Les cinquante et ung arretz d'amours

¶ Le .xlviii. arrest

Ung soir bien tard sus le soupper ainsi qu'on ostoit les plas de la table de unes nopces ou ung jeune gallant amoureulx estoit que les menestriers questoient l'aumosne pour monseigneur saint Julien/ il y eut une tresbelle jeune dame assise a table qui en parlant d'amours ainsi qu'on en devisoit a table dist audict gallant en passant ces motz. Telle gerbe n'est pas sans lien & que il n'estoit pas homme pour demourer derriere. Au moyen desquelles parolles il commença a tressuer de la grant joye qu'il en eut en ce moment et la mena dancer la premiere et depuis au retour quant il fut rassis au pres du lieu ou il l'avoit ramenee ung aultre jeune gallant la vint prendre pour mener dancer a qui elle fist assés grant accueil dont il en eut ung petit de mal en sa teste & n'en fut pas trop content/ Mais il luy vient si bien que pendant ce que ladicte dame danssoit il se vint arraisonner a sa chamberiere qui estoit illec assise/ laquelle luy dist entre les aultres choses et sans ce que ledict gallant luy en parlast qu'elle avoyt ouy dire a sadicte maistresse/ tant de bien et d'honneur que merveilles et luy asseura qu'elle l'aymoit au tant que il estoyt possible en pensant de ce que il ne la venoyt veoir et quaqueter avecques elle. Si a ceste heure ledict gallant fut moult fort surprins d'amours pas ne s'en fault esmerveiller/ Car sur le corps il n'avoit voine qui ne tremblast de joye et de liesse/ qui luy surmonta jusques au cueur/ et tellement que il entreprint de l'aller veoir le lendemain et il n'y faillit pas : et depuis y a esté par plusieurs journees : mais en effect tant plus y alloit et moins appercevoit qu'on tint compte de luy et pource requeroit ledict galant demandeur que icelle dame desclairast s'elle le vouloyt prendre a serviteur ou non affin que il n'y pensast plus Et que au surplus ladicte chamberiere qui ainsi luy avoit baillee l'aliance et fait trembler les fievres blanches tout du long d'une nuyct feust condampnee a l'amender envers luy/ et de telle amende honnorable et proffitable que ladicte court adviseroit De la partie de ladicte dame fut dit que au regard d'elle elle ne le hayoit point/ mais elle s'estoit pourveue d'ung aultre serviteur par quoy disoit qu'on la debvoit tenir pour excusee Et entant que touchoit ladicte chamberiere disoit voirement qu'elle avoit ouy dire a sadicte maistresse autant de bien dudict compaignon que on pourroit penser/ parquoy n'avoit failly en riens/ Et quant est de l'avoir conseillé de venir par devers elle elle disoit qu'elle l'avoit faict pour l'advancer pource que il est homme qui bien le valloit. Disoit oultre que telles paroles qui entrent par une oreille s'en doivent aller par l'autre & est moult grant follye aux gens de s'i fyer/ car il est aucuneffoys force de dire des choses qui ne sont pas veritables pour complaire aux gens et leur donner ung peu d'esperance pour venir es biens qu'ilz desirent/ et par ces moyens et autres disoit la chamberiere que elle estoit de voye de absolution/ mais les gens d'amours disoient qu'il n'y a aujourd'huy plus dangereuse chose en amours que de telz faulx rappors/ car c'est pour ravir ung homme jusques au troiziesme ciel/ et en advient plusieurs inconveniens comme d'aulcuns povres amoureux qui en perdent le boyre et le manger et les aultres en deviennent comme bestes sans sçavoir qu'ilz ont. Et pource requeroient lesdictes gens d'amours que ladicte court y mist provision mais ladite chamberiere disoit que au regard d'elle elle n'avoit meffaict car veues les pressupositions et parolles de sa maistresse qu'il estoit vraysemblable qu'elle l'eust aymé s'il se fust sceu conduire. A quoy ledit povre galant respondit qu'il n'y vouloit plus essayer et luy souffisoit de ce qu'il en avoit faict sans plus y retourner pour le pris comme dessus. lesquelles parties ouyes en tout ce qu'elles ont voulu dire ont esté appointees en droit et au conseil et a la court veu ledict procés & ce qu'il failloit veoir en ceste partie. Et tout veu la court dit que ladicte chamberiere a failly & grandement abusé/ & a ceste cause la condamne ladicte court a vuyder l'hostel de sa maistresse/ & si ordonne que jamais ne portera chapperon de couleur ceinture verte & la condamne en oultre en tous les despens dommaiges & interestz du povre amant la tauxation reservee.