Les cinquante et ung arretz d'amours

¶ Le .li. arrest

En la court de ceans c'est assis ung aultre procés entre une belle jeune dame & le procureur general d'amours adjoinct avec elle demandeurs en cas d'excés d'une part/ & ung assez gentil compaignon jadis amoureulx de ladicte dame prisonnier deffendeur audict cas/ et requerant l'enterinement de certaine remission d'autre part. Et disoit ladicte dame que combien que en amours l'en doibt endurer tout ce qu'il se faict par esbat ou amytié et qu'il soit deffendu aux hommes qui desirent leur avancement de ne proceder par voye de fait contre leurs dames jouant au tiers en ung beau grant preau vert/ et par joyeuseté en courant par derriere elle mist audict gallant ung tantinet d'herbe entre la chemise et le dos/ ce gallant se despita si terriblement que il luy vint incontinent bailler deux grans soufletz Et ne fut pas encores content de cela ainçoys la tumba a terre et la descoiffa en la trainant par les cheveulx devant tout le monde qui estoit illec/ comme s'elle eust esté sa chamberiere en ce faisant voye de faict est deffendue force et violence publicque en refraignant et derompant la sauvegarde d'amours ou ladicte dame estoyt enclose/ et aultrement grandement moult excedant et delinquant Et pource concluoit et requeroit ladicte dame a l'encontre dudict deffendeur qu'il fut condampné et contrainct a reparer lesdictz excés et oultraige et luy faire amende honnorable c'est assavoir en la court de ceans et au preau ou le cas a esté commis nue teste et en chemise tenant une torche ardant en sa main disant que a tort et maulvaisement a bastue et descoiffee ceste dame/ il s'en repent et crye mercy a elle/ et a toutes les dames qui estoient presentes Et avec ce pource que le cas est enorme/ et qu'il touchoit l'honneur de icelle dame demanderesse elle requeroit aussi que ledict deffendeur feust condampné a souffrir pugnicion corporelle audict preau ou il avoit faict l'oultraige en la maniere qui s'ensuyt. C'est assavoir qu'il feust lié tout nud a ung pillier que l'on y atacheroit/ et que illec toutes les dames qui virent ledict cas advenir le vinsent bastre a leurs aises jusques a ce que il fust bien frotté pour donner exemple aux aultres qui en vouldroient autant faire et en amende prouffitable en la somme de deux mille livres ou que telles aultres conclusions luy feussent adjugees que la court verroyt estre a faire en demandant despens dommaiges et interestz. De la partie dudict amoureulx fut deffendu au contraire et disoit que les hommes ne estoyent point tenus d'endurer des dames se il ne leur plaist/ car elles sont subjectes/ & ne leur appartient de venir mettre en leurs dos aulcunes herbes soit par esbat ou aultrement/ car ce qui leur plaist en une maniere il desplaist aux autres. Or estoit vray que ceste dame de son auctorité et sans dire qui avoit perdu ou gaigné luy estoit venue getter dedens le dos en jouant au tyers une poignee d'orties et d'ordure ou il y avoit parmy des fourmys qui le picquoyent et faysoyent si grant mal que il ne pouoit durer. Et a ceste cause comme tout esmeu par chaulde colle la vint frapper et descoifer ainsi que a esté dit Et fault en ce noter qu'il n'y prenoit pas garde/ mais pour la grant douleur qu'il sentoit au dos il ne s'en peut tenir. Et duquel cas ainsi advenu icelluy amant depuis qu'il a esté rassis a esté desplaisant de l'avoir faict. Et oultre plus c'estoit tiré a la chancellerie d'amours/ et en avoit tout entierement obtenues lettres de remission qui estoyent bien civilles et raisonnables veu ce que dit est dont il requeroit l'enterinement alias concluoit affin d'absolution et de despens Aprés lesquelles deffences les gens d'amours disoyent que ilz avoyent veu les informations faictes en ceste matieres/ par lesquelles le cas estoyt veriffié. Et aussi ne le pouoit ledict amant deffendeur nyer/ car luy mesmes l'avoit confessé. Et disoyent lesdictz gens d'amours que l'excés estoit moult grant/ et l'oultrage fait a ladicte dame excessif/ et que selon les droictz d'amours qui parlent de ceste matiere la pugnition y est si tresgrande/ qu'on ne sçauroit dire et nompas seulement sont telz gens qui battent et frappent leurs dames dignes de mort acoustumee mais doibt l'en deppartir et detrancher tous leurs membres par pieces/ aussi en effect c'est venu encontre la souveraineté d'amours/ et encourir crime de leze magesté. Et pource requeroyent et concluoyent lesdictes gens d'amours que ledict amant deffendeur feust pugny de pugnition corporelle & publicque/ et en ce faisant condampné a souffrir mort/ et estre executé par justice. et quant a la remission disoyent que l'en n'y debvoit obtemperer/ car le cas de soy estoit inremissible/ et failloit tout ainsi que ledit amant avoit faict ledict cas publicquement que le cas feust pugny devant la veue du monde aussi de le faire aultrement ladicte dame demoureroyt deshonnoree a tousjours mais qui ne se pouoit soubstenir en raison Par quoy comme dessus l'en n'y debvoit en riens obtemperer consideré mesmement l'enormité dudit cas et le consequent qui en peut advenir. Et finablement disoyent que se ledict delict demouroit impuny il n'y auroit jamais dame seure/ et seroyent tous les biens d'amours desprisez & mis dessoubz le pied par telz & meschans gens qui