La guirlande de Julie: augmentée de documents nouveaux
DANS l'Empire fameux de Flore et de Pomone,
Mon pere a mille enfans qui portent la Couronne;
Mais, préférant mon sort au leur,
I'ay mieux aymé demeurer Fleur,
Auec le vif éclat dont ie suis embellie,
Afin de m'offrir Vierge à la chaste Ivlie.
O perte fauorable! ô change précieux!
Ie quitte vne gloire mortelle,
Pour l'jmmortel honneur de parer cette belle,
Et le destin des Roys pour le destin des Dieux.
De M. C... (?)
LA FLEVR DE GRENADE.
Madrigal.
D'vn pinceau lumineux l'Astre de la lumiere
Anime mes viues couleurs,
Et regnant sur l'Olympe en sa vaste carriere,
Il me fait regner sur les Fleurs;
Ma pourpre est l'ornement de l'empire de Flore;
Autres fois ie brillay sur la teste des Roys,
Et le riuage More
Fut suiet à mes loix;
Mais, méprisant l'éclat dont ie suis embellie,
Ie renonce au Flambeau des Cieux,
Et viens, ô diuine Ivlie!
Adorer tes beaux yeux,
Pour viure par le feu d'vne plus noble vie,
Ie viens par vne belle ardeur,
A la honte du Ciel, acheuer ta grandeur;
Il te deuoit vne Couronne,
Et moy ie te la donne.
De M. DE BRIOTTE.