Poésies de Charles d'Orléans

Grant doubte fais de chose bien certaine;

Incertain suis, et si en vueil jugier;

Ou champs estroit, je jouste à la quintaine;

Non offensé, je me cuide vengier;

Ung pesant faiz me semble tres legier;

Je suis paillart, et contrefay du gent;

Par trop couart, hardy comme un Ogier;

Je gaigne assez, et si n'ay point d'argent.

L'ENVOY.

Prince, je suy siche, pour abregier,

Prodigue aussi, nonchallant, diligent,

Assez subtil, plus simple que bergier,

Je gaigne assez, et si n'ay point d'argent.

BALADE.

(Montbreton et Robertet.)

Je meurs de soif auprès de la fontaine;

Je trouve doulx ce qui doit estre amer;

J'ayme et tiens chier tous ceux qui me font haine,

Je hé tous ceulx que fort je deusse amer;

Je loue ceulx que je deusse blasmer;

Je prens en gré plus le mal que le bien;

Je vois querant ce qu'à trouver je doubte;

Croire ne puis cela que je scay bien;

Je me tiens seur de ce dont plus jay doubte.

Je prens plaisir en ce qui m'est atayne;

Ung peu de chose m'est grant comme la mer;

Je tiens de pres, celle qui m'est loingtaine;

Je garde entier ce que deusse entamer;

Saoul suis, de ce qui me fait affamer;

J'ay largement de tout, et si n'ay rien;

J'oublie ce que plus à cueur je boute;

Ce qui me lasche, me tient en son lien;

Je me tiens seur de ce dont plus j'ay doubte.

Je tiens pour basse chose qui est haultaine;

Je fuis tous ceulx que deusse reclamer,

Je croy plus tart le vray qu'une fredaine;

Tant plus suis froit, plus me sens enflamer;

Quant j'ay bon cueur, lors je prens à pasmer;

Ce que j'aquiers, je ne tiens pas pour mien;

Je prise peu ce qui bien chier me couste;

Sote maniere m'est plus que beau maintien;

Je me tiens seur de ce dont plus j'ay doubte.

L'ENVOY.

Prince, j'ay tout, et si ne scay combien;

J'atire à moy ce qui plus me deboute;

Ce que j'esloigne, m'est plus pres qu'autre rien;

Je me tiens seur de ce dont plus j'ay doubte.

BALADE.

Je meurs de soif aupres de la fontaine;

Verbe normal, sans conjugacion:

Congruité, de incongruité plaine;

Declinable, sans declinacion;

Approprié par appellation;

Determiné, sans quelque terminance;

Ou brief, ou long, sans variacion;

C'est plus fort fait, que ouvrer par ignorance.

Mat et vaincu, je frape la quintaine;

Sans violance je fois invasion;

Affirmatif d'une chose incertaine;

Silogisant sans proposicion;

Meuf figure où n'a conclusion;

Emptimeme sans quelque consequance;

Convertible où n'a conversion;

C'est plus fort fait, que ouvrer par ignorance.

J'ayme repos, et desire la paine;

Corruptible en generacion;

Le vray au faulx je duis et ramaine;

De maxime je fois oppinion;

Diffiment je fois descripcion,

Et l'accident je mue en substance;

Aveugle suis en clere vision;

C'est plus fort fait, que ouvrer par ignorance.

L'ENVOY.

Incomplexif, ayant complexion;

Irregulier, je suis de l'observance;

Je suis actif, designant passion;

C'est plus fort fait, que ouvrer par ignorance.

BALADE.

(Maistre Berthault de Villebresme.)

Je meurs de soif aupres de la fontaine;

Tout affamé, en mengier sumptueulx;

Comblé de dueil, en liesse haultaine;

Sec et brahaing, en pays fructueux;

Loing de vertuz, entre les vertueux;

Entre joyeux, plaintif et souspirant;

En lieu de bien, de mal affectueux;

Et va mon fait tousjours en empirant.

Entre tous biens je suis de mal quintaine;

Alangoré, entre les vigoreux;

Entre esbanoys, de regret cappitaine;

Amertume, entre les doulcereux;

Tremblant de froit en manoir chalereux;

En grant santé, tousjours mal endurant;

Entre courtois, despit et rigoreux;

Et va mon fait tousjours en empirant.

Forvoyé suis par hanter voye certaine,

Et avoyé, en lieux avantureux;

Ma nacion m'est region lointaine;

En lieu tres seur, je suis tres fort paoureux;

Espris d'amour, sans estre amoureux;

La lerme a l'ueil, je me vois deduisant;

Tout me desplaist, sans estre dangereux;

Et va mon fait tousjours en empirant.

L'ENVOY.

Prince, cesser fay le mal qui m'actaine,

Ou autrement je m'en iray mourant,

Car je suis pres d'avoir fievre quartaine,

Et va mon fait toujours en empirant.

BALADE.

(Maistre Jehan Caillau.)

Je meurs de soif aupres de la fontaine;

Tremblant de froit ou feu des amoureux;

Je suis tout sain en langueur et enpaine;

Et suis asseur, où tout est dangereux;

Tout mal, tout grief, m'est doulx et savoureux;

Plain de tourment, mene joyeuse vie,

Et ce qui plaist à tous, ne me plaist mie;

En povreté, je suis tres richement;

En engoisse, j'ay plaisance assovye;

Or jugiez donc se je vis plaisamment.

Je suis joyeulx sans plaisance mondaine;

Où chascun rit, pensif et douloreux;

Sans nul travail, si suis je hors d'alaine;

Pres de tout bien, suis le tres langoreux;

Ce qui me plaist, est aspre et rigoreux;

J'ayme estre seul, et si vueil compaignie;

Je dors assez, et suis en frenesie;

En desespoir j'ay grand allegement;

Ce qui est doulx, m'est plus amer que suye;

Or jugiez donc se je vis plaisamment.

Je suis seigneur sans terre et sans demaine;

Tant plus ay biens, et plus suis maleureux;

Je meurs de fain, et ay ma grange plaine;

Où tout est seur, si suis je tres paoureux;

Des plus vaillans et moins chevalereux;

Qui mal me fait, je lui rens courtoisie;

S'il fait beau temps, je demande la pluye;

Se je meurs tost, si vis je longuement;

En grant repos, plain de forsenerie;

Or jugez donc si je vis plaisamment.

L'ENVOY.

Prince, mon fait est droicte faerie,

Je bay travail, et le repos m'ennuye;

Maintenant d'un, et tantost autrement;

J'ay tous les jeux, et quicte la partie;

Or jugez donc si je vis plaisamment.

BALADE.

(Gilles des Ourmes.)

Je meurs de soif aupres de la fontaine;

Tremblant de froit ou feu des amoureux;

Je suis joyeulx s'aucun mal me demaine;

Plaintz et souspirs sont mes riz et mes jeux;

Je n'ay santé, sinon quand je me deulx;

Beau temps me plaist, et desire la pluye;

Qui bien me fait, je le tiens mon hayneux;

Or regardez, et jugiez s'il m'ennuye.

Je n'ay repos qu'en doleur et en paine;

J'ayme travail, et si suis paresseux;

Ung mois ne m'est qu'à ung aultre sepmaine,

Et m'est d'advis que le jour dure deux;

Se j'ay nul bien, je m'en tiens maleureux;

Quant j'ayme aucun, force est que je le fuye;

Qui m'est courtois, je lui suis rigoreux;

Or regardez, et jugiez s'il m'ennuye.

J'ay mille maulx, et ma personne est saine;

Plaisirs mondains me sont malencontreux;

Quant je suis seul, lors ung chascun m'actaine;

Rien n'ay asseur, si je n'en suis doubteux;

Gens bien en point me semblent souffreux;

En plain midy j'ay la veue esbluye;

Je n'ayme rien, et si suis convoiteux;

Or regardez, et jugiez s'il m'ennuye.

L'ENVOY.

Sans mot sonner, je dy mon cas piteux;

Je n'ay regret qu'en ce que je ne veulx;

Ce qui est doulx, m'est plus amer que suye;

Quant gens n'ont rien, je vueil mordre sur eulx:

Or regardez, et jugiez s'il m'ennuye.

BALADE.

(Simonnet Caillau.)

Je meurs de soif aupres de la fontaine;

Costé plaisir, mon cueur plaint et souspire;

Tout arresté, sans marchier l'on me maine;

Rempli de deul, vouloir me prent de rire;

En plaisans lieux je n'ay si non martire;

A nul ne suis, et si fault que m'avoue;

Parler scay bien, et ne puis mon cas dire;

Or regardez, se tel homme se joue.

Croire ne vueil, et est chose certaine;

Sans me toucher, je sens que l'on me tire;

En lit bien fait, là ne seuffre que paine;

Le chois ay eu, et est ma part la pire;

Sans avoir riens, j'ay tant qu'il deust suffire;

Qui mal me fait, de cestui la me loue;

Pres des joyeulx, je ne me scay deduire;

Or regardez, se tel homme se joue.

Esgaré suis, et voy la voye plaine;

Où tout est bien, assez treuve à redire;

Sens grant chaleur, ca et là me pourmaine;

Les yeulx bandez, en mirouer me mire;

Loingt de chault feu, je ne cesse de frire;

Tel me flate qui puis me fait la moue;

Ce qui est mien, j'en voy ung autre sire;

Or regardez, se tel homme se joue.

L'ENVOY.

J'ay piez et sens, et ne me scay conduire;

En beau chemin je suis cheut en la boue;

J'ayme estre à part, et compaignie desire;

Or regardez, se tel homme se joue.

BALADE.

En regardant vers le pays de France,

Ung jour m'avint, à Dovre sur la mer,

Qu'il me souvint de la doulce plaisance

Que souloie ou dit pays trouver;

Si commencay de cueur à souspirer,

Combien certes que grant bien me faisoit,

De veoir France que mon cueur amer doit.

Je m'avisay que c'estoit nonsavance,

De telz souspirs dedens mon cueur garder,

Veu que je voy que la voye commence

De bonne paix, qui tous biens peut donner;

Pour ce, tournay en confort mon penser,

Mais non pourtant, mon cueur ne se lassoit

De veoir France que mon cueur amer doit.

Alors chargay, en la nef d'esperance,

Tous mes souhays en leur priant d'aler

Oultre la mer, sans faire demourance,

Et à France de me recommander;

Or nous doint Dieu bonne paix sans tarder,

Adonc auray loisir, mais qu'ainsi soit,

De veoir France que mon cueur amer doit.

L'ENVOY.

Paix est tresor qu'on ne peut trop loer,

Je hé guerre, point ne la doit prisier,

Destourbé m'a longtemps, soit tort ou droit,

De veoir France que mon cueur amer doit.

BALADE.

Priez pour paix, doulce Vierge Marie,

Royne des cieulx, et du monde maistresse,

Faictes prier, par vostre courtoisie,

Saints et sainctes, et prenez vostre adresse

Vers vostre fils, requerrant sa haultesse

Qu'il lui plaise son peuple regarder,

Que de son sang a voulu rachater,

En deboutant guerre qui tout desvoye;

De prieres ne vous vueilliez lasser,

Priez pour paix, le vray tresor de joye.

Priez, prelaz, et gens de saincte vie.

Religieux, ne dormez en peresse,

Priez, maistres, et tous suivans clergie,

Car par guerre fault que l'estude cesse;

Moustiers destruiz sont sans qu'on les redresse,

Le service de Dieu vous fault laisser,

Quant ne povez en repos demourer;

Priez si fort que briefment Dieu vous oye,

L'Eglise voult à ce vous ordonner;

Priez pour paix, le vray tresor de joye.

Priez, princes qui avez seigneurie,

Roys, ducs, contes, barons plains de noblesse,

Gentils hommes avec chevalerie,

Car meschans gens surmontent gentillesse;

En leurs mains ont toute vostre richesse,

Debatz les font en hault estat monter,

Vous le povez chascun jour veoir au cler,

Et sont riches de voz biens et monnoye,

Dont vous deussiez le peuple supporter;

Prier pour paix, le vray tresor de joye.

Priez, peuple qui souffrez tirannie,

Car voz seigneurs sont en telle foiblesse,

Qu'ilz ne pevent vous garder par maistrie,

Ne vous aider en vostre grant destresse;

Loyaux marchans, la selle si vous blesse,

Fort sur le doz chascun vous vient presser,

Et ne povez marchandise mener,

Car vous n'avez seur passage, ne voye,

Et maint peril vous convient il passer:

Priez pour paix, le vray tresor de joye.

Priez, galans joyeulx en compaignie,

Qui despendre desirez à largesse,

Guerre vous tient la bourse degarnie;

Priez, amans, qui voulez en liesse

Servir amours, car guerre, par rudesse,

Vous destourbe de voz dames hanter,

Qui mainteffoiz fait leurs voloirs torner,

Et quant tenez le bout de la courroye,

Ung estrangier si le vous vient oster;

Priez pour paix, le vray tresor de joye.

L'ENVOY.

