L'avision de Christine

Respont christine a philosophie & la remercie en la personne de theologie.

Adont se tut la dame honoree/ et je commençay a ainsi dire/ O tres souveraine aministrarece de la pasture/ et du restorant medicinable qui ne garist pas tant seulement le malade par tribulacion navré/ mais lui rent vie force & vigueur par le doulx ongnement et liqueur de ton reconfort/ Toy philosophie l’armoire et corps de toute sciences/ lesquelles sont tes membres/ Je apperçois que il est vray ce qui est dit de toy sicomme saint augustin recite Car tu es toutes sciences et a tes amez te demonstres tele qu’il te plaist selon la voye que on te veulent enquerre & a moy simple de ta digne grace t’es monstré en fourme de sainte theologie pour repaistre mon ignorent courage le plus sainement a mon salu/ ne m’as pas fait comme a ta chamberiere/ mais mielx que tu ne promis/ C’est a savoir moy servie de tes plus prouffitables et dignes mes qui viennent de la table de dieu le pere/ dont te mercy C’est assavoir dieu qui est toy plus que ne saroie dire Et vrayement es tu toutes les sciences/ Car tu es vraye phisique/ c’est a savoir theologie en tant que tu es de dieu/ Car toutes les causes de toute nature sont en dieu createur/ Tu es ethiques/ car bonne vie et honneste que tu formes & apprens/ c’est a savoir a amer/ ce qui est a amer c’est dieu et le prochain/ & ce la toy theologie monstres tu en la science de phisique & de ethiques/ Tu es logique car la lumiere et la verité de l’ame raisonnable tu demonstres/ tu es politique Car tu apprens a bien vivre/ Car nulle cité n’est mieulx gardee que par le fondement et l’eaue de foy et de ferme concorde a amer le bien commun qui est tres vray et tressouverain/ c’est dieu de qui tu parles en la science en quoy a moy t’es demonstree/ c’est a savoir theologie. O theologie que je vueil louer dame en toy souveraine philosophie. Je congnois que quant homme apprent hors de toy/ se il lui est nuisible par toy il en scet la verité/ Se il lui est prouffitable aussi tu lui demonstres/ et quanque il ara peu apprendre ailleurs se en toy ne refiert/ tout sera parte de temps et ignorence/ Car tu es la sapience vraye/ ne autre chose n’est que toy en qui est trouvé ce que ailleurs ne peut estre c’est vraye felicité.

¶ Et ce tesmongne de toy saint gregoire ou prologue du livre des morales que tu as en publique ce de quoy tu peus nourrir les petis/ et de ce l’experience en ma personne le me tesmongne/ Et gardes en ton secret ce dont tu peus prendre les haulx entendemens en grant admiracion/ Car tu es ainsi comme un fleuve qui semble estre si pou parfont que un aygnel y prent pié/ Et si est si parfont que un elephant y peut nagier/ Merveilleux est ton fleuve sainte theologie qui si pou semble estre parfont a un aignel/ c’est a entendre a un bon simple qui y prent pié/ Et si est si parfont a un elephant orgueilleux/ c’est aux plus haulx entendemens qui a peine te scevent et non toute comprendre.

¶ Et pour ce dit bien le benoit saint jerome en l’epistre a sa bonne devote la vierge de mecriade/ use dist il de la leçon de theologie en lieu de miroir pour corriger ce que tu as en toy lait/ et pour garder ce que tu as en toy bel/ et te faire plus belle/ Car toy sainte theologie as un miroir qui monstre les ordures et les apprent a nettoyer.

¶ De toy et a ta louange de rechief dit le benoit docteur saint jerome qui tant cherement t’ama que ainsi comme les tenebres de la nuit point n’obscurcissent la clarté des estoilles du ciel Ainsi nulle mondaine iniquité ne peut obscurcir les ames qui sont appuyees au firmament de sainte theologie/ O dame sainte theologie/ tu m’as donné certaineté de ce que dit de toy le benoit saint gregoire ton docteur ou premier livre de morales que ta doctrine & sainte escripture aucune fois nous est viande aucune foiz nous est beuvrage en lieu plus obscurs/ lors est ce que elle nous est viande Car quant nous l’exposons c’est la viande que nous machons/ et quant nous l’entendons c’est ainsi comme la viande que nous avalons mais es lieux ou elle est plus clere elle nous est buvrage Car quant elle n’a besoing de exposicion/ nous la humons ainsi comme nous la trouvons// Dame que puis je dire de toy et du bien que tu m’as fait/ de la sainte viande de ton repast qui m’a rassadiee & fait congnoistre la ignorence de ma descongnoissance par quoy je congnoiz mon tort par ce que tu m’as conclus/ Si di que toy sainte theologie et divinité es une tres grasse viande qui contiens en toy toute delices ainsi comme la manne qui aux juifs plouvoit du ciel qui assavouroit en la bouche de chacun selon sa voulenté// Ainsi me depars de mon avision la quelle je ay partie sicomme en .iii. differences de .iii. pierres precieuses en leur proprietez/ la premiere est en fourme de dyamant/ le quel est dur et poignant/ et tout soit il cler hors oeuvre quant il est relié et mis en l’or il semble estre obscur et brun/ et toutefoiz ne se meut sa vertu qui est moult grande/ La seconde est le kamayeu en qui plusieurs visages et figures diverses sont empraintes/ et est son siege brun et l’emprainte blanche/ La tierce au rubis precieux cler et resplandissant et sanz nue obscure qui a proprieté de tant plus plaire comme plus on le regarde.

Explicit le livre de l’avision de christine.