Chroniques de J. Froissart, tome 01/13, 2ème partie : $b 1307-1340 (Depuis l'avénement d'Édouard II jusqu'au siége de Tournay)

§ 71. Ensi se departirent cil signeur; cescuns en

rala en son lieu. Et li rois Edouwars, vicaires de

l'Empire, s'en revint à Louvaing, dalés ma dame la 5

royne sa femme, qui nouvellement estoit là venue à

grant noblèce, et bien acompagnie de dames et de

damoiselles. Si tinrent à Louvaing leur tinel moult

honnourablement, tout cel yvier. Et fist faire monnoie

d'or et d'argent en Anwiers, à grant fuison. 10

Mais pour ce ne cessa mies li dus de Braibant de

renvoiier songneusement devers le roy de France

monsigneur Loeis de [Cranehen] [37], son plus especial

chevalier et consilleur, en lui excusant. En le fin, il

le fist demorer tout quoi dalés le roy. Et li carga et 15

enjoindi expressement que toutdis il l'escusast devers

le roy, et contredesist toutes informations qui

pooient venir au dit roi à l'encontre de lui. Li dis

monsigneur Loeis n'osa escondire le commandement

del duch son signeur; ains en fist toutdis bien son 20

devoir, à son pooir. Mais au darrain il en eut povre

guerredon, car il en morut en France de duel, quant

on vei apparamment le contraire de ce dont il escusoit

le duch si certainnement; et en devint si confus

qu'il n'en volt onques puis retourner en Braibant. Si 25

demora tous cois en France, pour lui oster de souspeçon,

tant qu'il vesqui: ce ne fu pas longement, si

com vous orés en avant recorder en l'ystore.