Dieu tout puissant nous vueille conforter

Toutes choses en terre, ciel et mer,

Priez vers lui que brief en tout pourvoye,

En lui seul est de tous maulx amender;

Priez pour paix, le vray tresor de joye.

BALADES DE PLUSIEURS PROPOS.

(Orléans contre Garancières.

Je, qui suis Dieu des amoureux,

Prince de joyeuse plaisance,

A toutes celles et à ceulx

Qui sont de mon obeissance,

Requier qu'a toute leur puissance

Me viengnent aider et servir,

Pour l'outrecuidance punir

D'aucuns qui, par leur janglerie,

Veulent, par force, conquerir

Des grans biens de ma seigneurie.

Car Garencieres, l'un d'entre eulx,

Si dit en sa folle ventance,

Pour faire le chevalereux,

Qu'avant hyer, par sa grant vaillance,

Lui et son cueur d'une aliance,

Furent devant beaulté courir;

Je ne luy vy pas sans faillir,

Mais croy qu'il soit en resverie,

Car si pres n'oseroit venir

Des grans biens de ma seigneurie.

Il dit qu'il est tant douloreux,

Et qu'il est mort sans recouvrance;

Mais bien seroit il maleureux,

Qui donneroit en ce creance;

On peut veoir que celle penance,

Qu'il lui a convenu souffrir,

N'a fait son visaige pallir,

Ne amaigrir de maladie,

Ainsi se mocque, pour chevir

Des grans biens de ma seigneurie.

L'ENVOY.

Sur tous, me plaist le retenir

Roys des heraulx pour bien mentir;

Cest office je lui octrie,

C'est ce que lui veuil departir

Des grans biens de ma seigneurie.

BALADE.

(Response de Garencieres.)

Cupido, Dieu des amoureux,

Prince de joyeuse plaisance,

Moi, Garancieres, tres soingneux

De vous servir de ma puissance,

Viens devers vous, en obeissance,

Pour vous humblement requerir

Que vous vueilliez faire punir

Ung homme de mauvaise vie.

Qui, contre raison, veult tenir

Le droit de vostre seigneurie.

C'est ung enfant malicieux,

Où nul ne doit avoir fiance,

Car il en a ja plus de deux

Deceues, au pais de France,

Dont vous deussiez prendre vengeance,

Pour faire les autres cremir;

C'est le prince de bien mentir,

Ainsné frere de janglerie,

Qui, contre raison, veult tenir

Le droit de vostre seigneurie.

Oncques Lucifer l'orgueilleux

Ne fist si grant oultrecuidance,

Quant il emprist d'estre envieux

Sur le Dieu de toute puissance;

Il me semble que, par sentence,

Vous le deussiez faire bannir

De vostre court, sans revenir,

Lui et sa faulse compaignie,

Qui, contre raison, veult tenir

Le droit de vostre seigneurie.

L'ENVOY.

Prince, s'on doit avoir vaillance

Pour mentir à grant habondance,

Et pour faulseté maintenir,

Vour verrez icellui venir

A grant honneur, n'en doubtez mie,

Qui, contre raison, veult tenir

Le droit de vostre seigneurie.

BALADE.

En acquictant nostre temps vers jeunesse,

Le nouvel an et la saison jolie,

Plains de plaisir et de toute liesse,

Qui chascun d'eulx chierement nous en prie;

Venuz sommes en ceste mommerie,

Belles, bonnes, plaisans et gracieuses,

Prestz de dancer, et faire chiere lye,

Pour resveiller voz pensées joyeuses.

Or bannissiez de vous toute peresse,

Ennuy, soussy avec merencolie,

Car froit yver, qui ne veult que rudesse,

Est desconfit, et convient qu'il s'enfuye;

Avril et May amainent doulce vie

Avec eulx; pour ce, soyez songneuses

De recevoir leur plaisant compaignie,

Pour resveillier voz pensées joyeuses.

Venus aussi, la tres noble Deesse,

Qui sur femmes doit avoir la maistrie,

Vous envoye de confort à largesse,

Et plaisance de grans biens enrichie,

En vous chargeant que, de vostre partie,

Vous acquictiez sans estre dangereuses;

Aidiez vous veult sans que point vous oublie,

Pour resveiller voz pensées joyeuses.

BALADE.

Bien monstrez, printemps gracieulx,

De quel mestier savez servir,

Car yver fait cueurs ennuieux,

Et vous les faictes resjouir;

Sitost, comme il vous voit venir,

Lui et sa meschant retenue

Sont contrains, et pretz de fuir,

A vostre joyeuse venue.

Yver fait champs et arbres vieulx,

Leurs barbes de neiges blanchir,

Et est si froit, ort et pluvieux,

Qu'empres le feu convient croupir;

On ne peut hors des huis yssir,

Comme ung oisel qui est en mue;

Mais vous faictes tout rajeunir,

A vostre joyeuse venue.

Yver fait le souleil, es cieulx,

Du mantel des nues couvrir;

Or maintenant, loué soit Dieux,

Vous este venu esclersir

Toutes choses et embellir;

Yver a sa peine perdue,

Car l'an nouvel l'a fait bannir,

A vostre joyeuse venue.

BALADE.

Je fu en fleur ou temps passé d'enfance,

Et puis apres devins fruit en jeunesse;

Lors m'abaty de l'arbre de plaisance,

Vert et non meur, Folie, ma maistresse;

Et pour ce la, raison qui tout redresse

A son plaisir, sans tort ou mesprison,

M'a à bon droit, par sa tres grant sagesse,

Mis pour meurir ou feurre de prison.

En ce j'ay fait longue continuance,

Sans estre mis à l'essor de largesse;

J'en suis content, et tiens que sans doubtance,

C'est pour le mieulx, combien que par peresse

Deviens fletry, et tire vers vieillesse;

Assez estaint est en moy le tison

De sot desir, puisqu'ay esté en presse

Mis pour meurir ou feurre de prison.

Dieu nous doint paix, car c'est ma desirance,

Adonc seray en l'eaue de liesse

Tost refreschi, et au souleil de France

Bien nectié du moisy de tristesse;

J'actens bon temps, endurant en humblesse,

Car j'ay espoir que Dieu ma guerison

Ordonnera; pour ce, m'a sa haultesse

Mis pour meurir ou feurre de prison.

L'ENVOY.

Fruit suis d'yver qui a meins de tendresse

Que fruit d'esté, si suis en garnison,

Pour amolir ma trop verde rudesse,

Mis pour meurir ou feurre de prison.

BALADE.

Cueur, trop es plain de folie,

Cuides tu de t'eslongner

Hors de nostre compaignie,

Et en repos te logier;

Ton propos ferons changier,

Soing et Ennuy nous nommons,

Avecques toy demourrons,

Car c'est le commandement

De Fortune qui en serre

T'a tenu moult longuement,

Ou royaume d'Angleterre.

Dy nous, ne cognois tu mie

Que l'estat de prisonnier

Est que souvent lui ennuye,

Et endure maint dangier,

Dont il ne se peut vengier;

Pour ce, nous ne te faisons

Nul tort, se te gouvernons

Ainsi que communement

Sont prisonniers pris en guerre,

Dont es l'un presentement

Ou royaume d'Angleterre.

En lieu de plaisance lye,

Au lever et au couschier

Trouveras merencolie,

Souvent te fera veillier,

La nuit et le jour songier;

Ainsi te guerdonnerons,

Et es fers te garderons;

De soussy et pensement,

Se tu peuz, si te defferre,

Par nous n'auras autrement

Ou royaume d'Angleterre.

BALADE.

Nouvelles ont couru en France,

Par mains lieux, que j'estoye mort;

Dont avoient peu deplaisance

Aucuns qui me hayent à tort;

Autres en ont eu desconfort,

Qui m'ayment de loyal vouloir,

Comme mes bons et vrais amis;

Si fais à toutes gens savoir

Qu'encore est vive la souris.

Je n'ay eu ne mal, ne grevance,

Dieu mercy, mais suis sain et fort,

Et passe temps en esperance

Que paix, qui trop longuement dort,

S'esveillera, et par accort

A tous fera liesse avoir;

Pour ce, de Dieu soient maudis

Ceux qui sont dolens de veoir

Qu'encore est vive la souris.

Jeunesse sur moy a puissance,

Mais Vieillesse fait son effort

De m'avoir en sa gouvernance;

A present faillira son sort,

Je suis assez loing de son port,

De pleurer vueil garder mon hoir;

Loué soit Dieu de Paradis,

Qui m'a donné force et povoir,

Qu'encore est vive la souris.

L'ENVOY.

Nul ne porte pour moy le noir,

On vent meilleur marchié drap gris;

Or tiengne chascun, pour tout voir,

Qu'encore est vive la souris.

BALADE.

Puisqu'ainsi est que vous alez en France,

Duc de Bourbon, mon compaignon tres chier,

Ou Dieu vous doint, selon la desirance

Que tous avons, bien povoir besongner;

Mon fait vous vueil descouvrir et chargier

Du tout en tout, en sens et en folie;

Trouver ne puis nul meilleur messagier,

Il ne faut ja que plus je vous en die.

Premierement, se c'est vostre plaisance,

Recommandez moy, sans point l'oublier,

A ma Dame; ayez en souvenance,

Et lui dictes, je vous pry et requier,

Les maulx que j'ay quant me fault eslongnier,

Maugré mon vueil, sa doulce compaignie;

Vous savez bien que c'est de tel mestier,

Il ne faut ja que plus je vous en die.

Or y faictes comme j'ay la fiance,

Car un amy doit pour l'autre veillier;

Se vous dictes: Je ne scay, sans doubtance,

Qui est celle? vueilliez la enseignier.

Je vous respons qu'il ne vous fault serchier,

Fors que celle qui est la mieulx garnie

De tous les biens qu'on sauroit souhaidier;

Il ne faut ja que plus je vous en die.

L'ENVOY.

Sy ay chargié à Guillaume Cadier

Que, par de la, bien souvent vous supplie;

Souviengne vous du fait du prisonnier,

Il ne faut ja que plus je vous en die.

BALADE.

Mon gracieulx cousin, Duc de Bourbon,

Je vous requier, quant vous aurez loisir.

Que me faictes, par balade ou chancon,

De vostre estat aucunement sentir;

Car quant à moy, saichiez que, sans mentir,

Je sens mon cueur renouveller de joye,

En esperant le bon temps à venir,

Par bonne paix que brief Dieu nous envoye.

Tout crestian qui est loyal et bon,

Du bien de paix se doit fort resjoir,

Veu les grans maulx, et la destruction,

Que guerre fait par tous pays courir;

Dieu a voulu Crestianté punir,

Qui a laissié de bien vivre la voye,

Mais puis apres, il la veult secourir,

Par bonne paix que brief Dieu nous envoye.

Et pour ce la, mon tres chier compaignon,

Vueilliez de vous desplaisance bannir,

En oubliant vostre longue prison,

Qui vous a fait mainte doleur souffrir;

Merciez Dieu, pensez de le servir,

Il vous garde de tous biens grant montjoye,

Et vous fera avoir vostre desir,

Par bonne paix que brief Dieu nous envoye.

L'ENVOY.

Resveilliez vous en joyeulx souvenir,

Car j'ay espoir qu'encore je vous voye,

Et moy aussy en confort et plaisir,

Par bonne paix que brief Dieu nous envoye.

BALADE.

Mon chier cousin, de bon cueur vous mercie,

Des blancs connins que vous m'avez donnez;

Et oultre plus, pour vray vous certiffie,

Quant aux connins, que dictes qu'ay amez,

Ilz sont pour moy, plusieurs ans a passez,

Mis en oubly; aussi mon instrument

Qui les servoit, a fait son testament,

Et est retrait, et devenu hermite;

Il dort tousjours, à parler vrayement,

Comme cellui qui en riens ne prouffite.

Ne parlez plus de ce, je vous en prie,

Dieux ait l'ame de tous les trespassez!

Parler vault mieulx, pour faire chiere lye,

De bons morceaulx et de frians pastez,

Mais qu'ilz soient tout chaudement tastez;

Pour le present, c'est bon esbatement,

Et qu'on ait vin pour nectier la dent;

En char crue mon cueur ne se delicte,

Oublions tout le vieil gouvernement,

Comme cellui qui en riens ne proufite.

Quant Jeunesse tient gens en seigneurie,

Les jeux d'amours sont grandement prisez;

Mais Fortune qui m'a en sa baillie,

Les a du tout de mon cueur deboutez;

Et desormais, vous et moi excusez

De tels esbatz serons legierement,

Car faiz avons nos devoirs grandement

Ou temps passé; vers Amours me tiens quicte,

Je n'en vueil plus, mon cueur si s'en repent,

Comme cellui qui en riens ne proufite.

L'ENVOY.

Vieulx soudoiers avecques jeune gent,

Ne sont prisiez la valeur d'une micte;

Mon office resine plainement,

Comme cellui qui en riens ne proufite.

BALADE.

