La guirlande de Julie: augmentée de documents nouveaux
IE fus vn Berger, autres fois,
Qui, poussé d'vne belle audace,
Alla cueillir dessus Parnasse
Des lauriers plus fameux que les lauriers des Roys.
Ce genereux desir d'vne éternelle gloire
Ne m'empécha pas de seruir
Auec les Filles de Mémoire
Les mortelles beautez qui me sceurent rauir.
Mais mon âme fut si volage,
A tant d'obiets diuers elle rendit hommage,
Et les bergeres si souuent,
En me reprochant leurs caresses,
Se plaignirent que mes promesses
Se perdoient parmy l'air dessus l'aile du vent,
Qu'Amour vint d'vne main puissante
Me transformer en cette Fleur,
Qui, comme i'eus l'ame inconstante,
Est inconstante en sa couleur.
Miracle de nos iours, si mes yeux t'eussent veuë
Avec tous ces appas dont le Ciel t'a pourueuë,
Mon cœur n'eut point esté leger;
Mais mon sort me console, et pour ma gloire ordonne,
Depuis que i'ay l'honneur d'embellir ta Covronne,
Que mes viues couleurs ne pourront plus changer.
De M. GODEAU.
LA TVLIPE.
Madrigal.
IE suis le plus brillant ouurage
Dont le pinceau de Flore embellit les estez,
Et sur les autres Fleurs i'ay le même auantage
Qu'a le feu de tes yeux sur les autres clartez.
Mais dans l'éclat qui m'enuironne,
Et qui de cent couleurs reléue mes beautez,
La gloire que le Ciel me donne,
D'estre vne fleur de ta Covronne,
A pour moy de si doux appas,
Que, bien que de ma mort ma gloire soit suiuie,
Pour mourir d'vn si beau trépas,
J'ayme mieux la mort que la vie.
De M. ARNAUD DE CORBEVILLE.
LA TVLIPE, AV SOLEIL[21].
Madrigal.
BEL Astre à qui je dois mon estre et ma beauté,
Ajoûte l'jmmortalité
A l'éclat nompareil dont ie suis embellie;
Empêche que le temps n'efface mes couleurs:
Pour Throsne donne-moy le beau front de Ivlie;
Et si cet heureux sort à ma gloire s'allie,
Ie seray la Reyne des Fleurs.
De M. C. (CORNEILLE.)
LA TVLIPE
NOMMÉE FLAMBOYANTE.
Madrigal.
PERMETTEZ-MOY, belle Ivlie,
De mesler mes viues couleurs
A celles de ces rares Fleurs,
Dont vôtre teste est embellie:
Ie porte le nom glorieux
Qu'on doit donner à vos beaux yeux.
De M. le marquis DE MONTAUSIER.
