Chroniques de J. Froissart, tome 01/13, 2ème partie : $b 1307-1340 (Depuis l'avénement d'Édouard II jusqu'au siége de Tournay)
§ 73. Quant cil signeur d'Alemaigne, à le semonse
dou roi englès, li dus de Braibant et messires Jehans
de Haynau vinrent à Malignes, il n'amenèrent pas
leurs gens avoech yaus, ne leurs pourveances, pour
hostoiier; mais se traisent par devers le roy, pour 20
parlementer encores un petit ensamble. Et là il s'acordèrent
communement, apriès tout plain de parolles,
que li rois englès pooit bien mouvoir à le quinsainne
après ou environ, et seroient adonc tout
appareilliet. Et pour tant que leur guerre fust plus 25
belle, et que bien apertenoit à faire, puis qu'il voloient
guerroiier le roi de France, il se acordèrent de
envoiier les deffiances au roi Phelippe: premierement,
li rois d'Engleterre Edouwars, qui se fist chiés
de tous et de chiaus de son royaulme, ce fu raisons, 30
ossi li dus de Guerles, li marcis de Jullers, messires
Robers d'Artois, messires Jehans de Haynau, li marcis
de Misse et d'Eurient, li marcis de Blankebourc,
li sires de Faukemont, messires Ernoulz de Bakehen,
li archevesques de Coulongne, messires Galerans, ses
frères, et tout li signeur de l'Empire, qui chief se 5
faisoient de le besongne avoech le roi englès. Si furent
ces deffiances escriptes et seellées de cescun, excepté
dou duch Jehan de Braibant, qui encores s'escusa,
et ne se volt mies adonc conjoindre en ces
deffiances, et dist qu'il feroit son fait à par lui, à 10
tamps et à point. De ces deffiances aporter en France
fu priiés et cargiés li evesques de Lincolle, qui bien
s'en acquitta, car il les aporta à Paris, et fist son
message bien et à point, tant qu'il ne fu de nullui
repris ne blamés. Et li fu delivrés un saufconduis 15
pour retourner arrière devers le roy, son signeur,
qui se tenoit à Malignes.
Or vous voel je parler de deus grans entrepresures
d'armes que messires Gautiers de Mauni fist, en le
propre sepmainne que li rois de France fu deffiiés. 20
Si tretost comme il peut sentir et percevoir que li
rois de France devoit ou pooit estre deffiiés, il pria
et cueilla environ quarante lances de bons compagnons
seurs et hardis, et chevauça tant de nuit que
de jours, qu'il vint en Haynau, et se bouta ens ès 25
bos de Blaton. Et encores ne savoit nulz quel cose il
voloit faire, mès il s'en descouvri là à aucuns de ses
plus secrès, et leur dist qu'il avoit prommis et voé
en Engleterre, present dames et signeurs, que ce seroit
li premiers qui enteroit en France et y feroit 30
guerre, et prenderoit chastiel ou forte ville, et y feroit
aucune apertise d'armes: si estoit sen entente
que de chevaucier jusques à Mortagne, et de sousprendre
le ville qui se tient dou royaume.
Chil à qui il s'en descouvri li acordèrent liement.
Adonc recenglèrent il leurs chevaus et restraindirent
leurs armeures, et chevaucièrent tout sieret, et passèrent5
les bos de Blaton et de Brifuel, et vinrent
droit à un ajournement, un petit devant soleil levant,
à Mortagne. Si trouvèrent d'aventure le guicet ouvert.
Adonc descendirent il messires Gautiers de
Mauni tout premiers, et aucuns des compagnons, et 10
entrèrent en le porte tout quoiement, et establirent
aucuns des leurs pour garder le porte, par quoi il ne
fuissent souspris; et puis s'en vinrent tout contreval
la rue, messires Gautiers de Mauni et son pennon
tout devant, devers le grosse tour et les chaingles. 15
Si le cuidièrent ossi trouver mal gardée, mais il fallirent
à leur entente, car les portes et li guicet estoient
fremet bien et estroitement. Ossi la gette dou
chastiel oy la friente et les perçut de sa garde. Si fu
tous esbahis, et commença à sonner et à corner en 20
sa buisine: «Trahi! trahi!» Si esvillièrent toutes
gens et li saudoiier dou chastiel, mais point ne vuidièrent
de leur fort.
Quant messires Gautiers de Mauni senti les gens
de Mortagne esmouvoir, il se retraist tout bellement 25
devers le porte, mais il fist bouter le feu en le rue
contre le chastiel, qui tantost s'esprist et aluma. Et
furent bien à ceste matinée soixante maisons arses,
et les gens de Mortagne moult effraet, car il cuidièrent
estre tout pris. Mais li sires de Mauni et ses 30
gens se partirent de le ville, et chevaucièrent arrière
devers Condet, et passèrent là l'Escaut et le rivière
de le Haine; et chevaucièrent le chemin de Valenciènes
et le costiièrent à le droite main, et vinrent à
Denaing, et se rafreschirent en l'abbeye. Et puis
passèrent oultre devers Bouchain, et fisent tant au
chastellain de Bouchain que les portes leur furent 5
ouvertes, et passèrent là une rivière qui y keurt, qui
se refiert en l'Escaut, et vient d'amont devers Alues,
en Pailluel.
Apriès ce, quant il furent tout oultre Bouchain et
le rivière, il s'en vinrent à un fort chastiel, qui se tenoit10
de l'evesque de Cambrai et de Cambresis, et
l'appelloit on Thun l'Evesque, et siet sus le rivière
d'Escaut. En che chastiel, n'avoit adonc nulle garde
souffissans, car li pays ne cuidoit nient estre en
guerre. Si furent cil de Thun soubdainnement souspris, 15
et li chastiaus pris et conquis, et li chastelains
et sa femme dedens. Et en fist li sires de Mauni une
bonne garnison, et y ordonna à demorer un sien
frère chevalier, qui s'appelloit messires Gilles de
Mauni, c'on dist Grignart, li quelz fist de puis ce jour 20
pluiseurs destourbiers à chiaus de Cambresis et de le
cité de Cambrai, car li chastiaus siet à une liewe de
Cambrai. Quant messires Gautiers de Mauni eut fait
ses emprises, il s'en retourna francement en Braibant
devers le roy englès, son signeur, et le trouva 25
à Malignes; se li recorda une partie de ses chevaucies.
Li rois les oy volentiers et les retint à grant
vasselage.