Dame qui cuidiez trop savoir,

Mais vostre sens tourne en folie,

Et cuidiez les gens decevoir,

Par vostre cautelle jolie;

Qui croirait vostre chiere lie,

Tantost seroit pris en voz las,

Encore ne m'avez vous mie,

Encore ne m'avez vous pas.

Vous cuidiez bien qu'apercevoir

Ne saiche vostre moquerie,

Si fais, pour vous dire le voir;

Et pour ce, chierement vous prie,

Alez jouer de l'escremie

Autre part, car quant en ce cas,

Encore ne m'avez vous mie,

Encore ne m'avez vous pas.

Vous ferez bien vostre devoir,

Se m'atrapez par tromperie;

Car trop ay congneu main et soir

Les faulx tours dont estes garnie,

On vous appelle, fol si fie;

Deportez vous de telz esbas,

Encore ne m'avez vous mie,

Encore ne m'avez vous pas.

BALADE.

(Orléans à Bourgoigne.)

Puisque je suis vostre voisin

En ce pais presentement,

Mon compaignon, frere et cousin,

Je vous requier tres chierement,

Que de vostre gouvernement,

Et estat me faictes savoir,

Car j'en orroye bien souvent,

S'il en estoit à mon vouloir.

Il n'est jour, ne soir, ne matin,

Que ne prie Dieu humblement

Que la paix prengne telle fin,

Que je puisse joyeusement,

A mon desir, prouchainement

Parler à vous, et vous veoir;

Ce seroit tres hastivement,

S'il en estoit à mon vouloir.

Chascun doit estre bien enclin

Vers la paix, car certainement

Elle departira butin

De grans biens à tous largement;

Guerre ne sert que de tourment,

Je la hé, pour dire le voir,

Bannie seroit plainement,

S'il en estoit à mon vouloir.

L'ENVOY.

Va, ma balade, prestement

A Saint Omer, monstrant comment

Tu vas pour moy ramentevoir

Au Duc à qui suis loyaument,

Et tout à son commandement,

S'il en estoit à mon vouloir.

BALADE.

(Responce de Bourgoigne à Orléans)

S'il en estoit à mon vouloir,

Mon maistre et amy sans changier,

Je vous asseure, pour tout voir,

Qu'en vo fait n'auroit nul dangier;

Mais par deca, sans actargier,

Vous verroye hors de prison,

Quicte du tout, pour abregier,

En ceste presente saison.

Se tel don povez recevoir

Par la grace Dieu, de legier

Pourrez tel à paix esmouvoir,

Qui la desire eslongier;

Nul contre n'osera songier,

Car confort aurez bel et bon,

Se Dieu nous veult assoulagier,

En ceste presente saison.

Mectons nous en nostre devoir

Qu'en paix nous puissions herbergier;

Il n'est ou monde tel manoir,

Qui desir a de s'y logier;

Abregeons, sans plus prolongier,

Il en est temps, ou jamais non,

Pour nous de guerre deslogier,

En ceste presente saison.

L'ENVOY.

Or pensons de vous allegier

De prison, pour tout engagier,

Se n'avons paix et union,

Et du tout m'y vueil obligier,

En ceste presente saison.

BALADE.

(Orléans à Bourgoigne.)

Pour le haste de mon passaige

Qu'il me convient faire oultre mer,

Tout ce que j'ay en mon couraige

A present ne vous puis mander;

Mais non pourtant, à brief parler,

De la balade que m'avez

Envoyée, comme savez,

Touchant paix et ma delivrance,

Je vous mercie chierement,

Comme tout vostre entierement,

De cueur, de corps et de puissance.

Je vous envoyerai messaige,

Se Dieu plaist, briefment sans tarder,

Loyal, secret et assez saige,

Pour bien à plain vous informer

De tout ce que pourray trouver

Sur ce que savoir desirez;

Pareillement fault que mectez

Et faictes, vers la part de France,

Diligence soigneusement;

Je vous en requier humblement,

De cueur, de corps et de puissance.

Et, sans plus despendre langaige,

A cours mots, plaise vous penser

Que vous laisse mon cueur en gaige

Pour tousjours, sans jamais faulser;

Si me veuillez recommander

A ma cousine, car croiez

Que en vous deux, tant que vivrez,

J'ay mise toute ma fiance;

Et vostre party loyaument

Tendray, sans faire changement,

De cueur, de corps et de puissance.

L'ENVOY.

Or y perra que vous ferez,

Et se point ne m'oublierez,

Ainsi que j'y ai esperance.

Adieu vous dy presentement,

Tout Bourgongnon sui vrayement,

De cueur, de corps et de puissance.

BALADE.

(Responce de Bourgoigne à Orléans.)

De cueur, de corps et de puissance,

Vous mercie tres humblement

De vostre bonne souvenance,

Qu'avez de moi soingneusement;

Or povez faire entierement

De moy, en tout bien et honneur,

Comme vostre cueur le propose,

Et de mon vouloir soyez seur,

Quoy que nul dye, ne deppose.

Ne mectez point en oubliance

L'estat et le gouvernement

De la noble maison de France.

Qui se maintient piteusement:

Vous saurez tout, quoy et comment;

Je n'en dy plus pour le meilleur,

Mais on en dit tant et expose,

Que c'est à oir grant orreur;

Quoy que nul dye, ne deppose.

Pensez à vostre delivrance,

Je vous en prie chierement;

Car, sans ce, je n'ay esperance

Que nous ayons paix nullement,

On la heit tant mortellement

Que trop peu trouve de faveur,

Ne fera, comme je suppose,

Se ce n'est par vostre labeur,

Quoique nul dye, ne deppose.

L'ENVOY.

Or prions Dieu, par sa doulceur,

Qu'à vous delivrer se dispose,

Car trop avez souffert douleur,

Quoy que nul dye, ne deppose.

BALADE.

(Orléans à Bourgoigne.)

Des nouvelles d'Albion,

S'il vous en plaist escouter,

Mon frere et mon compaignon,

Saichiez qu'à mon retourner,

J'ay esté, deca la mer,

Receu à joyeuse chiere,

Et a fait le Roy passer,

En bons termes, ma matiere.

Je doy estre une saison

Eslargi pour pourchasser

La paix, aussi ma raencon;

Se je puis seurté trouver

Pour aler et retourner,

Il fault qu'en haste la quiere,

Se je vueil brief achever,

En bons termes, ma matiere.

Or, gentil Duc Bourgongnon,

De ce cop vueilliez m'aydier,

Comme mon entencion

Est vous servir et amer,

Tant que vif pourray durer;

En vous ay fiance entiere,

Que m'ayderez à finer,

En bons termes, ma matiere.

L'ENVOY.

Mes amis fault esprouver,

S'ilz vouldront à ma priere,

Me secourir pour mener,

En bons termes, ma matiere.

BALADE.

J'ay tant joué avecques Aage

A la paulme, que maintenant

J'ay quarante cinq, sur bon gaige

Nous jouons, non pas pour neant;

Assez me sens fort et puissant

De garder mon jeu jusqu'à cy,

Ne je ne crains riens que Soussy.

Car Soussy tant me descourage

De jouer, et va estouppant

Les cops que fiers à l'avantage,

Trop seurement est rachassant;

Fortune si lui est aidant,

Mais Espoir est mon bon amy,

Ne je ne crains riens que Soussy.

Vieillesse de douleur enrage,

De ce que le jeu dure tant,

Et dit en son felon langage,

Que les chasses dorenavant

Merchera, pour m'estre nuisant;

Mais ne m'en chault, je la deffy,

Ne je ne crains riens que Soussy.

L'ENVOY.

Se bon eur me tient convenant,

Je ne double, ne tant ne quant,

Tout mon adversaire party,

Ne je ne crains riens que Soussy.

BALADE.

Visaige de baffe venu

Confit en composte de vin,

Menton rongneulx et peu barbu,

Et dessiré comme ung coquin,

Malade du mal saint Martin,

Et aussi ront q'un tonnellet;

Dieu le me sauve ce varlet!

Il est enroué devenu,

Car une pouldre de raisin

L'a tellement en l'ueil feru,

Qu'endormy l'a, comme un touppin;

II y pert chascun matin,

Car il en a chault le touppet;

Dieu le me sauve ce varlet!

Rompre ne sauroit ung festu,

Quant il a pincé un loppin,

Saint Poursain qui l'a retenu

Son chier compaignon et cousin,

Combien qu'ayent souvent hutin,

Quant ou cellier sont en secret;

Dieu le me sauve ce varlet!

L'ENVOY.

Prince, pour aler jusqu'au Rin,

D'un baril a fait son ronssin,

Et ses esperons d'un foret;

Dieu le me sauve ce varlet!

BALADE.

Amour qui tant a de puissance,

Qu'il fait vieilles gens rassoter,

Et jeunes plains d'oultrecuidance,

De tous estas se scet meller;

Je l'ay congneu pieca au cler,

Il ne fault ja que je le nye,

Parquoy dis et puis advouer

Ce n'est fors que plaisant folie.

A droit compter, sans decevance,

Quant ung amant vient demander

Confort de sa dure grevance,

Que vouldroit il faire, ou trouver?

Cela, je ne l'ose nommer;

Au fort, il faut que je le die,

Ce qui fait le ventre lever,

Ce n'est fors que plaisant folie.

Bien scay que je fais desplaisance

Aux amoureux, d'ainsi parler,

Et que j'acquier leur malvueillance;

Mais, s'il leur plaist me pardonner,

Je leur prometz qu'au par aler,

Quant leur chaleur est refroidie,

Ilz trouveront que, sans doubter,

Ce n'est fors que plaisant folie.

L'ENVOY.

Prince, quant ung prie d'amer,

Se l'autre si veult accorder,

Il n'y a plus sans mocquerie,

Laissiez les ensemble jouer,

Ce n'est fors que plaisant folie.

BALADE.

(Orléans à Bourgoigne.)

Beau frere, je vous remercie,

Car aidié m'avez grandement;

Et, oultre plus, vous certiffie

Que j'ay mon fait entierement;

Il ne me fault plus riens qu'argent,

Pour avancer tost mon passaige,

Et pour en avoir prestement,

Mectroye corps et ame en gaige.

Il n'a marchant en Lombardie,

S'il m'en prestoit presentement,

Que ne fusse, toute ma vie,

Du cueur à son commandement;

Et tant que l'eusse fait content,

Demourer vouldroye en servaige,

Sans espargner aucunement,

Pour mectre corps et ame en gaige.

Car se je suis en ma partie,

Et oultre la mer franchement,

Dieu mercy, point ne me soussie

Que n'aye des biens largement;

Et desserviray loyaument

A ceulx qui m'ont, de bon couraige,

Aidié, sans faillir nullement,

Pour mectre corps et ame en gaige.

L'ENVOY.

Qui m'ostera de ce tourment,

Il m'achetera plainement,

A tousjours mes à heritaige,

Tout sien seray, sans changement,

Pour mectre corps et ame en gaige.

BALADE.

(Orléans à Bourgoigne.)

Pour ce que je suis à présent

Avec la gent vostre ennemie,

Il fault que je face semblant,

Faignant que ne vous ayme mie;

Non pourtant, je vous certiffie,

Et vous pry que vueillez penser

Que je seray, toute ma vie,

Vostre loyaument, sans faulser.

Tous maulx de vous je voiz disant,

Pour aveugler leur faulse envie;

Non pourtant, je vous ayme tant,

Ainsi m'aid la Vierge Marie,

Que je pry Dieu qu'il me mauldie,

Se ne trouvez, au par aler,

Que vueil estre, quoy que nul die,

Vostre loyaument, sans faulser.

Gaignez envers moy mal talant,

A celle fin que nul n'espye

Nostre amour, car par ce faisant,

Sauldray hors du mal qui m'anuye;

Mais faictes que bonne foy lye

Nos cueurs, qu'ilz ne puissent muer,

Car mon vouloir vers vous se plye,

Vostre loyaument, sans faulser.

Vous et moy avons maint servant,

Que convoitise fort mestrie;

Il ne fault pas, ne tant ne quant,

Qu'ilz saichent nostre compaignie;

Peu de nombre fault que manye

Noz faiz secrez par bien celer,

Tant qu'il soit temps qu'on me publie

Vostre loyaument, sans faulser.

Tout mon fait saurez plus avant,

Par le porteur en qui me fye;

Il est loyal et bien saichant,

Et se garde de janglerie;

Creez le de vostre partie,

En ce qu'il vous doit raconter,

Et me tenez, je vous en prie,

Vostre loyaument, sans faulser.

L'ENVOY.

Dieu me fiere d'espidimie,

Et ma part es cieulx je renye,

Se jamais vous povez trouver

Que me faigne, par tromperie,

Vostre loyaument, sans faulser.

BALADE.

Par les fenestres de mes yeulx,

Ou temps passé, quant regardoye,

Advis m'estoit, ainsi m'ait Dieux,

Que de trop plus belles voye

Qu'à present ne fais; mais j'estoye

Ravy en plaisir et lyesse,

Es mains de ma Dame Jeunesse.