vouldroyent bien frapper aulcuneffois concluant comme dessus. Aprés les conclusions ainsi prises par lesdictes gens d'amours icelle dame emploioit ce que ilz avoyent dit a son proffit et oultre pour deffendre ladicte remission entant qu'il luy touchoit elle disoit qu'elle ne debvoit estre enterinee audict amant/ car elle estoit subretice/ obretice/ et desraisonnable subrectice entant qu'il avoit sceu que ladicte dame estoit en sa sauvegarde d'amours quant il perpetra lesdictz excés en la presence d'elle et aussi que elle a sceu que l'herbe qu'elle luy gecta dedans le doz n'estoit que par esbatement et en signe d'amour comment l'en peult ymaginer et s'eust esté ung aultre homme a qui elle eust voulu mal jamais ne se y fust jouee Et a la verité de tant qu'elle se seroit jouee a luy se l'amoureux estoit tel qu'il devoit estre il l'en debvoit plus priser Et monstroit bien que il ne sçavoit gueres d'honneur. Obretice car il avoit donné a entendre en ladicte remission que ladicte dame luy avoit getté des orties et des formis entre la chair & la chemise mais le contraire est vray c'est assavoir qu'il n'y avoit que belle herbe verte sans qu'il y eust point d'orties ne de formis ne que cela luy eut oncques fait mal ne desplaisir Et si au regard d'elle pour s'aquitter et monstrer l'amour qu'elle avoit en luy elle pouoit bien cela faire et luy estoit permis selon l'anticque et commung proverbe qui dict que gens qui s'entrayment pierres s'entreruent. Incivil/ car pardonner tel cas c'est en effect consentir que une dame demeure blasmee & infame sans avoir reparation de son honneur qui ne se peult faire en terme de raison. Et aussi que ledict amant avoit trainee par les cheveux/ et devant tout chascun estoit de soy inremissible Disoit oultre ladicte dame que ladite remission estoit desraisonnable/ car se telles choses avoient lieu & que amoureux fussent quictes de telz maulx pour prendre une pareille remission Il vauldroit aussy chier qu'il n'y eust plus de justice en amours et gaigneroit l'en autant a faire mal que bien. Mais ledict amant deffendeur soustenant sa remission disoit que le cas n'estoit si grant ne si mauvais comme l'en le faisoit de beaucoup Premierement car ladicte dame l'avoit menassé et sans ce qu'il luy demandast rien estoit venue toucher lesdictes herbes et orties parquoy s'il s'estoit revenché il avoyt de raison Secondement posé qu'il eust frappé si n'avoit elle point esté affolee et si ne l'avoit faict ledict amant que par jeu. Tiercement le cas estoit advenu par hastiveté de chaulde colle voire en estant cause promovent. Et par ainsi ladite remission estoit bien fondee et raisonnable et ne failloit point parler d'incivilité ne dire que amours ne puissent pardonner tel cas/ car de plus grans la moytié/ le chancellier d'amours baille tous les jours remission voire a ceux qui ont tué leurs dames et estoit trop contente la puissance et souveraineté d'amours Disant oultre ledict amant que en sesdites lettres de remission il avoit donné a entendre toute la pure verité du cas Parquoy l'en y devoit obtemperer et concluoit comme dessus Mais les gens d'amours en luy respondant disoient que ce cas ne se devoit jamais pardonner ne remettre avecques les autres/ car d'avoir ainsi frappé ladicte dame et traisnee par les cheveulx se estoit offence inremissible et donner occasion a chascun qui la estoient presens de penser qu'il sçavoit quelque mal a la dame et d'en publier contre son honneur ce qui n'est point. parquoy il failloit que sa faulte feust reparee publiquement Et ne la devoit l'en point passer soubz dissimulation. Ouyes lesquelles parties en tout ce qu'elles ont voulu dire et alleguer elles ont esté appointees en droit a mettre par devers la court et au conseil. Si a ladicte court veu le procés avec lesdictes lettres de remission & tout ce qu'il failloit veoir en ceste matiere. Et tout veu et consideré ce que il failloit a considerer/ la court dit que lesdictes lettres de remission sont incivilles et qu'elle n'y obtemperera point/ et deffendit au chancelier d'amours de n'en bailler plus de pareilles a quelque amoureulx que ce soit. Et condampne la court ledict amant deffendeur pour reparacion dudict cas a estre despoullé tout nud et ordonne qu'il luy sera en cest estat baillé et delivré par le bourreau quatre vieilles chamberieres d'estuves pour le tresbien vanner dedens une vieille coste poincte de prisonniers/ ou d'autre vieille couverture pleine de poux et de vermine Et cela faict le condampne a estre jecté tout nud en ung champ plain d'orties et de chardons. Et au surplus le bannist a tousjours mais du royaulme d'amours et du service des dames en desclairant tous et chascuns ses biens confisquez.

L'arrest finy ledit president qui estoit las & n'en pouoit plus dist au peuple illec attendant. Le greffier dira le surplus/ ainsi le greffier s'avança de plusieurs autres arrestz dire mais de tous ceulx qu'il prononça ne peuz rien rapporter ne escripre/ il avoit ung peu la voix basse tant qu'on ne le pouoyt entendre.

¶ Cy finissent les cinquante et ung arrest d'amours. Nouvellement imprimé a paris par la veufve feu Jehan trepperel et Jehan jehannot Imprimeur et Libraire juré en l'université de paris Demourant en la rue neufve nostre dame a l'enseigne de l'escu de France.