Chroniques de J. Froissart, tome 01/13, 2ème partie : $b 1307-1340 (Depuis l'avénement d'Édouard II jusqu'au siége de Tournay)
§ 97. Apriès le desolation et destruction de Aubenton,
ensi que vous avés oy, s'acheminèrent li
Haynuier et leurs routes devers Mauberfontainnes. Si
tost qu'il y parvinrent, il le conquisent, car il n'i 25
avoit point de deffense, et le pillièrent et robèrent,
et puis l'ardirent et, apriès, le ville de Aubencuel et
Segni le Grant et Segni le Petit, et tous les hamiaus
et villages de là environ, dont il en y eut plus de
quarante. Ensi se contrevengièrent li Haynuier des 30
damages que on leur avoit fais, tant en le terre de
Chimay comme à Haspre. Mais de puis li François
leur fisent cier comparer, si com vous orés avant en
l'ystore. De puis ceste chevaucie faite, li contes de
Haynau se retraist deviers le ville de Mons et donna
congiet toutes manières de gens d'armes, et les remercia 5
grandement et bellement cescun de son bon
service, et fist tant que tout se partirent bien content
de lui; si s'en rala cescuns en son lieu.
Assés tost apriès, vint il en volenté et en pourpos
au dit conte que d'aler esbatre en Engleterre et faire 10
certainnes alliances au dit roi, son serourge, pour estre
plus fors en sa guerre, car bien pensoit et disoit
que la cose ne pooit demorer ensi, et que li rois, ses
oncles, ne fesist aucune armée contre lui. Et pour
estre plus fors, bon li sambloit, et à son conseil ossi, 15
que il euist l'amour et l'alliance des Englès, des Flamens
et des Braibençons. Si manda li dis contes
tout son conseil à Mons en Haynau, et leur remoustra
sen entente. Et ordonna et institua là monsigneur
Jehan de Haynau à estre bauls et gouvrenères de 20
Haynau, de Hollandes et de Zelandes. Et se parti de
puis assés tost, à privée mesnie, et vint à Dourdresch
en Hollandes, et là monta en mer pour arriver
en Engleterre. Or nous tairons nous à parler dou conte
de Haynau, et parlerons des besongnes de son pays, 25
et des avenues qui y avinrent entrues qu'il fu hors.