Or, maintenant que deviens vieulx,

Quant je lis ou livre de joye,

Les lunectes prens pour le mieulx,

Parquoy la lectre me grossoye,

Et n'y voy ce que je souloye;

Pas n'avoye ceste foiblesse,

Es mains de ma Dame Jeunesse.

Jeunes gens vous deviendrez tieulx,

Se vivez et suivez ma voye;

Car aujourduy n'a soubz les cieulx

Qui en aucun temps ne foloye;

Puis fault que raison son compte oye,

Du trop despendu en simplesse,

Es mains de ma Dame Jeunesse.

L'ENVOY.

Dieu en tout, par grace pourvoye,

Et ce qui nicement fourvoye

A son plaisir, en bien radresse

Es mains de ma Dame Jeunesse

BALADE.

Par les fenestres de mes yeulx,

Le chault d'amours souloit passer;

Mais maintenant que deviens vieulx,

Pour la chambre de mon penser,

En esté freschement garder,

Fermées les feray tenir;

Laissant le chault du jour aler

Avant que je les face ouvrir.

Aussi en yver le pluvieux,

Qui vens et broillars fait lever,

L'air d'amour epidimieux

Souvent parmy se vient bouter;

Si fault les pertuis estouper,

Par où pourroit mon cueur ferir,

Le temps verray plus net et cler,

Avant que je les face ouvrir.

Desormais en sains et seur lieux,

Ordonne mon cueur demourer,

Et par Nonchaloir, pour le mieulx,

Mon medicin soy gouverner;

S'Amour à mes huys vient hurter,

Pour vouloir vers mon cueur venir,

Seurté lui fauldra me donner,

Avant que je les face ouvrir.

L'ENVOY.

Amours, vous venistes frapper

Pieca mon cueur, sans menacer;

Or, ay fait mes logis bastir

Si fors que n'y pourrez entrer,

Avant que je les face ouvrir.

BALADE.

Ung jour à mon cueur devisoye,

Qui en secret à moy parloit,

Et en parlant, lui demandoye

Se point d'espargne fait avoit

D'aucuns biens, quant Amour servoit;

Il me dist que tres voulentiers

La vérité m'en compteroit,

Mais qu'eust visité ses papiers.

Quant ce m'eut dit, il print sa voye,

Et d'avecques moy se partoit,

Apres entrer je le voye

En ung comptouer qu'il avoit;

Là deça et delà queroit,

En cherchant plusieurs vieux cayers,

Car le vray monstrer me vouloit,

Mais qu'eust visité ses papiers.

Ainsi, par ung temps l'atendoye,

Tantost devers moy retournoit,

Et me monstra, dont j'euz grant joye,

Ung livre qu'en sa main tenoit,

Ou quel dedens escript portoit

Ses faiz, au long et bien entiers,

Desquelz informer me feroit,

Mais qu'eust visité ses papiers.

Lors demanday se j'y liroye,

Ou se mieulx lire lui plaisoit;

Il dit que trop paine prandroye,

Pourtant à lire commancoit,

Et puis gectoit et assommoit

Le compte des biens et dangiers;

Tout à ung vy que revendroit

Mais qu'eust visité ses papiers.

Lors dy: Jamais je ne cuidoye,

Ne nul autre ne le croiroit,

Qu'en amer, où chascun s'employe,

De proffit n'eust plus grant exploit;

Amours ainsi les gens decoit,

Plus ne m'aura en telz santiers,

Mon cueur bien effacier pourroit,

Mais qu'eust visité ses papiers.

L'ENVOY.

Amours savoir ne me devroit

Mal gré, se blasme ses mestiers,

Il verroit mon gaing bien estroit,

Mais qu'eust visité ses papiers.

BALADE.

En tirant d'Orléans à Blois,

L'autre jour par eaue venoye,

Si rencontray, par plusieurs foiz,

Vaisseaulx, ainsi que je passoye,

Qui singloient leur droicte voye,

Et aloient legierement,

Pour ce qu'eurent, comme veoye,

A plaisir et à gré, le vent.

Mon cueur, penser et moy, nous trois,

Les regardasmes à grant joye,

Et dist mon cueur à basse voie:

Voulentiers en ce point feroye,

De Confort la voille tendroye,

Se je cuidoye seurement

Avoir, ainsi que je vouldroye,

A plaisir et à gré, le vent.

Mais je treuve le plus des mois

L'eaue de Fortune si quoye,

Quant ou bateau du monde vois,

Que, s'avirons d'Espoir n'avoye,

Souvent en chemin demourroye,

En trop grant ennui longuement,

Pour neant en vain actendroye,

A plaisir et à gré, le vent.

L'ENVOY.

Les nefz dont cy devant parloye,

Montoient, et je descendoye

Contre les vagues de tourment;

Quant il lui plaira, Dieu m'envoye,

A plaisir et à gré, le vent.

BALADE.

L'autre jour je fis assembler

Le plus de conseil que povoye,

Et vins, bien au long, raconter

Comment deffié me tenoye;

Comme par lectres monstreroye,

De merancolie et douleur,

Pourquoy conseiller me vouloye

Par les trois estas de mon cueur.

Mon advocat prist à parler,

Ainsi qu'anformé je l'avoye;

Lors vissiez mes amis pleurer,

Quant sceurent le point où j'estoye;

Non pourtant je les confortoye,

Qu'à l'aide de nostre Seigneur,

Bon remede je trouveroye,

Par les trois estas de mon cueur.

Espoir, Confort, Loyal penser,

Que mes chiefs conseillers nommoye,

Se firent fors, sans point doubter,

Se par eulx je me gouvernoye,

De me trouver chemin et voye

D'avoir brief secours de doulceur,

Avecques l'aide que j'auroye

Par les trois estas de mon cueur.

L'ENVOY.

Prince, fortune me guerroye

Souvent à tort, et par rigueur,

Raison veult que je me pourvoye,

Par les trois estas de mon cueur.

BALADE.

(Orléans.)

Bon regime sanitatis

Pro vobis, neuf en mariage,

Ne de vouloirs effrenatis,

Abusez nimis en mesnage;

Sagaciter menez l'ouvrage,

Ainsi fait homo sapiens,

Testibus les phisiciens.

Premierement, caveatis

De c...u trop à oultraige;

Car, se souvent hoc agatis,

Conjunx le vouldra par usaige

Chalenger, velud heritaige,

Aut erit quasi hors du sens,

Testibus les phisiciens.

Oultre plus, non faciatis

Ut Philomena ou boucaige;

Se voz amours habeatis,

Qui siffle carens de couraige

Cantendi, mais monstrez visaige

Joyeulx, et silis paciens;

Testibus les phisiciens.

L'ENVOY.

Prince, miscui en potaige

Latinum et françois langaige,

Docens loyaulx advisemens,

Testibus les phisiciens.

BALADE.

Du regime quod dedistis,

Cognoscens que tres saigement

Me, Monseigneur, docuistis,

Je vous remercie humblement;

Mais d'ainsi faire seurement,

Numquam uxor concordabit,

Hoc mains desbas generabit.

Je ne scay si bien novistis

L'infinie peine et tourement,

In quibus me posuistis,

Se je croy vostre enseignement;

Car tant congnois, s'aucunement

Fais du sourt quando temptabit,

Hoc mains desbas generabit.

Je voy trop bien que dixistis

Ce qu'on doit dire bonnement,

Et qu'aussi me avertistis

De ma santé entierement;

Mais quant je feray autrement,

Le fait d'autres recordabit,

Hoc mains desbas generabit.

L'ENVOY.

Prince, selon mon sentement,

Il fault s'acquiter loyaument;

Quia qui non laborabit,

Hoc mains desbas generabit.

BALADE.

(Maistre Pierre Chevalier.)

Tost est deceu, cuider d'homme oultrageux;

Tost est perdu, avoir mal acquesté;

Tost est vaincu, homme peu courageux;

Tost est reprins, qui fait desloyaulté;

Tost est saoule, apetit degouté;

Tost est lassé amy, de plaisir faire;

Tost despendu, ce qui a chier cousté;

Tost est deffait, qui veult autruy deffaire.

Tost est meschant, qui est enclin à jeux;

Tost renversé, qui est trop hault monté;

Tost est à fol, son parler dommageux;

Tost voions nous l'orgueilleux surmonté;

Tost dit helas, qui se voit tourmenté;

Tost ennuye, ce qu'on ne peut parfaire;

Tost octroie, qui en a voulenté;

Tost est deffait, qui veult autruy deffaire.

Tost est passé, ung plaisir soulageux;

Tost est villain de mesdire apresté;

Tost est baillé, ung mal contagieux;

Tost se tarist, jeunesse et beaulté;

Tost est pensif, qui a necessité;

Tost est paillart, qui le veult contrefaire;

Tost vient l'yver, tost se passe l'esté;

Tost est deffait qui veult autruy deffaire.

L'ENVOY.

Tart est rendu, argent qui est presté;

Tart vient à bien, homme de mal afaire;

Tart deffié, qui est ja conquesté;

Tost est deffait qui veult autruy deffaire.

BALADE.

(Maistre Berthault de Villebresme.)

Tost fût Priam, puissant Roy couronné,

Tost fut destruit et toute sa lignée;

Tost fut Saturne à mal habandonné;

Tost fut Echo en amours refusée;

Tost Leander perit en mer salée;

Tost devia la noble Rosemonde;

Tost fut Dido, d'amours desheritée;

Tost se passe la joye de ce monde.

Tost delaissa Paris, Oenone;

Tost fut Biblis en fontaine muée;

Tost defflora Bacchus, Erigone;

Tost fut Jason ennuyé de Medée;

Tost fut Philis pendue et estranglée;

Tost finerent Guischart et Sigismonde;

Tost print jadis Atropos, Dyopée;

Tost se passe la joye de ce monde.

Tost fut Saul, Roy des Juifz ordonné,

Tost se navra à mort de son espée;

Tost fut Pheton de fouldre environné;

Tost fut ravie Helene en Citharée,

Tost en mourut noblesse inestimée;

Tost fut Hero noyée en mer parfonde;

Tost fut l'amour Piramus expirée;

Tost se passe la joye de ce monde.

L'ENVOY.

Tost envahit fortuné, Hermionne;

Tost fut Progné convertie en haronde;

Tost fut Ithis en pieces tronsonné;

Tost se passe la joye de ce monde.

LECTRE EN COMPLAINTE

Envoyée par Fredet au duc d'Orléans.

Monseigneur, pour ce que scay bien

Que vous avez, de vostre bien,

Autreffoiz pris plaisir à lire

De mes faiz qui ne valent rien,

Dont trop à vous tenu me tien;

Vouloir m'est pris de vous escripre,

Et mon aventure vous dire,

Laquelle conter vous desire;

Car c'est raison que je le face,

Esperant que de mon martire,

Tel conseil qui devra suffire,

Me donnerez de vostre grace.

Il est vray que de par Amours,

Ung jour saint Valentin à Tours,

Fut une grande feste ordonnée,

Et fist assavoir par les cours,

Comme de coustume a tousjours,

Que chascun vint à la journée.

Là eut grant joye demenée,

Et mainte haulte loy donnée;

0Qui fut sans per, choisit adoncques;

Si euz, comme par destinée,

A mon gré la meilleure née

Qui en France se trouvast oncques.

Comme ma Dame, ma maistresse

Et ma terrienne Deesse,

Tousjours la sers, et l'ay servie;

Car il m'a, par deffense expresse,

Commandé lui faire promesse

D'estre sien pour toute ma vie;

Car tant ma pensée a ravie,

Et à la cherir asservie,

Que je ne pourroye, sur m'ame,

D'aultre jamais avoir envie,

Tant feust elle bien assouvie,

Si fort lui a pleu que je l'ame.

Mais ainsi m'en va, que depuis

Qu'à elle donné je me suis,

Je ne peuz avoir bien, ne joye,

Fors que tous maulx et tous Ennuys,

Qui à toute heure, jours et nuys,

Me tourmentent où que je soye,

Tant que ne scay que faire doye;

Et semble, se dire l'osoye,

Qu'ilz ayent tous ma mort jurée;

Se vostre bonté n'y pourvoye,

Force sera que par eulx voye

Finer ma vie maleurée.

Pource que souvent ne la voy,

Le plus que je puis, sur ma foy,

Je ne fais qu'en elle penser;

Savez vous la cause pourquoy?

En esperant que mon ennoy

Se deust aucunement cesser;

Mais il ne me veult delaisser,

Car plus en elle est mon penser,

Et plus de doleur me court seure,

Qui m'est si tres dure à passer,

Que je désire trespasser

Plus de mille foiz en une heure.

Que je sceusse prendre plaisir

En riens qui soit, fors desplaisir,

Las! je ne pourroye loing d'elle;

Car c'est celle que mon desir

M'a fait, pour maistresse choisir,

Comme s'il n'en feust point de telle,

Tout mon bien et mal vient de celle;

Ainsi, comme il plaist à la belle,

Il n'en est qu'à sa voulenté;

Et ne cuidez pas que vous celle

Que ce ne soit celle qu'appelle,

Devant chascun, ma Leauté.

