Chroniques de J. Froissart, tome 02/13 : $b 1340-1342 (Depuis les préliminaires du siége de Tournay jusqu'au voyage de la comtesse de Montfort en Angleterre)
§ 113. Nous nos tairons un petit à parler dou 5
duch de Normendie et dou conte de Haynau, et parlerons
dou roy Edouwart d'Engleterre, qui estoit
mis sus mer pour venir et arriver, selonch se intention,
en Flandres, et puis venir en Haynau aidier à
guerriier le conte, son serourge, contre les François. 10
Ce fu le jour devant le vegille Saint Jehan Baptiste,
l'an mil trois cens et quarante, qu'il nagoit par mer
à belle carge de naves et de vaissiaus. Et estoit toute
sa navie partie dou havene de Tamise, et s'en venoit
droitement pour arriver à l'Escluse. 15
Et adonc se tenoient entre Blankeberghe et l'Escluse
et sus le mer messires Hues Kierés, messires
Pières Bahucés et Barbevaire, à plus de sept vint
gros vaissiaus sans les hokebos. Et estoient bien Normans,
Bidaus, Geneuois et Pikars quarante mille. Et 20
estoient là ancré et arresté, au commandement dou
roy de France, pour attendre le revenue dou roy
d'Engleterre, car bien savoient qu'il devoit rapasser;
se li voloient veer et deffendre le passage, ensi qu'il
fisent bien et hardiement, tant qu'il peurent, si com 25
vous orés recorder. Li rois d'Engleterre et li sien,
qui s'en venoient tout singlant, regardent et voient
devers l'Escluse si grant quantité de vaissiaus que des
mas ce sambloient droitement uns bos; si en fu forment
esmervilliés, et demanda au patron de se navie 30
quelz gens ce pooient estre. Il respondi qu'il cuidoit
bien que ce fust li armée des Normans que li rois de
France tenoit sus mer, et qui pluiseurs fois li avoient
fait grant damage, et tant que ars et robet le bonne
ville de Hantonne, et conquis Christofle, son grant
vaissiel, et occis chiaus qui le gardoient et conduisoient. 5
Dont respondi li rois englès: «J'ay de lonch
temps desiré que je les peuisse combatre; si les combaterons,
s'il plaist à Dieu et à saint Jorge, car voirement
m'ont il fais tant de contraires que j'en voel
prendre le vengance, se g'i puis avenir.» 10
Lors fist li rois ordonner tous ses vaissiaus et mettre
les plus fors devant, et fist frontière à tous costés
de ses archiers; et entre deux nefs d'arciers, en y
avoit une de gens d'armes. Et encores fist il une bataille
sus costière, toute purainne d'arciers, pour reconforter, 15
se mestier faisoit, les plus lassés. Là y
avoit grant fuison de dames d'Engleterre, contesses,
baronnesses, chevalereuses et bourgoises de Londres,
qui venoient veoir le royne d'Engleterre à Gand, que
veue n'avoient un grant temps. Et ces dames fist li 20
rois englès bien garder et songneusement de trois cens
armeures de fier et de cinq cens arciers. Et puis pria
li rois à tous que il volsissent penser dou bien faire
et garder sen honneur; et cescuns li eut en couvent.