Les cinquante et ung arretz d'amours

¶ Le .xi. arrest.

Devant le maistre des forestz et des eaues sus le faict du gibier d'amours c'est assis ung aultre procés entre une jeune dame demanderesse d'une part/ & ung sien serviteur jadis amy deffendeur de l'aultre part. Et disoit ladicte demanderesse que a ung soir bien tard que il faisoit chault & que le soleil estoit pres de coucher elle & ledit amant et plusieurs de ses amys/ voisins s'en allerent baignier sus ung gravier d'une ysle et chasser aux poissons/ et furent les ungz mis en ordonnance pour tenir les rethz et filetz et les aultres pour courir devant le poisson/ et le faire courir devant les rethz. or advint que en courant ledit amoureux qui avoit tousjours l'oeil sus elle et plus que a prendre le poisson se vint aborder a l'encontre de elle/ et combien qu'il eust assez place pour tirer son chemin ailleurs toutes voyes tout en soursault/ et en ung moment il luy feist le jambet tellement que ceste povre femme cheut a terre & que sa cotte simple fut mouillee & gastee dedans la riviere Et ne fut pas encores content mais en faisant semblant de la relever il luy meist la main sur le tetin et la pressa tresfort dont elle fut toute esmeue au lict malade par bien long temps parquoy elle requeroit a l'encontre dudit amant qu'il en fust tresgriefvement pugny de pugnition publicque ainsi que le cas le requeroit et tellement que les aultres y puissent prendre bonne exemple. de la partie dudit amant fut dit tout au contraire que vrayement il est vray/ que ladicte dame et plusieurs aultres prindrent complot de leur baigner et chasser aux poissons et puis fut ledit amant mis a l'avantgarde pour chasser ledit poisson devant & elle estoit d'ung autre costé & tenoit les rethz & le filet. Si advint que comme il choisit le poisson il mesmarcha pour ung gros chaillou que il trouva qui le feist tumber sur elle et tellement que tous deux cheurent dedans l'eaue/ mais dieu mercy ne c'estoit point fait de mal car l'eaue n'estoit point grande et si estoit en plain sablon. et disoit oultre sus sa foy que en chayant il ne l'avoit tastee ne pincee ne ne eut pas le loysir de ce faire pour l'eaue dont il estoit tout esblouy/ et ne luy cuydoit avoir faict aucun mal. or disoit il que de la cheuste il n'en pouoit mais/ car le cas estoit advenu qu'il ne l'a pas fait cheoir en son escient si l'en ne luy en pouoit riens demander. et au regard de la cotte simple/ et aultres habillemens d'elle qu'elle disoit estre gastez aussi avoyent esté pareillement les siens/ et si avoit esté autant moullé comme elle/ & par ces moyens tendoit affin d'absolution et de despens. ledict procureur d'amours dessus le fait des eaues et des forestz disoit que par les ordonnances il est deffendu de ne point chasser a engins par lesquelz l'on puisse prendre teteins en l'eaue/ et requeroit que cest amant fust condampné en une bonne et tresgrosse amande. Mais ledit amoureux disoit au contraire que ce n'estoit raison car il n'avoit faict chose digne de reprehension/ ne touché au tetins dont il ait souvenance/ et se d'advanture sa main y avoit frayé qu'il ne confesse encore pas si auroyt ce esté en tumbant & cheant et estoit force qu'il se soubstint a quelque chose/ mais quoy qu'il en soit ladicte dame ne en avoit point esté blecee/ et pource concluoit comme dessus affin d'absolution. Surquoy ladicte demanderesse disoyt que la cheuste estoit trop lourde/ et qu'il ne s'en pouoit excuser/ car il l'avoit fait d'aguet a pense & propos deliberé pour parvenir a ses attaintes et en verité s'il ne lui eust fait oultraige elle n'en eust daingné parler Finablement parties ouyes elles furent appointees contraires et en enqueste & depuis ladicte enqueste faicte et le procés appointé en droict le maistre des eaues et forestz condampna par sa sentence ledict amoureux deffendeur a faire faire a ladicte dame une cotte simple verte en lieu de la sienne qui avoit esté gastee et a la porter en sa main et seroit tenu de se encliner devant elle en ostant son chapperon seulement et dire ces motz a genoulx. Madame par l'ordonnance de justice je suis contrainct de me venir rendre a vostre grace & mercy si vous prie que vous prenez en gré ceste robbe verte que je vous donne de bon cueur & au regard du demourant ne vous en souviengne plus car sur ma foy je ne le fis oncques en intencion de vous courroucer ains aymeroye mieulx estre mort et au surplus furent les despens recompensez d'ung costé & d'autre De laquelle sentence ledit deffendeur en appella en la court de ceans ou le procés a esté receu pour juger si a la court veu ledit procés l'enqueste aussi & tout qu'il failloit veoir en ceste matiere & tout veu dit qu'il a esté bien jugé par ledit maistre des eaues & forestz et mal appellé par l'appellant & l'amendera & condampne es despens