Puisque je l'ame si tresfort,

N'a pas doncques Amours grant tort?

De moy faire tant endurer,

Ou dire fault qu'il soit d'accort,

Que pour trop amer prengne mort,

Ou moy faire desesperer;

Quant pour plaindre, pour souspirer,

Pour mal qu'il me voye tirer,

Il ne m'en a que pis donné;

En ce point me fault demourer,

Car mieulx vault ainsi qu'empirer;

Veez là comment suis gouverné!

Helas! ce qui plus me tourmente,

Et dont fault que plus de dueil sente,

C'est la grant doubte que je fais,

Que je defaille à mon entente,

Et que dutout perde l'actente

De mes tant desirez souhais;

Car je suis seur, plus qu'oncques mais,

Que si par vous ne sont parfais,

User ma vie me fauldra,

En languissant desoresmais;

Comme cil à qui, pour jamais,

Toute plaisance deffauldra.

Et quant devers Amours je viens

Lui compter les maulx que soustiens,

En lui requerant allegance.

Il me respond: Je n'y puis riens,

Mais va t'en au DUC D'ORLÉANS,

Que fors lui, n'en a la puissance;

Fay donc qu'ayes son accointance,

Et te metz en sa bienveillance;

Car, se tu le puis faire ainsi,

Tu ne dois point faire doubtance,

Que de ta dure desplaisance,

Il n'en ait voulentiers merci.

A vous doncques me fault venir,

Et vostre du tout devenir,

Puisque vous avez ce povoir,

Que de moy faire parvenir

Au plus haut bien qui avenir

Me peut jamais, à dire veoir;

Pourquoy il vous plaise savoir,

Que se vous y faictes devoir,

Et voulez à mon fait entendre,

Tellement que je puisse avoir

Celle qui tant me plaist à voir,

Vostre à tousjours je m'iray rendre.

Or n'oubliez pas, Monseigneur,

Vostre tres humble serviteur;

Mais escoutez mes dolans plains,

Desquieulx je vous fais la clameur,

Et vueillez, par vostre doulceur,

Que par vous ilz soient estains,

Car croiez qu'ilz ne sont pas fains,

Ains pires avant plus que mains;

Puis me donnez, de vostre grace,

Je vous en pry à jointes mains,

Tel responce que, soirs et mains,

Tout mon vivant joyeulx me face.

AUTRE LECTRE EN COMPLAINTE

FAISANT RESPONCE AU DIT FREDET.

Fredet, j'ay receu vostre lectre,

Dont vous mercie chierement,

Ou dedens avez voulu mectre

Vostre fait bien entierement;

Fier vous povez seurement

En moy, tout, non pas à demy;

Au besoing congnoist on l'amy.

S'Amour tient vostre cueur en serre,

Ne vous esbahissez en rien;

Il n'est nulle si forte guerre

Qu'au derrain ne s'appaise bien;

Amour le fait, comme je tien,

Pour esprouver mieulx vostre vueil,

Grant joye vient apres grant dueil.

Se vous dictes: Las! je ne puis

Une telle doleur porter;

Je vous respons: Beau Sire, et puis

Vous en voulez vous depporter,

Ou au Dieu d'amours rapporter?

L'un des deux fault, se m'aist Dieux, voire;

Puisqu'il est trait, il le fault boire.

Cuidez vous, par dueil et courroux,

Ainsi gangner vostre vouloir?

Nennil, ce ne sont que coups roux

Qu'Amours met tout en nonchaloir;

De riens ne vous pevent valoir,

Et se les couchez en despense,

Trop remaint de ce que fol pense.

Voulez vous rompre votre teste

Contre le mur? ce n'est pas sens;

Il faut dancer, qui est en feste;

Certes, autre raison n'y sens;

Et pour ce la, je me consens

Que souffrez qu'Amours vous demaine;

Grant bien ne vient jamais sans paine.

Mais de voz doleurs raconter

Faictes bien, ainsi qu'il me semble,

Et les assommer et compter

Devant Amours; car il ressemble

A l'ostellier qui met ensemble,

Et tout dedens son papier couche;

Pour parler est faicte la bouche.

De pieca je fuz en ce point,

Encore pis, loing d'allegence;

Touteffoiz ne vouluz je point,

De moy mesmes, faire vengence;

Mais chauldement, par diligence,

Pourchassay et playday mon fait;

Peu gangne cellui qui se tait.

Et pour ce que la lectre dit

Qu'Amours veult que vers moy tirez,

De moy ne serez escondit,

S'aucune chose desirez

A vostre bien, quant l'escriprez;

Paine mectray, d'entente franche,

Que l'ayez de croq ou de hanche.

Combatez, d'estoc et de taille,

Vostre dure merencolie,

Et reprenez, commant qu'il aille,

Espoir, confort et chiere lie;

De ne vous oublier me lie,

Autant en ce que puis et doy.

Que se me teniez par le doy.

Or retournons à mon propos,

Et ne parlons plus de cecy.

Vray est que je suis en repos

D'amours, mais non pas de Soussy;

Et pour ce, je vous vueil aussy

De me conseiller travailler,

L'ami doit pour l'autre veillier.

Soussy maintient que c'est raison

Qu'il ait sur tous vers moy puissance;

Nonchaloir dit qu'en ma maison,

Vault mieulx qu'il ait la gouvernance,

Car il ramenera Plaisance,

Que Soussy a bannye à tort,

Sans resveillier le chat qui dort.

Soussy respond qu'estre ne peut,

Tant qu'on est ou monde vivant,

Car Fortune partout s'esmeut,

Et est à chascun estrivant,

En tous lieux va mal escrivant,

Et toutes choses met en double;

Elle a beaux yeulx et ne voit goute.

Si ne scay que je doye faire,

Ne lequel d'eulx me laissera;

Car, veu que tousjours j'ay affaire,

Soussy jamais ne cessera,

Mais mon plaisir rabessera,

En quelque place que je voyse;

Bien est aise, qui est sans noyse.

Quant en nonchaloir je m'esbas,

Et desplaisir vueil debouter,

Jamais ne scay parler si bas

Que Soussy ne viengne escouter:

Las! je le doy tant redoubter,

Car à tort souvent me ravalle;

Mais sans mascher fault que l'avalle.

Je ne scay remede quelconques,

Quant ay mis ces choses en poys,

Pour tous deux contenter adoncques,

Fors les faire servir par moys;

Mandez moy sur ce quelquefoys,

Fredet, bon conseil par vostre ame,

Foy que devez à vostre Dame.

RESPONCE DE FREDET AU DUC D'ORLÉANS.

Monseigneur, j'ay de vous receu,

Et aussi de mot à mot leu,

Une lectre qu'il vous a pleu

Moy rescripre, touchant mon fait,

Par laquelle j'ay apperceu

Le bon vouloir qu'avez eu

Vers moy tousjours, qui n'est pas peu,

Dont tout mon dueil avez deffait;

Et oultre plus comme j'ay veu,

Avez voulu que j'aye sceu,

De quoy il ne m'a point despleu,

Ce qui tant vous griefve, ou refait;

Sur quoy, de vous obeir meu,

Non pas ainsi comme il est deu,

Mais du tout au mieulx que j'ay peu,

Mon conseil tel quel vous ait fait:

Vous plaigniez de la rigueur,

Et aigreur,

Que vous fait, par sa fureur,

Et chaleur,

Celluy que nommez Soussy,

Qui sans cause et sans couleur,

Et langueur,

Par son ennuyeux labeur

Et maleur,

Vous tourmente sans mercy;

Dont par force de douleur

Vostre cueur

Est noyé par grant langueur,

Tout en pleur,

Et souvent devient transy;

Puis racontez, Monseigneur,

Quel doulceur,

Nonchaloir, par son bon eur

Et valeur,

Se offre vous faire aussi.

De Soussy vous vueil escripre,

C'est ung tres merveilleux sire,

Et fault dire

Que cellui n'a pas couraige

D'omme saige,

Qui veult qu'avec lui demeure,

Car il ne sert que de nuyre,

Et ne pense, ne desire

Qu'à destruire,

Et fait à chascun dommaige,

Et oultraige;

Ne lui chault qui vive ou meure,

Et fut il seigneur d'empire,

Ou qui que soit, tout fait frire,

Et martire;

Tant qu'il est en son servaige,

Avantaige

N'a nul, je le vous assure,

Mille maulx, tous d'une tire,

Ne lui pevent trop suffire;

Il n'est pire,

Tant fait de tourmenter raige,

Et enraige

Qu'à son gré tout ne demeure.

Soussy toult d'estre joyeulx,

Et fait merencolieux

Par tous lieux,

Et bien souvent furieux,

Tous ceulx où il a puissance;

Par lui les biens gracieux

Deviennent mal gracieux;

Jeunes, vieux,

Tout fait trouver ennuyeux

A qui plaist son accointance;

Puis, par sa grande savance,

Il avance

Autour d'eulx Desesperance

Qui, par ses diz ennuyeux,

Et ses faiz malicieux

Et crueux,

Les met en ceste creance,

Que jamais ilz n'auront mieulx;

Lors sont à tel desplaisance,

Que plus seroit leur plaisance,

Sans doubtance,

Brief mourir qu'estre mais tieulx.

Se les maulx compter vouloye,

Et la puissance en avoye,

Que Soussy vous feroit bien;

Mais à quoy l'entreprendroye?

Car certes je ne sauroye

D'un an vous dire combien,

Et pour ce, à tant je m'en tien;

Et maintenant je revien,

Pour faire vostre vouloir,

A parler, se j'en scay rien,

Du grant aise, du hault bien,

Lequel donne Nonchaloir.

Qui à Nonchaloir s'adresse,

Et tout, pour estre sien, lesse

Et delesse;

En leesse,

Sans que jamais mal le blesse,

Pourra sa vie passer.

Dueil, courroux, soussy, aspresse,

Et tous ceulx de leur promesse,

Soit tristesse,

Ou destresse,

Ou rudesse,

Qui de mains grever ne cesse,

Tous les fait avant passer.

Contre lui n'ont hardiesse;

Il les vaint, par sa sagesse,

Et abesse

Leur duresse,

Leur haultesse;

Nul ose lui faire presse,

N'encontre lui s'amasser,

Car il maine joye en lesse,

Qui le deffent d'eulx sans cesse,

Par prouesse;

Or donc qu'esse?

Est il au monde richesse

Qui sceut ung tel bien passer?

De lui vient plaisante vie

Qui desvie

Dueil, soussy, de toute place,

De repos aise assouvie,

Sans envie

De bien qu'à autruy se face,

Les autres bonnes efface,

Et defface.

Tout est en joye ravye,

Tout fait a joyeuse face,

Dont la grace

De vous a bien desservye.

Nonchaloir, de sa nature,

Lui soit fortune ou non dure,

L'un et l'autre tout endure,

Et prent en gré l'avanture,

Car il ne tient d'ame conte;

Joye, dueil, paix ou murmure,

Gangner, perdre sans mesure,

Soit à tort, ou par droicture,

Tout lui est ung, je vous jure;

Ne lui chault s'il besse ou monte,

Ou se moindre le surmonte,

D'un chascun à son gré compte,

De quanque lui vient n'a honte,

Soit bien ou mal, rien n'en compte,

A tout faire s'avanture,

Autant lui est Roi que Conte,

La cause est, comme il raconte,

Car à nulluy ne rent compte;

Et pour ce, la fin de conte,

Tousjours sa vie en paix dure.

Pourquoy, servir je vous conseille

De nostre maistre Nonchaloir;

Et bannissez, vueille ou non vueille,

Soucy, sans plus vous en chaloir;

De lui mieulx ne povez valoir,

Mais soit hors de vostre memoire;

Qui demande conseil doit croire.

Je vous supply qu'il vous suffise,

Et aussi il ne vous desplaise,

D'une question qu'ay cy mise,

D'un mien amy tres en malaise;

Dont, Monseigneur mais qu'il vous plaise,

Vostre conseil avoir m'en fault;

L'advis de deux mieulx que d'un vault.

Celluy que dy est si espris

D'une tant belle, bonne Dame,

Qu'il ne pourrait estre pris

Tellement si tres fort il ame,

Mais espoir n'a point, sur mon ame,

D'avoir jamais d'elle secours;

Pas n'est en paix qui sert amours.

Que autre Dame, se lui semble,

Qui n'a point de meilleur vivant,

Par le bien qu'en elle s'assemble,

Le vouldroit bien, pour son servant;

Non pourtant il mourrait avant

Que son cueur se peust sien clamer;

Par force l'en ne peut amer.

Et, pour ce, maintenant demande

Qui lui sera moins chose forte?

