray;

Certes, à nul tort ne feray.

Qui est ce qui m'en blasmera?

Je l'ay ainsi d'acoustumance,

En gré le preigne qui pourra,

Je n'en feray qu'à ma plaisance.

En raison jamais ne me fonde,

Mais mon vouloir accompliray;

Les aucuns convient que confonde,

Et les autres avanceray;

Mon propos souvent changeray,

En plusieurs lieux, puis ca, puis là,

Sans regle, ne sans ordonnance;

Où est il qui m'en gardera?

Je n'en feray qu'à ma plaisance.

L'ENVOY.

On escript: tant qu'il nous plaira,

Es lettres des seigneurs de France;

Pareillement de moy sera,

Je n'en feray qu'à ma plaisance.

BALADE.

Fortune, vray est vostre compte,

Que quant voz biens donné avez,

Vous les reprenez; mais, c'est honte,

Et don d'enfant, bien le savez;

Ainsi faire ne le devez.

Voz fais vous mectez à l'enchiere,

Chascun ce qu'il en peut, en a,

Et ne vous chault comment tout va,