Celle amer qu'Amours lui commande,

Où toute s'esperance est morte,

Ou l'autre, combien qu'il rapporte

Qu'amer ne la peut, ne desire;

De deulx maulx on prent le moins pire.

Veez là de mon amy le cas,

Auquel fauldroye bien envis;

Mais conseiller ne le puis pas,

Sans en avoir de vous l'advis;

Fait en soit à votre devis,

Monseigneur, car c'est bien raison,

Et à tant fine ma raison.

LA COMPLAINTE DE FRANCE.

France, jadis on te souloit nommer,

En tous pays, le tresor de noblesse,

Car ung chascun povoit en toy trouver

Bonté, honneur, loyaulté, gentillesse,

Clergie, sens, courtoisie, proesse;

Tous estrangiers amoient te suir,

Et maintenant voy, dont j'ay desplaisance,

Qu'il te convient maint grief mal soustenir,

Tres crestien, franc royaume de France.

Seez tu dont vient ton mal, à vray parler?

Congnois tu point pourquoy es en tristesse?

Conter le vueil, pour vers toy m'acquicter,

Escoutes moy, et tu feras sagesse.

Ton grant ourgueil, glotonnie, peresse,

Convoitise, sans justice tenir,

Et luxure, dont as eu habondance,

Ont pourchacié vers Dieu de te punir,

Tres crestien, franc royaume de France.

Ne te vueilles pourtant desesperer,

Car Dieu est plain de mercy, à largesse;

Va t'en vers lui sa grace demander,

Car il t'a fait, de ja pieca, promesse;

Mais que faces ton advocat Humblesse,

Que tres joyeux sera de toy guerir;

Entierement metz en lui ta fiance,

Pour toy et tous, voulu en croix mourir,

Tres crestien, franc royaume de France.

Souviengne toy comment voult ordonner

Que criasses Montjoye, par liesse,

Et, qu'en escu d'azur, deusses porter

Trois fleurs de Lis d'or, et pour hardiesse

Fermer en toy, t'envoya sa haultesse,

L'Auriflamme qui t'a fait seigneurir

Tes ennemis; ne metz en oubliance

Telz dons haultains, dont lui pleut t'enrichir,

Très crestien, franc royaume de France.

En oultre plus, te voulu envoyer

Par un coulomb qui est plain de simplesse,

La unction dont dois tes Roys sacrer,

Afin qu'en eulx dignité plus en cresse;

Et, plus qu'à nul, t'a voulu sa richesse

De reliques et corps sains, departir;

Tout le monde en a la congnoissance,

Soyes certain qu'il ne te veult faillir,

Tres crestien, franc royaume de France.

Court de Romme si te fait appeller

Son bras dextre, car souvent de destresse

L'as mise hors, et pour ce approuver,

Les Papes font te seoir, seul, sans presse,

A leur dextre, se droit jamais ne cesse;

Et pour ce, dois fort pleurer et gemir,

Quant tu desplais à Dieu qui tant t'avance

En tous estas, lequel deusses cherir,

Tres crestien, franc royaume de France.

Quelz champions souloit en toy trouver

Crestienté! Ja ne fault que l'expresse;

Charlemaine, Rolant et Olivier,

En sont tesmoings, pour ce, je m'en delaisse,

Et saint Loys Roy, qui fist la rudesse

Des Sarrasins souvent aneantir,

En son vivant, par travail et vaillance;

Les croniques le monstrent, sans mentir,

Tres crestien, franc royaume de France.

Pour ce, France, vueilles toy adviser,

Et tost reprens de bien vivre l'adresse;

Tous tes meffaiz metz paine d'amander,

Faisant chanter et dire mainte messe

Pour les ames de ceulx qui ont l'aspresse

De dure mort souffert, pour te servir;

Leurs loyaultez ayes en souvenance,

Riens espargnié n'ont pour toy garantir,

Tres crestien, franc royaume de France.

Dieu a les braz ouvers pour t'acoler,

Prest d'oublier ta vie pecheresse;

Requier pardon, bien te vendra aidier

Nostre Dame, la tres puissant princesse,

Qui est ton cry, et que tiens pour maistresse;

Les sains aussi te vendront secourir,

Desquelz les corps font en toy demourance.

Ne vueilles plus en ton pechié dormir,

Tres crestien, franc royaume de France.

Et je, CHARLES DUC D'ORLÉANS, rimer

Voulu ces vers, ou temps de ma jeunesse,

Devant chacun les vueil bien advouer,

Car prisonnier les fis, je le confesse;

Priant à Dieu, qu'avant qu'aye vieillesse,

Le temps de paix partout puist avenir,

Comme de cueur j'en ay la desirance,

Et que voye tous tes maulx brief finir,

Tres crestien, franc royaume de France.

COMPLAINTE.

Amour, ne vous vueille desplaire.

Se trop souvent à vous me plains,

Je ne puis mon cueur faire taire,

Pour la doleur dont il est plains;

Helas! vueillez penser au meins

Aux services qu'il vous a fais,

Je vous en pry à jointes mains,

Car il en est temps, ou jamais.

Monstrez qu'en avez souvenance,

En lui donnant aucun secours,

Faisant semblant qu'avez plaisance

Plus à son bien, qu'à ses doulours;

Ou me dictes, pour Dieu, Amours,

Se le lairrez en cest estat,

Car d'ainsi demourer tousjours,

Cuidez vous que ce soit esbat?

Nennil, car Dangier qui desire

De le mectre du tout à mort,

L'a mis, pour plustost le destruire,

En la prison de Desconfort;

Ne jamais ne sera d'accort

Qu'il en parte par son vouloir,

Combien que trop, et à grant tort,

Longtemps lui a fait mal avoir.

Et pour la tres mauvaise vie

Que lui fait souffrir ce villain,

Il est encheu en maladie,

Car de tout ce qui lui est sain,

A le rebours, j'en suy certain;

En ceste dolente prison,

Ne scay s'il passera demain,

Qu'il ne meure sans guerison.

Car il n'a que poires d'angoisse

Au matin, pour se desjeuner,

Qui tant le refroisdist et froisse,

Qu'il ne peut santé recouvrer;

D'eaue ne lui fault point donner,

Il en a de larmes assez;

Tant a de mal, à vray parler.

Que cent en seroient lassez.

Et n'a que le lit de pensée

Pour soy reposer et gesir;

Mais plaisance s'en est alée,

Qui plus ne le povoit souffrir,

A paine l'a peu retenir,

S'espoir ne feust jusques à cy;

N'a il donc raison, sans mentir?

S'il fait requeste de mercy.

Il porte le noir de tristesse,

Pour reconfort qu'il a perdu,

N'oncques hors des fers de destresse

N'est party, pour mal qu'il ait eu;

Touteffoiz vous avez bien sceu

Qu'à vous s'estoit du tout donné,

Quelque doleur qu'il ait receu,

Et vous l'avez abandonné!

Par m'ame, c'est donner courage

A chascun de voz serviteurs

De vous laisser, s'il estoit sage,

Et querir son party ailleurs;

Car tant qu'aurez telz gouverneurs,

Comme Dangier, le desloyal,

Vous n'aurez que plains et clameurs,

Car il ne fist oncques que mal,

A mon cueur le conseilleroye

Qu'il vous laissast; mais, par ma foy,

Ja consentir ne lui feroye,

Car tant de son vueil j'aperçoy,

Quelque doleur qu'il ait en soy,

Qu'il est vostre par devant tous;

Et, par mon serement, je le croy,

Qu'autre maistre n'aura que vous.

Or regardez, n'est ce merveille?

Qu'il vous aime si loyaument,

Quant toute doleur nompareille

A receu, sans allegement,

Et si le porte lyement,

Pensant que une foiz mieulx sera;

A vous s'en actent seulement,

Ne ja aultrement ne fera.

Si m'a chargié que vous requiere,

Comme pieca vous a requis,

Que vueilliez oir sa priere:

C'est qu'il soit hors de prison mis,

Et Dangier et les siens bannis,

Qui jamais ne vouldront son bien;

Ou au moins qu'aye saufconduis

Qu'ilz ne lui meffacent de rien.

Afin qu'il puist oir nouvelle

De celle dont il est servant,

Et souvent veoir sa beaulté belle;

Car d'autre rien n'est desirant

Que la servir, tout son vivant,

Comme la plus belle qui soit,

A qui Dieu doint de biens autant

Que son loyal cueur en vouldroit.

COMPLAINTE.

Ma seule Dame et ma maîtresse,

Où gist de tout mon bien l'espoir,

Et sans qui, plaisir, ne liesse,

Ne me pevent en riens valoir;

Pleust à Dieu que peussiez savoir

Le mal, l'ennuy et le courrous,

Qu'à toute heure me fault avoir

Pource que je suis loings de vous.

Helas! or ay je souvenance

Que je vous vy derrainement

A si tres joyeuse plaisance,

Qu'il me sembloit certainement

Que jamais ennuyeux tourment

Ne devoit pres de moi venir,

Mais je trouvay bien autrement,

Quant me fallut de vous partir.

Car, quant ce vint au congié prandre,

Je ne savoye, pour le mieulx,

Auquel me valoit plus entendre,

Ou à mon cueur, ou à mes yeulx;

Car je trouvay, ainsi m'aid' Dieux,

Mon cueur courroucié si tres fort

Qu'oncques ne le vy, en nulz lieux.

Si eslongné de reconfort.

Et d'autre part, mes yeulx estoient

En ung tel vouloir de pleurer

Qu'à peine tenir s'en povoient,

N'ilz n'osoient riens regarder;

Car, par ung seul semblant monstrer

En riens d'en estre desplaisans,

C'eust esté pour faire parler

Les jalous et les mesdisans.

Et de la grant paour que j'avoye

Que leur dueil si ne feust congneu,

Auquel entendre ne savoye;

Oncques si esbahy ne fu,

Si dolent, ne si esperdu;

Car, par Dieu, j'eusse mieulx amé,

Avant que l'en l'eust apperecu,

N'avoir jamais jour esté né.

Car, se par ma folle maniere,

J'eusse monstré, ou par semblant

Venant de voulenté legiere,

L'amour dont je vous ayme tant,

Par quoy eussiez eu, tant ne quant,

De blasme, ne de deshonneur;

Je scay bien que tout mon vivant,

Je fusse langui en doleur.

En ce point, et encore pire,

Alors de vous je me party,

Sans avoir loisir de vous dire

Les maulx dont j'estoye party:

Touteffoiz, Belle, je vous dy

Qu'il vous pleust de vouloir penser

Que je vous avoye servi,

Et serviroye sans cesser.

Tant comme dureroit ma vie,

Et, quant de mort seroye pris,

De m'ame seriez servie,

Priant pour vous en Paradis,

S'il en estoit en son devis;

Et mes biens, mon cueur et mon corps,

Je les vous ay du tout soubzmis;

Mais ca esté de leurs accors.

Car il n'est nulle que je clame,

Ne qui se puist nommer, de vray,

Ma seule souveraine Dame,

Fors que vous, à qui me donnay

Le premier jour que regarday

Vostre belle plaisant beaulté,

De qui vray serviteur mourray,

En gardant tousjours loyaulté.

Or vueilliez donc avoir pensée,

Puisque lors j'avoye tel dueil,

Belle tres loyaument amée,

Qu'encore plus grant le recueil,

Maintenant que, contre mon vueil,

Me fault estre de vous loingtains,

Et que veoir ne puis à l'ueil

Voz belles, blanches, doulces mains,

Et vostre beaulté nompareille,

Que veoye si voulentiers,

Plaine de doulceur à merveille,

Dont tous voz faiz sont si entiers,

Qu'ilz ont esté les messaigiers

De me tollir, et pres, et loing,

Mes vouloirs et mes desiriers;

Ainsi m'aid' Dieu à mon besoing.

Si vous supply, tres bonne et belle,

Qu'ayez souvenance de moy;

Car, à tousjours, vous serez celle

Que serviray comme je doy;

Je le vous prometz par ma foy,

Dutout à vous me suis donné;

Se Dieu plaist, je feray pourquoy

J'en seray tres bien guerdonné.

COMPLAINTE.

L'autrier en ung lieu me trouvay,

Triste, pensif et doloreux,

Tout mon fait, bien au long, comptay

Au hault Prince des amoureux,

Lequel m'a esté rigoreux,

Ou temps que mon cueur le servoit;

Et, ainsi qu'il me respondoit,

Souvenir, qui fut au plus pres,

Ses ditz et les miens escripvoit

En la maniere cy apres:

L'AMANT.

Helas! Amours, de vous me plains;

Mais les griefz maulx le me font faire,

Dont mon cueur et moy sommes plains,

Car trop estes de dur afaire;

S'un peu me fussiez debonnaire,

Espoir, que j'ay du tout perdu,

Si me seroit tantost rendu;

Mais pas n'avez tel vostre vueil,

Aincois, par vous m'est deffendu

Plaisant desir et bel acueil.

AMOURS.

Amours respond: A trop grand tort

Vous complaignez, et sans raison,

Car, envers chascun, Reconfort

N'est pas tousjours en sa saison;

Et, si savez qu'en ma maison,

Une coustume se maintient,

C'est assavoir que qui se tient

Pour serviteur de mon hostel,

Mainteffoiz souffrir lui convient;

L'usaige de mes gens est tel.

L'AMANT.

Certes, Sire, vous dictes vray;

Mais l'ordonnance riens ne vault,

Parler en puis, car bien le scay,

Et ay dancié à ce court sault;

Parquoy je congnois le deffault

De doulx plaisir que l'en y a;

Car, quant mon cueur vous depria

Secours, il lui fust escondit,

Adoncques, de dueil regnya

Vostre povoir, et s'en partit.

AMOURS.

Dea! beaulx amis, se dit Amours,

Celui qui a servir se met,

S'il veult avoir tantost secours,

Et le guerdon qu'on lui promet,

Ou autrement, il se desmet

Du service qu'il a empris;

De Loyaulté seroit repris,

Quand je tendray mon jugement,

Et si perdroit tous los et pris,

Sans jamais nul recouvrement.

L'AMANT.

Voire, Sire doit on servir

Sans prouffit, ou guerdon avoir?

Nennil, ung cueur devroit mourir,

Puisqu'il a fait loyal devoir,

Entierement à son povoir,

Et qu'il lui fault querir son pain;

A vous, qui estes souverain,

En est le plus de deshonneur,

Veu que, par faulte, meurt de fain

Vostre bon loyal serviteur.

AMOURS.

Qu'on meure de fain ne vueil pas,

Mais le trop haste s'echaulda,

Il convient aler pas à pas;

Et puis apres on congnoistra,

Qui mieulx son devoir fait aura,

Alors doit estre guerdonné.

Je suis assez abandonné,

A grant largesse, de mes biens;

Mais quant j'ay mainteffoiz donné

A plusieurs, semble qu'ilz n'ont riens.

L'AMANT.

De ceulx ne suis, quant est à moy,

Sur ce, je respons à briefz motz:

Je vous asseure, par ma foy,

Oncques ne fuz en ce propos,

J'ay tousjours porté sur mon dos,

Paine, travail à grant planté,

Ne nulle chose n'ay hanté,

Dont on dye qu'aye failly,

Combien qu'en dueil m'aiez planté,

Comme faint seigneur et amy.

AMOURS.

Estre mon maistre vous voulez,

Par vostre parler ce me semble,

Et grandement vous me foulez;

Mais l'estrif de nous deux ensemble,

Comme en peust cognoistre, ressemble

Au desbat du verre et du pot;

Fain avez qu'on vous tiengne à sot;

Devant Raison soit assigné,

Se j'ay tort, paier vueil l'escot,

Quand le desbat sera finé.

L'AMANT.

Il fault que le plus foible doncques

Soit tousjours gecté soubz le pié,

Ne je ne vy autrement oncques,

Rendre se fault, qui n'a traictié.

J'ay congneu, où j'ay peu gaingnié,

Vostre court, à mont et à val,

Et, soit à pié, ou à cheval,

On n'y scet trouver droit chemin;

Quoiqu'on y trouve bien, ou mal,

Il fault tout partir à butin.

AMOURS.

Pour le present, plus n'en parlons;

Puisque j'ay puissance sur tous,

Quelque chose que debatons,

A mon plaisir feray de vous;

Ne me chault de vostre courrous,

Ne de chose que l'en me dye,

Se je vous ay fait courtoisie,

Se vous voulez, prenez l'en gré;

Car le premier vous n'estes mie

Qu'ay courcié en plus grant degré.

CHANCON.

Ce May qu'amours pas ne sommeille,

Mais fait amans esliesser,

De riens ne me doy soussier,

Car pas n'ay la pusse en l'oreille;

Ce n'est mie doncques merveille

Se je vueil joye demener,

Ce May, etc.

Mais fait, etc.

Quant je me dors, point ne m'esveille,

Pour ce que n'ay à quoy penser,

Sy ay vouloir de demourer

En ceste vie nompareille.

Ce May, etc.

CHANCON.

Tiengne soy d'amer qui pourra,

Plus ne m'en pourroye tenir,

Amoureux me fault devenir,

Je ne scay qu'il m'en avendra;

Combien que j'ay oy, pieca,

Qu'en amours fault mains maulx souffrir.

Tiengne soy, etc.

Plus ne, etc.

Mon cueur devant yer accointa

Beaulté qui tant le scet chierir,

Que d'elle ne veult departir;

C'est fait, il est sien et sera.

Tiengne soy d'amer, etc.

CHANCON.

Quelque chose que je die

D'Amour, ne de son povoir,

Touteffoiz, pour dire voir,

J'ay une Dame choisie,

La mieulx en bien acomplie

Que l'en puist jamais veoir.

Quelque chose, etc.

D'amour, ne, etc.

Mais à elle ne puis mie

Parler, selon mon vouloir,

Combien que, sans decevoir,

Je suis sien toute ma vie.

Quelque chose, etc.

CHANCON.

N'est elle de tous biens garnie?

Celle que j'ayme loyaument;

Il m'est advis, par mon serement,

Que sa pareille n'a en vie.

Qu'en dites vous? je vous en prie,

Que vous en semble vrayement?

N'est elle, etc.

Celle que, etc.

Soit qu'elle dance, chante ou rie,

Ou face quelque esbatement;

Faictes en loyal jugement,

Sans faveur ou sans flatterie.

N'est elle, etc.

CHANCON.

Quant j'ay nompareille maistresse

Qui a mon cueur entierement,

Tenir me vueil joyeusement,

En servant sa gente jeunesse.

Car certes je suis en l'adresse

D'avoir de tous biens largement,

Quant j'ay, etc.

Qui a mon, etc.

Or en ayent dueil ou tristesse

Envieux, sans allegement;

Il ne m'en chault, par mon serement,

Car leur desplaisir m'est liesse,

Quant j'ay, etc.

CHANCON.

Dieu, qu'il l'a fait bon regarder!

La gracieuse, bonne et belle;

Pour les grans biens qui sont en elle,

Chascun est prest de la louer.

Qui se pourroit d'elle lasser?

Tousjours sa beaulté renouvelle.

Dieu qu'il, etc.

La gracieuse, etc.

Par deca, ne dela la mer,

Ne scay Dame, ne Damoiselle

Qui soit en tous biens parfais, telle;

C'est ung songe que d'y penser.

Dieu qu'il, etc.

CHANCON.

Par Dieu, mon plaisant bien joyeux,

Mon cueur est si plain de leesse,

Quant je voy la doulce jeunesse

De vostre gent corps gracieux,

Pour le regart de voz beaux yeulx

Qui me met hors de tristesse.

Par Dieu, etc.

Mon cueur, etc.

Combien que parler envieux

Souventeffoiz moult fort me blesse,

Mais ne vous chaille, ma maistresse,

Je n'en feray pourtant que mieulx.

Par Dieu, etc.

CHANCON.

Que me conseilliez vous, mon cueur,

Irai je par devers la belle?

Lui dire la paine mortelle

Que souffrez pour elle en doleur.

Pour vostre bien et son honneur,

C'est droit que vostre conseil celle.

Que me, etc.

Irai je, etc.

Si plaine la scay de doulceur,

Que trouveray mercy en elle,

Tost en aurez bonne nouvelle,

Cy vois n'est ce pour le meilleur.

Que me, etc.

CHANCON.

Ou regard de voz beaulx, doulx yeulx,

Dont loing suis par les envieux,

Me souhaide si tres souvent,

Que mon penser est seulement

En vostre gent corps gracieux.

Savez pourquoy, mon bien joyeulx,

Celle du monde qu'ayme mieulx

De loyal cueur, sans changement?

Ou regart, etc.

Dont loing, etc.

Me souhaide, etc.

Pour ce que vers moy en tous lieux

J'ay trouvé plaisir ennuieux,

Trop fort puis le departement

Que de vous fis derrainnement,

A regret merencolieux.

Ou regart, etc.

CHANCON.

Qui la regarde de mes yeulx,

Ma Dame, ma seule maistresse,

En elle voit, à grant largesse,

Plaisirs croissans de bien en mieulx.

Son parler et maintien sont tieulx

Qu'ilz mectent un cueur en liesse.

Qui la regarde, etc.

Ma Dame, etc.

Tous la suient, jeunes et vieulx,

Dieu scet qu'elle n'est pas sans presse;

Chascun dit: C'est une deesse

Qui est descendue des cieulx.

Qui la regarde, etc.

CHANCON.

Ce mois de May, nompareille Princesse,

Le seul plaisir de mon joyeulx espoir,

Mon cueur avez, et quanque puis avoir,

Ordonnez en comme dame et maistresse.

Pour ce, requier vostre doulce jeunesse

Qu'en gré vueille mon present recevoir.

Ce mois, etc.

Le seul, etc.

Et vous supply, pour me tollir tristesse,

Tres humblement, et de tout mon povoir,

Qu'à m'esmayer ayez vostre vouloir,

D'un reconfort bien garny de liesse.

Ce mois, etc.

CHANCON.

Commandez vostre bon vouloir

A vostre tres humble servant,

Il vous sera obeissant

D'entier cueur, et loyal povoir.

Prest est de faire son devoir,

Ne l'espargnez ne tant, ne quant.

Commandez, etc.

A vostre, etc.

Mectez le tout à nonchaloir,

Sans lui estre jamais aydant.

S'en riens le trouvez refusant,

Essayez se je vous dy voir.

Commandez, etc.

CHANCON.

Espoir, confort des maleureux,

Tu m'estourdis trop les oreilles

De tes promesses nompareilles,

Dont trompes les cueurs doloreux,

En amusant les amoureux,

Et faisant baster aux corneilles.

Espoir, confort, etc.

Tu m'estourdis, etc.

Ne soies plus si rigoreux,

Mieux vault qu'à raison te conseilles,

Car chascun se donne merveilles,

Que n'as pitié des langoreux.

Espoir, confort, etc.

CHANCON.

Belle, se c'est vostre plaisir

De me vouloir tant enrichir

De reconfort et de liesse,

Je vous requier, comme maistresse,

Ne me laissiez dutout mourir;

Car je n'ay vouloir, ne desir,

Fors de vous loyaument servir,

Sans espargnier dueil, ne tristesse.

Belle, etc.

De me, etc.

De reconfort, etc.

Et s'il vous plaist à l'accomplir,

Vueilliez tant seulement bannir

D'avec vostre doulce jeunesse,

Dolent refus qui trop me blesse,

Dont bien vous me povez guerir,

Belle, etc.

CHANCON.

Paix ou tresves, je requier desplaisance;

S'en toy ne tient, pas ne tendra à moy,

Que ne soyons desormais en requoy;

Accordons nous, chargons en Esperance.

Que gaignes tu à me faire grevence?

Assez me metz en devoir sur ma foy.

Paix ou tresves, etc.

S'en toy ne tient, etc.

Ou combatons tellement à oultrance

Que l'un die: Je me rens ou ren toy;

Mieulx estre mort je vueil, s'estre le doy,

Qu'ainsi languir, d'offrir premier m'avance.

Paix ou tresves, etc.

CHANCON.

Rafreschissez le chastel de mon cueur

D'aucuns vivres de joyeuse plaisance,

Car faulx Dangier, avec son aliance,

L'a assiegé tout entour de doleur.

Se ne voulez le siege sans longueur

Tantost lever, ou rompre par puissance,

Rafreschissez, etc.

D'aucuns, etc.

Ne souffrez pas que Dangier soit seigneur,

En conquestant soubz son obeissance

Ce que tenez en vostre gouvernance;

Avancez vous, et gardez vostre honneur.

Rafreschissez, etc.

CHANCON.

Se je fois loyalle requeste,

Soing et Soucy, et bon vous semble,

Pour Dieu, accordons nous ensemble;

Qui tort a soit mis en enqueste.

Quant vous, ne moy bien n'y aqueste,

Pour jugier droit conseil asemble.

Se je fois, etc.

Soing et Soussy, etc.

Je ne requier aultre conqueste

Que d'Espoir qui larron ressemble,

Et sans cause de mon cueur s'emble,

Dieu me secoure en cette queste!

Se je fois, etc.

CHANCON.

Se ma doleur vous savies,

Mon seul joyeux pensement,

Je scay bien certainement

Que mercy de moy auries.

Du tout refus banniries,

Qui me tient en ce tourment.

Se ma, etc.

Mon seul, etc.

Et le don me donneries,

Que vous ay requis souvent,

Pour avoir allegement;

Ja ne m'en escondiries,

Se ma, etc.

CHANCON.

Ne hurtez plus à l'uis de ma pensée,

Soing et Soucy, sans tant vous traveiller,

Car elle dort, et ne veult s'esveiller,

Toute la nuit en paine a despensée.

En dangier est, s'elle n'est bien pensée,

Cessez, cessez, laissez la sommeiller.

Ne hurtez plus, etc.

Soing et soussy, etc.

Pour la guerir Bon espoir a pensée

Medicine qu'a fait appareiller;

Lever ne peut son chief de l'oreiller,

Tant qu'en repos se soit recompensée.

Ne hurtez plus, etc.

CHANCON.

Ma seule, plaisant, doulce joye,

La maistresse de mon vouloir,

J'ay tel desir de vous veoir,

Que mander ne le vous sauroye.

Helas! pensez que ne pourroye

Aucun bien, sans vous, recevoir.

Ma seule, etc.

La maistresse, etc.

Car, quant desplaisir me guerroye

Souventeffoiz, de son povoir,

Et je vueil reconfort avoir,

Esperance vers vous m'envoye.

Ma seule, etc.

CHANCON.

L'un ou l'autre desconfira

De mon cueur et merencolie;

Auquel que fortune s'alye,

L'autre je me rens lui dira.

D'estre juge me suffira,

Pour mectre fin en leur folye.

L'un ou l'autre, etc.

De mon cueur, etc.

Dieu scet comment mon cueur rira,

Se gangne, menant chiere lye,

Contre ceste saison jolye,

On verra comment en yra.

L'un ou l'autre, etc.

CHANCON.

Je ne vueil plus riens que la mort,

Pource que yoy que reconfort

Ne peut mon cueur eslyesser;

Au moins me pourray je vanter

Que je souffre doleur à tort.

Car puisque n'ay d'Espoir le port,

D'Amours ne puis souffrir l'effort.

Ne doy je donc joye laisser?

Je ne, etc,

Pource que, etc.

Ne peut, etc.

Au Dieu d'amours je m'en rapport

Qu'en peine suis bouté si fort,

Que povoir n'ay plus d'endurer,

S'en ce point me fault demourer;

Quant est de moy, je m'y accort.

Je ne, etc.

CHANCON.

Qui? quoy? comment? à qui? pourquoi?

Passez, presens, ou avenir,

Quant me viennent en souvenir,

Mon cueur en penser n'est pas coy.

Au fort, plus avant que ne doy,

Jamais je ne pense en guerir.

Qui? quoy? etc.

Passez, etc.

On s'en peut rapporter à moy

Qui de vivre ay eu beau loisir,

Pour bien aprendre et retenir,

Assez ay congneu, je m'en croy.

Qui? quoy? etc.

CHANCON.

Belle que je cheris et crains,

En cest estat suis ordonné,

Que Dangier m'a emprisonné

De vostre grant beaulté loingtains;

N'il ne m'a de tous biens mondains

Qu'un souvenir abandonné.

Belle que je, etc.

En cest estat, etc.

Mais de nulle riens ne me plains,

Fors qu'il ne m'a tost raenconné;

Car bien lui seroit guerdonné,

Si j'estoye hors de ses mains.

Belle que je, etc.

CHANCON.

Je prens en mes mains voz debas

Desormais, mon cueur et mes yeulx,

Se longuement vous seuffre tieulx,

Moy mesmes de mon tour m'abas.

Pour vostre prouffit me combas,

Le desirant de bien en mieulx.

Je prens en, etc.

Desormais, etc.

Quant voz desirs souvent rabas

Desordonnez, en aulcuns lieux,

Mon devoir fais, ainsi m'aid' Dieux.

Passons temps en plus beaulx esbas.

Je prens en, etc.

CHANCON.

Ma Dame, tant qu'il vous plaira

De me faire mal endurer,

Mon cueur est prest de le porter,

Jamais ne le refusera.

En espérant qu'il guerira,

En cest estat veult demourer.

Ma Dame, etc.

De me, etc.

Une fois pitié vous prendra,

Quant seulement vouldrez penser,

Que c'est pour loyaument amer

Vostre beaulté qu'il servira

Ma Dame, etc.

CHANCON.

Mon cueur se combat à mon ueil,

Jamais ne les trouve d'accort;

Le cueur dit que l'ueil fait rapport

Que tousjours lui accroist son dueil.

La verité savoir j'en vueil,

Que semble il qui ait le tort?

Mon cueur, etc.

Jamais ne les, etc.

Se je trouve que Bel acueil

Ait gecté entre eulx aucun sort,

Je la condampneray à mort;

Doy je souffrir un tel orgueil?

Mon cueur, etc.

CHANCON.

De la regarder vous gardez

La belle que sers ligement,

Car vous perdrez soudainement

Vostre cueur, se la regardez;

Se donner ne le lui voulez

Clignez les yeulx hastivement,

De la regarder, etc.

La belle que, etc.

Les biens que Dieu lui a donnez,

Emblent un cueur subtilement;

Sur ce, prenez avisement,

Quant devant elle vous vendrez.

De la regarder, etc.

CHANCON.

Tant que Pasques soient passées,

Se nous avons riens trespassé.

Prions mercy du tems passé,

Et pour les ames trespassées.

Chascun pas à pas ses passées

Face, avant que soit trespassé.

Tant que, etc.

Se nous, etc.

Foleur a fait grandes passées,

Mains cueurs ont tout oultre passé;

Pour ce, par nous soit compassé

D'eschever faultes compassées.

Tant que, etc.

CHANCON.

Puisque je ne puis eschapper

De vous, courroux, dueil et tristesse,

Il me convient suir l'adresse

Telle que me vouldrez donner.

Povoir n'ay pas de l'amender,

Car douleur est de moy maistresse.

Puisque je ne, etc.

De vous, etc.

Si manderay par ung penser

A mon las cueur vuit de liesse,

Qu'il prengne en gré sa grant destresse,

Car il lui fault tout endurer.

Puisque je ne, etc.

CHANCON.

Sans ce, le demourant n'est rien;

Qu'esse? je le vous ay à dire,

N'enquerez plus, il doit suffire,

C'est conseil que tres segret tien.

Pourtant n'y entendez que bien,

Autrement je ne le desire.

Sans ce, etc.

Qu'esse? etc.

S'ainsi m'esbas ou penser mien,

Et mainte chose faiz escripre

En mon cueur, pour le faire rire;

Tout ung est mon fait, et le sien.

Sans ce, etc.

CHANCON.

C'est fait, il n'en fault plus parler,

Mon cueur s'est de moy departy;

Pour tenir l'amoureux party,

Il m'a voulu abandonner.

Riens ne vault m'en desconforter,

Ne d'estre dolent ou marry.

C'est fait, etc.

Mon cueur, etc.

De moy ne se fait que mocquer;

Quant piteusement je lui dy,

Que je ne puis vivre sans luy,

A paine me veult escouter.

C'est fait, etc.

CHANCON.

Assez pourveu, pour de cy à grant piece,

Et plus qu'assez, de penser et anuy,

Je me treuve sans congnoistre nulluy.

Qui se vente d'en avoir telle piece.

Fortune dit, qui tout mon fait despiece,

Que j'endure comme maint aujourduy.

Assez pourveu, etc.

Et plus qu'assez, etc.

Pourquoy souvent je mets soubz mon pié ce,

Prenant confort d'espoir, comme celluy

Qui me fye parfaitement en luy,

Ainsi remains qui le croiroit en piece.

Assez pourveu, etc.

RONDEL.

Puisqu'Amour veult que banny soye

De son hostel, sans revenir,

Je voy bien qu'il m'en fault partir,

Effacé du livre de Joye.

Plus demourer je n'y pourroye,

Car pas ne doy ce mois servir.

Puisqu'Amour, etc.

De son hostel, etc.

De Confort ay perdu la voye,

Et ne me veult on plus ouvrir

La barriere de Doulx plaisir,

Par desespoir qui me guerroye.

Puisqu'Amour, etc.

CHANCON.

Ca, venez avant, Esperance,

Or y perra que respondrez,

Et comment vous vous deffendrez;

On se plaint de vous à oultrance.

L'un dit que promectez de loing,

Et qu'en estes bonne maistresse,

L'aultre que faillez au besoing,

En ne tenant gueres promesse.

Quoique tardez, c'est la fiance

Qu'aux faiz de chascun entendrez

Et au derrain guerdon rendrez;

Dy je bien, ou se trop m'avance?

Ca, venez, etc.

RONDEL.

Pour le don que m'avez donné,

Dont tres grant gré vous doy savoir,

J'ay congneu vostre bon vouloir,

Qui vous sera bien guerdonné.

Raison l'a ainsi ordonné,

Bienfait doit plaisir recevoir.

Pour le don, etc.

Dont tres, etc.

Mon cueur se tient emprisonné,

Et obligé, pour dire voir,

Jusqu'à tant qu'ait fait son devoir

Vers vous, et se soit raenconné,

Pour le don, etc.

CHANCON.

Mon cueur, estouppe tes oreilles,

Pour le vent de Merencolie;

S'il y entre, ne doubte mye,

Il est dangereux à merveilles;

Soit que tu dormes ou tu veilles,

Fays ainsi que dy, je t'en prie.

Mon cueur, etc.

Pour le vent, etc.

Il cause doleurs nompareilles,

Dont s'engendre la maladie

Qui n'est pas de legier guerie;

Croy moy, s'à raison te conseilles.

Mon cueur, etc.

CHANCON.

Se j'eusse ma part de tous biens,

Autant que j'ay de loyaulté,

J'en auroye si grant planté

Qu'il ne me fauldroit jamais riens.

Et si gaingneroye des miens,

Ma Dame, vostre voulenté.

Se j'eusse, etc.

Autant que, etc.

Car pour asseuré je me tiens

Que vostre tres plaisant beaulté,

De s'amour me feroit rente,

Maugré Dangier et tous les siens.

Se j'eusse, etc.

CHANCON.

(Philippe de Boulainvilliers.)

Hola, hola, souspir, on vous hoit bien,

Vous vous cuidez embler trop coyement,

Contrefaisant ung peu le cayement;

Grant fain avez qu'on vous die tien,

Vous ne querez que d'ung cueur le soustien,

C'est de tieulx gens tousjours l'esbatement.

Hola, hola, etc.

Vous vous, etc.

Trop vous hastez, de vray, comme je tien,

Car l'on congnoist vostre fait clerement,

Une autreffoiz faictes plus saigement,

Car maintenant vous n'y gangnerez rien.

Hola, hola, etc.

CHANCON.

Pour les grans biens de vostre renommée,

Dont j'oy parler à vostre grant honneur,

Je desire que vous ayez mon cueur,

Comme de moy, tres loyaument amée.

Tresoriere, je vous voy ordonnée

A le garder en plaisance et doulceur.

Pour les, etc.

Dont j'oy, etc.

Recevez le, s'il vous plaist, et agrée,

Du mien ne puis vous donner don meilleur;

C'est mon vaillant, c'est mon tresor greigneur,

A vous l'offre de loyalle pensée.

Pour les, etc.

CHANCON.

(Gilles des Ourmes.)

Hola, hola, souspir, on vous oyt bien,

C'est à ung sourt à qui il le fault faire,

Retrayez vous, et pensez de vous taire,

Car Dangier oit si cler qu'il n'y fault rien;

Se d'aventure il vous oyt, je vous tien

Pour rué jus, car c'est vostre adversaire.

Hola, hola, etc.

C'est à ung, etc.

Ne saillez plus, actendez aucun bien,

Vous voulez vous, de vous mesmes deffaire?

Prenez conseil, quant c'est pour vostre affaire,

Et pour le mieulx, croyez sans plus le mien.

Hola, hola, etc.

CHANCON.

En songe, souhaid et pensée

Vous voy chascun jour de sepmaine,

Combien qu'estes de moy loingtaine,

Belle, tres loyaument amée,

Pour ce qu'estes la mieulx parée

De toute plaisance mondaine.

En songe, etc.

Vous voy, etc.

Dutout vous ay m'amour donnée,

Vous en povez estre certaine,

Ma seule Dame, souveraine,

De mon las cueur moult desirée.

En songe, etc.

CHANCON.

Aidez ce povre cayement

Souspir, je le vous recommande;

De vous, quant ausmone demande,

Ne se parte meschantement.

Son cas monstre piteusement,

Il semble que la mort actende.

Aidez ce povre, etc.

Souspir, je le, etc.

Donnez lui assez largement,

Qu'il ne meure, Dieu l'en deffende,

Affin que n'en faictes amende,

Au jour d'amoureux jugement.

Aidez, etc.

CHANCON.

De leal cueur, content de joye,

Ma maistresse, mon seul desir,

Plus qu'oncques vous vueil servir,

En quelque place que je soye;

Tout prest en ce que je pourroye,

Pour vostre vouloir acomplir.

De leal, etc.

Ma maistresse, etc.

En desirant que je vous voye,

A vostre honneur, et mon plaisir

Qui seroit briefment, sans mentir,

S'il fust ce que souhaideroye.

De leal, etc.

CHANCON.

En faulte du logeis de Joye,

L'ostellerie de Pensée

M'est par les fourriers ordonnée,

Ne scay combien fault que je y soye.

Autre part ne me bouteroye,

Content m'en tien, et bien m'agrée.

En faulte, etc.

L'ostellerie, etc.